Thawj Pawg Thawj Tswj Hwm tsab Xov, Plaub Hlis Ntuj 2018
Thaum Peb Mus Tom Ntej Ua Ke
Los ntawm Thawj Tswj Hwm Russell M. Nelson
Cov kwv tij thiab cov muam, kuv txo hwj chim vim kuv nrog nej nyob tag kis no. Plaub hnub tas los lawm peb tau muab ib tug txiv neej zoo kawg, Vajtswv ib tug yaj saub, faus cia—Thawj Tswj Hwm Thomas S. Monson. Tsis muaj tej lus uas piav tau hais tias nws ua neej zoo npaum li cas. Kuv yeej yuav zoo siab vim wb ua phooj ywg thiab ris Vajtswv txiaj rau tej yam uas nws tau qhia rau kuv. Tam sim no peb yuav tsum saib mus yav tom ntej nrog kev ntseeg peb tus Tswv Yexus Khetos tag nrho, tus uas yog tus tswv ntawm lub Koom Txoos no.
Ob hnub tas los lawm tag nrho cov Thwj Tim uas tseem muaj txoj sia nyob tau sib ntsib nyob hauv chav sab saud hauv lub Tuam Tsev Salt Lake. Nyob ntawd lawv twb koom siab txiav txim siab hais tias, qhov thib ib, yuav rov qab tsa Thawj Pawg Thawj Tswj Hwm tam sim ntawd, thiab qhov thib ob, kuv yuav ua tus Thawj Tswj Hwm ntawm lub Koom Txoos. Tsis muaj tej lus piav tau hais tias zoo li cas thaum kuv cov Kwv Tij—cov Kwv Tij uas tuav tag nrho cov yuam sij pov thawj hwj uas tus Yaj Saub Yauxej Xamiv tau muab txum tim rov qab los nyob hauv lub caij nyoog no—tau muab lawv txhais tes tsa saum kuv taub hau thiab tsa kuv los ua tus Thawj Tswj Hwm ntawm lub Koom Txoos. Yog ib lub sij hawm dawb ceev thiab ua rau kuv txo hwj chim.
Ces kuv thiaj li muaj kev lav ris xav seb tus Tswv tau npaj leej twg los ua kuv ob tug pab cuam. Kuv yuav ua li cas kom xaiv ob tug ntawm Pawg Kaum Ob tug Thwj Tim xwb, vim kuv hlub lawv txhua tus kawg li? Kuv zoo siab ua tus Tswv tsaug vim nws teb kuv tej lus thov. Kuv zoo siab uas Thawj Tswj Hwm Dallin Harris Oaks thiab Thawj Tswj Hwm Henry Bennion Eyring txaus siab ua hauj lwm nrog kuv los ua tus Pab Cuam thib Ib thiab tus Pab Cuam thib Ob. Thawj Tswj Hwm Dieter F. Uchtdorf twb rov qab mus rau hauv Pawg Kaum Ob tug Thwj Tim. Nws twb tau txais tej kev txib tseem ceeb uas nws tib leeg txawj ua.
Kuv qhuas nws thiab qhuas Thawj Tswj Hwm Eyring vim nkawd tau ua hauj lwm zoo kawg nkaus ua Thawj Tswj Hwm Monson ob tug pab cuam. Nkawd twb rau siab, txawj ua, thiab tau txais kev tshoov siab. Peb yeej ua Vajtswv tsaug rau nkawd. Tam sim no nkawd txaus siab ua hauj lwm ua tej yam raws li Vajtswv xav tau.
Vim nws yog tus Thwj Tim uas nyob ntev tshaj thib ob, Thawj Tswj Hwm Oaks kuj yog tus Thawj Tswj Hwm ntawm Pawg Kaum Ob tug Thwj Tim. Tiam sis, vim tau hu nws los ua hauj lwm hauv Thawj Pawg Thawj Tswj Hwm thiab raws li tus txheej txheem ntawm lub Koom Txoos, Thawj Tswj Hwm M. Russell Ballard, uas yog tus nyob ntev tshaj thib peb, nws yuav ua tus Thawj Tswj Hwm Sawv Cev rau pawg ntawd. Thawj Pawg Thawj Tswj Hwm yuav ua hauj lwm ua ke nrog Pawg Kaum Ob tug Thwj Tim kom paub tus Tswv lub siab nyiam thiab khiav Nws txoj hauj lwm dawb ceev kom mus tom ntej.
