Ang Unang Future Father’s Day ni Steven

Gilukot ni Steven ang iyang necktie ubos sa iyang suwang samtang ang ubang mga bata sa Primary nagpraktis sa bag-ong kanta. Dili, dili gyud siya mokanta niining kantaha.

Ang amahan sa among panimalay mao ang nagdumala sa among pamilya …

Si Steven motan-aw sa bintana ug sa kisame. Siya lihokan kaayo diha sa iyang lingkuran nga mora og hapit na siya nga nagsayaw. Dili siya makakanta bisan kon gustuhon pa niya. Adunay dako ug dili komportabling butang ang miungot sa iyang tutunlan. Ang ubang mga bata sa Primary nagpadayon sa pagkanta, nagkat-on sa matag bag-ong pulong.

Uban sa kahayag sa kaalam diha sa tanan nga matarung;

Akong amahan buotan ngari nako (“Fathers,” Children’s Songbook, 209).

Mibati si Steven nga gipikpik iyang bukton. Ang iyang inahan, kinsa hilom lang nga nagtan-aw sa may pultahan sa kwarto sa Primary, hinayng mibira sa iyang bukton. Gigiyahan siya sa iyang mama padulong sa pasilyo. Nalayo sa iyang mga higala diha sa Primary, si Steven dili makapugong sa mga luha sa pagtulo. Gigakos siya pag-ayo sa iyang mama.

“Ok ra nga saputon,” miingon si Mama, gipikpik iyang likod. “Nasayud ko nga ang pagkadungog ug pagkanta niana nga kanta lisud.”

Miyango si Steven, dayon gipahiran iyang mga mata. “Dili ko gustong mokanta sa Father’s Day tungod kay wala koy amahan.” Mihilak si Steven, ug iyang gipahit ang iyang ngabil. “Dili nako gustong tawagon pa siya og Papa. Dugay na kaayo kong wala makakita kaniya, ug gani dili siya gusto nga mahimo nakong amahan.”

Naningkamot pag-ayo si Steven nga dili mohilak—apan makadungog gihapon siya nila nga nagkanta. Ang kanta nakapasakit lang gyud niya og maayo. Sama sa dihang gisulatan siya sa iyang papa nga siya ug ang iyang bag-ong asawa dili na gusto nga makakita ni Steven ug sa iyang igsoong lalaki.

Gigakos na usab siya sa iyang inahan, ug nabasa ang sinina ni Steven sa iyang mga luha. “Makig-istorya ko sa presidente sa Primary. Dili ka kinahanglan nga mokanta kon dili ka ganahan. Apan yuna pa—ako adunay ideya.” Gitutokan siya sa iyang mama. “Karong tuiga dili ta mosaulog sa Father’s Day—kita mosaulog sa Future Father’s Day!” Siya mipahiyom, ug mitutok usab si Steven sa iyang mama.

“Unsa? Isaulog ang unsa?”

“Ang Future Father’s Day—atong isaulog kon unsa katalagsaon ka ug imong igsoon nga mahimong mga amahan sa umaabut. Kita adunay mga regalo ug cake ug inyong paborito nga soft drink!”

Gihagkan si Steven sa iyang mama sa agtang ug dayon gitarong iyang necktie. “Ikaw, Steven, mahimong talagsaon kaayo nga amahan—ako na kining matag-an. Tungod kay naghunahuna na ka kon unsay imong buhaton ngadto sa imong mga anak ug nagplano kon unsa ka nga matang sa amahan sa umaabut.”

Mas naghunahuna si Steven niini, mas midako ang iyang pahiyom. Iyang gigakos ang iyang mama ug mibalik sa Primary nga mas maayo ang gibati.

Paglabay sa duha ka semana si Steven nagbarug sa atubangan sa samin, nagtarung sa iyang bag-o nga nindot nga bow tie. Gihatag kini sa iyang mama nianang buntaga isip iyang pinakauna nga Future Father’s Day! Gibitbit ni Steven ang iyang kasulatan ug miagi sa atubangang pultahan padulong sa simbahan.

Siya mipahiyom sa iyang mama.

“Malipayong Father’s Day, Ma.”

Mipahiyom iyang mama. “Malipayong Future Father’s Day, Steven.”