“Unsay angay nakong hunahunaon panahon sa sakrament?”

Atol sa sakrament, ako maghunahuna ni Jesukristo ug sa Iyang Pag-ula. Lisud alang nako sa pagpadayag unsay akong gibati atol sa sakrament kon ako maghunahuna sa Pag-ula ni Jesukristo. Nasayud ako nga si Jesukristo gipili nga atong Manunubos. Nasayud ko nga Siya buhi.

Atol sa sakrament maghunahuna ko bahin sa unsay naagian sa Manluluwas aron kita makahinulsol sa mga sayop nga atong nahimo. Maghunahuna usab ako sa tanang mga panalangin nga Iyang gihatag nako ug sa talagsaong mga milagro nga Iyang gipahigayon ug ipahigayon. Napanalanginan kaayo kita nga makahimo sa pag-ambit sa sakrament aron nga kita makahinulsol sa atong mga sala ug makapasalig nga magbuhat og mas maayo.

Ang mga himno sa sakrament nagtudlo unsay atong hunahunaon atol sa sakrament. Sama pananglit, ang akong paborito nga himno sa sakrament, “In Humility, Our Savior” (Hymns, nu. 172), nag-ingon, “Ginoo, di ko kalimtan, Nimo gipakamatyan kasingkasing mo nabugto didtos krus sa Kalbaryo.” Ang paghinumdom sa mga pulong sa mga himno sa sakrament atol niining sagrado nga ordinansa makatabang nako nga mobati og kalinaw ug makapadugang sa akong pasalamat alang sa Pag-ula ni Jesukristo.

Atol sa sakrament kinahanglang hunahunaon nato kon unsa ka importante ang sakripisyo nga gihimo sa atong Manluluwas alang nato ug magbaton og pasalamat diha sa atong mga kasingkasing. Kon moambit ko sa sakrament, gusto nakong pasalamatan ang Langitnong Amahan ug ang Iyang Hinigugmang Anak, nga si Jesukristo, sa mga panalangin nga akong nadawat.

Duna koy gamay nga kard nga anaa sa akong mga kasulatan nga akong kuhaon kada Dominggo atol sa sakrament. Nag-bookmark kini sa Mosiah 18, diin gipahayag ni Alma ang pakigsaad sa bunyag. Ang kard dunay mubo nga mga sulat, sama sa “Pagmapasalamaton sa pag-ula,” nga gisulat niini aron sa pagtabang nako nga mahinumdom sa katuyoan ug sa kabalaan sa sakrament. Ang pagribyu sa mubo nga sulat nakatabang nako sa pag-focus sa akong hunahuna sa katuyoan ug sa kabalaan sa sakrament.

Ang katuyoan sa sakrament mao ang pagbag-o sa atong mga pakigsaad uban sa atong Langitnong Amahan ug mahugasan sa mga sala nga atong gihinulsulan. Atol sa sakrament, atong hinumduman ang sakripisyo ni Kristo alang nato ug mamalandong unsaon nato paggamit niini sa atong mga kinabuhi. Maningkamot ko sa paghunahuna unsay akong nahimo niining miaging semana ug giunsa nako pagtuman ang akong mga pakigsaad sa akong Amahan. Akong timan-an ang mga sala nga akong nahimo ug mo-focus kon unsaon nako sa paggamit ang Pag-ula sa pagbuntog niini. Kon buhaton nako kini, ang sakrament makapabayaw ug espirituhanong makapalig-on nga kasinatian.

Kinahanglan nga atong hunahunaon ang maulaong sakripisyo ni Jesukristo ug ang kaimportante sa pag-ambit nga takus sa mga simbolo sa Iyang lawas ug sa Iyang dugo. Mahunahuna usab nato ang higayon sa dihang Iyang gipanalanginan ang pan ug bino uban sa Napulog Duha ka mga Apostoles.

Sa bata pa ako, ang bugtong butang nga akong hunahunaon atol sa sakrament mao ra kon unsaon sa paghilom. Karon nga ako usa na ka tighupot sa priesthood, nakasabut ko nga aron ang sakrament makahuluganon ug makatabang nako nga motubo sa espirituhanong paagi, kinahanglan kong mamalandong niini. Maghunahuna ko sa Pag-ula sa Manluluwas ug sa unsang paagi Siya nagpakita og gugma alang nato. Maghunahuna usab ako sa unsa nga paagi nga ang sakrament makapalig-on sa akong hugot nga pagtuo ug tinguha sa pagtuman sa akong pakigsaad sa bunyag.