E fa’a’ite na tātou i tō tātou ’ite nō te hō’ē Fa’aora

Te hō’ē o te mau tao’a faufa’a rahi roa e ti’a ’ia fa’ahereherehia i roto i tō tātou mau ’utuāfare ’e nō te hōro’a atu ia vetahi ’ē, o « te hō’ē ïa ’ite nō te hō’ē Fa’aora », ’aore rā nō Iesu Mesia.

Nā roto i te ’īritira’a o te tau tu’ura’a o te ’īra’a o te mau tau ’ua tae mai ïa te māramarama i ni’a i te ta’ata ’e te rahira’a o te mau rāve’a ’āpī nō teie tau. ’Ua fa’ahaere mai te reira i te tau nō te mau hāmanira’a ’e te mau mauha’a nō te natira’a, tei fa’ati’a i te tohura’a a te ari’i Beniamina ’ia tupu.

’Ei melo nō te Pupu nō te Tino ’Ahuru ma Piti ’Āpōsetolo, tei pi’ihia ’ei ’ite ta’a ’ē « nō te i’oa nō te Mesia i roto i te ao pā’āto’a nei » (PH&PF 107:23) ma te mau fa’ata’ara’a ’ohipa ta’a ’ē i roto i te mau tōmite nō te mau ’ohipa ha’aparare ’e te aura’a ’e te huira’atira, ’ua nehenehe iā’u ’ia fa’atumu i ni’a i te fa’atupura’a i teie tohura’a—e ’ia parare nā te ao pā’āto’a nei « te hō’ē ’ite nō te hō’ē Fa’aora—ma te fa’a’ohipa i te mau rāve’a ’āpī roa a’e e vai nei i roto i tō tātou mau rima.

Nā roto i te mau ’ohipa ’āpī i roto i te ’ohipa nene’ira’a ’e te hāmanira’ahia te ratio ’e te ’āfata teata i nehenehe ai i te poro’i nō te fa’aho’i-fa’ahou-ra’a mai i te parare i roto i te ao pā’āto’a. Tē ’ite nei tātou i te reira mau hōho’a, ’e tē ha’amana’o noa nei ā tātou i te reira.

I roto noa i te ārea e 10 matahiti i muri a’e i te ’Orama Mātāmua, ’e te ’āva’e hou te ’Ēkālesia i fa’anahonahohia ai, e 5.000 Buka a Moromona tei nene’ihia. Mai taua taime mai ā, hau atu i te 175 milioni Buka a Moromona tei nene’ihia.

I te mau po’ipo’i sābati ato’a, ’e nehenehe tā ’outou e fa’aro’o ’aore rā e māta’ita’i i te ha’apūrorora’a nō Te Pehe ’e te A’ora’a Parau tei fātata i te 5 000 ha’apūrorora’a. ’Ua tupu te ha’apūrorora’a mātāmua nā roto i te ratio i te matahiti 1929. ’Ua tupu te ha’apūrorora’a mātāmua nō te ’āmuira’a rahi nā roto i te ’āfata teata i te matahiti 1949.

’Ei ’ohipa māere, i te matahiti 1966 ra, ’ua ha’amata te peresideni David O. McKay (1873-1970) i te a’o nō ni’a i te mau mea e tupu mai : « Te mau mea ’āpī ’e ’itehia tei ’ī i te pūai, nō te ha’amaita’i ānei ’aore rā nō te ha’amou ānei i te ta’ata, e hōpoi’a ïa nā te ta’ata i te fa’atere i te reira mau rāve’a rārahi tei tu’uhia i roto i te rima ta’ata… ’Ua ’ī teie tau i te mau ’ati e rave rahi, mai te mau rāve’a tei ’ore i fa’ahitihia ».¹

I te matahiti 1974, ’ua fa’a’ite mai te peresideni Spencer W. Kimball (1895-1985) i tōna ’orama nō te hō’ē mahana o te tae mai : « ’Ua ha’amaita’i mai te Fatu i tō te ao nā roto i te mau… tao’a pe’e’utari e rave rahi. Tei te ra’i teitei rātou i te fa’aeara’a, ma te ha’aparare i te mau poro’i i te mau tufa’a ato’a o te fenua nei… ’Ua riro mau teie mau tao’a pe’e’utari ’ei ’omuara’a nō te mau mea e vai nei i mua i te pae nō te ha’apūrorora’a nā te ao pā’āto’a nei… Tē ti’aturi nei au ē tē hina’aro mau nei te Fatu i te tu’u atu i roto i tō tātou mau rima te mau mea tā tātou te ta’ata nei e ’ite i te tahi noa tufa’a iti ».²

