Hem i lavem Yu

Mi bin stap sidaon long kona blong selestiel rum long saed blong piano long taem we oli bin dediketem Memfis Tenesi Tempol. Presiden Jemes E. Fost (1920–2007), wan memba blong Fas Presidensi long 1995 kasem 2007, i bin kam blong dediketem tempol ia. Hem i bin kam wetem sam nara lida we oli bin sidaon biaen long maekrofon. Wan lokol kwaea blong Jos i bin kam insaed mo stanap biaen long olgeta.

Wan yang woman we mi bin visiting tija blong hem, i bin wan memba blong kwaea ia. Truaot long miting, mi bin prea se bae hem i kasem wanem we hem i bin kam from. Hem i bin talem long mi se hem i bin kam long tempol dedikesen long dei ia blong faenemaot wea nao ples blong hem long saed blong Lod. Hem i bin komitim ol sin we i series bifo, mo nomata hem i bin sakem sin, hem i traehad yet blong filim gud abaot hemwan mo tu blong filim gud taem hem i singsing kwaea.

Mi stap luk i go long Presiden Fost, wetem filing ia se hem olsem wan representativ blong Lod long Fas Presidensi, bae i save mekem wan samting. ?Be olsem wanem nao bae mi talem long hem, ?mo olsem wanem nao hem i save mekem wan samting? Afta long miting, hem i stap kamaot long rum olsem we hem i bin kam tru long hem, mo bae i nogat man blong mitim hem, o sekhan, o toktok long hem. Mi bin andastanem se hem i bisi mo gat rod bakegen blong folem, be yet mi prea.

Presiden Fost, afta tingting plante, i bin lukluk long mi blong smol taem—ol masel long aebrao blong hem i bin fas gud tugeta. Taem miting i finis, wan hapi filing i bin kavremap fes blong hem wetem laet.

Hem i bin lukluk mi bakegen mo semtaem afta hem i bin stanap, tanem raon, mo pusum han blong hem i kam gud long fored. Hem i poin stret i go long fren blong mi. Afta hem i talem strong mo laod, “!Lod i lavem yu!”

Aksen blong Presiden Fost i bin smol mo ol samting we i no strong, be i bin fulap long paoa we i save kam nomo tru Tabu Spirit we i talem long hem wanem we mi no save mekem. Smol toktok ia nomo i bin blesem fren blong mi mo gohed blong sastenem fet blong mi se Lod i save evri samting abaot ol laef blong yumi mo “tru long ol smol mo ol samting we i no strong, ol bigfala samting i kam blong hapen simpol samting” (Alma 37:6).