?I Tru Yumi Rere?

Kolosap long ples we mi bin stap laef mo wok long hem, Jos i bin stap lukaotem wan projek blong fidim faol, mo ol wokman blong hem oli ol volontia we oli kamaot long ol lokol wod. Plante taem, projek ia i wok gud nomo, mo i stap saplae long stoahaos blong bisop wetem ol fres eg mo plante handred kilo blong faol we oli klinim finis. Be wanwan taem, blong stap olsem wan volontia fama we i kam long siti i no minim nomo blong gat soa long han, be tu, blong hat mo tingting i harem nogud smol.

Eksampol. Bae mi tingbaot oltaem taem ia we mifala i tekem ol yang man blong Aronik Prishud i go blong mekem bigfala klinap long spring taem. Grup ia blong mifala, i gat strong tingting mo gat fulap paoa, oli bin kam tugeta long ples blong projek mo hariap nomo, mifala i rutumaot, mo mekem ol hip, mo bonem ol nogud gras mo ol nara doti. Long laet blong ol bigfala faea ia, mifala i kakae sosej mo taltalem long mifala se mifala i mekem wan gudfala wok.

Be, i gat wan bigfala problem nomo. Noes mo ol faea ia i spolem gud ol 5,000 mama faol we oli stap putum eg, mekem se oli lusum feta blong olgeta mo oli stop blong putum eg. Afta long hemia, mifala i letem se i gat sam nogud gras i stap, blong mekem se faol i putum moa eg.

I no gat wan memba blong Jos we i bin help blong lukluk long olgeta we oli stap long nid i bin fogetem o no laekem eksperiens ia. Fasin blong wok, yusum gud samting, dipen long yuwan mo serem samting wetem ol narawan, oli no ol niu samting long yumi.

Yumi mas tingbaot se sistem blong stoahaos we i wok gud moa, i blong evri famle insaed long Jos blong gat wan saplae blong kaekae, klos, mo taem i posibol, blong oli gat ol narafala samting we i nid long laef. Stoahaos blong Lod, insaed long hem i gat taem, talen, skil, lav mo sore, ol tul we yumi givim wetem ful hat, mo mane blong ol fetful memba blong Jos. Ol risos ia oli stap blong bisop i save yusum olgeta blong helpem olgeta we oli stap long nid.

Mifala i stap askem evri Lata-dei Sent blong oli lukaot gud taem oli stap mekem ol plan blong olgeta. Oli mas laef long simpol fasin, blong stap longwe long bigfala kaon, o fasin blong mekem kaon we i no nid. Plante pipol oli save gotru long strong win blong nogat mane sapos oli gat wan saplae blong kaekae mo klos mo oli no gat kaon. Tedei, mifala i faenem se plante oli stap folem kaonsel ia, be long narafala wei: oli gat wan saplae blong kaon, mo oli no gat kaekae.

Mi ripitim wanem we Fas Presidensi i bin talemaot sam yia we i pas:

“Ol Lata-dei Sent oli bin kasem kaonsel blong plante yia blong oli rere from ol hadtaem taem oli stap putum smol mane i stap long saed. Taem olgeta Sent oli mekem hemia, i mekem se oli gat wan bigfala sekiuriti mo wan gudfala laef. Evri famle i gat responsabiliti blong lukluk long ol nid blong hem olsem we oli save mekem.

“Mifala i leftemap tingting blong yufala, long weaples yufala i stap long hem long wol ia, blong yufala i mas rere from ol samting we bae oli kam agensem yufala taem yufala i lukluk long faenens blong yufala. Mifala i askem strong long yufala blong no spendem tumas mane; yufala i mas gat disiplin long wanem samting yufala i stap pem blong stap longwe long kaon. Pemaot kaon blong yufala kwiktaem, olsem we yufala i save mekem, mo mekem yufala i kam fri long fasin ia blong stap slef. Sevem smol mane evri taem, blong mekem se, sloslo, yufala i putum wan gudfala mane i stap long saed.”¹

?Yumi rere, o no, from ol imejensi long laef blong yumi? ?Yumi stap mekem skil blong yumi i kam gud moa? ?Yumi lukluk long nid blong famle long laef long fasin blong wokhad? ?Yumi gat kaekae mo klos we yumi storem i stap? ?Yumi stap obei long ol komanmen blong God? ?Yumi stap mekem folem ol tijing blong ol profet? ?Yumi rere blong givim samting blong yumi i go long olgeta we oli pua, olgeta we oli stap long nid? ?Yumi stanap stret i stap long fes blong Lod?

Yumi stap laef long ol taem blong trabol. Plante taem, yumi no save fiuja blong yumi; from hemia, i wok blong yumi blong rere from ol samting we yumi no save long olgeta. Taem we taem blong mekem desisen i kam, taem blong stap rere i pas finis.