Nā roto i te mau rāve’a ’āpī i roto i te ha’apūrorora’a ’e te ha’apararera’a o tē tae mai nei i muri a’e i te Itenati, e au ra ’e tē ’ite nei tātou i roto i tō tātou orara’a te tupura’a mau o te mau tohura’a a te ari’i Beniamina, a te peresideni McKay, ’e te peresideni Kimball.

Tē vai ato’a ra te hō’ē hōho’a pāpū nō te fa’a’ohipara’a i teie mau rāve’a ’āpī nō te patu i te bāsileia o te Atua i ni’a i te fenua nei. ’Ua hina’aro vau e fa’a’ite atu ’ia ’outou i te tahi mau hi’ora’a.

I te matahiti 1996, ’ua ha’amata te ’Ēkālesia i te fa’a’ohipa i te tahua itenati ’ei mauha’a nō te poro’ira’a ’e te ’āparaura’a. Mai taua taime ra, fātata e 260 tahua itenati a te ’Ēkālesia tei ha’amatahia, mai te mau tahua fātata i roto i te mau fenua ato’a i reira te mau melo o te ’Ēkālesia e ora ai, i roto i tō rātou reo tumu.

E fa’a’ite atu vau e piti hi’ora’a mātauhia nō teie mau tahua. ’A tahi LDS.org, tei ha’amauhia i te matahiti 1996, o tē fāri’i nei i teie mahana hau atu i te 24 milioni ta’ata māta’itai ’āpī i te matahiti ’e hau atu i te 1 milioni ta’ata māta’ita’i i te hepetoma hō’ē. E rave rahi mau melo e ’imi nei i te mau materia nō te ha’api’ira’a ’e te mau a’ora’a nō te mau ’āmuira’a rahi i’ō nei. Te piti o te Mormon.org ïa, te hō’ē tahua tei fa’ata’ahia nō te fa’a’ite i te ’evanelia i tō tātou mau ta’ata tupu ’e te mau hoa e ’ere te melo nō te ’Ēkālesia. Tē fāri’i nei teie tahua hau atu i te 16 milioni ta’ata māta’ita’i i te matahiti.

Hōho’a

phone with mobile apps

Hōho’a nā Getty Images

’Oia mau, tē taui ’oi’oi nei te mau rāve’a ’āpī, ma te tītau i te tauto’ora’a ’e te mau rāve’a huru rahi ’ia ’ore tātou e fa’aru’ehia mai i muri. Nā roto i te hāmanira’ahia te mau niuniu ’āfa’ifa’i ’ua tae ato’a mai ïa te mana nō te ’imi ’e ’ia ’ite i te mau ha’amāramaramara’a rahi i roto noa i te ’apu rima. ’Ua fa’anahohia te rahira’a o teie ha’amāramaramara’a i roto i te mau fa’a’ohipara’a ’āfa’ifa’i, ’aore rā « apps ». ’Ua matara te app mātāmua a te ’Ēkālesia i te matahiti 2007 ra.

’Ua rahi ïa te mau hi’ora’a nō tā tātou fa’a’ohipara’a maita’i o te mau apps nō te ha’aparare i tō tātou « ’ite nō te hō’ē Fa’aora ». E’ita vau e fa’a’ite atu i te mau mea e vai nei i roto i te mau apps e rave rahi e vai nei i tō ’outou manimani rima, tē vai nei rā te tahi mau hi’ora’a o te mau apps tei mātauhia ’e ’outou :

Tē fa’a’ohipahia nei teie mau rāve’a e mau milioni taime i te hepetoma ’e te mau milioni ta’ata.

Te aura’a mau o te reira, o te mau rāve’a roro uira ïa o te fa’ati’a i te mau ta’ata ’e te mau pupu ’ia hi’o, ’ia hāmani, e ’ia fa’a’ite i te ha’amāramaramara’a, te mau mana’o, ’e te tahi atu mau rāve’a nō te fa’a’itera’a nā roto i te mau ta’ata ’ite-’ore-hia ’e te mau tahua itenati.

