Ua ineine anei tatou ?

I roto i te tuhaa oire i reira vau i te oraraa e te taviniraa i te hoê taime, ua faatupu te Ekalesia i te hoê opuaraa ohipa faaamu moa, e mau taata tamoni ore ana‘e te mau rave ohipa i roto no roto mai i te mau paroisa no te reira vahi. I te rahiraa o te taime ua riro te reira ei opuaraa manuïa maitai, tei horo‘a i te fare haaputuraa maa a te episekopo e rave rahi tauasini huero moa apî e e rave rahi hanere kilo moa tei faaineinehia. I te tahi râ mau taime, aita te feia faaamu moa tamoni-ore o te oire e farii noa i te opupu i ni‘a i te rima, e tupu atoa râ te mana‘o e te aau tapitapi.

Ei hi‘oraa, te haamana‘o nei au i te taime a amui ai matou i te feia apî tamaroa no te Autahu‘araa a Aarona no te rave i te ohipa tamâraa. E nahoa rahi tei ta‘iruru mai ma te oaoa e te itoito i te vahi faaamuraa moa, e ma te vitiviti, ua hutihuti, ua haaputu e ua tutu‘i i te mau aihere e te mau pehu huru rahi. I te marama o te auahi, ua amu matou i te mau « hot dogs » e ua haapopou matou ia matou iho no te ohipa maitai i ravehia.

Te vaira râ hoê noa iho fifi rahi. Ua haafifi te maniania e te auahi i na rahiraa e 5 000 moa ofaa, e te rahiraa o ratou ua faaea ta‘ue noa i te ofaa i te huero. I muri mai ua farii matou ia noaa noa te tahi aihere rii, ia rahi mai â te ofaaraa huero moa.

Aita roa i mo‘ehia i te hoê melo no te Ekalesia o tei tauturu i te haamaitairaa i te feia i roto i te ati, e aore râ, i tatarahapa i te ohipa tei tupu. Te faahoturaa, te haaputuraa, te faarava‘iraa ia’na iho e te opereraa na vetahi ê, e ere te reira i te ohipa apî no tatou.

Ia haamana‘o noa tatou e te rave‘a maitai a‘e no te fare haapu‘eraa oia hoi no te mau utuafare atoa i roto i te Ekalesia, ia vai ïa te hoê haaputuraa maa, te ahu, e mai te mea e nehenehe, te tahi atu mau mea e hinaarohia no te oraraa. I roto i te parau no te fare haapu‘eraa a te Fatu, te vaira ïa te parau no te taime, te mau taleni, te mau aravihi, te aroha, te materia haamo‘ahia e te mau rave‘a pae moni a te mau melo haapa‘o maitai o te Ekalesia. E roaa teie mau faufaa i te episekopo no te tauturu i te feia i roto i te ati.

Te a‘o nei matou i te feia mo‘a atoa no te mau mahana hopea nei ia vai ara noa i roto i ta ratou faanahoraa, ia riro ei taata haaputu i roto i to ratou oraraa, e ia haapae i te tarahu rahi e aore ra te faufaa ore. E rahi atu te taata e nehenehe e pa’uma i ni‘a i te mau are miti puai i roto i to ratou oraraa i te pae faufaa mai te mea e, te vaira ta ratou haaputuraa maa e te ahu e aita e tarahu. I teie mahana te ite nei matou e rave rahi tei pee i teie a‘o, ua huri râ te arata‘iraa : te vaira ta ratou haaputuraa tarahu e aita e maa.

E tapiti atu vau i te parau ta te Peresideniraa Matamua i faahiti e rave rahi matahiti i teie nei :

« Ua a‘ohia te feia mo‘a i te mau mahana hopea nei e rave rahi matahiti, ia faaineine no te tau ati na roto i te tuuraa i te tahi moni i te hiti. E horo‘a mai te reira i te parururaa rahi e te vai-maitai-raa. E hopoi‘a na te utuafare tata‘itahi ia haapa‘o i to’na iho mau hinaaro, mai ta’na e nehenehe.

« Te faaitoito nei matou ia outou, noa’tu te vahi i te ao nei tei reira outou i te nohoraa, ia faaineine no te tau fifi na roto i te hi‘opo‘araa i te huru o ta outou faufaa moni. Te a‘o atu nei matou ia outou ia faaau i ta outou haamau‘araa ; ia haavî ia outou iho i roto i ta outou mau hooraa mai no te ape i te mau tarahu. A aufau vitiviti i ta outou mau tarahu mai te mea e, e ti‘a ia outou, e a faati‘amâ ia outou i taua tîtîraa ra. A haaputu tamau i te tahi moni i te hiti no te faatupu maite i te hoê haaputuraa moni ».¹

Ua ineine anei tatou no te tau rû i roto i to tatou oraraa ? Ua haamaitai-roa-hia anei to tatou mau aravihi ? Te ora ra anei tatou ma te ara maitai ? Te vaira anei ta tatou haaputuraa tao‘a ? Te haapa‘o ra anei tatou i te mau faaueraa a te Atua ? Te tau‘a ra anei tatou i te mau haapiiraa a te mau peropheta ? Ua ineine anei tatou ia horo‘a i ta tatou maa na tei vĕvĕ, e tei ati ? Ua tu‘ati anei tatou e te Fatu ?

Te ora nei tatou i roto i te mau tau hepohepo. Pinepine te ananahi i te ite-ore-hia ; no reira, e mea ti‘a ia tatou ia faaineine no te mau mea papû ore. Ia tae ana‘e mai te tau no te faaotiraa, ua ma‘iri ïa te tau no te faaineineraa.