Ang Balaan nga Pagtahud nga Nating Karnero

Sa dihang ako nag-edad og mga pito ka tuig, ang akong presidente sa Primary gustong motabang sa mga bata nga magpakita og balaang pagtahud sa among Primary. Nagbuhat siya og dako nga bulletin board nga giporma og nating karnero. Kon ang usa ka bata magpakita og balaan nga pagtahud, iyang ibutang ang sticker nga porma og nating karnero sa bulletin board tupad sa iyang pangalan. Gusto kaayo kong makakuha niadtong mga sticker nga nating karnero. Mao nga usa ka adlaw sa Primary, hilom akong naglingkod nga gikyugpos ang mga bukton ug nagtan-aw sa presidente sa Primary aron siya makakita nako nga nagpakita og balaan nga pagtahud. Mas taas nga batang lalaki ang naglingkod atubangan nako, mao nga giirog nako og gamay ang lingkuranan aron siya makakita nako.

Dayon, samtang ako naglingkod nga nagpakita og balaan nga pagtahud, ang pyanista nagsugod sa pagpatukar sa nindot, malinawon nga kanta sa Primary. Samtang ako naminaw, usa ka malinawon nga pagbati ang miabut nako, ug mga luha nagsugod sa pag-agas sa akong mga aping. Wala ko makahibalo nganong gibati nako ang tumang kalipay ug kalinaw sa kaugalingon.

Human sa Primary akong giingnan ang akong mama bahin sa akong gibati, ug misulti siya nako nga ang Espiritu kadto. Nianang adlawa, akong nakat-unan unsay bation kon naa ang Espiritu. Kon kinahanglan ko nga maghimo og importante nga mga desisyon ug magkinahanglan og giya gikan sa Espiritu, makahinumdom ko kon unsa ka malinawon ang akong gibati nianang adlawa, ug akong mahibaloan sa unsa nga paagi makigsulti ang Espiritu nako.