2015
Mga Mangingisdag Tawo
Hunyo 2015


Mga Mangingisdag Tawo

Ang tanan nga midawat sa calling sa pagdumala sa Simbahan midawat sa imbitasyon sa Manluluwas nga mahimong mangingisdag tawo.

Imahe

Sa dihang bag-o pa lang mi nag-amuma sa among pamilya didto sa Hawaii, ang akong asawa ug ako mapasalamaton sa talagsaong mga Santos sa Ulahing mga Adlaw kinsa mitabang namo. Kining buotan nga mga miyembro midawat ug mitratar kanamo nga sama sa ilang kaugalingon nga pamilya. Sa pipila ka higayon ang akong batan-on nga anak nga lalaki dalhon sa ubang mga lalaki sa ward aron mangisda sa dagat. Kini nga kalihokan wala maglakip sa pagsakay og bangka apan naggamit sa karaang pamaagi sa pagpangisda nga gimugna sa mga katigulangan sa Hawaii.

Gamit ang usa niini nga pamaagi, ang usa ka hanas nga mangingisda mitikuloso nga mopilo ug moplastar sa naglingin nga pukot nga gibutangan og pabug-at libut niini. Iya dayong mainampingong dalhon ang pukot ngadto sa batoon nga bahin sa baybayon ibabaw sa tin-awng lim-aw sa tubig. Samtang ang mga isda manulod diha sa lim-aw nga bahin sa dagat, sa sakto nga panahon ug dakong kahanas, ilabay sa mangingisda ang pukot, ang pukot hingpit nga mabuksan ug sa dako nga naglingin nga porma motidlom kini sa dagat ug masikop ang nagpundok nga mga isda.

Samtang ang kahanas sa ingon niana nga mangingisda makadayeg, siya mismo makasulti nga kon walay maayong pukot nga limpyo, saktong pagkatahi, ug walay guba, ang iyang mga paningkamot walay bili. Ang sinati nga mga mangingisda nasayud nga ang ilang kalampusan mag-agad sa kahingpit sa ilang pukot ug nga ang epektibo, mabungahon nga pagpangisda dili magsugod hangtud ang mga pukot nasusi ug nahan-ay og tarung.

Kita makasabut niining baruganan diha sa orihinal nga mga Apostoles, pipila kanila mga mangingisda. Kita nakaila niining mga mangingisda sa nag-unang mga kapitulo sa Mateo, Marcos, ug Lucas, diin sila nagsalibay, nagtahi, ug naglaba sa ilang mga pukot sa dihang una nilang nahimamat ang ilang Agalon sa umaabut (tan-awa sa Mateo 4:18, 21; Marcos 1:16, 19; Lucas 5:2). Ilang gibuhi ang ilang mga pamilya ug mga pamilya sa ubang mga tawo pinaagi sa pagpangisda matag adlaw. Ang ilang swerte ug ilang pamilya nag-agad sa ilang pagpangandam ug kahanas ug sa kahingpit sa ilang mga pukot.

Sa dihang giimbitar sila ni Jesus nga “sumunod kamo kanako, ug himoon ko kamong mga mangingisdag tawo,” “dihadiha gibiyaan nila ang ilang mga laya,” “gibiyaan ang tanan, ug mikuyog sila kaniya” (Mateo 4:19, 20; Lucas 5:11; tan-awa usab sa Marcos 1:17–18).

Kadaghan naghunahuna ko niining ehemplo samtang akong gikonsiderar nga kadtong nagdumala sa Simbahan mitubag nga may samang pagtuo sa pagsunod sa imbitasyon nga “sumunod kamo kanako.” Sama sa karaang Simbahan, Ang Simbahan ni Jesukristo sa mga Santos sa Ulahing mga Adlaw gidumala sa mga propeta ug mga apostoles, kinsa mibiya sa ilang mga pukot ug mga propesyon ug nagbansay og bag-ong mga kahanas aron moserbisyo ug mosunod sa Agalon.

Mga Lider sa Katawhan

Unsay ipasabut nga mahimong “mga mangingisdag tawo”? Sa Iyang yano nga mga pulong sa pagdapit sa nag-unang mga Apostoles, ang Manluluwas mipaila sa unsay mamahimo Niyang komon ug epektibong matang sa pagtudlo—pagtudlo gamit ang mga sambingay. Siya nasayud nga kadtong gitawag sa pagsunod Kaniya nakasabut, sa pipila ka bahin, kon unsay Iyang gipasabut sa mga pulong nga “mga mangingisdag tawo.”

