Tangkyu, Brata Jei

“Tumoro hem i Sandei,” mi talem long gel blong mi we i gat faef yia taem hem i kam sidaon long leg blong mi. Wan bigfala smael i kavremap fes blong hem.

“!O!, i gud,” hem i talem. “Afta bae mi save luk Brata Jei.”

Fasin blong talem tangkyu i fulumap hat blong mi. Hamas mi filim blong talem tangkyu from wan tija we i gat lav, mo kea we i mekem se muf blong mifala i go long wan niufala wod i no bin had. Livim hom blong mifala long Midwes Amerika mo go stap 2,173 kilomita long we, i bin had blong ful famle be speseli nao blong smol wan blong mifala, Sisen. Hem i wan pikinini blong sem, hem i fraet long evri niu samting mo stap wari long olsem wanem blong atendem jos long fas wik blong mifala long niufala wod.

Brata Jei, wan naes man we i komitem hem, i gat long hem ol stret fasin blong mekem man i laf mo glad we i save winim tingting blong Sisen. Long fas Sandei, hem i bin go daon stret long saes blong hem, holem han blong hem, lukluk long ae blong hem mo talem, “Ale, swithat. Bae yu gat fan long klas blong yumi.”

Taem ol wik i pas, Sisen i stap luk fored from Sandei bitim eni narafala dei blong wik. Taem mifala i kasem jos nomo, be hem i go bitim evri memba from tija blong hem. Bae hem i smael taem hem i talem alo.

Truaot ol yia, Brata Jei bae i tingbaot wanwan studen wetem ol smol presen blong holidei mo ol betdei. Taem betdei blong Sisen i stap kam kolosap, man we hem i wantem tumas blong invaetem long pati blong hem bae hem i Brata Jei.

?Hem i save olsem wanem gel blong mifala i bin tekem hem long laef blong hem? ?Bae hem i save traem faenemaot hamas ol toktok mo aksen blong hem i bin mekem grup blong hem blong faef yia Praemeri studen i bilivim gud hem? Bae hem i save hamas i minim long mi, olsem wan mama, blong gat hem long laef blong gel blong mi?

Afta, Sisen i muv i go antap long klas blong Brata Edwod, mo gudfala eksperiens blong Praemeri i gohed. Mi wantem talem tangkyu tumas long hamas evri man mo woman we oli kea, rere gud mo gat tingting i stap daon, we oli bin gat wan gudfala paoa long saed blong spirit long laef blong Sisen.

Ful famle blong mifala i bin kasem blesing tru ol wanwan man mo woman we oli bin komitim olgeta taem oli bin givim seves long mifala long rod blong kam antap long saed blong spirit. Mi tingbaot wan top Skaotmasta, wan kworom advaesa blong ol pris we i safa long taem, wan Seminari tija we i gat fasin blong save wet long taem, wan nambawan Yang Woman presidensi, mo wan bisop we i kea.

Blesing olsem we famle blong mifala i bin kasem, mi save se i no mifala nomo. “Brata Jei” i save plante man, from i gat plante brata mo sista we oli bin komitim olgeta blong givim seves we i bin tajem ol laef blong ol famle olsem mifala. Mifala i talem tangkyu tumas from spirit blong olgeta, komitmen, fasin blong rere, mo lav blong olgeta.

Tangkyu long ol plante hadwok wokman truaot Jos we oli stap helpem famle blong mifala.