2018
Būreejtōn Russell M. Nelson: Kar Tōle, Kar Kōpooje, Kar Kallim̧ur
Būreejtōn Russell M. Nelson


Būreejtōn Russell M. Nelson: Kar Tōle, Kar Kōpooj, Kar Kallim̧ur

Ālkin jon̄oul iiō ko in an m̧wim̧wij im m̧adm̧ōdi menono ko āinwōt juon rim̧wijm̧wij menono ebun̄bun̄ innām im̧we elōn̄ bōro ko āinwōt juon Rijilōk an Irooj Jisōs Kraist, Būreejtōn Russell M. Nelson ej bōktok pā memaron̄ron̄ im juon iakwe em̧ool n̄an jerbal in karejar eo an āinwōt Būreejtōn eo an Kabun̄ in.

Pija
President Russell M. Nelson seated in black chair

N̄e juon Būreejtōn an Kabun̄ in ej mej, elōn̄ rej kalimjōk jekjek eo an eo ej kālet ej bōk jikin. Ilo m̧ool, jekjek jab in, kar tōl jān Irooj, ekar ijjino elōn̄ iiō ko m̧okta. Russell M. Nelson eaar wōr juon an iien m̧aanjabpopo ilo aolepān an mour n̄an kūr in ekwojarjar. Iaar juon rikam̧ool n̄an enan̄in aolepān m̧aanjabpopo jab in.

Maanjabpopo eo an Būreejtōn Russell M. Nelson ej kein kam̧ool ilo tōprak in aolepān iminene ko im tōprak ko an ilo aolepān mour eo an. E ebun̄bun̄ āinwōt rim̧wijm̧wij menono eo m̧oktata. E ej juon rijeje im rikōnono eo ekapeel, maron̄ kōnono ilo elōn̄ kajin ko. E ejeļā im iakwe armej ro, im ej meļeļe tokjān ko an jokālet ko ilo mour ko aer. E ejelā im iakwe jeje ko rekwojarjar im tampeļ kwojarjar eo. E ej juon ritōl etijemļo̧k eo ej kōm̧m̧ane jokālet ko ilo iien eo em̧ōkaj im jejet.

Būreejtōn Nelson e make ekar jeļā kajien, im ilo elōn̄ iien ko eaar ekkatak jān, 10 iaan 16 Būreejtōn ro m̧oktaļo̧k an Kabun̄ in. Kiiō, āinwōt Būreejtōn eo Kein 17, ej jino jerbal in būreejtōn eo an n̄an jiron̄ Armej ro Rewojarjar ilo Raan-ko Āliktata bwe Jisōs Kraist enaaj wōnm̧aanļo̧k wōt im tōl Kabun̄ eo An.

“Irooj ej iien otemjej eaar im enaaj iien otemjej katakin im im̧we rikanaan ro An,” eaar ba ilo iien kōjjeļā eo imejatoto ilo Jānwōde 16, 2018. “Irooj ej pād ilo Jōbwe eo. Kōj ro rekar ekkapit n̄an kwaļo̧k kam̧ool kōn āt eo Etan ekwojarjar ipeļaakin laļ in naaj wōnm̧aanļo̧k wōt im pukōt n̄an jeļā Ankilaan im ļoor e.”1

N̄ūrbōktak eo an Būreejtōn Nelson kōn jeraam̧m̧an indeeo eo an ajri ro nejin Anij ej itok jān juon bōro erub ilo jerbal in jipan̄ ilo aolepān mour eo an. Ilo ejja jekjek eo wōt ke eaar un̄ur elōn̄ bōro ko āinwōt juon rim̧wijm̧wij, eaar un̄ur elōn̄ bōro ko an Armej ro Rekwojarjar laļ in kōn katak ko rekajoor an, jerbal in jipan̄ kōn jab ļōmņak kōn e make, im iakwe ejjab likjab. Āinwōt an kar ba ilo iien kadiwōjļo̧k eo imejatoto ilo Jānwōde eo, bwe iakwe “eaar eddōkļo̧k ium̧win n̄oul iiō ko in an kweilo̧k ippām̧i, im kabun̄-jar ippāmi, im jerbal n̄an kom̧.”2

Maanjabpopo eo Eaorōk

Eļap wōt ijo armej rejeļā kajien kōn jerbal eo ejeno̧lo̧k an Dr. Nelson āinwōt juon scholar, scientist, im rim̧wijm̧wij menono an armej. Aolepān menin, barāinwōt kōn waanjon̄ak in mour an baam̧le, eaar juon m̧ōttan aorōk kōn m̧aanjabpopo eo an.

