Akoma Ndanee Anohoba no

Me maame, Mildren Bennion Eyring, nyinii wɔ ekuayɛ sɔn mu wɔ Granger, Utah, USA. No nuambanyin no kor, Roy, faa ebusua edwuma no a ɔyɛ nguanyɛn no. Ber a ɔyɛ aberantsɛba no ofii fie kedzii adapɛn pii. Mber rugu mu no n’enyigye wɔ Asɔr no mu no huanee. Ekyir no otuii kɔr Idaho, USA, waree, na onyaa mba baasa. Odzii mfe 34 na owui ber a nna ne yer edzi mfe 28 na hɔn mba no susuar.

Nna Roy n’ebusua kumaa no wɔ Idaho na me maame etu kɔ New Jersey, USA a ɔyɛ aborɔfo kwansin 2,500 no mpo, naaso nna ɔtaa kyerɛɛw hɔn ɔdɔ na nkuranhyɛ nkrataa. Mo wɔfa n’ebusua no frɛɛ me maame afɛdzi mu dɛ “Aunt Mid.”

Mfe twaa mu, na da kor bi menyaa tɛlɛfoon ɔfrɛ fii mo wɔfa ne mba no kor hɔ. Ɔkãa kyerɛɛ me dɛ Roy no kunafo no ewu. Mo wɔfa ba no kãa dɛ, “Aunt Mid bɛpɛ dɛ ibɛtse”. Nna Aunt Mid aka beebi deda, naaso nna ebusua no daho tse no dɔ nkã ma wɔhwehwɛɛ me bɔɔ me amandzɛɛ.

Ɔyɛɛ me nwanwa mbrɛ me maame sii yɛɛ n’asɛdze wɔ n’ebusua mu tse dɛ mbrɛ Nephifo nkɔnhyɛfo no yɛɛ hɔn asɛdze wɔ hɔn ebusua ebusua mu dɛ wɔbɛɛn hɔn ebusuafo a wɔpɛɛ dɛ wɔdze Jesus Christ asɛmpa no ma hɔn no. Nephi kyerɛw nkyerɛwee a nna ɔwɔ enyidado dɛ obekenyan no nuanom mba ma wɔasan aba hɔn egya panyin, Lehi, ne gyedzi mu. Mosiah ne mbabanyin kyerɛɛ dɛm ɔdɔ noara bi ber a wɔkãa asɛmpa no kyerɛɛ Lehi n’asefo no.

Ewuradze ama hɛn akwan a yɛdze bɛtse ɔdɔ nkã wɔ ebusua ebusua mu a obotum akɔ do afebɔɔ. Ndɛ Asɔr no mu mbabun no retse dɛ hɔn akoma redan kɔ hɔn ebusua ebusua do. Wɔrohwehwɛ hɔn ebusua mu mba a woennya kwan anngye nkwagye ayɛdze no wɔ abrabɔ yi mu no hɔn edzin. Wɔdze dɛm edzin no kɔ temple. Wosian enuma esu no mu a, wonya kwan tse Ewuradze na hɔn ebusua mu mba a wɔreyɛ ngyina ananmu ayɛdze ama hɔn no hɔn dɔ ne nkã.

Meda ho tum kaa ɔdɔ a nna ɔwɔ mo wɔfa ba ne ndze mu, nyia ɔfrɛɛ na ɔsee dɛ, “Hɛn maame akã beebi, na Aunt Mid bɛpɛ dɛ ibɛtse.”

Hom a hom yɛ ayɛdze ma ebusua mu mba no retserɛw hom dɔ mu, tse dɛ Mosiah mbabanyin no na nkɔnhyɛnyi Nephi. Tse dɛ hɔn no, ibenya enyigye atsenkã ama hɔn a wɔagye w’afɔrbɔ no. Ibotum so enya enyidahɔ dɛ ibenya abodwee kɛse dɛ Ammon a, ɔkãa fa ne asɛmpasomafo som wɔ n’ebusua ekyirekyirfo mba mu ho.

“Dɛm ntsi, hom mma yɛnhyɛ hɛnho enyimnyam, nyew, yebedzi dɛw, osiandɛ hɛn dɛw hyɛ mã; nyew, yebeyi hɛn Nyame ayɛw afebɔɔ. Hwɛ, woana na obotum ahyɛ noho enyimnyam kɛse wɔ Ewuradze mu? Nyew, woana na obotum akã no tum kɛse no nye n’ehumbɔbɔr, nye ne penkyɛr a ɔwɔ wɔ adasamba ho asɛm pii? Hwɛ, mese hom dɛ, dza ɔyɛ wɔ mu no no murunntum nnkã no mu ketseketse mpo” (Alma 26:16).

Megye dase dɛ ɔdɔ atsenkã a ewɔ ma w’ebusua mu mba no—bea biara a wɔwɔ no— yɛ anohoba dɛ Elijah bɛba no ho mãhyɛ. Ɔbae. Mba hɔn akoma redan akɔ hɔn egyanom do, na egyanom akoma redan kɔ hɔn mba do (hwɛ Malachi 4:5–6; Joseph Smith—Abakɔsɛm 1:38–39). Sɛ enya nkuranhyɛ dɛ hwehwɛ w’ewuakɔr edzin na fa dɛm edzin no kɔ temple a, nna dɛm nkɔnhyɛ no reba mu ma wo.

Ɔyɛ nhyira dɛ yɛtse ase wɔ mber a akoma ndanee anohoba no rehyɛ mã no. Mildred Bennion Eyring nyaa dɛm nkuranhyɛ no bi wɔ n’akoma mu. Ɔdɔɔ no nuabanyin n’ebusua, na ɔtseen noho maa hɔn. Wɔtsee dɛ hɔn akoma dze ɔdɔ adan kɔ Aunt Mid do osiandɛ nna wonyim dɛ ɔdɔ hɔn.