Mensahe sa Visiting Teaching
Balaan nga mga Kinaiya ni Jesukristo: Hiyas
Tun-i sa mainampuong paagi kini nga materyal ug tinguhaa nga masayud unsa ang angay nga ipakigbahin. Sa unsang paagi nga ang pagsabut sa balaanong mga kinaiya sa Manluluwas makapalambo sa inyong hugot nga pagtuo diha Kaniya ug mopanalangin niadtong inyong giamuma pinaagi sa visiting teaching? Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
“Himoa ang hiyas nga modayan-dayan sa inyong mga hunahuna nga walay paghunong; unya ang imong pagsalig mosamot pagkalig-on diha sa atubangan sa Dios; ug ang doktrina sa pagkapari motuhop diha sa imong kalag ingon sa mga yamog nga gikan sa langit.” (D&P 121:45).
Unsa ang hiyas? Si Presidente James E. Faust (1920–2007) miingon: “Ang hiyas sa iyang mas tugob nga kahulugan naglangkob sa tanang kinaiya sa pagkamatarung nga makatabang kanato nga maumol ang atong pagkatawo.”1 Si Presidente Gordon B. Hinckley (1910–2008) midugang: “Ang gugma sa Dios ang tinubdan sa tanang hiyas, kaayo, kalig-on sa kinaiya.”2
Sa relasyon tali sa babaye ug hiyas, si Elder D. Todd Christofferson sa Korum sa Napulog Duha ka mga Apostoles miingon: “Natawo ang mga babaye dinhi sa kalibutan dala ang piho nga hiyas, balaanong gasa nga naghimo nilang hanas sa pagsilsil niana nga mga kalidad sama sa pagtuo, kaisug, pagbati, ug pagpatahum sa mga relasyon ug kultura. …
Mga sister, sa tanan ninyong asosasyon, ang relasyon ninyo sa Dios, ang inyong Langitnong Amahan, nga tinubdan sa inyong moral nga gahum, maoy gikinahanglang unahon sa inyong kinabuhi. Hinumdumi nga ang gahum ni Jesukristo miabut pinaagi sa Iyang naka-focus nga debosyon sa kabubut-on sa Amahan. … Paningkamot nga mahimong ingon niana nga disipulo sa Amahan ug sa Anak, ug ang inyong impluwensya dili gayud molubad.”3
Dugang nga mga Kasulatan
Salmo 24:3–5; Mga Taga-Filipos 4:8; 2 Pedro 1:3–5; Alma 31:5; Doktrina ug mga Pakigsaad 38:23–24
Detalye gikan sa Thy Faith Hath Made Thee Whole, ni Walter Rane
Gikan sa mga Kasulatan
Karon, ang mahiyason nga mga babaye, puno sa pagtuo, mangayo og tabang sa Manluluwas. Sa Lucas 8 mabasa nato bahin sa usa ka babaye nga gitalinug-an sulod na napulog duha ka tuig nga dili maayo. Nagtinguha siya nga maayo sa dihang siya “miduol sa luyo ni [Kristo], ug mihikap sa borlas sa iyang saput: ug diha-diha [mitang-on] ang iyang talinugo. … Ug si Jesus miingon, May mihikap kanako: kay gibati ko nga may gahum4 nga migula kanako.” Kining mahiyasong matinud-anong babaye ug sa naghapa siya sa iyang atubangan, gisugilon niya sa “atubangan sa tanang tawo” ang hinungdan sa “iyang paghikap kaniya” ug ang iyang pagkaayo diha-diha. Ug si Jesus miingon kaniya, Anak, ang imong pagsalig nakapaayo kanimo; lumakaw ka nga malinawon” (tan-awa sa Lucas 8:43–48; tan-awa usab sa 6:17–19).
Pinaagi sa Iyang hiyas,5 Si Kristo makaayo, makahimo, makalig-on, makahupay, ug makapadasig kon kita mopili uban sa kaisug ug hugot nga pagtuo sa pagduol ngadto Kaniya.