Pija
young Russell M. Nelson with his parents and siblings

Russell Marion Nelson eaar ļotak ilo Jeptōm̧ba 9, 1924, n̄an Marion C. im Edna Anderson Nelson. Jim̧or jinen im jemān raar membōr ro rejeniknik an Kabun̄ in ilo aolepān tōre ko Russell ej ajri, bōtaab raar kwaļo̧k eļap iakwe n̄an ajri ro nejier im jet iien rekar jilkinļo̧k er n̄an Jabōt Jikuuļ. Ilo jinoin, Russell eo edik eaar jab itok limo in ilo jar, kōņaan ikkure football ippān ro m̧ōttan. Bōtaab ke eaar tōpar 16, būruwōn eaar jino eltok n̄an m̧ool ko an gospel eo im eaar peptaij ippān ro jein im jatin. Iiō ko tokālik, kōn waanjon̄ak im kareel an ro nejier, ro jinen im jemān Nelson raar bar ro̧o̧ltok im niknik.

Russell eo edik eaar barāinwōt uwaake kallim̧ur eo an jeļāļo̧kjeņ. Eaar jino kile, ke enaaj tokālik katakin, bwe kappukōt jeļāļo̧kjeņ ej juon eddo an kabun̄. Eaar kadiwōjļo̧k jān high school ilo 16 iiō, im eaar deļo̧n̄ ilo University of Utah ke aolepān laļ in eaar limotak kōn Pata eo an Lal In Kein II kar bōbraejān an jerbale juon mijen.

Ke Russell eaar jerbal im pukot bachelor degree eo an, kapeel eo an ikkijien al eaar kilaakļo̧k e n̄an kobaļo̧k ippān juon kumi in al ilo univeristy. Eaar tōl ilo jōbraino, Dantzel White, ekar ļo̧kjen an kōn e. Jidik iien tokālik rekar m̧are ālkin an kar bōk bachelor degree eo an ilo 1945. Ke eaar 22 iiō dettan, eaar kadiwōjļo̧k jān Univeristy of Utah kōn nōbar ko routiej āinwōt juon taktō. Eaar etal wōt n̄an University of Minnesota im kamminene n̄an erom̧ juon taktō. Ijo eaar juon membōr eaorōk an tiim eo me eaar im̧aantata ilo kōm̧m̧ane m̧wijm̧wij menono. Tokālik eaar kōm̧m̧ani jerbal in m̧wijm̧wij eo an ilo Minnesota im ilo Massachusettes General Hospital eo ilo Boston, Massachusettes, USA.

Ilo ioļapļap in an jikuuļ im an ļapļo̧k baam̧le eo an, Dr. Nelson kar kūri n̄an jerbal ilo iien Pata eo an Korea kōnke ekar lukkuun ļap aikuj taktō ilo jarin tariņae eo. Kōnke kaminene eo an ikkijien m̧wijm̧wij, kar jilkinļo̧k e n̄an Washington D.C., ijo eaar ejake juon kumi in ekkatak in m̧wijm̧wij ilo Walter Reed National Military Medical Center eo. Ilo 1953 eo, eddo eo an ilo jar in tariņae eaar kūrm̧ool, eaar joļo̧k juon iiō ilo Harvard Service eo ilo Massachusetts General Hospital eo ilo Boston. Innām eaar kadedeļo̧k PhD eo an ilo University of Minnesota ilo 1954 eo.

Pija
Russell M. Nelson with his wife (Dantzel) and children

Kōjekdo̧o̧n an poub ilo kaminene eo an kōn taktō im jerbal, Dr. Nelson eaar iien otemjej likūt m̧oktata baam̧le eo an ilo mour eo an. Dantzel White Nelson eaar jutak iturin im kar rie ļeo pāleen ilo aolepān baam̧le eo an, Kabun̄, jerbal, im m̧akūtkūt ko an jar in tariņae. Aer kijejeto, rejtak eo ippān doon im kadkad eo em̧m̧an eaar juon im̧we im kareel edim n̄an kajjojo ajri ro 10 nejier—ratimjuon leddik ro im juon ļaddik. Kadkad eo aer “eaar lukkuun em̧m̧an im lukkuun leļo̧k n̄an doon,” ekkar n̄an leddik eo nejier Sylvia Webster. Eo ediktata nejier, Russell Nelson Jr., eaar ba, “Eaar iien otemjej alikkar bwe ro jinō im jema raar kanooj iakwe doon.”3

