2014
Tabu Misin blong Jisas Kraes: Loya
Julae 2014

Visiting Tijing Mesej, Julae 2014

Tabu Misin blong Jisas Kraes: Loya

Stadi long toktok ia wetem prea mo luklukgud blong save wanem blong serem. ?Olsem wanem nao taem yu andastanem laef mo misin blong Sevya i leftemap fet blong yu long Hem mo blesem olgeta we yu stap lukaotem olgeta tru long visiting tijing? Blong kasem moa infomesen, go long .reliefsociety.lds.org.

Fet, Famle, Help

Jisas Kraes i Loya blong yumi long fored blong Papa. Toktok ia loya we i tekem rus blong hem long lanwis blong ol man Rom we i minim “man blong toktok long bihaf blong wan narawan.”1 Sevya i toktok long bihaf blong yumi, i yusum andastaning, jastis, mo fasin blong gat sore. Taem yumi save hemia yumi fulap wetem lav mo fasin blong talem tangkyu from Atonmen blong Hem.

“Lisen long [Jisas Kraes] hem we i loya wetem Papa, hem we i toktok long bihaf blong kes blong yu bifo long hem—

“I talem: Papa, luk ol harem nogud mo ded blong hem we i no mekem sin, long hem we yu laekem tumas; luk blad blong Pikinini blong yu we i bin ron, blad blong hem we yu bin givim blong yu gat glory long yu;

“Taswe, Papa, mekem gud long olgeta brata ia blong mi we oli biliv long nem blong mi, blong oli save kam long mi mo kasem laef we i no gat en long hem” (D&K 45:3–5).

Elda D. Tod Kristofeson blong Kworom blong Olgeta Twelef Aposol i talem abaot Kraes olsem Loya blong yumi: “I minim bigfala samting tumas long mi, we long eni taem mo long eni situesen mi save, tru long prea, go kolosap long bigfala jea ia blong gladhat, mo Papa blong mi long Heven bae i lisin long prea blong mi, mo Loya blong mi, Hem we i no mekem sin, Hem we blad blong Hem i bin ron, bae i toktok long bihaf blong mi.”2

I Kamaot long Ol Skripja

Mosaea 15:8–9; Moronae 7:28; Doctrine and Covenants 29:5; 110:4

I Kamaot long Histri blong Yumi

Truaot long histri blong Jos blong Lod, ol woman we oli ol disaepol blong Jisas Kraes oli bin folem eksampol blong Hem. Esta i bin wan loya we i fetful mo gat strong paoa long tingting. Kasen blong hem, Modekae, i givim long hem wan kopi blong wan oda we i kam long king se bae oli kilimded evri man Jiu, mo askem hem “blong mekem wan rikwes long [king] long bihaf blong ol pipol blong hem.” Hem i talem tu: “Mo ?huia i save se yu bin kam long kingdom ia blong wan kaen taem olsem hemia?” (Esta 4:8, 14.)

Nomata long denja blong stap olsem loya blong ol pipol blong hem, Esta i bin agri: “Nating we i agensem loa, be bambae mi mas go luk king. Mo sipos i min se mi mi mas ded from, be bambae i mas olsem” (Esta 4:16).

Esta i bin toktok wetem tingting i stap daon long king mo “i nildaon long fes blong king, i stap krae … blong jenisim ol toktok long oda ia … blong kilimded ol man Jiu.” Hem i talem, “?Olsem wanem nao bae mi stap mo luk ol laen blong mi oli ded?” (luk long Esta 8:3, 5–6). Hat blong king i go daon, mo i givim wanem Esta i wantem.3

© 2014 i kam long Intellectual Reserve, Inc. Oli gat evri raet. Oli printim long YSA. Oli letem long Inglis: 6/14. Oli letem translesen: 6/14. Translesen blong Visiting Teaching Message, July 2014. Bislama. 10867 852.

Ol Not

  1. Luk long Rasel M. Nelson, “Jesus Christ — Our Master and More” (Brigham Yang Yunivesiti faeasaed, 2 Feb. 1992), 4; speeches.byu.edu.

  2. D. Tod Kristofason, “I Know in Whom I Have Trusted,” Ensign, Mei 1993, 83.

  3. Luk tu long Daughters in My Kingdom: The History and Work of Relief Society (2011), 180.

Tingting long Hemia

?Olsem wanem fasin ia blong Jisas Kraes blong stap olsem loya i givim tingting long yumi blong yumi gat sore mo fogivim ol narafala man?