Etop eke First Presidency, Ofiong Inang ke isua 2018
Nte Nyin Ikade Iso Otokiet
Iko otode President Russell M. Nelson
Ndima ndito-eka irenowo ye iban, ami ndu ke nsuhore idem ke ndidu ye mbufo ke usenubok emi. Ke ufang usen inang emi ekebede nyin ima ibuk akwa erenowo, prophet Abasi kiet—President Thomas S. Monson. Iduhe iko emi ekpedade edomo ke ndaha ye uyama edu uwem esie. Ami nyeti ebuana ufan nyin ye esit ekom ke se enye ekekpebde mi ke nsinsi. Idahaemi ana nte nyin ise ini iso ye oyoho mbuotidem ke Obong nyin Jesus Christ, eke Ufok Abasi Esie edide enye emi.
Ke ufang usen iba emi ekebede ofuri mme odu-uwem Apostle ema eboho ke ubet enyong eke Temple Salt Lake. Do mmo ema enam oyoho ubiere, akpa, man efiak ebop First Presidency idahaemi ndien, udiana, yak ami nam utom nte Adaibuot eke Ufok Abasi. Mme iko iduhe eke mkpetingde nno mbufo se oworo ke ndinyene Ndito-ete mi—Ndito-ete emi ekamade ofuri ukpohode itie oku emi ekeyakde eno Prophet Joseph Smith ke eyo emi—ndidori ubok mmo ke ibuot mi man emek enyung esongo mi nte Adaibuot eke Ufok Abasi. Oro ekedi edisana ye enyene-utenge edinam.
Ndien oro ama akabare edi ubiong-utom mi ke ndidungore nyom mbon emi Jehovah ekebengede onim ete edi mme onoitem mi. Didie ke ami ndimek owo iba kpot nsio otu mme Apostle Duopeba eken, mmo kiet-kiet eke ami nehede ma eti-eti? Ami menehede nkom Jehovah ke ndiboro akam isong-esit mi. Ami nyoho ye ekom koro President Dallin Harris Oaks ye President Henry Bennion Eyring ema enyime ndidiana ye ami nam utom nte mme Akpa ye Udiana Onoitem ukem-ukem. President Dieter F. Uchtdorf ama afiak akada itie esie ke Eboho eke mme Apostle Duopeba. Enye ndien ama ebebem iso obo mme sanga-sanga akpan ubiong-utom eke odotde ye enye.
Ami mmetoro enye ye President Eyring ke nti utom mmo nte mme onoitem eke President Monson. Mmo enehede ekeme, esin-ifik, enyung enyene-ifiok ofuri ofuri. Nyin imenem esit ye mmo. Idahaemi mmo kiet-kiet enyime ndinam utom ke ebiet emi enehede eyom mmo.
Nte Apostle emi edide udiana ke edikpon ndaha, President Oaks nko akabare edi Adaibuot eke Eboho mme Apostle Duopeba. Nte ededi, sia ema ekot enye esin ke First Presidency diana ye ndutum eke Ufok Abasi, President M. Russell Ballard emi adianade ke edikpon ndaha, eyenam utom esie nte Udiana-Adaibuot eke eboho oro. First Presidency eyenam utom otokiet ye Eboho Duopeba man ediongo uduak Abasi enyung eda edisana utom Esie eka iso.
Nyin imeno ekom oto ke mme akam mbufo. Ekebong akam oro ke ofuri ererimbot ke ibuot nyin. Ke usenubok eme etienede usem emi President Monson ekebede efeb, ekpri eyen eren emi ekerede Benson okobong ukem akam oro. Ami nting esisit nto ke leta emi eka esie ekewetde ono esok Wendy, nnwan mi. Benson okobong akam ete, “Ete ke Enyong, sosongo koro President Thomas S. Monson eyekeme ndifiak nkokut nnwan esie. Sosongo ke obufa prophet nyin. Wam enye ndinyene uko nyung ntre ndikop ndik sia enye edide obufa prophet. Wam enye ndikori man enyene nsongidem ye odudu. Wam enye ndinyene odudu koro enye enyene itie oku. Nko wam nyin ke ofuri ini man idi nti owo.”
Ami mmekom Abasi nno ndito-nwong ntem ye mme-ete-ye-eka emi esinde-ifik ke ubiere mmo ke ndidi nti, enyene-esit ete-ye-eka—nno ofuri ete-ye-eka, andikpeb, ye mbon Ufok Abasi emi ebiomde ndidobi mbiomo ndien nko esuk enwanwam ke ofuri esit. Ke iko efen, ami ke nsuhore idem menehede nkom mbufo owo kiet-kiet.
Jehovah Ada Ibuot ke Utom emi
Nte nyin ikade iso otokiet, ami ndoho mbufo nte ekere ebanga akwa usung emi ke nte Jehovah akarade Ufok Abasi Esie. Ini emi Adaibuot Ufok Abasi ebede efeb, iduhe ndedibe nkpo kabanga owo efen eke edikotde ete anam utom ke ufang oro. Mbuba edimemek iduhe, ndisuan-etop nyom iduhe, nkokure se idu edi sung-sung edisana usung ndutum eke edida-itie, emi Jehovah ke Idemesie okonimde.