Ilo ejjeļo̧k kōtmāne kake, Dantzel Nelson eaar mej ālkin wōt iiō eo kein 60 iiō in aerro kar m̧are. Ālkin juon iien eaar kanooj ajimakeke, Elder Nelson eaar m̧areik Wendy Watson, juon kōrā eo eaar jab m̧are m̧okta eo me eaar wōr an doctor degree, jerbal ilo Brigham Young University eo, im an iakwe n̄an baam̧le eo eļap an Nelson eaar kōm̧m̧an bwe en juon m̧ōttan eo em̧m̧an n̄an Elder im Būreejtōn Nelson.

Pija
Russell M. Nelson with Wendy, his second wife

“Ijeļā eaar pen n̄an erom m̧ōttan juon baam̧le eo 200 jim̧a armej ro ie im en̄jake āinwōt kwoj juon m̧ōttan eo epaak,” leddik eo nejin Sylvia eaar ba. “Wendy eaar kōm̧m̧ane juon kijejeto im liin ekabwilōn̄lōn̄.”4 Russell Jr. eaar kakobaba, “Windy ej juon m̧ōttan eo ekanooj em̧m̧an n̄an e. … Imaron̄ lo ekōjkan an kar m̧aanjabpopo ium̧win iiō ko n̄an jerbal in im kūr in, im m̧ōttan eo eaorōk an men in ej Windy ilo mour eo an.”5

Āinwōt an menin kar jeje, oran baam̧le eo an Nelson 10 ajri ro, 57 ajri ro jibūn, im 116 ajri ro jibūn-jibūn, ippān bar 2 m̧ōttan jidik reļotak. Aolep ro me rej pād ilo iien koba ippān doon ilo kajjojo im̧ōko kajjojo allōn̄ n̄an iien kememe raan in ļo̧tak ko im iien m̧are ko.

“Aolep Aelōn̄ In Kiin̄ Ko Em̧ōj Leļo̧k N̄an Er Juon Kien”

Ke Russell M. Nelson eaar pād ilo jikuuļ in taktō, eaar katak bwe ejjeļo̧k taktō enej aikuj jibwe juon menono an armej, kōnke n̄e rej jibwe menono eo, enaaj kar bōjrak an bam̧. Jet wōt iiō tokālik, mekarta, Dr. Nelson im rikkatak ro jet m̧ōttan raar kwaļo̧k kōn wājepdik in kōjerbal juon mijiin in artificial heart-lung ippān juon kūru eo m̧oktata. Mijiin in heart-lung eo eaar bōk itok itak in būtōktōk an rinan̄inmej, kōtļo̧k n̄an an m̧wijm̧wij eo kōm̧m̧ane ilo menono eo ejjab emenono. Jerbal in jān Dr. Nelson im taktō ro m̧ōttan eaar jab to kōm̧m̧an n̄an armej ro im kiiō ej kōm̧m̧an n̄an elōn̄ļo̧k jān 1.5 milien kōm̧adm̧ōd ko kōn kōppeļo̧k menono kōm̧m̧an ilo aolepān laļ in iiō otemjej.

Im̧we eo ekar kōm̧m̧an bwe elolo in en kar ilo̧k n̄an Dr. Nelson ke eaar kejōkļo̧kjeņ kōn eoon kein ilo Katak im Bujen ko:

“Aolep aelōn̄ in kiin̄ ko em̧ōj leļo̧k n̄an er juon kien. …

“Im n̄an aolep aelōn̄ in kiin̄ em̧ōj leļo̧k juon kien; im n̄an kajjojo kien ewōr jon̄aer barāinwōt im koņ ko.” (K&B 88:36, 38).6

Dr. Nelson eaar kejōkļo̧kjeņ bwe eļan̄n̄e eaar jerbal, ekkatak, im kajjitōk kajjitōk ko rejim̧we, e im tiim eo an remaron̄ kar katak ta kien ko rej kakiene emenono an menono. “Eaar jān meļeļe kōn jeje ko rekwojarjar im ‘keidi’ er n̄an ijin ikdelel kake,” eaar ba, “bwe kōn jerbal eo eļap an m̧wijm̧wij menono āinwōt ad jeļā kake rainin eaar jipan̄ n̄a.”7

Ilo aolepān mour eo an, maron̄ in n̄an kōjerbal pedped ko an gospel eo eaar kōjeraam̧m̧an Būreejtōn Nelson, baam̧ļe eo an, Kabun̄ in, im laļ in. Eaar kii eo n̄an m̧aanjabpopo eo an n̄an kūr eo an āinwōt juon Rijilōk im kiiō āinwōt Būreejtōn an Kabun̄ in.