I te ārea matahiti 2010, ’ua ha’amata te ’Ēkālesia i te fa’a’ohipa i te rāve’a ha’apararera’a tōtiare nō te fa’atupu i te ha’apararera’a i « te ’ite nō te hō’ē Fa’aora ». Teie te hō’ē rāve’a pūai ’e te ’oi’oi. E’ita e noa’a i te fa’aauhia atu i te vitiviti o te tauira’a.

Te hō’ē tāpa’o ’itehia nō te ha’apararera’a tōtiare o te mea ïa e ’ia mātau ’e ’aore rā ’ia maita’i ana’e te hō’ē ta’ata i te hō’ē tahua itenati, e fā mai ïa te hō’ē tahua itenati ’āpī a’e, rahi a’e ’e te maita’i a’e.

E fa’a’ite poto noa atu vau e pae rāve’a ha’apararera’a tōtiare tā te ’Ēkālesia e fa’a’ohipa nei ’ei mau rāve’a nō te ’āparaura’a:

1. Facebook, ’ua hau atu i te piti milia ta’ata nā te ao nei e fa’a’ohipa nei i te reira rāve’a. I’ō nei, tē ha’amau nei te feiā fa’a’ohipa i tā rātou iho tahua natira’a nō tō rātou mau hoa.

2. Instagram o te hō’ē ïa tahua tōtiare e fa’atumu nei i ni’a i te mau hōho’a ’e te mau hōho’a video.

3. Pinterest mai te hō’ē ïa tāpura itenati. I’ō nei e pinehia ïa te mau hōho’a tei pi’ihia « pins » i ni’a i te tāpura. E nehenehe te reira mau pins e riro ’ei mau parau ’aore rā e mau hōho’a o te fa’atupu i te fa’aurura’a.

4. Twitter o te hō’ē ïa tahua tōtiare o te fa’ati’a i te mau ta’ata ’ia hāpono ’e ’ia tai’o i te mau poro’i poto ’e 280 ta’o tei pi’ihia « tweets ».

5. Snapchat o te fa’a’ite mai ïa i te mau hōho’a ’e te mau video poto o te ore i muri mai ’aore rā i roto i te ārea e 24 hora.

’Ei ’Ēkālesia, te fa’a’ohipa nei tātou i teie mau tahua ha’apararera’a tōtiare nā roto i te hō’ē rāve’a pūai.

Tē ha’amana’o nei paha ’outou i te poro’i aroha i roto i te ’āmuira’a rahi nō ni’a i te tapineva tā Elder Jeffrey R. Holland nō te Pupu nō te Tino ’Ahuru ma Piti ’Āpōsetolo i hōro’a e rave rahi mau matahiti i teie nei.³ Nō roto mai i tāna a’ora’a, ’ua hāmanihia te hō’ē video tei fāri’ihia e hau atu i te piti milioni ta’ata māta’ita’i i ni’a noa i te Facebook ’e e rave rahi tauatini tei au, tei fa’a’ite i te mau mana’o maita’i tei fāri’ihia.⁴

Hōho’a

grandson in the cockpit

I te ’āva’e ’atete 2016 ra, ’ua pia te peresideni Dieter F. Uchtdorf i te hō’ē video i ni’a i te Instagram, ha’api’ira’a i te mau parau tumu o te ’evanelia i tāna mo’otua tamaroa Erik nā roto mai—e nehenehe tā ’outou e tu’upiri—i te piha pairati o te hō’ē manureva !⁵ E rave rahi tauatini ta’ata māta’ita’i tei ’oa’oa i te hōho’a Instagram a te peresideni Uchtdorf ’e e rave rahi mau mana’o maita’i tei fāri’ihia mai.

’Ua pia ato’a te ’Ēkālesia i ni’a i te Instagram i te ’āva’e Novema 2017 ra, te hō’ē video nō Elder Dallin H. Oaks rāua ’o Elder M. Russell Ballard o tē pāhono nei i te uira’a a te hō’ē vahine ’āpī nō ni’a i te mau tāvinira’a misionare a te mau tuahine. ’Ua hi’ohia teie piara’a hau atu i te 112 000 taime.

