Te fārereira’a te ’āpōsetolo i te feiā fa’atere Katorika nō Pōrīnetia Farāni

’Ua fārerei ’o Elder Gary E. Stevenson nō te Pupu nō te Tino Ahuru ma Piti ’āpōsetolo i te feiā fa’atere Katorika nō Pōrīnetia Farāni i te ’āva’e ’ātete i ma’iri a’e nei. Nā ni’a i te i’oa o te ’Ēkālesia, ’ua pūpū atu ’oia i te mā’a o te fa’a’ohipahia e te ari’i-’epikōpo-ra’a nō te ha’amaha i te po’ia ’e te ’oto i Pōrīnetia Farāni.

’Ua ’āpitihia mai o Elder Stevenson i roto i tōna tere e te ari’i-’epikōpo Katorika nō Papeete, te ari’i-’epikopo Jean-Pierre Cottanceau, e Elder O. Vincent Haleck, peresideni nō te Ārea nō Pātifita ’e e Elder Benjamin Sinjoux, Hitu ’Ahuru Ārea.

’Ua fāri’i-poupou-hia ’o Elder Stevenson, Elder Haleck ’e Elder Sinjoux e Monseigneur Cottanceau ’e te tahi o tōna mau feiā fa’atere.

’Ua tāu’aparau rātou i te mau fifi nō te feiā ’aita e vāhi fa’aeara’a i Tahiti ’e te tītaura’a e hōro’a i te mā’a nā te feiā tei roto te orara’a i te fifi mau.

’Ua ha’apāpū atu ’o Elder Stevenson i te pāturura’a a te ’Ēkālesia nō te mau tauto’ora’a maita’i roa a te ’Ēkālesia Katorika i Pōrīnetia Farāni i te fa’a’amura’a i te feiā veve ’e te pāturura’a ia rātou nā roto i te tahi atu rāve’a tauturu huira’atira.

Tē hōro’a nei te ’Ēkālesia i te rima nā te ao ato’a nei nō te tauturu i te feiā veve ’e te feiā i roto i te fifi ma te ’āpiti atu i te Catholic Relief Services, Catholic Charities ’e te Caritas.

’Ua fāitohia te hōro’ara’a o te mā’a i te 9 000 tāra Mārite, ’ua ti’a te reira nā roto i te ō a te feiā mo’a ’e te tahi atu mau ta’ata i Pōrīnetia Farāni ’e nā te ao ato’a nei nō te ’ohipa tōtaururu huira’atira a te ’Ēkālesia.

I te mau mahana mātāmua o te ’Ēkālesia, ’ua fa’ati’a Iosepha Semita i te parau tumu nō te ’evanelia ti’amā ’e te huru fa’a’oroma’i : « Tē ti’aturi nei mātou e ti’ara’a tō mātou ’ia ha’amori i te Atua Mana Hope mai te au i tō mātou iho hina’aro, ’e e ti’ara’a ho’i tō te mau ta’ata ato’a ’ia ha’amori rātou noa atu te huru, te vāhi ’e te mea tā rātou i hina’aro’ (Te mau Hīro’a Fa’aro’o 1:11) ».

’Ua fārerei ato’a ’o Elder Stevenson ’e tāna vahine ’o Lisa i te mau melo nō Pōrīnetia Farāni.

I roto i tōna tere i Pātifita Apato’a, ’ua fārerei o Elder Stevenson i te feiā mo’a tei ha’amaita’i i tō rātou orara’a ’e tō rātou orara’a ’utuāfare nā roto i te ’amuira’a atu i roto i te mau ha’api’ira’a nō te fa’arava’ira’a iāna iho a te ’Ēkālesia. E tauturu teie mau ha’api’ira’a i te mau ta’ata ’ia fa’arava’i iāna iho i te pae vārua ’e i te pae tino, o te arata’i pinepine atu ’ia ’imi i te ’ohipa, i te hō’ē ’ohipa maita’i a’e, ’aore rā te fa’atupura’a i te hō’ē taiete na’ina’i.