Si Presidente Harold B. Lee (1899–1973) mitudlo, “Ang pagkahimo nga ‘mga mangingisdag tawo’ mao ang laing paagi sa pagsulti nga ‘mahimong mga lider sa tawo.’ Busa sa pinulongan karon kita mosulti … : ‘Kon kamo mosunod sa akong mga sugo, Ako mohimo kaninyong mga lider sa katawhan.’”1

Ang lider sa katawhan mao ang tawo nga gitawag sa pagtabang sa uban aron mahimong “tinuod nga mga sumusunod … ni Jesukristo” (Moroni 7:48). Ang Handbook 2: Administering the Church miingon, “Sa pagbuhat niini, una ang mga lider maningkamot aron mahimong matinud-anong mga disipulo sa Manluluwas, magkinabuhi matag adlaw aron makabalik og puyo sa presensya sa Dios. Dayon makatabang sila sa pagpalig-on sa mga pagpamatuod sa uban ug mas maduol sa Langitnong Amahan ug ni Jesukristo.”2

Ang tanan nga midawat sa calling sa pagdumala sa Simbahan midawat sa imbitasyon sa Manluluwas nga mahimong mga mangingisdag tawo.

Mga Pukot ug Konseho

Imahe
Jesus Christ. Appearance to Fishing Apostles

Gikan sa pinakataas nga lebel sa pagpangulo sa Simbahan ngadto sa korum sa Aaronic Priesthood ug sa mga kapangulohan sa klase sa Young Women, ang mga lider giorganisar og mga konseho. Ang mga lider gitudloan nga mag-andam sa espirituhanong paagi, hingpit nga moapil diha sa mga konseho, mangalagad sa uban, motudlo sa ebanghelyo ni Jesukristo, ug mangalagad sa mga organisasyon sa priesthood ug auxiliary sa Simbahan. Dugang pa, sila modasig og panaghiusa ug panag-uyon sa Simbahan, mag-andam sa uban aron mahimong mga lider ug magtutudlo, modelegar og mga responsibilidad, ug mosiguro sa pagkamay tulubagon.3

Sama nga ang unang mga Apostoles migamit sa ilang kahibalo sa pagpangisda aron mahimong mangingisdag mga tawo, atong magamit ang mga baruganan nga makita sa ilang paggamit sa mga pukot ngadto sa mga konseho sa Simbahan. Sama sa pukot, kini nga mga konseho giorganisar ug giandam aron pundukon ang mga anak sa Langitnong Amahan—ang matag miyembro sa konseho molihok isip importante ug kinahanglanon nga bahin sa konseho. Sama sa pukot nga epektibo lang kon maayo kini, mao usab ang atong mga konseho makompromiso kon ang mga miyembro niini dili organisado, wala nakatutok, ug wala naglihok nga sila angay molihok.

Ang mga lider sa konseho mosunod sa mga ehemplo sa karaang mga mangingisda nga Apostol pinaagi sa kanunay nga pagsusi ug pagtahi niining mga “pukot.” Buhaton kini sa mga lider sa konseho pinaagi sa pahimo og regular nga pagbansay, pagdumala sa mga miting sa konseho, paghatag og sakto sa oras ug angay nga feedback ngadto sa mga miyembro sa konseho, ug paghatag og gugma, pagdasig, ug pagdayeg. Walay ikapuli sa epektibong kalig-on ug kapasidad sa pagpundok sa hustong paglihok sa mga konseho.

Ang Konseho sa Ward

Tingali ang konseho nga may dakong oportunidad sa pag-impluwensya sa indibidwal nga mga miyembro sa Simbahan mao ang konseho sa ward. Ang mga miyembro niining konseho sa tinuoray gitawag nga mahimong mga mangingisdag tawo uban sa sugo sa pagdumala sa buhat sa kaluwasan diha sa ward, sumala sa paggiya sa bishop. Sila nagpuyo ug nagserbisyo sa ilang mga ward, diin ilang maila-ila ug makauban kadtong mga tawo nga ilang pagadumalaon.

“Ang mga miyembro sa konseho sa ward naningkamot nga makatabang sa mga indibidwal sa paglig-on sa pagpamatuod, makadawat og makaluwas nga mga ordinansa, makatuman sa mga pakigsaad, ug mahimong mapahinungurong sumusunod ni Jesukristo (tan-awa sa Moroni 6:4–5). Ang mga miyembro sa konseho sa ward may kinatibuk-ang responsibilidad para sa kaayohan sa mga sakop sa ward.”4

Ang mga miyembro sa konseho sa ward adunay mahinungdanong tahas sa pagpadali sa buhat sa kaluwasan. Kon ang konseho sa ward wala maglihok sama sa gidahuman, ang buhat mohinay. Ang kapasidad sa pagpundok sa “pukot” nakompromiso, ug ang paningkamot sa konseho gamay lang og mga resulta. Apan kon ang konseho sa ward organisado ug nagtutok sa paglig-on sa mga indibidwal ug pamilya, ang resulta makapahingangha.

