Ang Akong Lawas Usa ka Templo

Sa wala pa kita matawo, kita mga espiritu nga walay pisikal nga mga lawas. Daghan ang mga butang nga dili nato mahimo hangtud nga kita adunay usa ka lawas. Ang Dios mipadala kanato dinhi sa yuta aron sa pagkuha og mga lawas. Nagkinahanglan kita sa espiritu ug lawas aron mahimong sama sa Langitnong Amahan. (Tan-awa sa D&P 88:15.)

Ang atong mga lawas importante kaayo ug balaan nga ang Ginoo mitawag niini nga mga templo (tan-awa sa 1 Mga Taga-Corinto 3:16–17). Ug ang pag-angkon og lawas makalingaw usab! Ang mga lawas mahimo modagan, mokanta, mokatkat, mokatawa, mo-drowing, molangoy, mosayaw, ug mobuhat og uban pang makalingaw nga mga kalihokan. Usab, atong magamit ang atong mga lawas aron sa pagkat-on, pagtabang sa mga tawo, paghimo og mga pamilya, ug paghimo sa kalibutan nga mas maayong dapit.

Ang mga lawas lain-lain ang mga porma, kolor, ug gidak-on, ug kini kabahin sa plano sa Langitnong Amahan. Bisan tuod ang matag lawas lahi, kitang tanan gilalang sumala sa panagway sa Dios (tan-awa sa Genesis 1:26). Kana nagpasabut nga ang atong mga lawas gisunod diha sa Iyang hingpit nga lawas. Ang matag usa ka lawas matahum tungod kay ang matag usa niini usa ka gasa gikan sa atong mahigugmaong Langitnong Amahan.

Usahay ang atong mga lawas dili molihok, mobuhat, o lahi ra tan-awon sigon sa atong gusto niini. Bisan unsa pa ang atong mga lawas karon, kita makapili nga magmapasalamaton niini ug gamiton kini sa pagbuhat og maayo nga mga butang dinhi sa yuta. Moabut ang adlaw, ang matag usa kanato mabanhaw ug makabaton og lawas nga hingpit (tan-awa sa Alma 40:23). Ang Dios nahigugma nato bisan unsa pa ang atong mga lawas, ug makahigugma usab kita sa atong kaugalingon.

Kinahanglan nga kita motratar sa atong mga lawas sa samang paagi nga kita moatiman sa bisan unsa nga bililhon nga bahandi—uban sa gugma ug pagtahud. Pinaagi sa mga propeta ug sa Pulong sa Kaalam, ang Langitnong Amahan misulti kanato kon unsa ang dili maayo alang sa atong mga lawas ug unsa ang makaayo. Daghan ang mga butang nga atong mahimo aron sa pag-atiman sa atong mga lawas:

• Kaon sa makahimsog nga mga pagkaon ug pag-ehersisyo.

• Pagsinina og tarung ug himoang limpyo kanunay ang atong mga lawas.

• Tahura ang mga lawas sa ubang mga tawo.

• Ayaw markahi ang atong mga lawas og mga patik o mga pagpatusok.

• Ayaw paggamit og mga drugas, alkohol, tabako, kape, o tsa.

• Pagdula og luwas ug makalingaw nga mga dula ug magpalayo gikan sa mga kalihokan nga makuyaw.

Kon atong ampingan ang atong mga lawas, mas makahimo kita sa pagbati sa Espiritu Santo.