Si Presidente Russell M. Nelson: Gigiyahan, Giandam, Mipasalig
Human sa mga dekada sa pag-ayo og mga kasingkasing isip ilado nga doktor sa kasingkasing ug pagtandog sa mga kasingkasing isip Apostol ni Ginoong Jesukristo, si Presidente Russell M. Nelson adunay makanunayong kamot ug walay paglubad nga gugma ngadto sa iyang pangalagad isip Presidente sa Simbahan.
Kon ang Presidente sa Simbahan mamatay, daghan ang nagtutok sa proseso diin ang iyang sumusunod pagapilion. Gani, kana nga proseso, gigiyahan sa Ginoo, nagsugod sa daghang mga tuig na ang nakalabay. Si Russell M. Nelson adunay tibuok kinabuhi nga pagpangandam alang niining balaan nga tawag. Nakasaksi ko og daghan niana nga pagpangandam.
Ang pagpangandam ni Presidente Russell M. Nelson makita sa kinatibuk-an sa iyang mga kasinatian ug mga kalampusan sa kinabuhi. Inila siya isip usa ka pioneer nga doktor sa kasingkasing. Talagsaon siya nga magsusulat ug mamumulong, makaistorya og daghang mga pinulongan. Nakaila ug nahigugma sa mga tawo, ug nakasabut siya sa mga epekto sa mga desisyon sa ilang kinabuhi. Nakahibalo ug ganahan siya sa mga kasulatan ug sa balaan nga templo. Usa siya ka sinati nga tigdumala kinsa mohimo dayon og lig-on nga mga desisyon.
Si Presidente Nelson personal nga nailhan, ug sa daghang mga higayon gitudloan sa 10 ka miaging 16 ka mga Presidente sa Simbahan. Karon, isip ika-17 nga Presidente, nagsugod siya sa iyang pangalagad pinaagi sa paghatag og kasiguroan sa mga Santos sa Ulahing mga Adlaw nga si Jesukristo magpadayon sa paggiya sa Iyang Simbahan.
“Ang Ginoo kanunay nga mihatag ug mohatag og instruksyon sa Iyang mga propeta,” miingon siya panahon sa sibya sa pagpahibalo niadtong Enero 16, 2018. “Ang Ginoo ang nangulo. Kami nga gi-orden sa pagsaksi sa Iyang balaan nga ngalan sa tibuok kalibutan mopadayon sa pagtinguha nga mahibalo sa Iyang kabubut-on ug mosunod niini.”1
Ang pagpakabana ni Presidente Nelson alang sa mahangturong kaayohan sa mga anak sa Dios nagagikan sa tibuok kinabuhi nga kinasingkasing nga pagserbisyo. Sa samang paagi nga daghan kaayo ang iyang natandog isip usa ka doktor, natandog usab niya ang mga kasingkasing sa mga Santos sa tibuok kalibutan uban sa iyang gamhanan nga mga pagtulun-an, hamili nga pagserbisyo, ug walay paglubad nga gugma. Sama sa iyang gisulti sa makasaysayanong sibya sa Enero, nga ang gugma “milambo sulod sa daghang mga dekada sa pakighimamat kaninyo, pagsimba uban kaninyo, ug pag-alagad kaninyo.”2
Importante nga Pagpangandam
Daghan ang nahibaloan sa talagsaong panrabaho ni Dr. Nelson isip usa ka pioneer nga eskolar, batid sa siyensya, ug doktor sa kasingkasing sa tawo. Kanang tanan, ingon man ang maayong ehemplo sa kinabuhi sa pamilya, mao ang nag-unang bahin sa iyang pagpangandam.
Si Russell Marion Nelson natawo niadtong Septyembre 9, 1924, ngadto nila ni Marion C. ug Edna Anderson Nelson. Ang mga ginikanan dili kaayo aktibo nga mga miyembro sa Simbahan sa tibuok pagkabata ni Russell, apan gipakita nila sa ilang mga anak ang gugma ug usahay paadtoon sila sa Sunday School. Sa sinugdanan, ang batan-ong si Russell dili interesado sa Simbahan, mas palabihon pa ang pagdula og football uban sa iyang mga higala. Apan sa dihang 16 anyos na siya, ang iyang kasingkasing nagsugod sa pagdawat sa mga kamatuoran sa ebanghelyo ug siya nabunyagan uban sa iyang mga igsoon. Mga tuig ang milabay, tungod sa ehemplo ug pagdani sa ilang mga anak, ang mga ginikanan nga Nelson mibalik sa pagkaaktibo.
Ang batan-ong Russell naningkamot sa oportunidad nga makadawat og edukasyon. Nakaamgo siya, nga dayon iyang gitudlo, nga ang pagkuha og edukasyon usa ka relihiyoso nga responsibilidad. Migradwar siya gikan sa high school sa edad nga 16, ug mieskwela siya sa University of Utah sa dihang ang tibuok kalibutan nga panagsungi sa Ikaduhang Gubat sa Kalibutan nakapugong niya sa pagserbisyo og full-time nga misyon.
