Sunda ang Hinay nga mga Aghat
Ang matag hunghung gikan sa Espiritu Santo maayo gyud nga paminawon.
Paghulagway pinaagi ni Greg Newbold
Kon dunay unos nga mopahagsa sa dakong kahoy sa inyong higdaanan nianang gabhiona, siguro gusto mong makahibalo og sayo.
Si Wilford Woodruff (1807–98), nga nahimong ikaupat nga Presidente sa Simbahan, natulog sa gawas sa iyang karwahe uban sa iyang asawa ug anak sa dihang ang Espiritu mihunghung, “Bangon ug ibalhin ang [imong] tartanilya.”1 Mahimo ra untang dili niya tagdon ang maong ideya, pero misunod hinoon siya. Paglabay sa tunga sa oras, usa ka alimpulos ang mibali sa dakong kahoy ug milabay niini sa kahanginan Ang kahoy mitugpa diha gayud sa unang nahimutangan sa karwahe.
Adunay daghang ingon niana nga mga ehemplo sa mga milagro nga nahitabo isip resulta sa pagsunod sa mga aghat.
Apan unsa ang bahin sa usa ka aghat nga modasig ninyo sa pagtawag og usa ka higala aron lang moingon og hello? O usa ka aghat sa pagsulod og dugang medyas sa inyong backpack sa inyong sunod nga pag-hike? Ang pagsunod sa maong mga aghat tingali dili mosangpot og kulbahinam nga mga sangputanan, apan importante gihapon kini.
Ang higala nga iyong tawagon tingali dunay problema. Ang tawag sa telepono tingali makadasig niya. Sa pag-hike, ang dugang nga medyas mahimong maoy kalainan tali sa kakomportable sa biyahe ug sa masakit nga mga pagkapaslot kon ang inyong mga tiil wala damha nga mabasa.
Si Presidente Thomas S. Monson mitudlo: “Magbantay kita.Kita magpaabut. Kita maminaw nianang ligdong, hinay nga tingog. “Kon kini mosulti, ang maalamong mga tawo mosunod.Kita dili maglangay-langay sa pagsunod sa mga pag-aghat sa Espiritu.”2
Usahay ang espirituhanon nga mga aghat dinalian. Sa kasagaran, hinoon, malumo kini. Ang Langitnong Amahan misaad sa pagtudlo nato “pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto” (2 Nephi 28:30).
Si Elder David A. Bednar sa Korum sa Napulog Duha ka mga Apostoles mitudlo: “Labing kasagaran, ang pagpadayag moabot sa hinay-hinay sa pagdagan sa panahon ug ihatag sumala sa atong tinguha, katakus, ug pagpangandam.”3
Sa kasagaran, walay usa nato nga kinahanglang molikay og punoan sa kahoy nga nalabay sa alimpulos ngari nato. Apan makasiguro kita nga kanunay dunay gagmay ug yanong kaayohan nga atong mabuhat kon kita magbantay sa Espiritu.