Ilo jerbal eo an etijemļo̧k ie, Dr. Nelson em̧ōkaj an kar utiej āinwōt juon rim̧wijm̧wij im rikkatak kōn taktō. Ilo 1995 eo eaar bōk juon jerbal āinwōt juon rikkatak professor in m̧wijm̧wij ilo University of Utah. Ijo eaar kalōk juon mijiin in heart-lung me eaar kōjerbale n̄an kōm̧m̧ane m̧wijm̧wij menono eo m̧oktata ilo Utah—eo kein kajuon in kain kōm̧adm̧ōd in iturilik in Mississippi River. Eaar ekōnono im je elōn̄ jebta in bok in taktō ko im elōn̄ļo̧k jān 70 ro m̧ōttan raar etale peba ko ilo bok ko jet. M̧okta jān kūr eo an n̄an rijilōk, eaar kōm̧m̧ane kōpetata in ļo̧k 7,000 m̧wijm̧ij ko.8

Ilo kakobaba n̄an kapeel in taktō eo an, Dr. Nelson eaar juon rūkaki eim̧we im juon ritōl ilo opiij ewājabdik, jekjek ko me ekar kōm̧m̧an bwe en aorōk ilo jikin taktō im tokālik kōjeno̧lo̧k e ilo kūr ko an ilo Kabun̄.

“Jerbal eo an juon taktō, eļaptata, ej n̄an katakin,” Dr. Nelson eaar ba. Eaar kakobaba, “Juon taktō ej lukkuun in jerbal ilo jekjek eo eutiej tata an n̄e ej katakin rinan̄inmej eo an ta eo ebōd im ta eo emaron̄ in kōm̧m̧ane n̄an kajim̧we.”9

Pija
Russell M. Nelson as a doctor and during a visit to China

Dr. Nelson eaar kwaļo̧k ikdelel in im itok limo eo ilo katakin im kajikuuļ jān itok itak n̄an laļ ko ilikin n̄an kwaļo̧k im katakin kilen kōm̧adm̧ōd ilo m̧wijm̧wij. N̄an jipan̄ e ilo katakin, eaar ekkatak elōn̄ kajin ko, ekoba kajin French, Portuguese, Germany, Russia, im Spanish bwe en maron̄ em̧m̧anļo̧k an ekōnono ippān im katakin taktō ro im rikkatak ro ilo laļ ko jet. Ālkin an kar pād ilo juon kweilo̧k eo me Būreejtōn Spencer W. Kimball (1895–1985) eaar rōjan̄ e jarlepju eo n̄an katak kajin China, Dr. Nelson im lio pāleen Dantzel ilo iien eo em̧ōkaj tata raar jino ekkatak kajin Mandrian. An wājabdik ilo kajin eo eaar kōm̧m̧an bwe en jerbal ippān kumi in taktō eo ilo China, ijo eaar kōm̧m̧ani ekōnono ko im kar kōm̧m̧an m̧wijm̧wij, dāpij mour an juon eo ebun̄bun̄ ilo aolepān China.10

Kom̧win Pukōt M̧oktata Aelōn̄ in Anij

Ejja āinwōt an kar kabwilōn̄lōn̄ tōprak ko ilo taktō an Būreejtōn Nelson, eaar kalimjōk wōt Irooj im jerbal eo An. Elōn̄ wōt membōr ro an Kabun̄ in rejjab jeļā bwe eaar jerbal āinwōt mijenede ilo Temple Square eo jān 1955 n̄an 1965 eo, tōl rilotok ro jān 4:00 n̄an 5:00 jota Taije otemjeļo̧k. Iien eo eaar juon iaan iien ko repoub tata āinwōt juon rim̧wijm̧wij. Eaar jeje tokālik bwe “ilo 1964 eo, kōmij kab jino kar tōn ijjino juon kōm̧adm̧ōd kōn kapan̄pan̄ eo kōn bōk jikin aortic valve eo. Jon̄an mej eaar utiej, im iien eo n̄an leļo̧k n̄an kajjojo rin̄aninmej eaar kanooj in ļap—enan̄in juon-illo̧k-juon n̄an elōn̄, elōn̄ awa ko, jet iien em̧ool raan ko.”11