Samtang si Russell naningkamot sa iyang bachelor’s degree, ang iyang talento sa musika miaghat niya sa pag-apil sa grupo sa musika sa unibersidad. Ang lead soprano, nga si Dantzel White, nakakabig sa iyang atensyon. Sa wala madugay naminyo sila human niya madawat ang iyang bachelor’s degree niadtong 1945. Sa edad nga 22, migradwar siya gikan sa University of Utah uban sa tag-as nga mga pasidungog isip usa ka medical doctor. Mipadayon siya ngadto sa University of Minnesota alang sa postdoctoral training. Didto siya ang importante nga sakop sa team nga nagsugod sa kalamboan sa open-heart surgery. Dayon nagtrabaho siya isip resident doctor sa operasyon sa Minnesota ug sa Massachusetts General Hospital sa Boston, Massachusetts, USA.
Sa taliwala sa iyang edukasyon ug nagkadako nga pamilya, si Dr. Nelson gitawag nga moserbisyo atol sa Korean War tungod kay gikinahanglan gayud kaayo sa kasundalohan ang mga doktor. Tungod sa iyang surgical training, gipadala siya ngadto sa Washington, D.C., diin iyang gipahigayon ang surgical research unit sa Walter Reed National Military Medical Center. Niadtong 1953, ang iyang obligasyon sa militar natuman, migahin siya og usa ka tuig sa Harvard Service sa Massachusetts General Hospital didto sa Boston. Dayon nahuman niya ang iyang PhD sa University of Minnesota niadtong 1954.
Bisan sa iyang busy nga medical training ug panarbaho, giuna kanunay ni Dr. Nelson ang iyang pamilya sa iyang kinabuhi. Si Dantzel White Nelson mitambayayong ug misuporta sa iyang bana sa tanan niyang mga kalihokan sa pamilya, Simbahan, propesyunal ug sa militar. Ang ilang kanunay, nga pagsuporta sa usag usa ug mahigugmaong relasyon mao ang usa ka inspirasyon ug kanunay nga impluwensya sa ilang 10 ka anak—siyam ka babaye ug usa ka lalaki. Ang ilang relasyon “mahigugmaon ug naghinatagay sa usag usa,” sumala sa anak nga babaye nga si Sylvia Webster. Ang ilang kinamanghuran, si Russell Nelson Jr., nahinumdom, “Klaro kaayo nga ang akong mga ginikanan naghigugmaay pag-ayo sa usag usa.”3
Wala damha, si Dantzel Nelson namatay sa hapit na ang ilang ika-60 nga anibersaryo sa kasal. Human sa mamingaw kaayo nga panahon, si Elder Nelson naminyo ni Wendy Watson, usa ka wala maminyo nga babaye kansang doctor’s degree, pagkapropesor sa Brigham Young University, ug mahigugmaong tabang sa dakong pamilya sa Nelson nakahimo niya nga angay nga kompanyon ni Elder ug Presidente Nelson.
“Nakasiguro ko nga lisud mahimong kabahin sa pamilya nga sobra sa 200 ka tawo ug mobati nga kamo suod nga mga higala,” miingon ang anak nga babaye nga si Sylvia. “Si Wendy naningkamot ug talagsaon siya.”4 Si Russell Jr. midugang, “si Wendy maayo kaayo nga kauban ngadto kaniya. … Akong makita nga giunsa siya pag-andam sa milabayng katuigan alang niini nga katungdanan ug niini nga calling, ug ang importante nga bahin niana mao si Wendy sa iyang kinabuhi.”5
Ingon nga kini gisulat, ang gidaghanon sa pamilyang Nelson 10 ka anak, 57 ka apo, ug 116 ka apo sa tuhod, dunay 2 nga umaabut. Ang tanan nga makahimo magpundok sa lain-laing pamilya kada bulan aron sa pagsaulog og mga adlaw nga natawhan ug mga anibersaryo.
“Ang Tanan nga Gingharian Dunay Balaod nga Gihatag”
Sa dihang si Russell M. Nelson didto sa medical school, gitudloan siya nga kinahanglan walay doktor ang mohikap sa kasingkasing sa tawo, tungod kay kon mahikapan ang kasingkasing, mohunong kini sa pagpitik. Hinoon, paglabay sa pipila ka tuig, si Dr. Nelson ug ang iyang isig ka mga researcher mi-report sa unang malampusong paggamit og artificial heart-lung machine diha sa usa ka iro. Ang heart-lung machine gipuli sa sirkulasyon sa pasyente, nakahatag og higayon nga maoperahan ang wala magpitik nga kasingkasing. Kini nga naimbento ni Dr. Nelson ug sa iyang mga kauban sa wala madugay gihimo ngadto sa mga tawo ug karon nakahimo na og labaw sa 1.5 ka milyon nga open-heart nga operasyon kada tuig sa tibuok kalibutan.
