Ang Propeta Mitubag sa Akong Pag-ampo

Paghuman sa akong ikaduhang tuig mi-apply ko sa graphic design program sa unibersidad. Wala ko madawat, apan mahimo kong mo-apply og balik pagkasunod tuig. Wala ko maganahi nga magpaabut og laing tuig aron mogradwar.

Ang pinakaduol sa akong gipili nga major mao ang photography. Busa nag-ampo ko kabahin sa pag-usab sa akong major ug maayo akong gibati niini. Gusto lang ko nga makaangkon og degree!

Sa pagsugod sa fall semester, aduna koy mga klase kabahin sa film ug sa social history sa photography. Nindotan kaayo ko niining duha. Apan sa akong pagtan-aw sa nalatid sa mga hilisgutan sa kurso sa akong klase sa film, namatikdan nako nga ang mga estudyante kinahanglang motan-aw og daghang R-rated nga mga salida. Sa akong klase sa photography ang magtutudlo miingon nga bayolenti, makasamok, ug sekswal nga mga litrato among tun-an. Siya miingon nga mao kini ang photography karong panahona.

Nasagmuyo ko samtang naghunahuna kon unsay buhaton. Nasayud ko nga ang ebanghelyo nagtudlo batok niining mga butanga, apan kinahanglanon kining mga klaseha. Naghunahuna ko sa kasulatan nga maanaa sa kalibutan apan dili kalibutanon (tan-awa sa Juan 15:19). Mahimo ba kong maanaa sa klase apan dili moapil kanila?

Nag-ampo ko aron masayud unsay buhaton ug pagbaton og pagtuo sa pagbuhat unsay eksakto. Nagpakitambag ko sa akong asawa, ginikan, ug igsoong lalaki. Samtang nakig-istorya ko sa akong igsoon, iyang kong gipahinumduman sa mosunod nga bersikulo: “kay unsa may kapuslanan alang sa usa ka tawo kon maangkon niya ang tibuok kalibutan nga pagapildihan sa iyang kinabuhi?” (Mateo 16:26).

Nasayud ko nga importante ang edukasyon, apan nasayop kaha ko sa akong kurso? Makahimo kaha ko nga temporaryong mohunong sa pag-eskwela nga hapit naman ko mohuman?

Usa ka lawom nga gabii nagmata ko uban sa akong anak nga nagmasakiton, nakahunahuna ko sa pagtan-aw ni Presidente Thomas S. Monson diha sa Internet. Sa wala madugay nagtan-aw ko sa pakigpulong ni Presidente Monson sa kinatibuk-ang komperensya niadtong Oktubre 2011. Naminaw ko og maayo samtang naghisgot siya sa pagkadaut sa sumbanan sa katilingban, nag-ingon nga ang dili angay ug imoral nga pamatasan gidawat na sa kadaghanan.

Dayon iyang gisulti ang gikinahanglan nakong madunggan: “Kinahanglan kitang magmabinantayon sa kalibutan nga misalikway pag-ayo sa espirituhanong mga butang. Importante nga atong isalikway ang bisan unsa nga dili uyon sa atong mga sumbanan, sa dili gayud pag-undang sa unsay atong gitinguha: kinabuhing walay katapusan sa gingharian sa Dios.”¹

Ang mga pulong nakatandog gyud pag-ayo kanako. Samtang ang mga luha midagayday sa akong nawong, nasayud ko nga ang buhing propeta mitubag sa akong pag-ampo.

Bisan tuod nalangay ang akong mga plano sa paggradwar, nasayud ko nga ang Ginoo mopanalangin sa akong pamilya ug nako samtang nagsunod mi sa propeta, nagsalikway sa panglantaw sa kalibutan, nagsunod sa kasugoan, ug nagsuporta sa mga baruganan sa ebanghelyo.