President a Odzi Kan na N’apamfo Amandzɛɛbɔ, Kwakwar 2018.
Kaa No Aber Nyina
President Henry B. Eyring ne kasaa
Ɔpamfo a Odzi Kan wɔ President a Odzi Kan na n’Apamfo mu
Ana ibotum nye me esusu ehu nkɔnhyɛnyi Moroni dɛ orukrukye Mormon Nwoma no mu nsɛm a odzi ewiei no egu sika mprɛtse no do a? Nna ɔaka ɔno nko. Nna oehu ne man, no nkorɔfo, na n’ebusua dɛ wɔahwe ase. Nna ɔkõ “rokɔ aprɔw’’ wɔ asaase no do(Mormon 8:8). Naaso nna ɔwɔ enyidado, osiandɛ nna oehu hɛn mber yi! Na dza nkyɛ obotum akyerɛw nyina no, ɔtoo nsa frɛ hɛn dɛ yɛnkaa (hwɛ Moroni 10:3).
Nna President Spencer W. Kimball (1895–1985) n’enyi gye ho dɛ ɔrekyerɛkyerɛ dɛ kasafua a ohia dodow wɔ kasafua nkyerɛase buukuu mu no botum ayɛ kaa. Osiandɛ yɛnye Nyankopɔn edzi ahyɛmu no ntsi, ɔkãa dɛ, “hɛn ehiadze kɛsenara nye dɛ yɛbɛkaa’’.1
Ibotum ehu kasafua kaa no wɔ kyerɛwsɛm no nyina mu. Ber a Nephi tuu no nuanom mbanyin no fo no, ɔtoo nsa frɛɛ hɔn dɛ wɔnkaa Ewuradze ne nsɛm na wɔnkaa mbrɛ Nyankopɔn esi agye hɔn egyanom (hwɛ 1 Nephi 15:11, 25; 17:40).
N’asɛm kɛse a odzi ewiei mu no, Ɔhen Benjamin kãa kasafua kaa mpɛn esuon. Nna ɔwɔ enyidado dɛ no nkorɔfo bɛkaa “Nyankopɔn ne kɛseyɛ … na ne papayɛ na penkyɛr’’ wɔ hɔn do (Mosiah 4:11; san so hwɛ 2:41; 4:28, 30; 5:11–12).
Ber a Agyenkwa hyehyɛɛ sacrament no, Ɔtoo nsa frɛɛ N’esuafo no dɛ wondzi ngyinahɔmadze no “mfa nkaa’’ N’afɔrbɔ no (Luke 22:19). Sacrament mpaabɔ biara a emi na ɔwo bɛtse no, kasafua aber nyina dzi kasafua kaa no enyim (hwɛ N&A 20:77, 79).
M’asɛm yi yɛ ɔfrɛ, ntotɔserɛ mpo, dɛ hom bɛkaa. Nsusui ebiasa yi nye dza hom botum akaa dapɛn biara ber a hom dzi sacrament ngyinahɔmadze krɔnkrɔn no. Mowɔ enyidado dɛ wɔbɔyɛ mfaso ama hom, dɛ mbrɛ wɔayɛ ama me no.
Hom Nkaa Jesus Christ
Odzi kan, kaa Agyenkwa no. Kaa Ne nyimpa ban ber a nna Ɔwɔ asaase do, mbrɛ Osii kasaa kyerɛɛ nkorɔfo, na mbrɛ Osii kyerɛɛ ayamuyie wɔ Ne ndzeyɛɛ mu. Kaa hɔn a Odzii mber wɔ hɔn nkyɛn na dza Ɔkyerɛkyerɛe. Agyenkwa no “kyinii na Ɔyɛɛ yie’’ (Ndwuma 10:38). Ɔserɛɛ ayarfo no. Osii pi dɛ ɔbɛyɛ N’Egya ne pɛ.
Ne kɛse no, yebotum akaa akatua kɛse a Otuae, fi No dɔ mu maa hɛn, dze eyiyi hɛn bɔn ne nkekaa efi hɔ no. Ber a yɛkaa No no, hɛn pɛ dɛ yɛbɛkã No do no benyin. Yɛbɛpɛ dɛ yɛbɛyɛ ayamuyie mbordo, yɛdze bɔn bɛkyɛ mbordo, na yebenya pɛ mbordo dɛ yɛbɔhwehwɛ Nyankopɔn ne pɛ na yɛayɛ.