Ang inspirasyon nga migiya niining nadiskobrihan miabut ngadto ni Dr. Nelson samtang namalandong sa mosunod nga mga bersikulo sa Doktrina ug mga Pakigsaad:
“Ang tanan nga mga gingharian adunay balaod nga gihatag. …
“Ug ngadto sa matag gingharian gihatagan og usa ka balaod; ug ngadto sa matag balaod adunay pipila ka mga kinutuban usab ug mga kasabutan” (D&P 88:36, 38).6
Mirason si Dr. Nelson nga kon siya motrabaho, magtuon, ug mangutana sa saktong mga pangutana, siya ug ang iyang team makakat-on unsa ang nagdumala sa nagpitik nga kasingkasing. “Pinaagi sa pagsabut sa mga kasulatan ug ‘pagpahisama’ niini ngadto niini nga bahin sa interes,” miingon siya, “nga ang dakong bahin sa pag-opera sa kasingkasing nga atong nahibaloan karon gipasayon alang kanako.”7
Sa iyang tibuok kinabuhi, kini nga abilidad sa paggamit sa mga baruganan sa ebanghelyo nakapanalangin ni Presidente Nelson, sa iyang pamilya, sa Simbahan, ug sa kalibutan. Importante kadto sa iyang pagpangandam alang niini nga tawag isip usa ka Apostol ug karon isip Presidente sa Simbahan.
Sa iyang propesyunal nga trabaho, si Dr. Nelson daling nahimong inila isip usa ka surgeon ug medical researcher. Niadtong 1955 gidawat niya ang katungdanan isip research professor of surgery sa University of Utah. Didto naghimo siya og usa ka heart-lung machine nga iyang gigamit sa pagpahigayon sa unang open-heart surgery sa Utah—ang unang operasyon sa kasadpan sa Mississippi River. Mitudlo siya ug misulat og daghang mga kapitulo alang sa medikal nga mga libro ug sobra sa 70 ka libro sa kauban ang naribyu sa ubang mga publikasyon. Sa wala pa ang iyang tawag ngadto sa pagka-apostol, iyang gipahigayon ang dul-an sa 7,000 ka mga operasyon.8
Dugang ngadto sa iyang medikal nga mga kahanas, si Dr. Nelson usa ka makapadasig nga magtutudlo ug usa ka epektibo nga tigdumala, mga hiyas nga nakapahimo niya nga bililhon sa medical field ug makapaila niya sa iyang mga calling sa Simbahan.
“Ang katungdanan sa usa ka doktor, una, mao ang pagtudlo,” miingon si Dr. Nelson. Midugang siya, “Ang usa ka doktor nagtrabaho sa iyang pinakamaayo kon siya nagtudlo sa iyang pasyente unsay sayop ug unsay angay nga buhaton mahitungod niini.”9
Si Dr. Nelson mipakita niini nga pagkaandam ug tinguha sa pagtudlo ug edukasyon pinaagi sa pagbiyahe ngadto sa langyaw nga mga nasud aron pagpakita ug pagtudlo sa medikal nga mga proseso. Sa pagtabang kaniya sa pagtudlo, nagtuon siya og daghang mga pinulongan lakip sa French, Portuguese, German, Russian, ug Spanish aron mas makaistorya siya ug makatudlo sa mga doktor ug mga researcher sa ubang mga nasud. Human makatambong og miting diin si Presidente Spencer W. Kimball (1895–1985) mitambag sa kongregasyon sa pagkat-on og Inintsik, si Dr. Nelson ug ang iyang asawa nga si Dantzel diha-diha nagsugod sa pagtuon og Mandarin. Ang iyang kahanas niana nga pinulongan nakapahimo niya sa pagtrabaho uban sa medikal nga komunidad sa China, diin mihatag siya og mga lecture ug mipahigayon og operasyon, miluwas sa kinabuhi sa usa sa nasyunal nga bayani sa China.10
Unaha sa Pagpangita ang Gingharian sa Dios
Sama ka impresibo sa medikal nga mga kalampusan ni Presidente Nelson, iyang gipadayon ang iyang pagtutok sa Ginoo ug sa Iyang buhat. Kadaghanan sa mga miyembro sa Simbahan wala masayud nga siya nagserbisyo isip misyonaryo sa Temple Square gikan sa 1955 hangtud 1965, naggiya sa mga bisita gikan sa 4:00 ngadto sa 5:00 sa hapon kada Huwebes. Mao kini ang usa sa iyang labing busy nga panahon isip usa ka surgeon. Dayon misulat siya “niadtong 1964, nagsugod pa lang kami sa medisina sa hagit sa pag-ilis sa aortic valve. Daghan ang nangamatay, ug ang panahon sa pasalig ngadto sa matag pasyente taas kaayo—hapit one-on-one alang sa daghang mga oras, usahay moabut og daghang mga adlaw.”11
Alang sa kadaghanan, kana nga reyalidad makapahimo nga imposible ang calling nga nagkinahanglan og panahon. Dili alang ni Dr. Nelson. Niadtong 1964, human siya ug ang uban nainterbyu isip posible nga presidente sa stake, si kanhi-Elder Spencer W. Kimball, nga giubanan ni Elder LeGrand Richards (1886–1983) sa Korum sa Napulog Duha ka mga Apostoles, misulti kaniya: “Gibati namo nga ang Ginoo gusto nga ikaw modumala niini nga stake. Atol sa among daghang mga interbyu, kon mogawas ang imong pangalan ang tubag mao gyud gihapon: ‘O, dili siya mahimong maayo kaayo,’ o ‘Wala siyay panahon,’ o kining duha. Bisan pa niana, gibati namo nga ang Ginoo gusto nimo. Karon kon gibati nimo nga ikaw busy kaayo ug dili modawat sa tawag, nan imo kanang pribilehiyo.’ …
“Yano akong mitubag niana nga ang desisyon gihimo na niadtong Agosto 31, 1945, sa dihang si Sister Nelson ug ako naminyo sa templo. Mihimo kami og pasalig kaniadto sa ‘pag-una … sa gingharian sa Dios, ug sa iyang pagkamatarung,’ mibati nga masaligon nga ang tanan idugang ngari kanamo, sama sa gisaad sa Ginoo. (Tan-awa sa Mat. 6:33.)”12
Ang pagdawat ni Dr. Nelson niana nga calling naghulagway unsay gitawag ni Elder Jeffrey R. Holland sa Korum sa Napulog Duha ka mga Apostoles “ang pagkamapainubsanon ug pagkayano sama sa usa ka bata sa hugot nga pagtuo ni Russell Nelson. … Ingon ana siya kamapainubsanon, ingon ana siya ka sama sa bata, sa matag ang-ang ug hapit sa tanang ubang relasyon sa tawo nga akong nakita kaniya.”13
Si Elder Kimball mihatag ni Dr. Nelson og panalangin, nagsaad nga ang mga nangamatay kalabut sa operasyon sa aortic valve mokunhod ug nga ang proseso dili na makakuha og daghan sa iyang panahon ug enerhiya.