I ni’a i te Pinterest, ’e ’itehia ’e rave rahi mau hānere ’pins’ nō roto mai i te LDS.org ’e nā roto ato’a mai i te mau melo tāta’itahi e rave rahi, o te fa’auru ia vetahi ’ē. ’Ei hi’ora’a, e rave rahi o tē fa’a’ite nei i te mau parau a te mau peropheta—tahito ’e nō teie tau. Tē fa’a’ite ra te hō’ē pine i te hō’ē o te mau ha’api’ira’a a te peresideni Thomas S. Monson, « E rave rahi mau mea i roto i te orara’a o te tupu ’ia au i tō tātou ra huru ».⁶TWITTER

’Ua māta’ita’ihia te hō’ē ’tweet’ a Elder David A. Bednar nō te Pupu nō te Tino ’Ahuru ma Piti ’Āpōsetolo tei fa’a’itehia i te matahiti i ma’iri a’e nei i te po’ipo’i Pāta e 210 000 taime. ’Ua fa’a’ite’ite mai o Elder Bednar ē, e nehenehe te hō’ē poro’i poto ’e te ’ōhie, « ’aore ’oia i’ō nei, ’ua ti’afa’ahou a’enei ïa » (Mataio 28:6) e fa’atupu i te mana’o hōhonu o tē vai maoro mai.

I te pae hope’a, ’ua fa’a’itehia ’aita i maoro a’enei te mau hōho’a ’e te mau parau a te hō’ē o te mau poro’i a te peresideni Monson nō te Peresidenira’a Mātāmua i ni’a i te Snapchat.

Teie nei, i muri a’e i tō’u fa’a’itera’a i te mau maita’i ato’a o teie mau rāve’a ’āpī ’e tō rātou fa’a’ohipara’a ti’a, ’ua mana’o vau ’e mea maita’i ato’a ’ia tuatāpapa i te tahi o te mau ’ati tei ’āpitihia atu i te reira mau rāve’a.

E ti’a ia tātou pā’āto’a ’ia ’ara i te rahira’a taime e nehenehe e ha’amau’ahia nō te ha’apararera’a tōtiare ’e te fa’a’ohipara’a i te mau apps ta’ita’i. Tē vai ato’a nei te fa’aitira’a i te tau’ara’a parau i te tahi ’e te tahi nā roto i te fa’a’ohipara’a i te rāve’a ha’apararera’a tōtiare, o te nehenehe e fa’ataupupu i te tupura’a o te ’āparaura’a i roto i tā tātou feiā ’āpī e rave rahi.

E’ita e nehenehe e ha’afaufa’a-’ore-hia te mau ’ati tei ’itehia i roto i te mau hōho’a tano ’ore. Te rahi nei te fa’atītīra’a a te mau hōho’a faufau i roto i te tōtaiete, o tē ha’afifi nei ’e o tē ha’amāuiui nei i te mau ta’ata ’e te mau ’utuāfare e tae noa atu i roto i te ’Ēkālesia.

’Ei fa’ahope’ara’a, e hōro’a ïa vau e piti ā ’ati o te tupu mai, tei tāora i tā rāua mau ’upe’a fātata i ni’a i te mau ta’ata ato’a, e tae noa atu te feiā ’āpī tamahine ’e te mau metua vahine ’e te mau vahine fa’apoipo mileniuma. E pi’i au i teie nā ’ati ’e piti mai « te orara’a maita’i tei moemoeāhia » ’e « te mau fa’aaura’a ’i’ino ». Tē mana’o nei au ē te rāve’a maita’i roa a’e nō te tātara i teie nā ’ati ’e piti o te hōro’ara’a ïa i te tahi mau hōho’a.

I te rahira’a o te taime, te tāmata nei te mau hōho’a tei piahia i ni’a i te rāve’a ha’apararera’a tōti’are i te fa’ahōho’a i te orara’a i roto i te huru maita’i roa a’e ’e e mea pineine ra nā roto i te mau rāve’a ma’ama’a. E mea pinepine teie mau rāve’a i te ’ī i te mau hōho’a nehenehe nō te fa’a’una’una i te fare, te mau vāhi fa’afa’aeara’a fa’ahiahia, ’e te fa’aineinera’a ’ohipa rahi i te mā’a. ’Oia mau, te fifi, e rave rahi pa’i mau ta’ata e hepohepo nei nō te mea ’aita rātou i tae i te fāito nō teie huru orara’a ha’avare moemoeāhia.