Kaa Dza Ihia dɛ Eyɛ no Yie
Ɔyɛ dzen dɛ ibɔdwen Agyenkwa no ho—N’ahotsew na emudziyɛ—a sɛ yɛdze hɛnho to No ho a, yɛnnkɔdwen hɛn mfom na hɛn sintɔ ho. Yeedzi ahyɛmu dɛ yebesie Ne mbrasɛm, naaso yɛtaa tɔ sin wɔ gyinapɛn a ɔkrɔn yi ho. Mbom Agyenkwa no nyim dɛ iyi besi, a ɔno ntsi na Ɔdze sacrament ayɛdze no maa hɛn no.
Sacrament no ne farbaa fi Ahyɛmu Dadaw afɔrbɔ no mbɔe ntɔyɛɛ, a bɔnkã kã ho (hwɛ Leviticus 5:5). Yɛmmfa anyɛmbowa mmbɔ afɔr bio, naaso yebotum yɛakɔ do egyaa hɛn bɔn mu. Kyerɛwsɛm no frɛ iyi “ akoma a abobɔ nye sunsum a abotow’’ afɔrbɔ (3 Nephi 9:20). Fa nnuhu akoma bra sacrament ase (hwɛ N&A 59:12; Moroni 6:2). Ber a iyɛ dɛm no, ibenya bɔnfakyɛ na iremman mmfi anamɔn kwan no a ɔsan kɔ Nyankopɔn hɔ no ho.
Kaa Mpontu no a Ereyɛ no
Ber a ihwehwɛ w’abrabɔ mu wɔ sacrament ayɛdze ber mu no, mowɔ enyidado dɛ w’adwendwen nnketsim ndzɛmba bɔn a ayɛ no nko do, na mbom obetsim wɔ ndzɛmba a ayɛ a oye no do—mber horow a atse nkã dɛ Ɔsor Egya na Agyenkwa no hɔn enyi sɔɔ wo no. Ibotum mpo agye mber kakra wɔ sacrament ber no dze aserɛ Nyankopɔn dɛ ɔmboa wo ma hu ndzɛmba yinom. Sɛ iyɛ a, mobɔ wo anohoba dɛ ibɛtse biribi nkã. Ibɛtse enyidado nkã.
Ber a mayɛ iyi no, Sumsum no ama me awerɛhyɛmu dɛ ber a meda ho nndzi mu no, meye ndɛ kyɛn dza nna metse ndeda. Na iyi ma me gyedzi dɛ, osian Agyenkwa no ntsi, mubotum ayɛ papa ɔkyena mpo.
Aber nyina yɛ mber tsentsen ara yie, na ɔkyerɛ dɛ mbɔdzembɔ no dodow no ntsim. Inyim fi suahu mu mbrɛ osi yɛ dzen dɛ edze enyidahɔ bɔdwen adze kor ho ber nyina. Naaso ɔmmfa ho mbrɛ isi sie w’anohoba dɛ ibɛkaa No aber nyina no yie, Ɔno kaa wo aber nyina.
Agyenkwa no nyim wo haw horow. Onyim dza ɔtse ber a abrabɔ mu akadwen hyɛ wo do no. Onyim mbrɛ isi hia tsirtsir, nhyira a ofi erekaa No aber nyina na iritsie No no mu ba ne—“dɛ ama aber nyina [enya] no Sunsum ma ɔnye [wo] atsena’’(N&A 20:77; woetsĩmu akã ho).
Ntsi, Ɔma wo akwaaba dapɛn biara dze ba Sacrament pon no ho, a Ɔma wo kwan bio dɛ ibɛkaa No aber nyina.
No Translation Intellectual Reserve, Inc. Wɔakora do tumdzi nyina. USA na wotsintsimii English approval: 6/17. Translation approval: 6/17. First Presidency Message, February 2018. ne nkyerɛasee. Fante. 15046 502