“Pagkasunod tuig, ang panahon nga gikinahanglan sa operasyon mi kunhod, ug ako aduna nay panahon nga gikinahanglan sa pagserbisyo niana ug sa ubang mga calling,” miingon si Dr. Nelson. “Gani, ang mga nangamatay mikunhod … ubos kaayo ug madawat ra, miarang-arang. Pagkatalagsaon, kanang maong operasyon akong gihimo alang ni Presidente Kimball paglabay sa walo ka tuig.”14
Ang mga gikinahanglan sa iyang trabaho ug mga calling sa Simbahan nagpasabut nga limitado na kaayo ang libreng panahon nga igahin sa panimalay. Hinoon, gihimo niya ang tanan nga mahimo niyang prayoridad ang iyang asawa ug ang ilang 10 ka anak. Kon naa siya sa panimalay, ihatag niya ang iyang tanang panahon ngadto sa iyang pamilya. Sa iyang daghang mga biyahe sa tibuok kalibutan, iyang dad-on kasagaran ang iyang asawa o usa sa ilang mga anak uban kaniya. Samtang maayo kaayo pagkaatiman ni Dantzel ang ilang mga anak kon wala siya, mapasalamaton siya sa iyang kamahalaron ngadto kanila kon siya mabakante gikan sa iyang busy nga trabaho ug mga calling. “Kon naa siya sa balay, naa gyud siya!” makausa gisultihan niya si Presidente Harold B. Lee (1899–1973), kinsa nianang higayuna mao ang Presidente sa Korum sa Napulog Duha ka mga Apostoles.15 Si Presidente Lee sa kasagaran mobalik-balik niini nga linya kon magtambag og busy nga mga lider sa priesthood sa pagtutok sa ilang mga pamilya.
Pagsunod sa Propeta
Usa ko ka saksi ug gamay nga partisipante sa usa ka importante nga hitabo sa propesyunal nga kinabuhi ni Dr. Russell M. Nelson ug sa iyang asawa nga si Dantzel. Nahitabo kini isip kabahin sa akong unang miting uban sa mga Nelson niadtong 1965, sobra na sa 52 ka tuig ang nakalabay. Sa iyang autobiography, si Dr. Nelson naghisgot nga siya gitanyagan og pagkapropesor sa surgery ug pagka-chairman sa Division of Cardiovascular and Thoracic Surgery sa University of Chicago. Kini nga tanyag, misulat siya, “gihatag ang mga kapanguhaan kanako pinaagi sa pinansyal nga suporta, research laboratory, ug staff support nga makatuman sa damgo ni bisan kinsa nga academician. Isip dugang nga pagdani, ang tanyag naglakip sa upat ka tuig sa kolehiyo alang sa among tanang siyam ka anak sa institusyon nga ilang gusto, nga ang tanang balayranan bayran sa University of Chicago.” Ang dean misulti ni Dr. Nelson, “Usa sa mga rason nga kami gusto nimo tungod kay kami nakahibalo nga ikaw usa ka buotan nga Mormon. Gusto ka namo sa among faculty. Nagkinahanglan kami nimo dinhi sa paghatag sa impluwensya ngadto niini nga Unibersidad nga ikahatag sa usa ka Mormon.”16
Isip kabahin sa iyang agresibo nga pagrekrut niining talagsaong doktor, ang dean mitawag nako aron motabang sa pagkumbinser sa mga Nelson nga mobalhin ngadto sa Chicago. Ako kaniadto usa ka propesor sa balaod sa University of Chicago ug nakaila sa dean of medicine tungod kay nagserbisyo kami sa faculty senate sa unibersidad. Ang dean mihangyo nako nga manihapon uban sa mga Nelson sa among panimalay. Miawhag siya nako sa pagsulti nila sa tanan mahitungod sa Simbahan sa Chicago tungod kay kini usa ka importante kaayo nga konsiderasyon alang kanila.
