Napulo ka mga Kasayuran alang sa mga Ginikanan sa mga Young Adult

Ania ang pipila sa mga hagit nga giatubang sa mga young adult sa kalibutan karon, uban sa mga pangutana niadto nga kadtong mga hagit gikan sa mga ginikanan.

Dugay-dugayng panahon sa pagpabiling single. Mga uso sa katilingban sa pagsugod og mga pamilya sa ulahing bahin sa kinabuhi makapabati sa mga young adult nga padayon ang ilang pagkatin-edyer. Ang uban mobati og kaugtas, nagduha-duha kon magminyo ba sila o magbaton og anak. Isip mga ginikanan, sa unsang paagi kita makatabang nila nga makabaton og mahangturong panglantaw?

Walay kasiguroan sa pinansyal. Daghan sa mga young adult dili tingali makatupong sa ilang mga ginikanan sa ekonomikanhong paagi. Tingali maglisud sila sa pagpangita og trabaho—gani sa degree sa kolehiyo—o sa pagsangkap alang sa usa ka pamilya. Isip mga ginikanan, kinahanglan ba kitang motabang, o atong hunahunaon nga ang atong mga anak motubo gikan sa pagdumala sa ilang kaugalingong mga panalapi?

Makakapoy kaayo nga mga opsyon. Ang mga young adult karon dunay mas daghang nagkalain-laing mga kapilian sa panarbaho. Apan usahay kanang tanang kapilian ingon og makakapoy kaayo. Sa unsang paagi nga ang mga ginikanan makatabang sa hamtong nga mga anak sa pagsuhid sa mga opsyon apan usab makahukom sa makatagbaw nga panarbaho?

Ang pagpuyo uban sa mga ginikanan. Magminyo man sila o dili, ang nagtubo nga gidaghanon sa mga young adult nga nag edad og 18 ug 34 nagpuyo uban sa mga ginikanan. Kon ang mga hamtong nga mga anak mopuyo uban sa ilang mga ginikanan, unsaon sa mga ginikanan ang pagpakigsabut sama sa kinsa ang mopalit og pagkaon ug unsaon sa pagdisiplina sa mga apo?

Giapilan nga relihiyon. Karon, ang mga young adult sa tanang tinuohan dili na magpasakop og usa ka simbahan kay sama sa miaging henerasyon. Sa unsang paagi nga kita isip mga ginikanan makaawhag sa atong hamtong nga mga anak nga magpabiling aktibo sa Simbahan? Sa unsang paagi kita sa espirituhanon nga paagi makasuporta kanila bisan kon ilang pilion nga dili na moapil sa mga kalihokan sa Simbahan?

Bisan ang atong hamtong nga mga anak tingali molabaw pa nato sa mga abilidad o sa kalampusan, nagkinahanglan gihapon sila ug angay sa suporta sa mga ginikanan sa pagpakabuhi dinhi sa kalibutan. Ang mosunod mao ang 10 ka mga giya nga ikonsiderar.

1. Susiha unsay gusto ug ganahan sa inyong mga anak. Imbis sultihan ang inyong young adult nga mga anak kon unsaon sa pagkuha unsay inyong hunahuna nga ilang gikinahanglan, pangutana sa ilang hiyas, mga tumong, ug mga damgo. Mahimong mohangyo sila ninyo sa pagtabang nila sa pagplano aron makab-ot kini. Kon maoy ilang buhaton, himoa ang ilang damgo nga giya sa inyong pag-istoryahanay. Susiha ang pros ug cons, pag-ampo alang sa giya, ug padayon sa pagpakigsulti. Kon sila wala masayud unsay gusto nila, awhaga sila sa pagpakigkita sa usa ka guidance counselor, mokuha og vocational interest test, o mosinati pa pinaagi sa pagtrabaho ug pagbolunter.

2. Mainampuong magtuon sa Doktrina ug mga Pakigsaad 121:34–46. Kini nga mga bersikulo magamit sa mga inahan ug amahan. Nagtudlo kini og husto nga mga baruganan mahitungod kon unsaon sa paghatag og matarung nga mga giya sa atong hamtong nga mga anak.

3. Paggahin og panahon diha sa daghang mga young adult. Tingali inyong mahibaloan nga ang mga anak sa ubang mga tawo interesado usab kon giunsa ninyo sa pagdala sa nag-edad pa kamo og 20 hangtud 30. Ang mga young adult gustong mahibalo kon unsaon sa mga hamtong pagbalanse sa nagkalahi nga mga prayoridad, pagpili og trabaho, o makahibalo nga ila nang nakita ang ilang kapikas. Kon kamo makig-uban niining mga young adult, kamo mas makasabut og dugang mahitungod sa mga hagit nga giatubang sa ilang henerasyon.

