« ’A ’ōu’a i roto i te tahora ! »
Elvin Jerome Laceda
Pampanga, Philippines
Fa’ahōho’ara’a nā Gary Alfonson
’Ua ani mai tō’u māmā rū’au iā’u i te hō’ē mahana ’ia ’āfa’i i te tahi mā’a tāna i fa’aineine i tō’u ra metua vahine fēti’i. E avatea mahana mā’a ve’ave’a, ’e tē vai ra te tahi atu mau mea e rave rahi tā’u i hina’aro i te rave ’eiaha rā te ravera’a i te hō’ē fa’auera’a a tō’u māmā rū’au. ’Ua parau vau iāna ’ia ani atu i te hō’ē o tō’u mau taea’e fēti’i ’ia haere, ’ua mārō rā ’oia ē ’ia haere au.
’Ua mā’iri te hō’ē hora, ’e ’ua ha’amata vau i te mana’o ē ’e ti’a iā’u ’ia rave i te mea tā tō’u māmā rū’au i ani. ’Ua ’ohi au i te mā’a ’e ’ua haere atu vau i te fare ’o tō’u metua vahine fēti’i. E mea ātea roa, ’e i tō’u taera’a atu, ’aita vau i ’ōpua i te fa’aea maoro atu.
’Ua ’ite au i tō’u metua vahine fēti’i ’e tāna ’aiū e pae ’āva’e i roto i te hō’ē hāmata tei ta’amuhia i ni’a i nā tumu vī ’āpī e piti. Tei piha’i iho te mau tumu vī i te hō’ē tahora pape e tahe ra i muri mai i te fare. ’Ua haere ti’a atu vau ’ia rāua ra nō te hōro’a atu i te mā’a. ’Ua mutu ihora te mau taura o te hāmata. ’Ua marua ihora tō’u metua vahine fēti’i ’e tāna ’aiū i roto i te tahora. ’Ua ro’ohia vau i te ri’ari’a. ’Aita vau i ’ite i te ’au, ’e ’aore roa e ta’ata nā piha’i iho nō te tauturu mai. ’Aita vau i ’ite e aha te rave.
I taua iho ra taime, ’ua fa’aro’o vau i te reo o te Vārua : « ’A ’ō’ua i roto ! »
Ma te feruri ’ore, ’ua ’ō’ua vau. Te mea maita’i rā, ’ua ’ite au i te ’aiū tau tetoni noa i muri iho, ’e ’ua nehenehe i tō’u metua vahine fēti’i i te haere mai i rāpae au i te pape. I tō’u haerera’a mai i rāpae au i te pape ’e te ’aiū, ’aita i nehenehe iā’u i te ti’aturi i te mea tei tupu iho nei. ’Ua ’ō’ua vau i roto i te hō’ē tahora ’e ’aita ho’i au i ’ite i te ’au, nō te mea rā ē ’ua fa’aro’o vau i te Vārua, ’ua ora ïa māua ’e tō’u feti’i i te paremo.
’Ua ’ite au i te faufa’a ’ia ’ite ’e ’ia fa’aro’o i te ’arata’ira’a ’e te fa’aurura’a tā te Atua e hōro’a mai ia tātou nā roto mai i te Vārua Maita’i. Tē māuruuru nei au ē ’ua rave au i te pae hope’a i te mea tā tō’u māmā rū’au i ani ’e ’ia ’āfa’i atu i te mā’a i te fare o tō’u metua vahine fēti’i. ’Ua ’ite au ē e ti’a ia tātou ’ia fa’aitoito i te fa’aro’o i te mau fa’a’itera’a a te vārua ’ia nehenehe ia tātou ’ia riro ’ei mau rima nō te Atua nō te tauturu i tāna mau tamari’i.