Ang Akong Leksyon kabahin sa Hugot nga Pagtuo

Pipila ka tuig ang milabay, nagtudlo ko og usa ka leksyon sa family home evening kabahin sa hugot nga pagtuo. Ang akong pamilya migahin og daghang mga higayon nga maghisgut kabahin sa hugot nga pagtuo tungod kay ang akong magulang nga lalaki adunay mga pangutana kon nganong kita nagkinahanglan og hugot nga pagtuo. Akong gitanom ang usa ka binhi sa melon sa usa ka gamay nga kopa. Akong gisultihan ang akong pamilya nga ang hugot nga pagtuo sama sa usa ka binhi. Kon inyo kining atimanon og maayo, ang binhi motubo.

Wala pa kaayo mi magmalampuson sa pag-ugmad og mga tanaman. Apan nanghinaut ko nga akong mapatubo kini nga tanom ug nga ako mahimong maayo nga ehemplo sa hugot nga pagtuo. Akong gibutang ang kopa sa bintana ug giatiman kini. Naghulat ko ug nag-ampo nga ang akong binhi motubo.

Hapit na ko moundang, apan human sa usa ka semana sa katapusan nakakita ko og pipila ka mga berde nga nanggitib. Mitubo kini diha sa may bintana sa misunod nga semana. Dayon ang akong mga ginikanan mitabang nako nga makakita og lugar nga matamnan niini sa luyong nataran.

Akong giatiman og maayo ang akong tanom. Gibisbisan ko kini ug giibtan sa mga sagbut. Mipadayon kini sa pagdako. Nalipay kaayo ko!

Paglabay sa pipila ka semana, nakabantay ko sa mga bulak, ug dayon misugod pagpanggimaw ang gagmayng mga bunga. Among nakita ang pito ka mga melon nga mitubo diha sa tanom gikan sa akong usa ka gamay nga binhi. Alang kanako kadto usa ka milagro ug ang tubag sa akong mga pag-ampo. Ang bunga tam-is, sama sa giingon sa Alma 32:42: “Ug tungod sa inyong kakugi ug sa inyong hugot nga pagtuo ug sa inyong pailub uban ang pulong sa pag-alima niini, nga kini mogamot diha kaninyo, tan-awa, dili madugay kamo mopu-pu sa bunga niini, diin bililhon kaayo, diin tam-is labaw sa tanan nga tam-is.”

Kini nga kasinatian nakapalipay kaayo nako ug mitudlo kanako ug sa akong pamilya nga ang hugot nga pagtuo ang usa ka tinuod nga baruganan sa ebanghelyo ni Jesukristo.