Sinati ko sa usa ka ward nga nanlimbasog sa dili epektibo nga konseho sa ward. Lisud sa bishop ang pagdawat sa direksyon nga makita sa Handbook 2 tungod kay siya komportable sa iyang pamaagi ug ganahan sa iyang daan nga mga sumbanan. Hinoon, human sa daghang pagtambag ug pagbansay sa mahigugmaong presidente sa stake mihumok ang kasingkasing sa bishop, mihinulsol, ug madasigong misugod sa pag-organisar sa konseho sa ward sumala sa gihatag nga instruksyon. Siya mitan-aw sa mga video sa pagbansay nga anaa sa LDS.org, siya mibasa sa mga seksyon 4 ug 5 sa Handbook 2, ug gisunod ang iyang nakat-unan.

Daling gidawat sa mga miyembro sa konseho sa ward ang mga kausaban, ug ang diwa sa gugma ug panaghiusa ilang nabati samtang sila mitutok sa paglig-on sa mga indibidwal ug pamilya. Sa kada miting, sila mogahin og panahon sa paghisgut sa mga investigator, bag-ong mga kinabig, dili kaayo aktibo nga mga miyembro, ug mga miyembro nga nanginahanglan. Sila mibati og kalooy niining mga kaigsoonan, ug ang mga milagro misugod nga nahitabo.

Ang bishop mireport nga hapit diha-diha dayon sa dihang gibuhat kining mga kausaban sa konseho sa ward, ang wala mailhi nga dili kaayo aktibo nga mga miyembro misugod na sa pagsimba. Kini nga mga miyembro miingon nga diha-diha dayon sila nadasig nga mobalik sa Simbahan. Sila miingon nga nakadawat sila og klaro ug dili malikayan nga pagbati nga sila kinahanglang mobalik sa pagpakig-uban sa mga Santos. Sila nasayud nga sila higugmaon ug gikinahanglan nila ang suporta nga matanyag sa mga miyembro.

Ang bishop mipakigbahin nako nga siya sigurado nga ang Langitnong Amahan nagpaabut lang niya nga siya mosunod sa tambag nga iyang nadawat ug sa pag-organisar sa konseho sumala sa gihatag nga instruksyon sa dili pa Niya tandugon ang kasingkasing ug hunahuna niining dili kaayo aktibo nga mga miyembro aron mobalik pagkaaktibo sa Simbahan. Ang bishop nakaamgo nga kinahanglan lang niya nga mohimo og mahigugmaon, maamumahon nga palibut para niining mga miyembro sa dili pa sila magiyahan sa Espiritu nga mobalik. Ang iyang mga pulong nakapahinumdom kanako sa kasinatian ni Pedro nga mangingisda:

“Ug sa paghisakay [ ni Jesus] sa usa sa mga sakayan, nga iya ni Simon, siya mihangyo kaniya sa pagtulak niini og diyutay gikan sa mamala. Ug siya milingkod, ug nagpanudlo sa mga tawo sukad sa sakayan.

“Ug sa nakaundang na siya pagsulti, siya miingon kang Simon, Palawod kamo, ug itaktak didto ang inyong mga pukot aron makakuha kamo.

“Ug si Simon mitubag kaniya, Ginoo, tibuok gabii namong hago ug wala gayud kamiy nakuha: apan tungod sa imong sulti akong itaktak ang mga pukot.

“Ug sa nabuhat na nila kini, ilang nakuha ang mabagang duot sa isda” (Lucas 5:3–6).

Samtang kita maminaw ug mosunod sa tambag nga gihatag kanato sa mga propeta, manalagna, ug tigpadayag niining modernong panahon—tinuod nga “mga mangingisdag tawo”—ug samtang atong inspeksyunon ug tahion ang atong mga pukot samtang nagserbisyo, ang atong kapasidad sa pagpadali sa buhat sa kaluwasan molambo pag-ayo ug kita mamahimong mga instrumento diha sa kamot sa Langitnong Amahan aron sa pagpundok sa Iyang mga anak.

Mubo nga mga Sulat

  1. Harold B. Lee, sa Conference Report, Okt. 1960, 15.

  2. Handbook 2: Administering the Church (2010), 3.1.

  3. Tan-awa sa Handbook 2, 3.2.1–5; 3.3.2–4.

  4. Handbook 2, 4.4.