Usa ka Panalangin alang ni Mamá

Nahuman na ang Primary, ug ang 10 anyos nga si Ruben nangita sa mga misyonaryo. Manglakaw sila pauli uban niya. Sila si Elder Sánchez ug Elder Rojas nagtudlo ni Ruben ug sa iyang magulang, nga si Diego, sa mga leksyon sa misyonaryo ug nagbunyag ug nagkumpirma kanila. Karon giisip ni Ruben nga sila iyang labing suod nga mga higala.

Mitan-aw si Ruben sa bintana sa sirado nga pultahan sa klasrom. Anaa ra sila! Apan unsa may ilang gibuhat? Ang ilang mga kamot anaa sa ulo sa usa ka tawo sa ward, ug morag nag-ampo sila sama sa dihang si Ruben gikumpirmahan.

Sa dihang migawas sila sa kwarto, iyang gipangutana ang mga misyonaryo, “Unsay inyong gibuhat?”

“Gihatagan namo si Brother Mendoza og panalangin sa priesthood,” miingon si Elder Sánchez. “Sama kini sa usa ka espesyal nga pag-ampo, ug makahatag kini og kahupayan, makatabang sa tawo nga makahibalo unsaon sa pagsulbad sa usa ka problema, o gani makaayo sa masakiton.”

Pagkasunod Dominggo nangita na usab si Ruben sa mga misyonaryo human sa pagsimba. “Makaadto ba kamo sa akong balay ug mohatag ni mamá og panalangin?” mihangyo siya. “Nagsakit pag-ayo ang iyang likod.”

Nagdali silang miadto sa balay ni Ruben. Sila si Elder Sánchez ug Elder Rojas nakigsulti sa mamá ni Ruben. Usa siya ka miyembro sa Simbahan, apan dugay nang wala siya makasimba.

“Nakasabut mi nga dili maayo ang imong gibati, Sister Garcia,” miingon si Elder Rojas.

“Ang akong likod sakit kaayo sulod na sa daghang mga semana,” miingon siya kanila. “Miadto na ko sa daghang mga doktor, apan wala sila makatabang nako.”

“Si Ruben mihangyo namo nga moanhi ug mohatag nimo og panalangin sa priesthood,” miingon si Elder Sánchez. “Gusto ka bang buhaton namo kana?”

“O, oo, palihug,” miingon si Mamá.

Samtang ang mga misyonaryo mibutang sa ilang mga kamot sa iyang ulo ug mihatag kaniya og panalangin, nakahilak si Mamá. Sa dihang nahuman na sila, migakos si Ruben kaniya. “Nasayud ko nga ang panalangin makatabang nimo,” giingnan niya siya.

Paglabay sa tulo ka adlaw mibalik ang mga misyonaryo aron kumustahon unsa nay gibati sa Mamá ni Ruben. “Malipayon kaayo kong nakakita ninyo,” miingon siya kanila. “Ang sakit sa akong likod nagsugod sa pagkawala human kamo mohatag nako og panalangin, ug karon kompleto nang nawala!”

“Ang Langitnong Amahan miayo nimo, Sister Garcia,” miingon si Elder Sánchez. “Ug Siya mitugot namo sa pagtabang Niya pinaagi sa paggamit sa among awtoridad sa priesthood sa pagpanalangin nimo.”

Pagkasunod Dominggo—ug kada Dominggo human niana—si Mamá misimba uban ni Ruben ug Diego. Nasayud siya nga ang gahum sa priesthood tinuod, ug mao usab si Ruben.