Mapasalamaton ako nga ang among mga lider sa kabatan-onan nagplano sa pagbisita sa templo. Samtang nangandam kami alang niini nga biyahe ngadto sa Apia, Samoa, nalipay kami niining talagsaon nga oportunidad. Malipayon kami nga miadto sa templo aron sa paghimo og mga bunyag alang sa patay—alang niadtong anaa sa kalibutan sa espiritu nga nagpaabut kanamo sa pagpangita sa among family history ug mohimo sa buhat alang kanila.

Atol sa bunyag, akong nakita ang usa ka batan-ong lalaki sa among grupo nga gibunyagan alang ni Faataga Agavale, ang akong lolo. Nakahilak ako sa tumang kalipay, ug ako nasayud nga anaa didto ang iyang espiritu. Nalipay kaayo ko nga among nahimo ang buhat alang kaniya diha sa templo.

Isip usa ka tin-edyer, dili ko ganahan moadto sa simbahan, mao nga wala kaayo koy nasayran mahitungod sa Biblia o mahitungod sa Dios, ug dili pud nako gusto. Sa dihang 17 anyos ko, usa nako ka higala miingon kanako nga usa siya ka Mormon. Wala akoy ideya kon unsa na ang Mormon. Akong gisultihan ang akong higala, “Kon gusto kong masayud og bisan unsa mahitungod niana nga simbahan, ako mismo ang mangita.”

Nakakita nga wala kaayo koy pagpakabana bahin sa relihiyon, siya mihatag nako og Basahon ni Mormon ug mihangyo nako sa pagbasa niini ug sa pag-ampo mahitungod niini. Siya wala mamugos nako. Sa wala madugay nianang gabhiona samtang akong giablihan ang basahon, akong namatikdan iyang pagpamatuod nga gisulat diha sa atubangan. Samtang nagbasa ko niini, akong gibati nga kinahanglan ko nga masayud pa mahitungod sa Basahon ni Mormon. Busa misugod ako sa pagbasa sa 1 Nephi. Naganahan kaayo ko sa pagbasa niini. Kinahanglan nga daghan pa ko og makat-unan.

Sa usa ka family home evening, ang iyang pamilya mitudlo kanako kabahin sa ebanghelyo ni Jesukristo. Ang tanan ingon og makatarunganon. Sa wala madugay gitudloan ko sa mga misyonaryo ug nabunyagan ug nakumpirmahan nga usa ka miyembro sa tinuod nga Simbahan sa Ginoo. Ang ebanghelyo nakatabang kanako nga mahibalo kinsa ko, diin ko gikan, ug asa ako mahimo nga moadto kon ako magmatinud-anon.

Samtang ako naghinumdom, akong nakita kon sa unsang paagi nga ang Espiritu Santo mitabang kanako nga gusto pa nga magkat-on. Samtang nadugangan ang akong pagkat-on, nausab ang akong kinaiya mahitungod sa simbahan ug sa Dios. Sa unang higayon sa akong kinabuhi, gusto nako nga mobuhat sa unsay gusto Niya nga ipabuhat kanako.

Ang Basahon ni Mormon nakapausab sa akong kinabuhi, ug mapasalamaton ako sa akong higala kinsa mipakigbahin niini ngari kanako. Ang usa ka tinuod nga higala mopakigbahin og mahinungdanon nga impormasyon sama niini.