« Mai te mea tē ’ite ra vau ē tē mo’e ra tō’u fa’aro’o, e aha ïa tā’u e rave ’ia noa’a fa’ahou mai te reira ? »

Mai te mea e fifi rahi tō’u i te fāri’ira’a i te Vārua, e tauturu te haerera’a i roto i te mau pāpa’ira’a mo’a iā’u ’e ’ia ’ite i te fa’aro’o o te mau ta’ata ato’a. Nā te reira e hōro’a mai i te fa’aro’o. Penei a’e e mea poto roa tā ’outou mau pure. ’A tāmata i te fa’ariro i tā ’outou mau pure ’ei mau pure ’ā’au tae mau ’e e tauturu mai te Metua i te Ao ra ia ’outou ’ia noa’a fa’ahou mai tō ’outou fa’aro’o.

’Ua ’ite au ē e nehenehe tā’u e pure i te Metua i te Ao ra ’e ’ia ani iāna ’ia tauturu mai iā’u ’ia tāpe’a noa i te tumu rā’au o te fa’aro’o tā’u e fa’atupu nei. E ti’a iā’u ’ia rave i te mau mea tei tītauhia nō te fa’a’amu i te reira fa’aro’o, mai te tai’ora’a i te mau pāpa’ira’a mo’a, te ’imira’a i te mau ’itera’a pae vārua, te tai’ora’a i tō’u mau ha’amaita’ira’a, ’e te anira’a i te tauturu a tō’u nei ’utuāfare. ’Ia nā reira ana’e, e nehenehe tō’u fa’aro’o i te tupu rahi atu ā. E’ita te reira e tupu noa i roto i te hō’ē noa mahana—e ravera’a o te tītau i te taime. E ti’a iā’u ’ia fa’a’oroma’i ’e ’ia ti’aturi i te Fatu.

’Ia ’ite ana’e au ē tē ’ore ra tō’u fa’aro’o, e paraparau vau i tō’u māma ’e tō’u pāpā, ’e e feruri ’āmui mātou i teie fifi. I te tahi mau taime e hīmene mātou i muri iho i te hō’ē hīmene o te fa’aitoito ia mātou ’ia nehenehe e fāri’i i te Vārua.

Ta’a ’ē noa atu i te pure ti’a atu i te Metua i te Ao ra, ’e nehenehe tā tātou e ani i tō tātou mau metua e nāhea e nehenehe ai ia tātou ’ia ho’i fa’ahou iāna ’e ’ia noa’a fa’ahou mai tō tātou fa’aro’o.

’Ei ta’ata tei paruparu i roto i te fa’aro’o, teie nā mea e toru tā’u i rave ’ia noa’a fa’ahou te fa’aro’o. ’A tahi, ’ua pure au. ’Ua manuia maita’i te purera’a nō te pūai ’e nō te ’ite i te mea e ti’a iā’u ’ia rave. Te piti, ’ua parau vau i tō’u mau hoa piri, ’e ’ua tauturu rahi mai rātou iā’u i te taime i hina’aro ai au i te reira tauturura’a. Te toru, ’ua tai’o vau i te mau pāpa’ira’a mo’a. E rave rahi mau pāpa’ira’a mo’a tei tū’ati atu i te fa’aro’o ’e e nehenehe te reira i te tauturu ia tātou ’ia noa’a fa’ahou mai te fa’aro’o.