Usen utom eke Apostle kiet-kiet edi usen ukpeb ye mbengeidem nno ediwak ubiong-utom eke edidide ke ini iso. Oro eyeda ediwak isua eke utom unwam man Apostle adaha tongo ke ekpri mkpoitie ekesim akamba mkpoitie ke eboho oro. Kini oro, enye eyenyene akpa ndaha ifiok-ukpeb ke iso utom kiet-kiet emi enamde ke Ufok Abasi. Enye nko akabare emehe ye ediwak owo ke ererimbot, ke esit edide mbuk-eset, edu-edinam, usem mmo ke nte nsanga-utom adade enye akanare ererimbot ke ediwak ini. Usung edida-itie emi edi asanga-asanga ke nda-usung eke Ufok Abasi. Ami mfiokke nkpo efen eke etiede ntre. Oro ikpenaha akpa nyin idem, koro Ufok Abasi Christ edi emi. Enye inamke nkpo itiene ekikere owo.
Ami mmenam utom ke Eboho eke mme Apostle Duopeba ke idak nkani mme Adaibuot eke Ufok Abasi ition. Ami mmekut danga nte Adaibuot kiet-kiet obode eriyarare ndien ke nte adade eriyarare oro anam nkpo. Ke ofuri ini Jehovah ke eteteme ndien eyeteme onyung ono mme prophet Esie ifiok-spirit. Jehovah ada ibuot ke utom emi. Nyin emi ema ekemek ndidi ntiense nno edisana enying Esie ke ofuri ererimbot iyeka iso ndiyom man idiongo uduak Esie nyung nam uduak oro.
Edu ke Usung Ediomo oro
Idahaemi, ami ndoho mbon Ufok Abasi emi kiet-kiet nte, esanga ke usung ediomo oro. Nsinifik mbufo man etiene Andinyanga ke ndinam mme ediomo ye Enye ndien ekem onim mme ediomo oro eyebere usung ono ofuri edidiong eke spirit ye ufang emi odude ono irenowo, iban, ye ndito-nwong ke kpukpru ebiet.
Nte obufa Presidency, nyin iyom nditongo ke ndikere mbanga se utit edidide. Ke ntak emi, nyin iduhe ke temple iting iko ino mbufo mfin emi. Akpatre nkpo emi owo nyin kiet-kiet idinamde edi ndibo odudu edidiong ke Ufok Jehovah, idiana kiet nte mme ufokemana, inim ediomo emi ikanamde ke temple emi edinamde nyin idot ndibo mkpon-nkan eno Abasi—eno eke nsinsi uwem. Mme edinam-iko Abasi ye mme ediomo emi mbufo enamde do edi ukpohode ke ndida mkpeme uwem, ndo ye ufokemana mbufo, ye ukeme mbufo ke ndikan enwan eke andidiok. Ntuakibuot mbufo ke temple ye utom unwam mbufo do nno mbon-ntongo-ubon mbufo eyeno mbufo nkori eriyarare eke idem mbufo ye emem ndien eyenwam mbufo ke ndisin ifik man edu ke usung ediomo oro.
Idahaemi, edieke edide mbufo ema eworo ekpong usung oro, ami mmeda ofuri idorenyin ke esit mi ndoho nte mbok efiak enyong edi. Ke suto iyatesit, afanikong eke mbufo ekpekededi, itie odu ono mbufo ono mbufo mi, ke Ufok Abasi Christ emi. Mbufo ye emana mbufo emi mimanake kanga eyebo edidiong oto ke nkpo se mbufo enamde idahaemi ke ndifiak nyong-nka usung ediomo oro. Ete nyin Enyong amama ndito Esie, ndien Enye oyom nyin owo kiet-kiet ete ifiak inyong ika ufok itiene Enye Odu akamba utom emi Ufok Abasi Jesus Christ eke mme Ndisana owo ke Ukpere Edem Usen enyenede ndinam—ke ndinwam nyin owo kiet-kiet man ifiak inyong ika ufok.
Ami mmewut ata ima mi nno mbufo—ima emi ekekoride oto ke ediwak isua eke ami nsobode ye mbufo, mbuanade ediduk Ufok Abasi ye mbufo, nyung namde utom nno mbufo. Edisana ubiong nyin edi ndika ke ofuri mme idut, oruk, usem, ye otuowo, ndinwam ke ndibenge ererimbot nno Edidi Obong Oyoho Ikaba. Utom emi ke nyin idi-inam ye mbuotidem ke Jesus Christ, koro imediongo ete ke Enye edi ibuot. Emi edi utom Esie ye Ufok Abasi Esie. Nyin idi isungutom Esie.
Ami mmebiere ndiyak idem mi nno Abasi Nsinsi Ete nyin ye Eyen Esie, Jesus Christ. Ami mmediongo Mmo, mmema Mmo, nyung nwongo ndinam utom nno Mmo—ye mbufo—ke ofuri ibifik emi osuhode ke uwem mi. Ke edisana enyin Jesus Chrst, amen.
© 2018 otode Intellectual Reserve, Inc. All rights reserved. Ekeming ke USA. Enyime edikabare ke Iko Mbakara: 6/17. Enyimme Ndikabare: 6/17 Edikabare Etop eke First Presidency Message, March 2018. Efik. 15048 553