’Ua mo’e ’e ’ua ’itehia mai
’Ua ’ite au ē, e pāhono te Metua i te Ao ra i te mau pure. I tō mātou ’utuāfare fa’aeara’a i te fenua Helemani, ’ua haere atu mātou i te hō’ē Volksmarch i roto i tō mātou ’oire iti. Te Volksmarch i reira ïa te mau hoa ’e te mau ta’ata tupu e ’oa’oa ai ’e te tahi ’e te tahi ma te hāhaere atu nā roto i te natura. ’Ua parau tō’u nā metua ē, e nehenehe iā’u ’ia haere i mua atu i te pupu nā muri i te hō’ē ō tō’u mau hoa, ’e ’ua ha’amata māua i te haere nā ni’a i te poromu roa.
Tau minuti i muri mai ’aita i nehenehe iā’u i te ’ite i te tahi melo nō tō’u ’utuāfare. ’Ua parau atu vau i tō’u hoa ē e fa’aea vau i muri i ni’a i te poromu nō te tīa’i atu ia rātou. ’Aita i maoro roa ’aita vau i ’ite fa’ahou i tō’u hoa ’aore rā tōna ’utuāfare, ’e ’aita ā tō’u nā metua i tae mai. ’Ua fa’aea vau ’o vau ana’e i roto i te uru rā’au, ’e ’ua ri’ari’a vau. ’Ua fa’aoti a’era vau i te pure ’ia ’itehia mai au ’e te tahi ta’ata.
I te tahi atu pae o te uru rā’au, ’ua ’ite tō’u metua tāne i te Vārua Maita’i i te paraura’a iāna, « ’A haere ’e ’imi i tā ’oe tamaiti ». ’Ua ’ite ’oia ē ’ua hina’aro rahi au iāna, nō reira ’ua huri ti’a atu ’oia i muri ’e ’ua parau atu i tō’u māmā, e haere ’oia e ’imi iā’u. Tau minuti i muri iho ’ua tae mai tō’u metua tāne ma te horo atu i ni’a i te poromu i reira vau i te tīa’ira’a ’e ’ua ’ite mai ’oia iā’u. ’Ua ’oa’oa roa vau i te ’itera’a i tō’u pāpā ! I tōna paraura’a mai iā’u nō te mana’o pūai tāna i fāri’i e ’ua hina’aro vau iāna, ’ua ’ite au ’ua pāhono mai te Metua i te Ao ra i tā’u pure.
’Ua ’oa’oa roa vau i te ’itera’a ē noa atu te vāhi i reira vau, e nehenehe tā’u e paraparau atu i te Metua i te Ao ra. E tauturu mai ’oia iā’u ’ia ’ite i tō’u ’ē’a.