Mao nga ang akong kanhi asawa, si June, ug ako nakigkita ni Dantzel ug Russell Nelson midapit nila sa panihapon ug nindot nga pagbisita sa among balay sa Chicago niadtong Dominggo, Nobyembre 21, 1965. Gibuhat namo ang tanan sa pag-awhag nila nga mobalhin ngadto sa Chicago. Nahibaloan nako sa kaulahian gikan sa iyang autobiography nga sila “ganahan kaayo niini nga tanyag ug gani nakapili og balay sa usa sa mga dapit sa Chicago diin [sila] makapadako sa [ilang] pamilya.”17
Unsay sunod nga nahitabo maoy usa sa paghulagway kon sa unsa nga paagi nga ang inspirasyon sa Ginoo migiya sa mga desisyon ug pagpangandam ni Russell M. Nelson. Didto sa Siyudad sa Salt Lake, nangayo siya og tambag gikan ni Presidente David O. McKay (1873–1970) sa paggiya sa mga Nelson sa ilang importante nga desisyon. Nag-ampo ang propeta, ug ang tubag miabut: “Dili.”
Si Presidente McKay miingon: “Nagpuyo ka na sa labing maayong siyudad sa tibuok kalibutan. Ikaw aduna nay pamaagi sa kinabuhi nga dili matupngan bisan asa sa kalibutan. Dinhi mahatagan ang imong mga anak nga babaye sa labing maayong kahimtang nga ikahatag ngadto kanila. Mas importante sila kanimo kay sa bisan unsa nga kabantog o umaabut nga moabut kanimo sa bisan unsa nga unibersidad. Dili, Brother Nelson, ang imong dapit ania dinhi sa Siyudad sa Salt Lake. Ang mga tawo moanhi gikan sa tibuok kalibutan nganha kanimo tungod kay ikaw ania dinhi. Sa akong hunahuna dili maayong moadto ka sa Chicago.”18
Puno sa pagtuo, si Dr. Nelson mibalibad sa tanyag sa Chicago ug nagpabilin sa Siyudad sa Salt Lake. Didto, sa umaabut nga katuigan, gipahigayon niya ang open-heart surgery ug gipalungtad ang mga kinabuhi sa daghang mapasalamaton nga pasyente, lakip nila ni Presidente Kimball, Elder Richard L. Evans (1906–71), Presidente Boyd K. Packer (1924–2015), ug daghan pang ubang mga lider ug mga miyembro sa Simbahan ug sa ilang mga pamilya.
Alang ni June ug nako, kadtong miting sa Chicago mao ang sinugdanan sa dugay ug gibahandi nga panaghigala ni Russell ug Dantzel Nelson. Paglabay sa unom ka tuig na-release siya isip presidente sa stake ug gitawag isip Kinatibuk-ang Presidente sa Sunday School. Nianang samang tuig, gitudlo ko isip presidente sa Brigham Young University. Sulod sa daghang mga tuig, nagserbisyo kami sa Korum sa Napulog Duha ka mga Apostoles, ug karon moserbisyo kami nga magkauban diha sa Unang Kapangulohan sa usa ka panaghigalaay nga nagsugod didto sa Chicago tali sa duha ka academician ug sa ilang mga asawa 52 ka tuig na ang nakalabay.
Nausab nga mga Kasingkasing
Niadtong Abril 7, 1984, si Dr. Nelson giordinahan nga usa ka Apostol ug na-set apart isip usa ka miyembro sa Korum sa Napulog Duha ka mga Apostoles. “Sa usa ka mubo nga higayon,” miingon siya, “ang pagtutok sa miaging kwarenta ka tuig sa medicine ug surgery nausab ngadto sa paghalad sa nahibilin sa akong kinabuhi sa full-time nga pagserbisyo ngadto sa akong Ginoo ug Manluluwas, nga si Jesukristo.”19
Sa iyang pagkatawag ngadto sa pagkaapostol, si Elder Nelson mipahayag, “Ang buhat nga karon akong gihimo mao ang labing importante nga kawsa sa kalibutan. Masangkaron kini, makatagbaw kini, ug mahagiton kini. Ug kinahanglang buhaton nako ang akong labing maayo, tungod kay duna koy responsibilidad alang niini nga pagkatinugyanan.”20
Sukad nahimong usa ka Apostol, ug isip Presidente sa Korum sa Napulog Duha ka mga Apostoles sukad 2015, si Presidente Nelson nagpadayon sa pagbiyahe sa kalibutan—nagpakigbahin sa mga pulong sa mahangturong kinabuhi ug nakapausab sa mga kasingkasing. Usa sa iyang unang mga assignment mao ang pagsugod sa pagsangyaw sa ebanghelyo ngadto sa Eastern European nga mga nasud. “Sa … lima ka tuig, duna koy 27 ka biyahe ngadto sa 31 ka nasud sa Europe,” miingon si Presidente Nelson. “Sa wala pa mamatay si Presidente [Ezra Taft] Benson, … ako [naka] himo sa pag-report ngadto kaniya nga nahuman namo ang among assignment: naestablisar na nato karon ang Simbahan sa matag nasud sa Eastern Europe.”21
Si Presidente Nelson mipahinungod usab sa 27 ka nasud alang sa pagsangyaw sa ebanghelyo, lakip sa Bulgaria, Croatia, El Salvador, Ethiopia, French Polynesia, Kazakhstan, ug Russia. Sa makausa, sa sulod sa upat ka adlaw gipahinungod niya ang unom ka managlahi nga nasud.22 Sa iyang apostolikanhong pangalagad nakabisita na siya og 133 ka nasud.23
Isip usa ka sakop sa Korum sa Napulog Duha ka mga Apostoles, si Elder Russell M. Nelson nagserbisyo og taas nga tuig isip chairman sa matag usa sa tulo ka importante nga mga konseho niini: ang Missionary, Temple and Family History, ug Priesthood Executive (karon Priesthood and Family Executive).
