Mensahe sa Unang Kapangulohan
Ang Saad sa Pagpabalik sa mga Kasingkasing
Ang akong inahan, si Mildred Bennion Eyring, nagtubo sa komunidad sa pag-uma sa Granger, Utah, USA. Usa sa iyang igsoong lalaki, si Roy, misunod sa negosyo sa pamilya sa pagpamuhi og mga karnero. Isip usa ka batan-ong lalaki siya migahin og daghang mga semana layo sa panimalay. Sa kadugayan siya nahimong dili kaayo interesado sa Simbahan. Wala madugay siya mibalhin sa Idaho, USA, naminyo, ug adunay tulo ka anak. Siya namatay sa edad nga 34 sa dihang ang iyang asawa 28 anyos ug ang ilang mga anak gagmay pa.
Bisan tuod og ang gamay nga pamilya ni Roy tua sa Idaho ug ang akong mama mibalhin og mga 2,500 ka milya (4,025 km) ngadto sa New Jersey, USA, siya kanunay misulat kanila og mga sulat sa paghigugma ug pag-awhag. Ang pamilya sa akong tiyo mapinanggaong motawag sa akong mama og “Tiya Mid.”
Milabay ang katuigan, ug usa ka adlaw niana nakadawat ko og tawag sa telepono gikan sa usa sa akong mga ig-agaw. Gisultihan ko nga ang biyuda ni Roy namatay. Ang akong ig-agaw miingon, “Si Tiya Mid gusto nga mahibalo ka.” Si Tiya Mid dugay nang namatay, apan ang pamilya mibati pa gihapon sa iyang gugma ug naningkamot sa pagpahibalo nako.
Nakapanghinuktok ko kon unsa ka dako sa tahas sa akong inahan diha sa iyang pamilya susama sa tahas sa mga propeta nga Nephite diha sa ilang mga pamilya pinaagi sa pagpabiling duol sa mga paryente nga gusto nilang tudloan sa ebanghelyo ni Jesukristo. Misulat si Nephi og rekord nga iyang gilauman nga makaimpluwensya sa mga anak sa iyang igsoong mga lalaki sa pagbalik ngadto sa tinuohan sa ilang patriyarka, nga si Lehi. Ang mga anak nga lalaki ni Mosiah nagpakita sa samang gugma samtang sila nagsangyaw sa ebanghelyo ngadto sa kaliwatan ni Lehi.
Ang Ginoo mihatag og paagi nato nga mobati sa gugma diha sa mga pamilya nga magpadayon hangtud sa kahangturan. Ang kabatan-onan sa Simbahan karon mibati sa ilang mga kasingkasing sa pagpabalik sa ilang mga pamilya. Sila nangita og mga pangalan sa mga sakop sa pamilya kinsa wala makabaton og kahigayunan sa pagdawat sa mga ordinansa sa kaluwasan niini nga kinabuhi. Sila modala niadtong mga pangalan ngadto sa templo. Kon sila moubog na sa tubig sa bunyag, sila dunay oportunidad nga mobati sa gugma sa Ginoo ug sa mga sakop sa pamilya diin sila nagpahigayon og pag-proxy nga mga ordinansa.
Nakahinumdom gihapon ko sa gugma sa tingog sa akong ig-agaw kinsa mitawag ug miingon, “Ang among mama namatay, ug si Tiya Mid gusto nga mahibalo kamo.”
Kaninyo kinsa mopahigayon og mga ordinansa alang sa mga sakop sa pamilya nagtabang pinaagi sa gugma, sama sa gibuhat sa anak nga lalaki ni Mosiah ug sa propeta nga si Nephi. Sama nila, kamo mobati og hingpit nga kalipay alang niadtong modawat sa inyong halad. Makalaum usab kamo nga mobati sa samang dakong katagbawan nga gibati ni Ammon, kinsa miistorya sa iyang misyonaryo nga pagserbisyo sa lagyo nga mga sakop sa pamilya:
“Busa, maghimaya kita, oo, maghimaya kita sa Ginoo; oo, kita maglipay, kay ang atong kalipay puno; oo, kita magdayeg sa atong Dios sa kahangturan. Tan-awa, kinsa ang makahimaya pag-ayo diha sa Ginoo? Oo, kinsa ang makasulti pag-ayo diha sa iyang dako nga gahum, ug sa iyang kalooy, ug sa iyang pagkamainantuson ngadto sa mga katawhan? Tan-awa, ako moingon nganha kaninyo, ako dili makasulti sa kinagamyan nga bahin sa akong gibati” (Alma 26:16).
Ako mopamatuod nga ang inyong mga pagbati sa gugma alang sa mga sakop sa inyong pamilya—bisan asa sila—mao ang katumanan sa saad ni Elijah nga moabut. Siya miabut. Ang mga kasingkasing sa mga anak mobalik ngadto sa ilang mga amahan, ug mga kasingkasing sa mga amahan mobalik ngadto sa ilang mga bata (tan-awa sa Malaquias 4: 5–6; Joseph Smith—Kasaysayan 1:38–39). Kon inyong gibati ang kadasig sa pagpangita sa mga ngalan sa inyong mga katigulangan ug modala niadtong mga ngalan sa templo, inyong masinati ang katumanan niana nga panagna.
Usa kini ka panalangin sa pagpuyo sa mga panahon dihang natuman ang saad sa pagpabalik sa mga kasingkasing. Si Mildred Bennion Eyring mibati og tinguha sa iyang kasingkasing. Siya nahigugma sa pamilya sa iyang igsoon, ug siya mitabang kanila. Gibati nila ang ilang mga kasingkasing mibalik sa paghigugma ni Tiya Mid tungod kay sila nasayud nga siya nahigugma kanila.