Ewe Pwonen Kununon Netip

Inei, Mildred Bennion Eyring, a feifeita non eu sopwun atake non Granger, Utah, USA. Emon mongeian, Roy, a fiti ewe angangen ewe famini an epwe foneni siip. Neanuonun a men nonnom toau seni imwan we non chommong wiik. Ekkis me ekkis a kisino an mochen fiti Mwichefen. Iwe mwirin a mokut ngeni Idaho, USA, a pupunu, me nounatiw unuemon semirit. A mano atun a 34 ierin nupwen punuan we a 28 ierin me meinisin nour semirit ra kukkun.

Ina mo pwe an Roy famini mi kukkun ra nonnom Idaho me inan we a mokut ukkukun 2,500 main ngeni New Jersey, USA, a mammak fan chommong ngeni pwe a tongeir me amwasanger. Tettenin semei we a iteni inei we pwe “Aunt Mid.”

Chommong ier a no, me a wor tettenin pwi we a kokkori ei won fon. Ra ereniei pwe punuan Roy a mano. Anon tettenin pwi, “Aunt Mid epwe mochen om kopwe sinei.” Aunt Mid a fen mano, nge ewe famini mi chok chiwen mefi an tong me ra esinei ngeniei.

Ngang ua mairu ren ifan ukukkun manauan inei we a apwonueta eu wis usun wisan ekkewe soufosun chon Nifai ra pwan apwonueta non ar kewe famini ren ar nomofoch arap ngeni nour kewe aramas ra mochen wato ngeni ewe kapas allimen Jises Kraist. Nifai a makkei eu uruo non an apinukunuk pwe epwe anisi ekkewe noun pwin kewe ar repwe niwin ngeni ewe nuku an semanaper, Liai. Ekkewe noun Mosaia ra pwan pwarata ewe chok tong nupwen ra afanafana ewe kapas allim ngeni ekkewe mwirimwirin Liai kewe.

Ewe Samon a awora ngenikich ekkewe napanap minne sipwe mefi tong non famini mi tongeni sopweino feinfeino Ekkewe serafo non ewe Mwichefen ikenai ra mefi netiper kuneno ngeni ar famini. Ir ra kukkuta itan chon ar famini ion kewe ese wor rer tufichin etiwa ekkewe angangen amanau non ei manau. Ir ra uwei ekkena it non ewe tempel. Nupwen ra tonong non ewe koniken paptais, mi wor rer tufichin ar repwe mefi ewe tongen Samon fengen ren tongen ekkewe chon ar famini ion ra fori ekkewe angang fan itan.

Ngang mi chiwen chechemeni ewe tong non neuan tettenin pwi ion a kokkori ei me apasa, “Inach a mano, me Aunt Mid a mochen om kopwe sinei.”

Ami ion oua kan fori annuk pwisin fan itan chon famini oua fori ren tong, usun chok noun Mosaia kewe me ewe soufosu Nifai. Usun chok ir, kopwe mefi pwapwa ren ekkena ir ion ra etiwa om asoren angang. En ka pwan tongeni mefi ewe chok menemenoch usun Ammon, s iei an poraus usun an angangen misineri nein ekkewe aramasen me nom:

“Ina minne, sipwe ingeiti, ennet, sipwe ingeiti ewe Samol; ewer, sipwe pwapwa, pun ach pwapwa mei unus; ewer, sipwe ingeiti nouch Kot feinfeino. Nengeni, ion a tongeni nuno an ingeiti non ewe Samol? Ewer, ion epwe tongeni nuno an kapas usun an manaman, me an umoumouch, me an nikitutam ngeni noun aramas kewe? Ngeni, Ua apasa ngonuk, kosap tongeni apasa kukkunun minne ua mefi(Alma 26:16).

Ua pwarata pwe ekkewe memmefin tong remi fan itan chon ami famini meinisin—, ian ra nonnom ia— a fis pwe pwonuetan ewe pwonen an Elijah epwe feito. A fen feito. Netipan ekkewe semirit ra kunu ngeni semer kewe, me netipan semer kewe ra kunu ngeni nour kewe semirit (nengeni Malachi 4:5–6; Joseph Smith—History 1:38–39). Nupwen ka mefi mochenin om kopwe kukkuta itan noum kewe newo me uwei ekkena it ngeni tempel, ka apownueta ekkena kapasen oesini.

A eu feioch chapur ne nonnom non ei fansoun nupwen ewe pwonen kununon netip a pwonueta. Mildred Bennion Eyring a mefi ena sokkun non netipan. A men tongei an mongiean we famini, iwe a mochen eitau poun ngenir. Ir ra mefi netiper mi kunu fan tong pokiten Aunt Mid pwe ra sinei pwe a men tongeiir.