Ang Simbahan adunay daghang importante nga mga kausaban panahon sa katuigan ni Elder Nelson diha sa Korum sa Napulog Duha, diin nagserbisyo siya sa lima ka presidente sa Simbahan. Sukad niadtong 1984, ang Simbahan misobra sa doble ang gidaghanon, gikan sa 6 ka milyon ka miyembro ngadto sa sobra sa 16 ka milyon. Ang Korum sa Napulog Duha ka mga Apostoles ug ang Unang Kapangulohan mipagawas og duha ka opisyal nga pamahayag: “Ang Pamilya: Usa ka Pamahayag ngadto sa Kalibutan” niadtong 1995 ug “Ang Buhi nga Kristo” niadtong 2000. Ang gidaghanon sa magamit nga mga templo misaka gikan sa 30 niadtong 1984 ngadto sa 159 sa 2017. Niadtong 2010, sa dihang si Elder Nelson gitawag nga chairman sa Missionary Executive Council, ang Simbahan adunay 58,000 ka misyonaryo. Karon, human ang dako nga pagsaka dihang ang edad sa pagserbisyo gipaubsan, ang gidaghanon miabut og mga 67,000.
Personal nga mga Hiyas
Kadaghanan sa unsay naribyu mahitungod ni Doctor, Elder, ug karon Presidente Nelson usa ka publiko nga rekord. Mokomentaryo na ako karon sa pipila sa iyang importante nga personal nga mga hiyas nga akong naobserbahan sa milabayng mga tuig.
Una, si Russell M. Nelson usa gayud ka buotan nga tawo ug buotan nga higala ug kauban. Kanunay ang iyang pagkamabination ug kapuangod sa tanan niyang personal nga mga relasyon. Talagsaon siyang ehemplo, kugihan ug tumanon gayud niya ang iyang mga responsibilidad—pamilya, Simbahan, ug propesyunal. Ug makalingaw siya nga ikauban.
Sa iyang estilo sa pagpangulo, kanunay siyang mahigalaon ug sayon duolon. Mao kana ang labing gitinguha nga hiyas sa senior nga mga lider. Uban kaniya, dili gayud kami magduha-duha sa pagsulti sa piho nga hilisgutan o mobati nga ang pagbuhat sa ingon makasamok kaniya. Wala gayud kami mahadlok sa pagpakigsulti kaniya mahitungod sa bisan unsang piho nga butang. Si Presidente Nelson bukas kaayo, dali maduolan, ug sayon kaayo pakig-istoryahan.
Sa iyang paghimo og desisyon, si Presidente Nelson mabalaka mahitungod sa kinatibuk-ang epekto. Maayo siya nga maghuna-huna sa posibleng epekto sa usa ka desisyon o polisiya o paggamit sa doktrina sa lain-laing mga grupo sa mga miyembro—sa mga hamtong, sa mga batan-on, sa dili kaayo aktibo, sa mga lider sa Simbahan, ug sa uban. Nakita nako kana nga hiyas sa ubang mga lider, apan ang panan-awon ni Presidente Nelson niini nga hilisgutan talagsaon. Tingali resulta kini gikan sa iyang kasinatian isip usa ka doktor kinsa dili makahatag og resita alang sa usa ka bahin sa lawas nga dili maghunahuna sa epekto niini sa ubang mga bahin.
Si Presidente Nelson usa gayud ka maayo kaayo nga tigtugyan, mas maayo niini kay sa daghang mga lider nga akong naobserbahan sa propesyunal ug sa Simbahan. Kana usab tingali may kalabutan sa trabaho sa surgeon, kinsa mopahigayon og talagsaong buluhaton human (ug sa dili pa) mobuhat ang uban.
Laing importante nga hiyas ni Presidente Nelson mao ang iyang pasensya. Maglikay siya og komprontasyon kon magsulbad og mga problema o mga butang nga kinahanglang mahuman. Maalamon siyang maglikay sa mga taktika nga “sulbaron nato na karon dayon” pabor sa pagtugot og gamayng panahon kon masulbad ra ba kini sa iyang kaugalingon. Kana nga hiyas importante kaayo sa iyang pagpangulo, sama sa panahon sa duha ug tunga ka tuig sa iyang pagserbisyo isip Presidente sa Korum sa Napulog Duha.
