Ayuhon Ba sa Ginoo ang Among Anak?

Sa dihang ang among anak nga lalaki kwatro anyos pa, kanunay siyang mohangyo nako sa pagkanta og “Master, the Tempest Is Raging” (Hymns, nu. 105). Ang iyang gagmayng mga mata mokislap inig-korus sa dihang ang Ginoo mimando nga ang hangin ug balud magmalinawon. Iya kong pangutan-on kabahin sa gahum ni Jesus. Tubagon nako siya nga mabuhat ni Jesus ang tanan sa katarung tungod kay anaa Niya ang tanang gahum. Ang Manluluwas mao ang bayani sa among anak.

Apan sa dihang nag-13 anyos among anak, misinati siya og grabeng depresyon. Dili na siya ganahang mosulti o gani mokaon. Dili na siya interesado sa iyang naandang mga kalihokan, ug dili na gyud siya ganahang moapil sa mga pag-ampo sa pamilya o sa mga family home evening. Ingon og dili na siya interesado sa simbahan o sa ebanghelyo.

Ang ubang sakop sa among pamilya kanunay nag-ampo ug nagpuasa para kaniya, ingon man usab ang among mga kauban sa ward ug stake ug daghan sa among mga higala ug paryente. Ang among paningkamot daw sama sa kasinatian ni Alma sa pag-ampo para sa iyang anak (tan-awa sa Mosiah 27:14, 22–23).

Dili namo gustong ipugos ang ebanghelyo ngadto sa among anak, busa amo siyang giingnan nga dili siya kinahanglang moapil sa among pag-ampo sa pamilya o mga family home evening apan gusto namo nga kauban namo siya. Samtang among gisunod ang mga pulong sa Manluluwas sa “pag-ampo uban sa inyong mga banay ngadto sa Amahan … aron ang inyong … mga anak mapanalanginan” (3 Nephi 18:21), mas nagkaepektibo ang among mga pag-ampo sa pamilya ug mga family home evening. Among nabati ang Espiritu diha sa among panimalay. Ug bisan tuod hilom lang among anak, apan naa siya.

Hinay-hinay sa misunod nga duha ka tuig, among nakita nga ang among mga pag-ampo ug family home evening adunay epekto sa among anak. Atol sa usa ka family home evening, siya nagpamatuod sa Manluluwas ug dayon mihangyo kon mahimo siya ang moandam sa family home evening. Misugod siya sa pag-apil sa mga pag-ampo sa pamilya ug malipayong misimba. Nakasinati siya og dakong kausaban sa kasingkasing samtang iyang nabati ang matubsanong gugma sa Manluluwas (tan-awa sa Alma 5:26). Ang Ginoo, uban sa Iyang makaayo nga gahum, sa tinuoray miluwas sa among anak.

Malipayon ug madasigon na usab siya, andam nga motabang sa uban ug mopakita og gugma. Miingon siya nako nga siya nasayud ang Manluluwas miayo niya. Ang mga pagsulay sa among anak nakatabang kaniya sa pagmugna og gamhanang pagpamatuod ug dugang gugma ug pagsalig sa Manluluwas. Miserbisyo siya sa Ginoo isip usa ka misyonaryo sa Argentina Buenos Aires South Mission. Human sa iyang pag-uli nagminyo siya sa templo, ug siya ug iyang asawa adunay nindot kaayong anak nga babaye.

Nasayud ko nga ang Manluluwas adunay gahum sa pag-ayo, pagbuhat og mga milagro, ug makapalipay kanato niining kinabuhia ug sa umaabut nga kinabuhi.