2014
Prea blong mi long Not Si
Oktoba 2014


Prea blong mi long Not Si

Olaf Tolif Jensen, Yuta, YSA

Pikja
drawing for LDS Voices

Ol pikja oli kam long Bradli H. Klak

Taem mi bin gat 17 yia, mifala i bin stap long wan aelan long Saot blong Nowei we oli singaotem Andabeloy. Papa blong mi i bin konvet i kam long Jos long Andabeloy, mo mi mi bin baptaes long solwota longwe.

Mi bin wan man blong kasem fis long taem ia mo mi bin eksperiensem gud olsem wanem blong draevem wan bot. Papa blong mi i putum mi blong lukaotem ol taksi seves bot we olgeta we oli stap long eria ia oli yusum.

Wan dei long 1941, mifala i bin kasem wan telefon kol we i kam long dokta long Flekefjod, blong go long not. Wan woman we i stap kolosap tu aoa longwe long bot, i bin sik tumas mo nidim blong go long hospital. Dokta Hofman i bin askem sapos mi save tekem hem i go luk woman ia, be papa mo mama blong mi oli bin wari from wan strong win we i stap kam tru long Not Si. Mifala i bin disaed blong prea, mo askem Papa long Heven wanem blong mekem. Mifala i bin kasem wan ansa se mi mas go nomo.

Taem mi lego Tryg, 10 mita fising bot blong mi i go long solwota, weta i bin nogud mo ol wef i bigbigwan. Afta we mi pikimap dokta, mi stat blong tekem wan smol rod bitwin ol ston go kasem open si. Mifala i sapos blong travel i go lon wan komiuniti kolosap nomo long not blong Lista, hemia long saot blong Nowei we I gat fulap ston long saed blong solwota—wan ples we pipol i save long hem olsem ples blong strong win mo ol sip i stap rek long ples ia.

Mi stiarem bot ia i go tru long strong win ia kasem we mifala i kasem wan ples we i gat ol bigfala ston we i kolosap 12 mita narasaed, we i tekem mifala kasem ples we mifala i wantem go long hem. Ol wef i hae tumas we mi nomo save kontrolem bot ia tru long rod ia, from oli pas tru long rod ia mo fas long ol ston.

“Bae yumi mekem wanem?” dokta i askem tru long strong win ia.

“Yumi mas prea from,” mi ansa.

Mi stop mo prea, askem Papa long Heven blong givhan. Stret afta we mi talem amen, wan klia ansa i kam long mi. Semtaem mi tingbaot wan stori blong wan olfala man blong fising we i bin talem long mi. Hem i bin stap fising long sem eria ia tru wan rabis taem mo nomo save go so. Taem hem i stap wet aotsaed long rabis taem ia, hem i bin luk wan wei we ol wef ia i stap kam long hem. Afta we tri bigfala wef i kam pas, i gat wan smol taem we ples i kwaet i kam afta—we i inaf blong hem blong go insaed long smol rod ia.

Mi bin go fising plante taem long eria ia be mi neva luk wan wei we wef i stap kam long hem. Be, mi bin karem bot i go long fored blong smol rod ia, mo wet mo stap luk taem ol tri bigfala wef ia i kam insaed. I tru olsem oli talem, semtaem afta ples i kwaet. Mi lego bot i flot i go fored long ol wota ia we i kwaet i go tru insaed long bei mo karem Dokta Hofman i go sef long so. Hem i hariap i go long sik woman ia mo mi bin wet long hem long bot, mo talem tangkyu long Papa long Heven we i bin ansarem prea blong mi.

Taem dokta i bin kambak wan aoa afta, hem i talem, “!Yumi bin sevem laef blong hem!”

Afta we mi harem glad long nius ia mo wetem moa gud weta, mi bin draevem gud bot ia i go hom.

Mi talem witnes se taem yumi nidim help, yumi mas prea. Mi save se Papa long Heven bae i ansa.

Ol wef i hae tumas we mi nomo save kontrolem bot ia tru long rod ia.