Parau poro‘i na te Peresideniraa Matamua, Tiurai 2014
Te fafauraa no te faafariuraa te mau aau
Ua paari to’u mama, o Mildred Bennion Eyring, i roto i te oraraa faaapu no Granger, Utah, te mau Hau Amui no Marite Hoê o to’na mau taea‘e, o Roy, ua rave i te taiete a te utuafare no te faaamuraa i te mamoe. I to’na apîraa, ua haere oia e rave rahi mau hepetoma i te atea i te fare. I te roaraa o te tau, ua iti mai to’na anaanatae i te Ekalesia. Oia mau, ua haere atu oia i Idaho, te mau Hau Amui no Marite, ua faaipoipo, e e toru ta’na tamarii Ua pohe oia i te 34raa o to’na matahiti, e 28 matahiti to ta’na vahine e e mea na‘ina‘i roa ta raua mau tamarii.
No’atu e tei Idaho te utuafare na‘ina‘i o Roy e ua haere atu to’u mama e 4 025 kilometera i New Jersey, te mau Hau Amui no Marite, ua tamau noa to’u mama i te papa‘i i te mau rata no te here e te faaitoitoraa ia ratou. E pii te utuafare o to’u paino tane i to’u mama o « Tati Mid ».
Ua tere te mau matahiti, e i te hoê mahana ua farii au i te hoê niuniu na te hoê o to’u mau taea‘e fetii. Ua parauhia mai ia’u e ua pohe te vahine ivi a Roy. Ua parau to’u taea‘e fetii e, « ua hinaaro o Tati Mid ia ite oe ». Ua faaru‘e o Tati Mid e mea maoro i teie nei, tera râ te ite noa ra te utuafare i to’na here e ua imi no te parau mai ia’u.
Ua maere au i te huru ta to’u mama faaîraa i te hoê ti‘araa i roto i to’na utuafare, hoê â mai te ti‘araa ta te mau peropheta Ati Nephi i faaî i roto i to ratou utuafare na roto i te faaearaa i piha‘i iho i to ratou fetii, ta ratou i hinaaro e hopoi atu i te evanelia a Iesu Mesia. Ua papa‘i o Nephi i te hoê papaa parau, o ta’na i ti‘aturi e umeraa i te mau tamarii a to’na mau taea‘e no te ho‘i mai i te faaroo o to ratou patereareha, o Lehi. Ua faaite te mau tamaroa a Mosia i taua â here ra, a poro ai ratou i te evanelia i te mau huaai o Lehi.
Ua horo‘a mai te Fatu ia tatou i te mau rave‘a ia ite i te here i roto i te mau utuafare o te tamau â e amuri noa’tu. Te ite nei te feia apî i roto i te Ekalesia i teie mahana i to ratou aau i te fariuraa i to ratou utuafare. Te imi nei ratou i te mau i‘oa o te mau melo o te utuafare, o ratou aita e rave‘a no te farii i te mau oro‘a no te faaoraraa i roto i teie oraraa. E afa‘i ratou i teie mau i‘oa i te hiero. Ia tomo ratou i roto i te pape o te bapetizoraa, e rave‘a no ratou ia ite i te here o te Fatu e o te mau melo o te utuafare no ratou o ratou i rave ai te mau oro‘a na roto i te monoraa.
Te haamana‘o faahou â ra vau i te here i roto i te reo o to’u taea‘e fetii tei niuniu mai e tei parau mai, « ua pohe to matou mama, e ua hinaaro o Tati Mid ia ite oe ».
Te feia i roto ia outou o tei rave i te mau oro‘a no te mau melo o te utuafare, te faaite ra ïa ratou i te here, mai ta te mau tamaroa a Mosia i rave e te peropheta Nephi. Mai ia ratou, e ite outou i te oaoa no te feia tei farii i ta outou ô. E nehenehe atoa outou e ite mai i taua â popou rahi ra mai ia Amona, o tei parau no ta’na ohipa taviniraa misionare i rotopu i te mau melo utuafare atea:
« E tena na, ia arue tatou, e ia faatura tatou i te Fatu ra ; e ia oaoa ; ua î roa hoi to tatou aau i te oaoa ; e haamaitai tatou i to tatou Atua e a muri noa’tu. Inaha, o vai ïa te taata e tia ia’na ia faarahi roa ino i te arueraa i te Atua ? O vau hoi ïa te taata e tia ia’na ia faarahi roa ino i te parau maitai no to’na ra mana rahi, e to’na ra aroha, e to’na ra faaoromai roa i te tamarii a te taata nei ? Inaha, te faaite atu nei hoi au ia outou, e ore e tia ia’u ia faaite atu i te hoê vahi iti a‘e o to’u nei hinaaro ia’na ra » (Alama 26:16).
Te faaite papû nei au e, te mana‘o here o ta outou i farii no to outou mau melo o te utuafare—i te mau vahi tei reira ratou— e faaiteraa te reira i te tupuraa o te fafauraa e, e haere mai o Elia. Ua haere mai oia. E faafariu te aau o te mau tamarii i to ratou mau metua e e faafariu te aau o te mau metua i to ratou mau tamarii (hi‘o Malaki 4:5–6; Iosepha Semita—Aamu 1:38–39) Ia tae ana‘e mai ia outou te hinaaro ia imi i te mau i‘oa o to outou mau tupuna e ia afa‘i i teie mau i‘oa i te hiero, te ite ra ïa outou i te tupuraa o taua tohuraa ra.
E haamaitairaa ia ora i te tau a tupu ai te fafauraa no te mau aau e faafariu ra. Ua ite o Mildred Bennion Eyring i taua hinaaro ra i roto i to’na aau. Ua here oia i te utuafare o to’na taea‘e, e ua tauturu oia ia ratou. Ua ite ratou e faafariu to ratou aau ma te here ia Tati Mid no te mea ua ite ratou e ua here oia ia ratou.
© 2014 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/14. Parau faati‘a no te iritiraa : 6/14. Iritiraa no First Presidency Message, July 2014. Tahitian. 10867 895