’Ua hōro’a mai te Atua i tōna aroha nō te tāmarū i tō’u pe’ape’a

I te tahi taime, e ’ere i te mea ’ōhie ’ia tāvini i te hō’ē misiōni, e māu’ara’a maita’i rā.

I tō’u ho’ira’a i te fare mai tā’u misiōni atu, ’ua ’āpā atu vau i tō’u ’utuāfare i muri a’e e 18 ’āva’e ’ei misiōnare. I roto i tā’u misiōni, ’ua ha’amaita’i-roa-hia vau, ’ua vai noa tō’u Metua i te Ao ra i pīha’i iho iā’u.

I roto i tō’u nā tauira’a mātāmua e piti, ’ua au ’ore au, noa atu ē e paraparau fārani au. ’Ua fifi roa vau i te tāpe’ara’a i te mau ta’ata ’ia paraparau nō Iesu Mesia. ’Ua tauturu rahi tō’u ho’a mātāmua iā’u nā roto i tōna hi’ora’a maita’i.

’Ua vai noa te buka a Moromona iā’u ra nō te fa’a’ite i te parau pōro’i nehenehe o te fa’aho’i-fa’ahou-ra’a mai e Iosepha Semita.

Hō’ē mahana, tē rave ra vau i tā’u iho tuatāpapara’a ’e te hō’ē buka tā te misiōni i hōro’a mai nō te ha’api’i i te ’ohipa misiōnare. ’Ua ’ite mai au i te hō’ē uira’a nō ni’a i te buka a Moromona. Tē nā ō ra, e ’itera’a ānei tō ’oe nō te buka a Moromona ? E nehenehe ānei ’oe e fa’a’ite atu i tō ’oe hoa ? »

’Ua feruri au, « ’aita tō’u e ’itera’a mau ». ’Ua fa’aoti au e pure i tō’u Metua i te Ao ra ’ia hope tā’u tuatāpapara’a ’e ’ia ani ē e parau mau ānei te buka a Moromona (Moroni 10:4). ’Aita vau i fāri’i i reira iho i te pāhonora’a. ’Ua ani au i te Atua i taua ā uira’a ra i te mau taime ato’a ’a pure ai au ’e ’ua fātata roa vau i te vaiiho i te hiti.

I roto i te reira taime, tē ha’api’i ra māua hō’ē melo ’ore o tei fārerei na i te mau misiōnare e 30 matahiti te maoro. ’Ei mau misiōnare, e ani tāmau noa māua i te Atua ’ia tauturu mai ia māua ’ia ’ite e aha te fifi ’e nāhea māua ’ia tauturu i tā māua mau melo ’ore ’ia fāri’i i te hō’ē ’itera’a pāpū.

I te pae hope’a ’ua tāpe’ahia mai hō’ē tai’o mahana nō te bāpetizora’a, i te mahana nā mua a’e i tōna bāpetizora’a, ’ua niuniu mai ’oia ’ia māua ē ’aita ’oia e hina’aro ’ia bāpetizohi’a ’oia. E ha’api’ira’a tā māua ’e ’ōna ’e ’ua ani māua i te hō’ē nā ta’ata fa’aipoipo misiōnare ’ia haere mai e ha’api’i nā muri iho ia māua. Tā mātou ’ōpuara’a ’ia ta’a e aha te mau mea e fa’afifi nei iāna ’ia pe’e ia Iesu Mesia.

’Ua ui mātou e rave rahi mau uira’a nō ni’a i te buka a Moromona, ’e ’ua ’ite mātou ē ’aita tōna e ’itera’a pāpū ē ’ua hōro’a mai te Atua i te tahi ’ē atu buka nō te fa’a’ite pāpū nō Iesu Mesia.

I roto i te ha’api’ira’a, ’ua fāri’i au i te hō’ē mea i roto i tō’u ’ā’au e parau rā : « E ti’a iā’u ’ia ani i tā māua melo ’ore ē e ti’a ānei ’ia mātou e pure ’e ’ia ani e parau mau ānei te buka a Moromona ». ’Ua hina’aro vau e tāu’a ’ore i te reira mana’o nō te mea ’aita tō’u itoito i nava’i nō te rave i te mea tā te Atua i ani mai iā’u ’ia rave.

’Ua ha’amana’o vau i te pāpa’ira’a mo’a i roto i Te Parau Ha’api’ira’a ’e Te mau Parau Fafau 9:8-9 :

« ’Ārea rā, inaha, tē parau atu nei au ia ’oe ē, ’ia ’imi māite ’oe i te reira i roto i tō ’oe ’ā’au ; e ti’a ai ’ei reira ’oe e ani mai ai iā’u ’e ’ua ti’a ānei, e mai te mea ’ua ti’a ra e fa’atupu ïa vau i te ahu i roto i tō ’oe ’ōuma ; nō te reira ’oe e ’ite ai e ’ua ti’a ihoa.

