Ang Gahum sa Kanus-a

Ang sakit sa akong bana kalit nga miabut. Usa ka buntag namutol siya sa mga sagbot, ug ang sunod nga butang nga among nahibaloan siya nasakit. Pagkasunod adlaw gitauran na siya og life support. Samtang kami mibalhin gikan sa emergency room ngadto sa operating room, usa sa mga doktor misulti kon sila makahimo sa pagluwas kaniya.

Tungod kay ang sakit nga iyang nakuha talagsaon, gamay ra ang iyang kahigayunan nga mabuhi. Wala ko makatuo sa daling pagkausab sa mga hitabo. Gibati ko ang tumang kasubo.

Mapasalamaton, si Pierre nakaluwas sa iyang unang operasyon ug gibutang ngadto sa intensive care unit (ICU). Daghan pa nga kalisdanan ang moabot, apan ang iyang kahigayunan nagkalambo sa kada labay sa oras. Ang una sa daghan nga mga nurse nakigsulti nako sa buntag pagkahuman sa pinakauna nga operasyon. Gihisgutan niya kanus-a si Pierre nakaabut sa sunod nga lakang sa pagtambal. Namalandong ko sa epekto niana nga pulong. Dunay dakong paglaum sa kanus-a kay sa kon—makahatag kini og pagsalig, paglaum. Nagpasalamat ako niya sa pagpili sa pulong, ug maalamon siyang mipahiyom.

Si Pierre nakadawat og daghang mga panalangin sa priesthood, nga nakahatag og dakong suporta. Kami nasayud nga magbantay sa kamot sa Ginoo sa among mga kinabuhi, tungod kay ang Iyang impluwensya dili mahitungod sa kon apan sa kanus-a. Kada higayon nga ang panglawas ni Pierre dili maayo, mopahinumdom ko niya sa mga panalangin ug nga kami kinahanglan mopakita sa among hugot nga pagtuo sa Ginoo. Sagrado kini nga panaw, ug kada adlaw usa ka gasa.

Ang paglaum sa kanus-a naghimo kanamo nga positibo. Apan, 18 ka adlaw sa among panaw, dihay dili gyud maayong nahitabo. Atol sa ikapito nga operasyon, ang iyang mga doktor miingon nga ang sakit mikatap na pag-ayo. Ang medical team naghilak nga misulti sa ilang kaguol samtang sila misulti nako nga si Pirre dili na makalahutay nianang gabhiona.

Akong nakauban ang akong mahangturong kompanyon sa dihang siya namatay. Napanalanginan kami sa bugtong anak sa miaging kaminyoon nga diha sa telepono sa pagpadayag sa iyang gugma alang sa iyang amahan. Si Pierre malinawong namatay.

Paglabay sa mga semana, sa iyang lubong, mga pulong sa kahupayan miabut gikan sa Mosiah 2:41: “Kamo kinahanglan maghunahuna sa bulahan ug sa malipayon nga kahimtang niadto nga naghupot sa mga sugo sa Dios. Kay tan-awa, … kon sila magpabilin nga matinud-anon hangtud sa katapusan sila pagadawaton ngadto sa langit, nga pinaagi niana sila mahimo nga mopuyo uban sa Dios diha sa usa ka kahimtang nga walay katapusan ang kalipay” (emphasis gidugang).

Si Pierre ug ako kanunay nga mideterminar nga ang kon niana nga kasulatan mao ang kanus-a alang kanamo. Nasayud kami nga pinaagi sa pagpabilin nga mapasaligon sa among mga pakigsaad, pagahiusahon kami—nga usa lamang ka pangutana sa kanus-a. Misalig kami sa plano sa Ginoo sa mahangturong mga pamilya ug kinabuhing dayon. Gahum kini sa kanus-a nga nakapaaghat namo sa pagpadayon.