4. Isulti ang ilang mga gasa. Ang pagtabang sa mga young adult sa pagdiskobre sa ilang mga talento ug interes makatabang nila sa paghunahuna og usa ka makatagbaw nga kaugmaon. Ipasabut nga ang mga tawo malingaw panagsa ra hangtud nga sila mohatag og igong paningkamot nga mahimong eksperto. Bisan kadtong dunay daghang mga talento sa pagkatawo kinahanglang mogahin og panahon sa pagpalambo niini aron molampus.

5. Salig kanila sa ilang mga desisyon. Wala kini magpasabut nga sila mohimo kanunay og hingpit nga mga pagpili. Kini nagpasabut sa pagsalig nga sila makabangon ra, nga ang Dios mapasayloon, ug nga ang kinabuhi mahimong makahuluganon kaayo bisan kon kini naglakip sa pagbuntog sa mga kapakyasan o sa paglahutay sa mga pagsulay. Ang gagmayng mga anak mahimong madaot gumikan sa trauma, ang mga young adult motubo gikan sa pagbuntog sa babag imbis sa paglikay niini. Hatag og emosyonal ug praktikal nga suporta, i-awhag ang pagpahulay gikan sa kaugtas, pag-ampo uban nila ug alang nila, ug magpakatawa og ginagmay.

6. Dayga sila sa ilang mga paningkamot. Ang pagdayeg sa mga young adult sa pagkakugihan ug pagbangon makatabang nila nga magpadayon pa og dugay sa mga buluhaton, sa dugang nga mga hagit, ug malingaw labaw pa sa ilang mga buhat. Usa ka pormula nga gipakigbahin ni Presidente Thomas S. Monson nag-ingon, “Ang pagtrabaho mosangpot sa kalampusan kay sa magdamgo lang.”¹

7. Tinguhaa ang Inspirasyon. Ang atong mga pag-ampo ug hugot nga pagtuo makatabang nato sa pag-abli sa atong mga kasingkasing sa paghatag og higayon sa Dios sa pag-usab nato. Usa ka babaye nga akong nailhan nabalaka sa gitan-aw sa iyang hamtong nga mga anak. Gibati niya nga ang salida nagpakita og kawalay pagtahud ug panagbangi, bisan tuod kini giisip nga angay sa ilang edad. Dili gustong manghilabut, siya nag-ampo ug nagpuasa og balik-balik kon unsay buhaton o isulti. Usa ka buntag ang iyang umagad nga babaye mitawag aron sa pagpatambag kon unsaon sa pagdumala ang walay tahud ug panag-away sa iyang mga anak. Ang akong higala mipaambit sa iyang obserbasyon mahitungod sa salida sa TV, usa ka impluwensya nga wala gayud mamatikdi sa iyang umagad nga babaye. Ang batan-ong mga ginikanan mihisgot sa isyu uban sa ilang mga anak. Mga kausaban gikauyunan, ug ang kahimtang sa panimalay milambo.

8. Hisguti ang mahitungod sa kwarta. Ang pagkasensitibo ngadto sa inyong kaugalingong mga sitwasyon ug kahingkod sa matag anak, pagmainampoon sa paghukom unsa nga pinansyal nga tabang, kon aduna, ang ihatag sa inyong mga anak. Tingali nagkinahanglan lamang sila sa inyong tabang sa paghimo og badyet. Kon hatagan ninyo sila og pinansyal nga tabang, klaroha sa sinugdanan kon gusto ba ninyong pabayaran o gamiton sa laing paagi. Dayon ikalipay ang paghatag nila og responsibilidad sa pagdumala sa ilang mga pundo ug magkat-on gikan sa mga sayop, lakip sa binuhatan nga morag wala nay ugma kon sila mopalabi og gasto karon.

9. Pagmapaubsanon. Kon gibati ninyo nga mosaway sa kaugalingon tungod sa pagkasayop sa pagkaginikanan, paningkamot nga magpaubos pa imbis maulaw. Pangayo og pasaylo, sulti unsay inyong buhaton aron molambo, ug dayon padayon uban sa pagsalig. Himoa ang inyong mga anak nga mosulti gikan sa pag-obserbar kaninyo nga ang inyong sayop dili katapusan, ang pagpangayo og pasaylo dili timailhan sa kahuyang, ug ang pagpasaylo sa uban ug sa atong kaugalingon makahatag og kalinaw.

10. Sukda ang tinuod nga kalampusan. Kon kita mag-focus pag-ayo kon unsay ikasulti sa uban nato tungod sa mga pagpili sa atong mga anak (maayo man o dautan), mawad-an kita sa tumong, ug sa kasagaran mawala ang Espiritu. Hinumdumi nga ang atong kalampusan isip mga ginikanan dili kon unsa ka maayo nagsunod ang atong mga anak sa atong mga mithi apan pinaagi kon unsa kamakanunayon ug walay paghinakog kita nagsunod niini.