Kopwe Achocho ne Sinei Neminewe me An Famini

Nuku, Famini, Aninis

Rita Jeppeson me noun we fefin chon amwa ra winiti mi chiechioch nupwen ra chufengen me aea fengeni nongonongen ewe kapas allim. Nge ar chufengen mi pwan pachenong ar kukunou fengen non pekin urumotun kapas. Ina met Rita a kan sani usun noun we chon amwa pokiten mi sinei pwe ir chiechi me an churi esap chok ren an epwe “chekini” ewe etetten. Mi chommong mettoch sister ra tongeni fori fansoun chufengen, usun fetan fengen ika otei ekkoch fetin non ewe atake nupwen ekkewe semirit ra kukunou.

Elter Jeffrey R. Holland seni ewe Mwichen Ekkewe Engon me Ruemon Aposel a apasa, “Oupwe pwisin ekieki pwe ami chon tupuni ewe Samon ngeni Noun kewe. … Aupwe anean … pwe oupwe forata ew fansoun ennetin aurek non pekin kapas allim ngeni ekkewe chon ewe mwichefen, aupwe tumunu fengeni emon me emon, anisir non ren pekin ngun me inis non och napanap epwe och.”¹

Me ren Moses ewe Samon a annuku ekkewe semiriten Isreal pwe “ekkewe chon ekis ra nonnom won fonuemi. Oupwe kirikiroch ngenir ussun chok emon chienemi chon Israel o tonger ussun oua pwisin tongei kemi.” (Leviticus 19:34). Meni pwich kewe sia churir ir “chon ekis” nupwen sia keran poputani ach angang, nge nupwen sia sinei i me an famini, ach mochen epwe napeno ne “mwarei fengeni an emon me emon chou, pwe repwe tongeni pan” me netipach repwe “riri fengen non ew chok me non tong nefiner” (Mosaia 18:8, 21).

Reyna I. Aburto, Aruemonun Chon Aninis non ewe Presetenin Fin Anisi Unus, mi chechemeni nupwen a keran chok mu seni punuwan a emon minafon memper non ewe Mwichefen. “Nei kewe chon amwa ra feito non imwei,” a apasa, “me ra wato ew memefin pwe ngang mi pachenong me tong non netipei.”²