N̄an elōn̄ iaan membōr ro an Kabun̄ in, bwe ilo m̧ool enaaj kar kōm̧m̧an bwe en pen juon kūr eo aikuj eļapļo̧k iien. Ejjab n̄an Dr. Nelson. Ilo 1964 eo, ālkin an im ro jet kar intōrpiu āinwōt naaj kar juon stake būreejtōn, Elder Spencer W. Kimball, kar etal ippānļo̧k Elder LeGrand Richards (1886–1983) jān Doulul eo an Jon̄oulruo Rijilōk ro, eaar jiron̄ e: “Kōmij en̄jake bwe Irooj ekōņaan bwe kwōn tōl stake in. Ilo iien intōrpiu ko am rellōn̄, jabdewōt iien etam eaar walōn̄tak uwaak eo eaar ijello̧kin tartokin: “O, ejjamin in lukkuun in em̧m̧an,’ ak ‘Ejjeļo̧k an iien,’ ak er jim̧or. Mekarta, kōmij en̄jake bwe Irooj ekōņaan kwe. Kiiō eļan̄n̄e kwoj en̄jake bwe eļap am̧ boub im jamin bōk kūr eo, innām ej am̧ iien em̧m̧an.’ …

“Ilo ļam waan iaar uwaak bwe jokālet eo eaar kōm̧m̧an ilo O̧kwōj 31, 1945 eo, ke Sister Nelson im n̄a kar m̧are ilo tampeļ. Kōm kar kōm̧m̧ane juon kallim̧ur tōre eo n̄an ‘pukōt … m̧okta aelōn̄ in Anij, im an kwojarjar,’ en̄jake lōke bwe aolep men ko jet renaaj kar kobaiktok n̄an kōm, āinwōt an Irooj kar kallim̧ur. (Lale Matu. 6:33.)”12

An Dr. Nelson bōk kūr jab eo ej kwaļo̧k ta eo Elder Jeffrey R. Holland jān Doulul eo an Jon̄oulruo Rijilōk ro kar ņae etan ejjab to “ettā āinwōt ajri im ļam waan an tōmak eo an Russell Nelson. … Ej ettā, e āinwōt ajri, ilo aolep jon̄ok im ilo enan̄in aolep jem̧jerā an armej bwe emōj aō lo e ie.”13

Elder Kimball eaar leļo̧k n̄an Dr. Nelson juon kōjeraam̧m̧an, kallim̧ur bwe oran jon̄an mej reiookļo̧k aortic valve m̧wijm̧wij eo enaaj kar dikļo̧k im bwe kōm̧adm̧ōd eo ejjamin bar aikuji eļap kōn iien eo an im kajoor eo an.

“Iiō eo tok juon, iien eo aikuji n̄an kōm̧adm̧ōd eo eaar dikļo̧k, im eaar wōr aō iien eo aikuji n̄an jerbal ilo kūr eo ak kūr ko jet,” Dr. Nelson eaar ba. “Ilo m̧ool, oran jon̄an mej eo am eaar dikļo̧k n̄an … juon eo edik im em̧m̧an, jon̄an eo bōke. Ebwe an kaitoktok limo, bwe m̧wijm̧wij eo iaar kōm̧m̧ane n̄an Būreejtōn Kimball ralitōk iiō ko tokālik.”14

Pija
Russell M. Nelson and Spencer W. Kimball; Russell M. Nelson with Dantzel, his first wife