Kay nakadayeg sa pasensya ni Presidente Nelson, kinahanglang daygon usab nako ang lahi nga hiyas. Dili siya magduha-duha sa paghimo og mga desisyon. Kon sakto ang panahon ug ang isyu andam na alang sa desisyon, mohimo dayon siya og lig-on nga mga desisyon. Siya adunay maayong pagsabut kon ang usa ka hilisgutan magkinahanglan og pasensya ug dugang pang paghisgot ug kon kinahanglan lang kaming mopili sa mga alternatibo ug mopadayon sa buhat sa Ginoo. Ang iyang mga kauban sa pagpangulo ganahan niana.
Si Presidente Nelson usa usab ka tighiusa. Iyang dad-on ang nagkalahi nga mga punto sa panglataw ngadto sa panag-uyon ug ang managlahi nga mga tawo ngadto sa panaghiusa. Pagkatalagsaon nga hiyas alang sa usa ka lider sa mga miyembro kinsa mapasaligon ngadto sa samang balaang doktrina apan gikan sa lain-laing mga kultura ug mga tradisyon.
Si Russell M. Nelson adunay natural nga mga gasa sa diplomasya nga akong naobserbahan mismo. Gigamit niya kini sa iyang propesyunal nga mga kalihokan, bisan sa China. Sukad sa iyang tawag ngadto sa Napulog Duha, nakahimo siya og mga oportunidad alang sa Simbahan sa Eastern Europe sa tanang nagsunod-sunod nga milagroso nga mga sirkumstansya. Dugang pa, nakabisita siya og 133 ka lain-laing mga nasud isip sulugoon sa Ginoo. Pagkatalagsaon nga pagpangandam alang sa dakong katungdanan nga karon diin siya gitawag!
Lain nga importanting mga hiyas ni Presidente Nelson—makasurprisa sa pipila—mao ang iyang kahanas isip usa ka magsusulat. Ang iyang sinulat nga komunikasyon mao ang mga ehemplo sa kaklaro, ug ang iyang pag-edit sa sinulat sa uban makatabang kanunay. Ang mga sakop sa Napulog Duha magbayloay og mga draft aron makakuha og mga sugyot alang sa kalamboan sa teksto sa importante nga mga pakigpulong. Niana nga proseso, akong nakat-unan nga walay usa nga nagsugyot og mas maayo nga kalamboan sa akong mga pakigpulong kay ni Presidente Nelson. Isip usa nga migahin sa iyang propesyunal nga kinabuhi sa mga pulong, natingala ko nga ma-edit sa maalamong paagi sa usa ka tawo kansang propesyunal nga kinabuhi gigahin sa mga lawas. Nahupay ko nga nakahibalo nga ang iyang pagkamaayo nga mosulat mao ang resulta sa kakugi. Makausa, atol sa usa ka hangyo sa pagribyu sa usa sa iyang mga manuskristo, akong nakita nga kini mao ang ikawalo nga draft. Kon nakahibalo pa ko sa talagsaong rekord ni Dr. Nelson sa propesyunal nga mga gimantala, dili unta ako matingala nga walay mas maayo nga magsusulat diha sa Korum sa Napulog Duha.
Daghan ang natingala sa edad sa atong bag-ong presidente—93! Kita nga nagtrabaho uban kaniya nabalaka lamang sa atong kaugalingong mga paningkamot nga makatupong kaniya. Ang iyang pagkaaktibo, sa pisikal ug sa hunahuna talagsaon kaayo. Ang panumduman talagsaon kaayo. Mag-ski pa siya kanunay nga mopahulay lang og kadiyot. Mogamit gihapon siya sa iyang snowblower, sa iyang agianan sa sakyanan ug sa iyang silingan.24 Nakasinati ko sa iyang walay limit nga kalagsik kada Huwebes. Kon mahuman na ang among miting sa Templo sa Salt Lake, ang uban mosakay sa elevator ngadto sa ubos nga andana ug ang uban maglakaw og pipila ka hut-ong sa hagdanan gikan sa kwarto sa itaas. Si Presidente Nelson kanunay nga magdali nga manaog sa hagdanan. Kanunay kong maningkamot sa pag-apas kaniya apan dili ko makahimo.
Mapasaligon ngadto sa Manluluwas
Si Presidente Nelson miingon, “Ang matag adlaw sa pagserbisyo sa usa ka Apostol usa ka adlaw sa pagkat-on ug pagpangandam alang sa dugang nga mga responsibilidad sa umaabut.”25 Alang kaniya, ang panahon sa pagpangandam nahuman na, ug nadawat na niya ang sagrado nga kupo sa Presidente sa Ang Simbahan ni Jesukristo sa mga Santos sa Ulahing mga Adlaw. Unsay mapaabut nato sa iyang pagpangandam atol sa iyang panahon sa pagpangulo?
Ang labing importante mao ang iyang pasalig ngadto ni Ginoong Jesukristo, kinsa mao ang pangulo sa Iyang Simbahan. Sama sa gisulti ni Presidente Nelson sa iyang mensahe sa Enero, gikutlo sa sayo pa, “Kita … mopadayon sa pagtinguha nga makahibalo sa Iyang kabubut-on ug mosunod niini.”26 Sa kasamtangan, ang dinasig nga mga pagtulun-an ni Presidente Nelson miila sa posible nga mga hilisgutan nga hatagan og gibug-aton.