’Ua fa’auruhia ta’u tamahine iramutu ’e te hō’ē ’pin’ o te faraoa « pancake » nō te mahana fānaura’a ’e ’ua tāmata ’oia i te nā reira ato’a. ’Aita ’oia i nā reira nā roto i te rū, ’ua fa’aoti rā ’oia i te fa’auru i te tahi atu mau ta’ata nā roto i te piara’a i tāna « Pinterest fail » (hi’o i te hōho’a o te faraoa pancake).

Maita’i ē, e nehenehe tā tātou ’ia ’ārearea rahi a’e ’e ’ia ha’aparuparu iti a’e i te taime tei mua ia tātou te mau hōho’a e fa’a’ite ra i te orara’a fa’ahi’o maita’i noa o te fa’atae rahi nei i te fa’aaura’a ha’aparuparu.

E ’ere teie i te hō’ē noa tāpa’o nō tō tātou nei tau, nā roto rā i te ferurira’a i te mau parau a Paulo, mai i muta’a ihora: « ’O rātou rā i te fa’afāitora’a rātou ia rātou iho…’e te fa’aaura’a rātou ia rātou iho, ’aore ïa i ’ite » (2 Korinetia 10:12).

’Ua hōro’a mai iho nei Elder J. Devn Cornish nō te Hitu ’Ahuru i te a’o tano ato’a: « Tē ha’amāuiui faufa’a ’ore nei tātou ia tātou iho nā roto i te tāta’ura’a ’e te fa’aaura’a. Tē ha’avā hape nei tātou ia tātou iho nā roto i te mau mea tā tātou e rave nei ’aore rā e ’ore e rave nei ’e nā roto ato’a i te mau  parau o vetahi ’ē. Mai te mea e hina’aro tātou e fa’aau, e fa’aau tātou e aha tō tātou huru i te mātāmua ’e i teie nei—’e ’oia ato’a, ’e aha tā tātou e hina’aro ’ia riro ananahi ».⁷

E fa’a’ite atu vau i te hō’ē o te mau parau huna a tō mātou ’utuāfare, tei ’itehia i roto i teie hōho’a ’utuafare (i ni’a i te ’api i muri mai), tei patahia i te tahi nau matahiti i teie nei, hou te taera’a mai o te rāve’a ha’apararera’a tōtiare. ’Ahani ’ua patahia te reira i teie mahana, ’ua piahia paha ia te reira, o tē fa’a’ite ra i te hō’ē ’utuāfare e maha tamāroa nehenehe ’e te peu maita’i e ’oa’oa ra i te hō’ē patara’a maita’i nō te hō’ē hōho’a ’utuāfare ’e te tā’āto’ara’a. E hina’aro ānei ’outou i te ’ā’amu mau ?

Tē ha’amana’o noa ra vau i te niuniu a tā’u vahine fa’aipoipo. « E Gary, tei hea ’outou ? Tei rāpae au mātou i te fare ’o te ta’ata pata hōho’a. ’Ua ineine pā’āto’a mātou nō te pata i te hōho’a. E ’ere i te mea ’ōhie i te fa’a’ahu, i te fa’a’āfaro ’e i te fa’aineine i te mau tamāroa. ’Ua tae mai ’oe ? »

’Ua mo’ehia iā’u ’e ’aita ā vau i fa’aru’e atura i te piha ’ohipa ! E ’āfa hora vau i te tāere, ’e ’aita roa te mau mea i tere maita’i nō tō’u ’orera’a i tae ’oi’oi mai, fātata roa te huehue.

E aha ho’i tei tupu ? ’Oia ho’i, tē horohoro ra tā’u tamaiti matahiapo nā roto i te ’āua ’e ’ua ’itehia mai iāna te hō’ē tumu ’āpara, ’ua ’ohi i te tahi mau ’āpara ’e ’ua ha’amata i te tāora haere te reira i ni’a i te tahi atu mau tamāroa. ’Ua tāora ’oia i te ’āpara i ni’a i te tua ’o te toru ’o tā māua tamāroa tei marua i raro ’e nō reira ’ua ha’amata ’oia i te ta’i.