Peb ua nej tsaug rau nej tej lus thov Vajtswv. Tib neeg nyob thoob plaws lub ntiaj teb tau thov pab peb. Thaum hnub uas Thawj Tswj Hwm Monson tas sim neej, muaj ib tug me nyuam tub uas muaj plaub xyoos hu ua Benson uas tau thov li no. Kuv hais tej yam uas nws niam sau hauv ib tsab ntawv rau kuv tus poj niam, Wendy. Benson thov hais tias, “Leej Txiv Saum Ntuj Ceeb Tsheej, ua koj tsaug uas Thawj Tswj Hwm Thomas S. Monson tau pom nws tus poj niam dua. Ua tsaug rau peb tus yaj saub tshiab. Thov kom nws ua siab loj thiab tsis txhob ntshai vim nws yog tus tshiab. Pab nws loj hlob tuaj kom noj qab nyob zoo thiab muaj dag muaj zog. Pab nws muaj hwj chim vim nws muaj lub pov thawj hwj. Thiab pab peb ua neeg siab zoo txhua lub sij hawm.”
Kuv ua Vajtswv tsaug rau cov me nyuam zoo li no thiab cov niam tsev txiv tsev uas rau siab ua ncaj ncees qhia cov me nyuam—rau txhua tus niam tsev txiv tsev, tus xib hwb, thiab mej zeej uas ris nra hnyav tiam sis tseem txaus siab ua hauj lwm. Los yog hais tias, rau nej txhua leej txhua tus, kuv txo hwj chim ua Vajtswv tsaug.
Tus Tswv Yog tus uas Coj Peb Kev
Thaum peb mus tom ntej, kuv caw nej xav txog txoj kev zoo kawg nkaus uas tus Tswv siv kom kav Nws lub Koom Txoos. Thaum ib tug Thawj Tswj Hwm ntawm lub Koom Txoos tas sim neej, txhua tus paub hais tias tus uas Vajtswv yuav hu los ua txoj hauj lwm ntawd yog leej twg. Tsis muaj tib neeg ua kev sib tw, tiam sis tsuas muaj tus txheej txheem zoo uas tus Tswv tau npaj kom tsa tus thawj coj tshiab.
Txhua hnub uas ib tug Thwj Tim ua hauj lwm yog ib hnub kawm thiab ib hnub npaj kom lav ris ntxiv thaum yav tom ntej. Ib tug Thwj Tim yau yuav tsum ua hauj lwm ntev heev kom ua ib tug Thwj Tim laus. Thaum lub sij hawm ntawd, nws thiaj li kawm tau nws tus kheej txog txhua txoj hauj lwm hauv lub Koom Txoos. Nws kuj paub zoo txog cov neeg nyob hauv lub ntiaj teb, tsis hais lawv zaj keeb kwm, kab lig kev cai, thiab yam lus thaum nws txais kev txib mus thoob plaws lub ntiaj teb. Qhov uas peb tsa cov thawj coj tshiab hauv lub Koom Txoos los tsis muaj tus txheej txheem zoo ib yam. Kuv tsis paub txog ib yam dab tsi uas zoo li no. Qhov no yuav tsum tsis txhob ua rau peb xav tsis thoob, vim nov yog tus Tswv lub Koom Txoos. Nws tsis ua raws li tib neeg ua.
Kuv twb ua hauj lwm hauv Pawg Kaum Ob tug Thwj Tim rau tsib tug Thawj Tswj Hwm ntawm lub Koom Txoos. Kuv twb saib txhua tus Thawj Tswj Hwm txais kev tshwm sim thiab ua raws li kev tshwm sim ntawd. Tus Tswv yeej tau thiab yeej yuav qhia thiab tshoov Nws cov yaj saub lub siab. Tus Tswv yog tus uas coj peb kev. Peb cov uas tus Tswv tau tsa kom ua tim khawv txog Nws lub npe dawb huv nyob thoob plaws lub ntiaj teb tseem yuav nrhiav thiab ua raws li Nws lub siab nyiam.
