Parau poro‘i na te mau tuahine hahaere, Tetepa 2014
Te misioni hanahana a Iesu Mesia : Tamahanahana
A tuatapapa na roto i te pure i teie mau parau e a imi ia ite eaha te faaite atu. Nahea te maramaramaraa i te oraraa o te Faaora e i Ta’na misioni e faarahi ai i to outou faaroo Ia’na e e haamaitai ai i te feia ta outou e haapa‘o nei na roto i te tere hahaereraa ? No te mau haamaramaramaraa hau atu, a haere i niʻa i te reliefsociety.lds.org.
Te Faaroo, Te Utuafare, Te Totauturu
Ua fafau mai Iesu Mesia « Eita vau e vaiiho otare noa ia outou, e ho‘i mai â vau ia outou nei » (Ioane 14:18). E horo‘a mai Oia ia tatou i « te unauna ei mono i te rehu auahi, e te mono‘i ra i te oaoa ei mono i te oto » (Isaia 61:3). No te mea ua mamae te Mesia i te Taraehara no tatou tata‘itahi, eita tatou e mo‘ehia Ia’na. Ua parau o Linda S. Reeves, tauturu piti i roto i te peresideniraa rahi o te Sotaiete Tauturu e, « ua amo to tatou Faaora i ni‘a Ia’na Iho… i to tatou mau mauiui e to tatou mau ati, e ti‘a ai Ia’na ia ite e, eaha to tatou mana‘o, e e nahea ia tamahanahana ia tatou ».1
Te iteraa e, e tamahanahana te Mesia ia tatou, e nehenehe te reira e horo‘a mai ia tatou i te hau, e e faaûru ia tatou ia pee i To’na hi‘oraa na roto i te aupururaa ia vetahi ê. Ua parau te peresideni Thomas S. Monson e, « na to tatou ite i te evanelia e to tatou here i to tatou Metua i te Ao ra e i to tatou Faaora e tamahanahana e e paturu ia tatou e e hopoi mai i te oaoa i to tatou aau mai te mea e haere afaro noa tatou e e haapa‘o noa i te mau faaueraa. Aita hoê mea i roto i teie nei ao e nehenehe e aro mai ia tatou ».2
No roto mai i te mau papaʻiraa moʻa
Ioane 14:18, 23; Alama 7:11–13; Te Parau Haapiiraa e te Mau Parau Fafau 101:14–16
No roto mai i to tatou aamu
Ua haapii te tuahine Elaine L. Jack, te ahuru ma piti o te peresideni rahi o te Sotaiete Tauturu : « I roto i te hahaereraa a te mau tuahine, e haere atu tatou e farerei i te tahi e te tahi. E pinepine te mau rima i te parau i te mea ta te reo e ore e parau. E rave rahi te itehia i roto i te hoê tauahiraa mahanahana. E faatahoê te hoê ataataraa amui ia tatou. E faahaumarû te hoê taime faaiteiteraa i to tatou mau varua. Eita e nehenehe ia tatou e haamama i te mau taime atoa i te hopoi‘a a te hoê taata tei pe‘ape‘a, e nehenehe râ ta tatou e faateitei ia’na ia nehenehe ia’na ia faaoroma‘i i te reira ».3
Ua itehia i to tatou mau tuahine pionie no te Sotaiete Tauturu « te puai varua i roto i te here e te aroha o te tahi e te tahi. … A faaruru ai ratou i te mau tamataraa o te ma‘i e o te pohe, ua pure ratou ma te faaroo no te tahi e te tahi e ua tamahanahana te tahi i te tahi. Ua papa‘i o Helen Mar Whitney e, ‘ua tere te here o te Atua mai tera aau i tera aau, e tae noa’tu, e au ra e, aita to te diabolo e puai faahou i roto i ta’na mau tutavaraa no te ti‘a mai i ropu ia matou e te Fatu, e i te tahi mau taime, ua taraihia te mau tara o ta’na mau ohe ino’ ».4
© 2014 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/14. Parau faati‘a no te iritiraa : 6/14. Iritiraa no Visiting Teaching Message, September 2014. Tahitian. 10869 895
A feruri i teie
Nahea te haaroaroaraa e, e haamana‘o te Fatu ia outou, i te hopoi mai i te tamahanahana ia outou ?