2018
Taua po’ipo’i sābati ’ana’ana ra
April 2018


Te mau parau tumu o te ’evanelia

Taua po’ipo’i sābati ’ana’ana ra

Nō roto mai i te hō’ē a’ora’a i te ’āmuira’a rahi nō ’Atopa 2006.

I taua mahana ra, ’ua ’ōfati te Fatu tei ti’afa’ahou mai i te mau tāpe’a ’o te pohe. ’Ua ti’a ’oia i ni’a mai roto mai i te mēnema, ’e ’ua fā mai ma te hanahana ’ei Fa’aora nō tō te ao ato’a nei.

Hōho’a
Mary Magdalene at the tomb

’Ua ’ite tātou e aha te ti’a-fa’ahou-ra’a—te tāhō’ēra’a ïa te vārua ’e te tino i roto i tōna ra huru maita’i roa…

Tē ’ite ra ’outou ? Te ora i tōna ra huru mau ? ’Aita e ma’i, ’aita e māuiui, ’aita e teimaha i te ma’i tei ha’ape’ape’a tāmau noa ia tātou i te tāhuti nei ?

’Ua riro te ti’a-fa’ahou-ra’a ’ei tumu parau rahi i roto i te ti’aturira’a o te mau keritetiano…

’Ia ti’a mai rā te Fa’aora mai te mēnema mai, … ’Ua rave ’oia i te hō’ē mea ’aore roa e ta’ata e nehenehe e rave. ’Ua ’ōmutu ’oia i te ta’amu o te pohe, ’eiaha nōna noa, nō te feiā ato’a rā i ora nā—te parau ti’a ’e te parau ti’a ’ore…

’Ua hōro‘a ’oia i taua hōro’a ra nō te mau ta’ata ato’a. ’E nā roto i taua ’ohipa hanahana ra, ’ua tāmarū ’oia i te ’oto rahi e ’amu nei i te vārua o te feiā tei pohe ’e tei herehia e tātou.

Tē feruri nei au i te pōiri rahi o taua mahana pae ra ’a fa’asataurohia ai te Mesia…

’Ua aueue ihora te fenua, ’e ’ua pōiri roa…

Teie mau ta’ata ’i’ino tei tītau ’ia ha’apohe iāna, tē ’oa’oa nei ïa rātou…

I taua mahana ra, ’ua mahae a’era te pāruru o te hiero.

’O Maria nō Magadalena ’e ’o Maria, te metua vahine o Iesu, ’ua teimaha roa rāua i te ’oto ’e te pe’ape’a… Teie ta’ata rahi tā rāua i here ’e i fa’atura, teie ïa e tārere nei i ni’a i te satauro, ’ua pohe…

’Ua pe’ape’a roa te mau ’āpōsetolo. ’O Iesu, tō rātou Fa’aora—te ta’ata tei haere nā ni’a i te miti, tei fa’ati’a i tei pohe ra—’Ōna iho, tei roto ’oia i te rima o te feiā ’i’ino ra.

E mahana pae teie tei ’ī roa i te ’oto rahi ri’ari’a ’e te māuiui māite…

Tē feruri nei au i te mau mahana ato’a mai te ’omuara’a mai o te ’ā’amu o teie nei ao, taua mahana pae ra te mea ’ino roa a’e ïa.

’Aita rā te ’ati rahi o taua mahana ’oto ra i vai tāmau noa nō te mea i te Sābati iho, ’ua ’ōfati te Fatu tei ti’afa’ahou i te mau tāpe’a o te pohe. ’Ua ti’a ’oia i ni’a mai roto mai i te mēnema, ’e ’ua fā mai ma te hanahana ’ei Fa’aora nō tō te ao ato’a nei.

’E i roto noa i te hō’ē taime, te mau mata tei ’ī nā i te roimata tahe ra, ’ua marō ïa. Te mau ’utu ato’a tei muhumuhu i te pure ’oto ’e te pe’ape’a, i teie nei, tē parau nei ïa i te mau parau ha’apoupou māere, nō te mea, ’o Iesu te Mesia, te Tamaiti a te Atua ora, ’ua ti’a mai ïa i mua ia rātou… ’ei fa’a’itera’a ē, te pohe o te ha’amatara’a ïa nō te hō’ē orara’a ’āpī ’e te nehenehe.

E mahana pae tō tātou tāta’itahi—’oia ho’i, taua mau mahana ra mai te huru e, ’ua parari hu’ahu’a roa te ao nei, vai noa atu ai te mau hu’ahu’a i raro i piha’i iho ia tātou.

Tera rā, tē fa’a’ite pāpū nei au nā roto i te i’oa o te ta’ata tei ’upo’oti’a i ni’a i te pohe—E tae mai te sābati. I roto i te pōiri o tō tātou ’oto, e tae mai te sābati…

Noa atu te huru o tō tātou pe’ape’a, e tae mai te sābati. I teie ānei orara’a ’e ’aore rā, a muri a‘e, e tae mai te sābati.

Tē fa’a’ite pāpū nei au ē, e ’ere te ti’a-fa’ahou-ra’a i te fabula. Tei ia tātou nei te mau ’itera’a pāpū o te feiā tei ’ite iāna. E rave rahi tauatini ta’ata i roto i te fenua tahito ’e te fenua ’āpī, tei ’ite i te Fa’aora tei ti’afa’ahou mai. ’Ua fāfā rātou i te mau puta i roto i tōna ra rima, te ’āvae ’e te ’ao’ao.

I muri a’e i te ti’a-fa’ahou-ra’a, ’ua fa’a’āpī-fa’ahou-hia te mau pipi. ’Ua rātere rātou nā te ao ato’a nei… ma te poro taiā ’ore ē ’o Iesu te Mesia, te Tamaiti tei ti’afa’ahou mai a te Atua ora.

E rave rahi o rātou… tei pohe i te pohe maratiri ma te fa’a’itera’a pāpū nō te Mesia tei ti’afa’ahou i ni’a i tō rātou ra utu, ’a pohe atu ai rātou.

’Ua taui te ti’a-fa’ahou-ra’a i te orara’a o te feiā tei ’ite i te reira. E’ita ānei te reira e taui ato’a i tō tātou orara’a ?

E ti’a pā’āto’a mai tātou mai raro mai i te mēnema…

Nō te ora ho’i ’e te tusia mure ’ore a te Fa’aora o te ao nei, e tāhō’ē-fa’ahou-hia tātou i te feiā tā tātou i here roa…

I taua mahana ra, e ’oa’oa ai tātou i te mea ē, ’ua ’upo’oti’a te Mesia i ni’a i te mau mea ato’a tā tātou e ora ’e a muri noa atu.

Na roto i te mau ’ōro’a mo’a tā tātou e fāri’i i roto i te hiero mo’a, e’ita tō tātou fa’aru’era’a i teie nei orara’a tāhuti poto roa e fa’ata’a ’ē maoro i te mau aura’a tei natihia i te mau taura ta’amu mure ’ore.

Ta’u teie ’itera’a pāpū hanahana, e ’ere te pohe i te hope’ara’a o te orara’a…

’Ia haro’aro’a tātou ’e ’ia ora ma te māuruuru nō te mau hōro’a faufa’a rahi te tae mai nei ia tātou nei, tātou te mau tamaiti ’e te mau tamahine nā te hō’ē Metua ora i te Ao ’e nō te fafaura’a o taua mahana nehenehe ra ’a ti‘afa’ahou mai ai tātou pā’āto’a ma te ’oa’oa rahi mai roto mai i te mēnema…

Noa atu te pōuri o tō tātou mahana pae, e tae mai te sābati.