« Mai te mea rā e ’ere ïa i te mea ti’a e ’ore roa e noa’a ia ’oe te reira huru ahu i roto ia ’oe ra, e ha’apōurihia rā tō ’oe mana’o e nā te reira e ha’amo’e i te mea hape i roto i tō ’oe mana’o ; nō reira, e ’ore roa e ti’a ia ’oe ’ia pāpa’i i te reira mea mo’a maori rā ’ia hōro’ahia ia ’oe e au. »

E au ra tē ha’amata ra tō’u ’ouma i te ahu roa, ’ua fātata vau i te haere i rāpae i te piha nō te inu i te pape. ’Ātīrā noa atu, ’ua ’ite au ’ua tauturu teie mana’o iā’u ’ia itoito atu ā nō te hāmama i te vaha ’e ’ia ani i tā māua melo ’ore e nehenehe ānei ia mātou ’ia pure i te reira taime ’e ’ia ani i te Atua ē e parau mau ānei te buka a Moromona.

Nā mua a’e au i te parau i te pure, ’ua ’ite au ē e parau mau te buka a Moromona nō te mea ’ua ’ite au te ahu o tō’u ’ōuma, ’e mai tā te pāpa’ira’a mo’a i parau : « Nō te reira ’oe e mana’o ai ē ’ua ti’a ihoa ».

I roto i te pure, ’ua ta’i rahi au nō te mea ’ua pe’ape’a roa vau ē ’ua ’eta’eta te ’ā’au o tā māua melo ’ore o te ha’afifi iāna ’ia ’ite i te Vārua. Noa atu rā, ’ua mauruuru rahi au nō te mea ’ua pāhono te Atua i tā’u uira’a i muri iho i te ferurira’a nō te roara’a hō’ē ’āva’e i te uira’a i muri iho : « E ’itera’a ānei tō’u nō te buka a Moromona ? » I te pae hope’a ’ua fāri’i au i te hō’ē ’itera’a pāpū nō te buka a Moromona.

’Aita vau i tai’o e hia buka a Moromona tā’u i ’ōpere i roto i tā’u tau misiōni, ’ua ’ite ra vau ē e nehenehe teie buka e taui i tō’u orara’a. ’Ua taui tō’u iho orara’a, eiaha nā mua a’e i tā’u misiōni i roto rā i tā’u misiōni. ’Ua ’ite au nāhea vau e rave i te ’ohipa e te Vārua nō te pāhono i te uira’a a te ta’ata.

Tē fa’a’ite pāpū nei au ē te buka a Moromona o te ’ōfa‘i fana ïa nō tā tātou ha’apa’ora’a. ’Ua ’ite au e pāhono te Atua i tā tātou mau uira’a. Tē vai nei tāna tārena mahana e pāhono mai rā ’oia. I te tahi taime, tē mana’o nei tātou nō te mea e tāmatara’a tō tātou, nō te mea ïa ’aita te Atua i here ia tātou. E mea hape te reira. ’Ua ’ite au ’ua hōro’a mai te Atua i te mau tāmatara’a nō tātou, ’eiaha nō te mea ’aita ’oia i here ia tātou, nō te mea rā ’ua hina’aro ’oia e tarai ’ia tātou mai te hō’ē taiamani nō te mea e mea faufa’a roa tātou nāna. ’Ua hina’aro ’oia ’ia itoito, ’ia māramarama, ’ia ha’apa’o ’e ’ia nava’i tō tātou pūai nō te ’aro i te mau tāmatara’a a Satane.

’Ua ’ite au ē nō te ’Ēkālesia ’a Iesu Mesia tātou ’e e ’ere te ’ēkālesia nā te ta’ata. E Atua temeio te Atua. Tē ani nei au ia tātou tāta’itahi ’ia pure tāmau noa i tō tātou Metua i te Ao ra ’e ’a ani e parau mau ānei te buka a Moromona. Noa atu ’ua ’ite a’e nā ’outou i te reira, ’ua parau te peresideni Henry B. Eyring : « E ani au i te Atua e parau mau ānei te buka a Moromona, ’eiaha nō te mea ’aita tō’u e ’itera’a pāpū, nō te mea rā ’ua hina’aro vau ’ia fāri’i i taua ā mau mana’o i te mau taime ato’a, e tauturu te reira iā’u ’ia ’ite i te here o te Atua ».

’Ua riro te buka a Moromona ’ei tāpa’o pāpū nō te here o te Atua nō tāna mau tamari’i.

’Ua tāvini ’o Amandine Liard i roto i te Misiōni nō France Paris mai te ’āva’e māti 2016–’āva’e ’ātete 2017. Nō roto ’oia i te pāroita Toahotu