I terā ārea taime, ’a tupu ai teie ’ohipa, ’ua pārahi te piti o tā’u tamaiti ’e ’ua huti ri’i i tōna piripou i ni’a. ’Ua ’ite te tahi atu mau tamari’i ē e mea ’uo’uo tōna mau tōtini tū’aro, e ’ere te mau tōtini nō te haere i te purera’a tā tōna metua vahine i hōro’a atu iāna ’ia ’ō’omo. ’Ua ani atu ’oia iāna, « Nō te aha ’oe i ’ore ai e ’ō’omo i tō ’oe tōtini haere purera’a ? »

’Ua parau mai ra ’oia, « ’Aita vau i au i te reira. E mea ma’ero roa ».

’E i te taime ’a paraparau ai ’oia iāna, ’ua horo tā māua tamaiti iti, e piti matahiti, nā roto i te ’āua, ’ua marua i ni’a i te tahi mea, ’e ’ua tahe te toto nā roto i tōna ihu. I teie nei, tē tōpatapata ra te toto i ni’a i tōna piriaro ’uo’uo, ’e ’ua hāharave’e (taché) roa te piriaro. I reira tō’u taera’a atu. Hō’ē ana’e rāve’a nō te fa’aora i te hōho’a e fa’ahuri i te piriaro, ma te tāhuna i te toto i te pata hōho’a.

Mai tei mana’ohia, ’a horo ’e ’a tāora ai tā māua tamaiti pa’ari i te mau ’āpara nā roto i te ’āua, ’ua marua ’oia ’e ’ua repo tōna turi ’āvae i te matie. Nō reira, i roto i te hōho’a, ’ua tu’u ’oia i tōna rima nō te tāpo’i i te repo matie.

E nō te toru o tā māua tamaiti, ’ua tīa’i ïa mātou e 20 minuti ’ia ’ore te ’ute’ute o tōna mau mata nō te ta’ira’a.

’E tei muri i teienei te hāharave’e toto i te tua ’ahu o tā māua tamaiti ’āpi a’e.Teienei te piti o tā māua tamaiti,

tei ni’a ïa tōna nā rima i tōna nā tōtini ’uo’uo tū’aro ’ia ’āfaro maita’i te mau mea ato’a.

E nō’u nei, ’o Gary, tei roto ïa vau i te fifi nō te mea nā tō’u tāere i fa’atupu i teie ’āhuehuera’a.

Nō reira, ’ia ’ite ana’e ’outou i teie hōho’a nehenehe o tō mātou ’utuāfare ’e ’ia amuamu ’outou, « E nō te aha ïa e’ita e nehenehe ia tātou ’ia ha’aputuputu i te mau mea ato’a ’e ’ia pata i te hō’ē hōho’a ’utuāfare maita’i mai tō rātou ? » ’ua ’ite ïa ’outou i teienei !

Mai tā ’outou i nehenehe e ’ite, e ti’a ia tātou ’ia ara i te mau fifi ’e te mau ’ati, e tae noa atu i te huru maita’i moemoeāhia ’e te mau fa’aaura’a ma’ama’a. E ’ere te ao i te mea ’ana’ana roa mai tei ’itehia i roto i te rāve’a ha’apararera’a tōtiare. Tē vai nei rā te maita’i rahi tei tae mai ’e o tē tae mai nā roto i teie mau rāve’a natira’a.

I te matahiti 2017, ’ua hōro’a mai te piha fa’atere nō te ’ohipa misiōnare i te ’arata’ira’a ’āpī nō ni’a i te mau rāve’a ’ōhie e nehenehe te rāve’a ha’apararera’a tōtiare e fa’a’ohipahia i roto i te ’ohipa misiōnare. E nehenehe te mau rāve’a roro uira’a e rave rahi e vai nei ’ia fa’a’ohipahia nā roto i te mau rāve’a pūai, ’ōhie, ’e te maita’i roa.

’Ua rau te mau fa’a’ohipara’a e rave rahi nō te fa’a’ohipa i te mau rāve’a ’āpī nō teie tau nā roto i te mau ravera’a tano ’e te fa’auruhia. E ti’a ia tātou ’ia rave i te mau mea ato’a nō te ha’api’i i te u’i ’āpī ’ia fa’a’ohipa parau-ti’a i te mau rāve’a ’āpī nō teie tau ’e ’ia fa’a’ara ’e ’ia pāruru i te fa’a’ohipara’a ti’a ’ore o teie mau rāve’a ’āpī ’e te mau fifi o te tupu mai. E ti’a i teie mau mea e tauturu ia tātou ’ia ha’apāpū ia tātou ’e e mea rahi a’e te mau maita’i o te mau rāve’a ’āpī i te mau ’ati o te tupu mai.