Atol sa Oktubre 2017 nga kinatibuk-ang komperensya, si Presidente Nelson mipahinumdom sa mga miyembro sa Simbahan sa pagkaimportante sa Basahon ni Mormon. Gipakigbahin niya ang mga resulta sa iyang personal nga pagtuon sa Basahon ni Mormon, lakip sa mga lista kon unsa ang Basahon ni Mormon, unsay gipamatuod niini, unsay gisupak niini, unsay natuman niini, unsay giklaro niini, ug unsay gipadayag niini. Iyang giawhag ang mga miyembro sa pagtuon ug pagpamalandong sa basahon kada adlaw.27
Niadtong Enero 16, 2018, duha ka adlaw human si Presidente Nelson na-set apart isip Presidente sa Simbahan, iyang gipahibalo nga ang bag-ong Unang Kapangulohan magsugod sa iyang pangalagad sa “paghunahuna sa katapusan.” Kana nga “katapusan” mao ang kaluwasan sa mga indibidwal ug sa sealing sa mga pamilya diha sa balay sa Ginoo. “Tungod niini nga rason, namulong kami kaninyo karon gikan sa templo,” miingon si Presidente Nelson gikan sa annex sa Templo sa Salt Lake.
“Ang tumong nga gipaningkamutan sa matag usa nato mao ang matugahan og gahum diha sa balay sa Ginoo, ma-seal isip mga pamilya, matinud-anon sa mga pakigsaad sa templo nga maghimo kanatong takus sa labing mahinungdanong gasa sa Dios—ang kinabuhing dayon. Ang mga ordinansa sa templo ug ang mga pakigsaad nga inyong gihimo didto mahinungdanon sa pagpalig-on sa inyong kinabuhi, sa inyong kaminyoon ug pamilya, ug sa inyong abilidad sa pagbatok sa mga pag-atake sa kaaway. Ang inyong pagsimba sa templo ug ang inyong pagserbisyo didto alang sa inyong mga katigulangan mopanalangin kaninyo og dugang nga personal nga pagpadayag ug kalinaw ug molig-on sa inyong pasalig nga magpabilin diha sa dalan sa pakigsaad.”28
Si Presidente Nelson mitawag usab sa mga Santos nga magpabilin sa dalan sa pakigsaad: “Ang inyong pasalig nga mosunod sa Manluluwas pinaagi sa paghimo og mga pakigsaad uban Kaniya ug dayon sa pagtuman niadto nga mga pakigsaad moabli sa pultahan ngadto sa tanang espirituhanong mga pribilehiyo ug panalangin nga mahimong maanaa sa mga babaye, lalaki, ug mga bata bisan asa.” Niadtong mipahawa sa dalan, siya misulti: “Dapiton ko kamo uban sa tanang paglaum sa akong kasingkasing nga balik palihug. Bisan unsa pa ang inyong mga problema, bisan unsa ang inyong mga hagit, adunay luna alang kaninyo dinhi, sa Simbahan sa Ginoo. Kamo ug ang mga henerasyon nga wala pa matawo mapanalanginan sa inyong mga buhat karon nga mobalik sa dalan sa pakigsaad.”29
Ania ang laing importante nga timaan: “Ang kasulatan nga nahimong buhi nga sugilanon alang nako mao ang ika-88 nga seksyon sa Doktrina ug mga Pakigsaad, diin ang Ginoo miingon, ‘Ako modali sa akong buluhaton diha sa iyang angay nga panahon,’” miingon si Presidente Nelson. “Ug ako nabuhi … aron makakita niining pagpadali.”30 Karon siya mogiya niini.
Si Presidente Russell M. Nelson mipamatuod kanunay sa pagkabalaan ni Jesukristo ug sa kamatuoran sa plano sa kaluwasan nga gihatag sa atong Langitnong Amahan ug sa Iyang Hinigugmang Anak sa pagpahibalo ug paggiya kanato. Samtang mogiya si Presidente Nelson sa Simbahan sa umaabut, ang mga Santos sa Ulahing mga Adlaw makaangkon og dakong kahupayan sa pagkahibalo nga siya mogiya kanila sumala sa kabubut-on sa langit. “Akong ipahayag ang akong debosyon ngadto sa Dios nga atong Mahangturong Amahan ug sa Iyang Anak, si Jesukristo,” miingon siya. “Nakaila ako Kanila, naghigugma Kanila, ug mopasalig sa pag-alagad Kanila—ug kaninyo—sa matag ginhawa nga nahabilin sa akong kinabuhi.”31
Gimahal nako kining sulugoon sa Ginoo, ang akong dugay na nga kauban ug higala, si Presidente Russell M. Nelson. Uban sa akong isig ka miyembro sa Ang Simbahan ni Jesukristo sa mga Santos sa Ulahing mga Adlaw, akong gimahal ang iyang mga pagtulun-an ug magpaabut sa iyang dinasig nga pagpangulo isip atong propeta. Ako mopamatuod nga gitawag siya sa Dios sa paggiya sa Simbahan sa atong panahon.