Thawj Pawg Thawj Tswj Hwm tsab Xov, Plaub Hlis Ntuj 2015
Thawj Tswj Hwm Monson Hais Kom Peb Ua Siab Loj
Thawj Tswj Hwm Thomas S. Monson tau qhia hais tias peb yuav tsum xaiv ua tej yam txhua lub sij hawm.
Xwv kom peb xaiv tej yam zoo, nws ntuas peb kom peb ua siab loj—”ua siab loj hais tsis yog, ua siab loj hais yog. Tej yam uas peb xaiv yeej yuav hloov peb lub neej tom ntej.”1
Los ntawm tej yam uas Thawj Tswj Hwm Monson hais, nws ua rau Haiv Neeg Ntseeg hauv Hnub Nyoog Kawg nco qab tias lawv yuav tsum ua ruaj nrees ua qhov ncaj ncees, tiv thaiv lawv txoj kev ntseeg, thiab tawm tsam neeg ntiaj teb uas xyeej tsis yuav tej ntsiab cai thiab kev cai uas nyob mus ib txhis.
Nws hais tias, “Vajtswv yeej hu kom peb txhua tus ua siab loj tsis tu tsis tseg. Nws ib txwm zoo li ntawd; nws yeej yuav zoo li ntawd.”2
Vajtswv Pom Zoo rau Kev Ua Siab Loj
“Peb yeej yuav raug kev ntshai, raug thuam, thiab muaj neeg uas tawm tsam peb. Cia peb—peb txhua tus—ua siab loj tsis ua raws li tej yam uas coob tug pom zoo, ua siab loj ua raws li peb tej ntsiab cai. Kev ua siab loj, tsis yog kev ua kom sib haum xwb, yuav ua rau Vajtswv zoo siab pom zoo rau peb. Kev ua siab loj rais los mus ua ib qho txiaj ntsim uas muaj nuj nqis thiab tsim nyog heev thaum peb xav tias kev ua siab loj yog kev txaus siab raug kev tuag li ib tug txiv neej thiab kev txiav txim siab tias yuav ua neej zoo. Thaum peb ua neej mus tom ntej, siv zog ua neej raws li peb yuav tsum ua, peb yeej yuav txais kev pab los ntawm tus Tswv thiab Nws tej lus yuav nplij peb lub siab.”3
Nyiaj Mus Nrog Kev Ua Siab Loj
“Kev nyiaj mus tom ntej txhais li cas? Kuv nyiam kev txhais lus no: nyiaj mus nrog kev ua siab loj. Tej zaum nej yuav tsum ua siab loj thaum nej ntseeg; yeej yuav tsum muaj tej lub sij hawm thaum nej mloog lus. Yeej yuav tsum ua siab loj thaum nej nyiaj mus txog hnub uas nej yuav tas sim neej no.”4
Ua Siab Loj Sawv Khov Kho rau Qhov Tseeb
“Xav kom nej cia li ua siab loj sawv khov kho rau qhov tseeb thiab kev ncaj ncees. Vim peb lub sawm fem khiav nrawm mus deb ntawm tej kev cai thiab ntsiab cai uas tus Tswv tau muab rau peb, peb yeej yuav tsum tiv thaiv tej yam uas peb ntseeg. Yog tias nej zaj lus tim khawv tsis ruaj khov kho, ces yuav nyuaj rau nej nyiaj taus tej lus thuam ntawm cov uas tawm tsam nej txoj kev ntseeg. Thaum nej zaj lus tim khawv txog txoj moo zoo, tus Cawm Seej, thiab Leej Txiv Saum Ntuj Ceeb Tsheej ruaj khov kho, ces nej zaj lus tim khawv yuav pab nej tas nej lub neej.”5
Yuav Tsum Ua Siab Loj Coj Ncaj Ncees
“Tej zaj uas lawv tshaj tawm hauv TV, movie, thiab lwm yam [niaj hnub no] feem ntau tawm tsam tej yam uas peb xav kom peb cov me nyuam mloog thiab ua raws li. Tsis yog peb yuav tsum qhia kom lawv ua raws nraim li cov lus qhuab qhia xwb tiam sis peb yuav tsum pab lawv nyob ruaj nrees, txawm yog lawv raug dab tsi los xij. Peb yuav tsum siv sij hawm ntau thiab siv zog ntau—thiab xwv kom peb pab tau lwm tus, peb yuav tsum ua siab loj coj ncaj ncees kom tiv tau kev phem uas peb pom hauv qhov txhia chaw.”6
Thov Kom Peb Ua Siab Loj Tas Mus Li
“Thaum peb ua neej nyob txhua hnub, lwm tus yeej yuav sim peb txoj kev ntseeg. Tej lub sij hawm yus muaj neeg nyob ib puag ncig tiam sis yus nyob ib leeg ntseeg tias tej yam ntawd tsis tsim nyog ua. …
“Thov kom peb yuav ua siab loj thiab npaj siab sawv ruaj nrees rau peb txoj kev ntseeg, thiab yog peb nyob ib leeg xwb, thov kom peb yuav ua siab loj, thiab cia qhov uas peb paub tias peb yeej tsis nyob ib leeg thaum peb sawv nrog peb Leej Txiv Saum Ntuj Ceeb Tsheej txhawb peb lub siab.”7
(c) 2015 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv : 6/14. Pub txhais ua lus Hmoob: 6/14. Kev txhais First Presidency Message, April 2015. Hmong. 12584 295
Qhia los ntawm tsab Xov No
Tej zaum koj yuav xav hais kom cov uas koj qhia xav txog ib lub lim tiam tom ntej—nyob hauv tsev, ntawm qhov chaw ua hauj lwm, hauv tsev kawm ntawv, los yog hauv lub tsev koom txoos—uas lawv yuav tsum ua siab loj thiaj ua tau. Tej zaum lawv yuav tsum kov yeej ib qho uas lawv ntshai, nyiaj ib qho uas nyuaj ua, nyob ruaj nrees ntseeg, los yog txiav txim siab ua raws li ib lub ntsiab cai ntawm txoj moo zoo. Cia li caw lawv qhia txog lawv tej kev xav los yog muab sau tseg.