Hōho’a

pointing at tablet

Hōho’a nā Getty Images

I te taime ’a feruri ’e ’a pure hōhonu ai au nō ni’a i teie parau poro’i, ’ua ara ’oi’oi mai au i te hō’ē po’ipo’i ma te hō’ē hīmene ’e te mau parau ’ōhie o teie hīmene i roto i tō’u ferurira’a : « ’Auē ïa te nehenehe te mau ve’a o tē poro nei ia tātou i te ’evanelia o te hau ».⁸

Tā tātou poro’i e poro’i ïa nō te hau, ’e ’o ’outou ho’i te mau ve’a nehenehe o tē poro atu i te reira. E nehenehe tā ’outou e rave i te reira nā roto i te mau rāve’a ’āpī ’e te fa’ahiahia nō teie tau. Tē ora nei tātou i roto i te hō’ē ao nō te īra’a o te mau tau ma te rāve’a ’ia poro i te ’evanelia nō te hau nā roto i tō tātou mau manimani rima.

Tei ia tātou ra te mau parau a te mau peropheta tahito, o te fa’a’ite maita’i mai nei i te huru o tō tātou tau ’e te hōro’a mai nei i te ’arata’ira’a nō tō tātou tau : « E teie nei, te parau atu nei au ’ia ’outou ē, e tae mai te tau e parare ai te ’ite i te Mesia i roto i te mau fenua ato’a, ’e te mau ’ōpu ato’a, ’e te mau re’o ato’a, ’e te mau nūna’a ato’a » (Mosia 3:20).

Tei ia tātou ato’a te mau parau tei tae mai ia tātou nā roto i te heheura’a ’āpī nō teie tau, o tē parau mai nei ’e o tē hōro’a mai nei i te ’arata’ira’a nō tō tātou tau ’e tō tātou huru orara’a. Tē fa’ahiti nei au i te parau a Elder Bednar : « Tē ti’aturi nei au ’ua tae te taime nō tātou ’ei mau pipi a te Mesia ’ia fa’a’ohipa maita’i ’e ’ia manuia maita’i teie mau mauha’a fa’auruhia nō te fa’a’ite pāpū atu i te parau nō te Atua te Metua Mure ’Ore, tāna ’ōpuara’a ’oa’oa nō tāna mau tamari’i, ’e tāna Tamaiti, ’o Iesu Mesia, ’ei Fa’aora nō te ao ; ’ia poro i te tupura’a mau o te fa’aho’i-fa’ahou-ra’a-hia mai o te ’evanelia i te mau mahana hope’a nei ; ’e ’ia fa’atupu i te ’ohipa a te Fatu ».⁹

Tē ani nei au ia ’outou tāta’itahi ’ia feruri māite i tā ’outou ’ohipa ’ei mau ve’a nehenehe nō te porora’a i te ’evanelia nō te hau. ’Ia rave tāta’itahi tātou i tā tātou tufa’a nō te fa’a’ite i tō tātou « ’ite nō te hō’ē Fa’aora » i te mau fenua ato’a, te mau ’ōpua ato’a, te mau re’o ato’a, ’e te mau nūna’a ato’a. Te rāve’a maita’i roa a’e nō te rave i te reira i te hō’ē ïa ta’ahira’a i te taime hō’ē ’e nā roto i te rāve’a ta’a ’ē e au maita’i nō ’outou ’e tō ’outou ’utuāfare. ’Ia noa’a ia ’outou tāta’itahi te itoito ’ia pāpa’i, ’ia pine, ’ia au, ’ia fa’a’ite, ’ia fa’aho’a, ’ia ’tweet’, ’ia ’snap’, ’e ’ia pia nā roto i te hō’ē ravera’a o te fa’ateitei, fa’ahanahana, ’e te fa’atura i te hina’aro a tō tātou Metua Here i te Ao ra ’e o te ’āfa’i mai i te hō’ē ’ite nō te Fa’aora i tō ’outou ’utuāfare, te feiā tei herehia e ’outou, ’e te mau hoa—e tae noa atu i tō ’outou mau hoa i roto i te rāve’a ha’apararera’a tōtiare.