Piry’eg Kristus nap’an e Kristmas

Dad nanged bo’or marunga’agen pi chathowliy ko saf, ni mus ni kar “soengaed ulane gin am, mar chathowliyed e pi saf roared nap’an e nep.”¹ Pi chathowliy nem ni woed rogon e mo’on ni dariy’ fan, woed rogon bo’or e gidii’ nima mururwel urngin e rran.

Sana yaed e pow ko e gidii’, u reb e ningyal’, day gayed e rayog roraed ningar piry’eged Kristus, machane kan thiyleg e gum’racha’raed nap’an ke bing e ma’ab ko tharmiy ma yoeg Kristus ngoraed.

I yaed e gidii’ ni, tomuren kar runga’ged e milwol ko e tamilwol ku tharmiy, kar ranoed nib papay nga Bethlehem ningar guyed riy’.²

Fapi Mo’on nib Lowaen’ i yaed e sensei ni kar biy’eged marunga’agen e wub ko en Messiah, en Fak Got. Udakaen e mafil roared, kar filed marunga’gen fapi pow nibe yib u somm’on e gargle Rok. Nap’an kar guyed, kar chuwgaed ko tabinaew roared mar milekagraed nga Jerusalem, mar fithed, “U’uw en ni kan gargelen i’ir fare Pilune ko gidii’ ni Jew?”³

Lowaen’ roraed marunga’agen Kristus gathi mus ulane babyor. Nap’an kar guyed fapi pow ko gargel Rok, kar ngongoliyed. Kar ranoed ningar pireg’ed riy’

Fapi Mo’on nib Lowaen’ i yaed e pow ko e gidii’ nibe gayed ngak Kristus udakaen e mafil nge biy’eg ko babyor. E yul’yul’ roared ngak fatin riyul’ nira fekdaed ngak Kristus ningar liyoergaed Ngak fare Pilune ko pi piline, en Tathapeg ko gidii’. ⁴

Simeon nge Anna i yow e pow ko e gidii’ nima gayed ngak Kristus udakaen fare Ya’el. Pi cha’ney nib yul’yul’ ba’adag e tiliw ma, udakean e balaynag a bich rorow nge meybil nge udakaen e yul’yul’ nge mafol, kar sapgow ngak fare rran ninge yib en Fak Mo’on.

Udakaen e yul’yul’, sobutaen’, nge mich, kar soengow mar sapgow ko fare wub ko Tahtapeg.

U tomur, e michaen’row ke fel’rogon nap’an Mary nge Jospeh ke dag e madway ngorow ni boron ra fek Nga dakaen pi denen ko gidii’.⁵

Fare chepin marung’agen e gidii’ nib yul’yul’ ulan fare Bin Be’ech e Nam kar sapgaed ko fapi pow ko gargel rok Tathapeg ngan piry’eg ulane fare Babyor ku Mormon.

Gadadba pugurraen ni fapi gidii’ nib michaen’ ngak Kristus kar thapeged e moning nge damomuw. E gidii’ nib t’uf t’uf ko pi rran nem kar feked yathin ngak e gidii’ nib michaen’ ni kar koeled ngak e ban’en nib lily. Nib riyul’, fapi gidii’ ni dar michaen’gaed kar moning gaed ni gaa’ lingan ni kar ngongoliyed e “feked yathin” ulane nam(3 Nephi 1:7). Kar moningaed ngak e gidii’ nibe michaen’ nira yib e gargle ko Tathapeg.

E puwaen’ nge fekyathin roared ke mang gaa’ ni yaedba’adag ningar thang e pogofay e gidii’ nib michaen’ ngak e Tathapeg. Fare Babyor ku Mormon ba weliy’ fatin ke buch u tomur.⁶

Fapi gidii’ nib michaen’ ulane ningyal’ nam i yaed e pow ko e gidii’ nibe piryg’eged ngak Kristus dariy’ fan e moning, sminmin, fa fananikay. Yaedma piry’eged ngak Kristus dariy’ fan reb e gidii’ nibe yoeg e moning, tugthin, fa baen ngoraed.

Machane e fananikay ko reb e gidii’ dabki muluwaen’raed fapi gidii’ nib yul’yul’ ningar piry’eged Kristus.

Nap’an re duw ney, ma nap’an re ningyal’ ney ko Kristmas, nira yoeg e tin fel’ ngodaed ningad fithed “Urrogon ningu piry’eg Kristus?”

Nap’an a ningyal’ nib mom’aw ko yafas rok, fare Pilune nib gaa’ ni David ni ke yoloey, “O Got, I gur e Got rog; u somm’on ningue Piry’egem: e ya’el rog nibe balal ni fanam, e ufin rog ma gay u tigil’.” ⁷

Sana e laniyaen’ ninge piry’eg Got i’ir e fan ni kan yoeg marung’agen David i’ir e mo’on u woed rogon e gum’racha’ Got. ⁸

Nap’an re ningyal’ ney ko Kristmas ma nap’an e ningyal’ ko duw, ninge yoeg ningad piry’eged u polo’ e gum’racha’daed nge ya’el rodad e Tathapeg nib t’uf rodad, fare Pilune ko Gapas, En nib Thothup ko Israel. E laniyaen’ ney, u gaa’ rogon, ba dag fa’an gadad gubin e chongin fare Galasia ku Yesus Kristu ko Gidii’en Got ko Tin Tomur e Rran nge fa’an gadad e gachalpen Kristus nib yul’yul’.,