Nagtudlo Kita pinaagi sa Gahum sa Espiritu Santo

Nagatuo kita nga ang pagtudlo sa ebanghelyo ni Jesukristo pinaagi sa gahum sa Espiritu Santo mahinungdanon sa buhat sa Dios sa kaluwasan. Ang epektibong pagtudlo makatabang sa mga tawo nga molambo sa ilang hugot nga pagtuo ug magtinguha sa pagsunod sa ebanghelyo. Ang pagtudlo mahimong mahitabo sa daghang kalihokan, sama sa paghatag sa mga leksyon ug mga pakigpulong sa simbahan; apan nagtudlo usab kita kon atong hisgutan ang mga kasulatan uban sa usa ka sakop sa pamilya o kon mopasabut kita ngadto sa usa ka silingan kabahin sa priesthood.

Hunahunaa kining upat ka mga baruganan alang sa epektibong pagtudlo:

• Higugmaa kadtong inyong gitudloan. Ila-ilaha sila. Mainampoong ikonsiderar ang ilang mga panginahanglan samtang kamo mangandam sa pagtudlo. Sulayi ang paggamit og lain-laing pamaagi sa pagtudlo: lain-laing mga pamaagi makatabang sa lain-laing mga tawo (tan-awa ang pipila ka mga ideya sa tuo).

• Motudlo pinaagi sa Espiritu. Si Nephi mitudlo, “Kon ang tawo mamulong pinaagi sa gahum sa Espiritu Santo ang gahum sa Espiritu Santo modala niini ngadto sa mga kasingkasing sa mga katawhan” (2 Nephi 33:1). Samtang kamo magtudlo, mahimo ninyong dapiton ang impluwensya sa Espiritu pinaagi sa pagpamatuod ug pinaagi sa paggamit sa mga kasulatan ug mga pagtulun-an sa mga propeta sa ulahing mga adlaw. Tinguhaa ang giya sa Espiritu Santo samtang kamo nangandam sa pagtudlo. Siya modasig kaninyo nga masayud unsaon sa pagtudlo.

• Itudlo ang doktrina. Aprubado nga mga materyal sa kurikulum gikan sa Simbahan, sama sa mga kasulatan, mga pakigpulong sa kinatibuk-ang komperensya, ug mga manwal, naglangkob og doktrina—mahangturong mga kamatuoran gikan sa Dios.

• Dapita ang makugihon nga pagkat-on. Samtang kamo magtudlo, hinumdumi nga si kinsa kadtong maminaw maoy responsable sa ilang kaugalingong pagkat-on. Awhaga sila sa pagpangutana, sa pagpakigbahin sa ilang mga hunahuna kabahin sa hilisgutan, ug pagpamalandong kon sa unsang paagi sila makasunod sa mga baruganan sa ebanghelyo. Ang ilang pagpamatuod niadtong mga baruganan molambo samtang sila nagpuyo niini (tan-awa sa Juan 7:17).

Si Presidente Gordon B. Hinckley (1910–2008) namulong mahitungod sa kaimportante sa maayong pagtulun-an: “Kinabuhing dayon moabut lamang kon ang mga lalaki ug mga babaye magtudlo sa epektibong paagi nga sila mag-usab ug modisiplina sa ilang kinabuhi. Dili nila mahimong ipamugos ang pagkamatarung o ngadto sa langit. Kinahanglan sila pagagiyahan, ug nagpasabut kana sa pagtudlo” (gikutlo sa Jeffrey R. Holland, “A Teacher Come from God, Ensign, Mayo 1998, 26).