Raws Nraim txoj Kev Khi Lus
Tam sim no, kuv xav hais rau txhua tus mej zeej ntawm lub Koom Txoos hais tias, cia li raws nraim txoj kev khi lus. Qhov uas nej coj raws nraim li tus Cawm Seej thaum nej nrog Nws ua kev khi lus thiab qhov uas nej ua raws li nej tej kev khi lus ntawd yuav qhib qhov rooj rau nej txais tau txhua txoj koob hmoov thiab txhua lub cib fim uas txiv neej, poj niam, thiab me nyuam nyob qhov txhia chaw txais tau.
Vim peb yog ib Pawg Thawj Tswj Hwm tshiab, peb xav pib ua hauj lwm tom qab xav txog qhov kawg. Yog vim li no, peb thiaj li hais lus rau nej hnub no nyob hauv ib lub tuam tsev. Qhov kawg uas peb txhua tus xav tau yog kev txais vaj txiaj ntsim lub hwj chim nyob hauv tus Tswv lub tsev, nrog tsev neeg sib khi ua ke, ua raws nraim li tej kev khi lus uas ua hauv lub tuam tsev uas ua rau peb tsim nyog txais Vajtswv lub txiaj ntsim zoo kawg nkaus—uas yog txoj sia nyob mus ib txhis. Cov kab ke hauv lub tuam tsev thiab tej kev khi lus uas nej ua nyob haud yeej yog qhov uas txhawb nqa nej lub neej, nej txoj kev sib yuav thiab tsev neeg, thiab nej txoj kev txawj tiv tau tus yeeb ncuab tej kev tawm tsam. Nej txoj kev teev tiam Vajtswv hauv lub tuam tsev thiab nej tej hauj lwm nyob haud rau nej cov poj koob yawm txwv yuav foom koob hmoov rau nej kom nej txais tau kev tshwm sim ntxiv thiab muaj kev kaj siab lug thiab yuav ua rau nej rau siab taug raws nraim txoj kev khi lus.
Nim no, yog tias nej twb tau tawm txoj kev no, nrog tag nrho kev cia siab kuv caw nej thov nej rov qab los. Txawm tias nej txhawj txog dab tsi, txawm nej muaj teeb meem dab tsi los, yeej muaj chaw rau nej nyob hauv qhov chaw no, uas yog tus Tswv lub Koom Txoos. Nej thiab tej tiam neeg uas tseem tsis tau yug los yuav txais koob hmoov los ntawm tej yam nej ua tam sim no yog nej rov qab los rau txoj kev khi lus. Peb Leej Txiv Saum Ntuj Ceeb Tsheej hlub Nws cov me nyuam, thiab Nws xav kom peb txhua tus rov qab los nrog Nws nyob. Nov yog lub hom phiaj tseem ceeb tshaj plaws ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg—pab peb txhua tus rov qab los tsev.
Kuv qhia nej tias kuv hlub nej heev—yog kev hlub uas tau loj tuaj tau ntau xyoo uas kuv tau ntsib nej, teev tiam Vajtswv nrog nej, thiab ua hauj lwm pab nej. Vajtswv txib peb mus qhia txhua haiv neeg, xeem neeg, yam lus, thiab cov neeg, pab npaj neeg ntiaj teb txog thaum tus Tswv Los Zaum Ob. Peb yuav ua li no nrog kev ntseeg tus Tswv Yexus Khetos, vim peb paub tias Nws yog tus thawj coj. Nov yog Nws txoj hauj lwm thiab Nws lub Koom Txoos. Peb yog Nws cov tub qhe.
Kuv tshaj tawm txog kuv txoj kev rau siab ua hauj lwm rau Vajtswv peb Leej Txiv Nyob Mus Ib Txhis thiab Nws Leej Tub, Yexus Khetos. Kuv paub Nkawd, hlub Nkawd, thiab cog lus tias kuv yuav ua hauj lwm rau Nkawd—thiab nej—txog thaum kuv ua pa zaum kawg. Los ntawm Yexus Khetos lub npe dawb ceev, amees.
© 2018 los ntawm Intellectual Reserve, Inc. All rights reserved. Luam tawm hauv Teb Chaws Amelikas. Pub txhais ua lus As Kiv : 6/17. Pub txhais ua lus Hmoob: 6/17. Kev txhais First Presidency Message, April 2018. Hmong. 15048 295