Aikuj eo jān jikin jerbal eo an im kūr ko an Kabun̄ in eaar meļeļe in bwe Dr. Nelson eaar kanooj dik an iien kakkije n̄an joļo̧k iien ilo m̧weo. Mekarta, eaar kōm̧m̧ane aolep men ko emaron̄ in kar n̄an kōm̧m̧an bwe lio pāleen im ajri ro nejier 10 rej juon kālet eaorōktata. Jabdewōt iien eaar pād ilo m̧weo im̧ōn, ekōn wujlepļo̧k aolep an iien n̄an baam̧le eo an. Ilo iien itok itak ko an rellōn̄ ipeļaakin laļ in, emakijkij an bōk lio pāleen ak juon iaan ajri ro nejiero ippānļo̧k. Ilo an Dantzel em̧m̧an an lali ajri ro nejiero ilo an jako, liin eaar kam̧m̧oolol kōn wujlepļo̧k eo an n̄an er n̄e ewōr an iien kakkije jān jerbal eo an im kūr ko an. “N̄e ej pād m̧weo im̧ōn, ej kōm̧aat an n̄an lio pāleen im ajri ro!” liin eaar jiron̄ Būreejtōn Harold B. Lee (1899–1973), eo ilo iien eo eaar Būreejtōn eo an Doulul eo an Jon̄oulruo Rijilōk ro.15 Būreejtōn Lee ekōn emakijkij an bar ālij eoon in n̄e ej kapilōk ritōl ro repoub n̄an m̧ad ippān baam̧le ko aer.

Ļoor Rikanaan eo

Iaar juon rikam̧ool im juon ribōk kuņaan ejjab ļap ilo juon m̧akūtkūt aorōk ilo mour in jerbal eo an Dr. Russell M. Nelson im lio pāleen Dantzel. Menin eaar waļo̧k āinwōt m̧ōttan kweilo̧k eo aō im̧aan tata ippān Nelson ro ilo 1965 eo, elōn̄ļo̧k jān 52 iiō ko remootļo̧k. Ilo bok in kōn mour eo an, Dr. Nelson ej kwaļo̧k ekōjkan aer kar leļo̧k n̄an e āinwōt juon professor in m̧wijm̧wij im chairman an Division of Cardiovascular im Thoracic Surgery ilo University of Chicago. Jerbal in leļo̧k, eaar je, “eaar kōm̧m̧an bwe en wōr kein jipan̄ ko n̄an n̄a ilo wāween jipan̄ ikkijien jāān, laboratory research, im rijerbal ro me renaaj kar kakūrm̧ool ettōņak eo an jabdewōt rikkatak. Āinwōt kein kareel eļapļo̧k, jerbal eo eaar koba emān iiō kaļōj n̄an aolep ajri ro nejimro ratimjuon ilo jikuuļ eo rej kālete, kōn aolep piiļ ko kōļļāik jān University of Chicago.” Eo ej jeban eaar jiron̄ Dr. Nelson, “Juon iaan un ko kōm kōņaan kwe ej bwe kōm jeļā kwoj juon Mormon em̧m̧an. Kōm kōņaan kwe bwe kwōn pād ilo faculty eo am. Kōmij aikuji eok ijin n̄an bōktok kareel eo n̄an University in me juon Mormon emaron̄ bōktok.”16

Ejja m̧ōttan wōt kareel n̄an jerbal in ekajoor an taktō in ekabwilōn̄lōn̄, eo ej jeban eaar kūrtok eō kōn jipan̄ eo aō n̄an kareel Nelson ro n̄an em̧m̧akūtļo̧k n̄an Chicago. Tōre eo iaar juon professor in law ilo University of Chicago im kar jeļā kajien eo ej jeban taktō kōnke kōmro kar jerbal ippān doon ilo faculty senate eo an university eo. Eo ej jeban eaar kajjitōk ippa n̄an kūrtok Nelson ro n̄an kōjota eo ilo m̧weo imōm̧. Eaar libjerjer eō n̄an jiron̄ er aolep men kōn Kabun̄ in ilo Chicago kōnke eaar jeļā menin eaar juon ļōmņak ekanooj aorōk n̄an er.

Kōn menin eaar lio ippān emej, June, im n̄a kar ioon Dantzel im Russell Nelson im kūrtok er n̄an juon kōjota im juon lotok eo eaiboojoj n̄an m̧weo imōm̧ ilo Chicago ilo Jabōt, Nobōm̧ba 21, 1965 eo. Kōm kar kōm̧m̧ane ijo em̧m̧an tata n̄an kareel er n̄an em̧m̧akūttok n̄an Chicago. Tokālik iaar jeļā jān bok eo kōn mour eo an bwe raar “kanooj in itok limo ilo jerbal in im jon̄an raar kālet juon em̧ ilo juon iaan bukwōn ko ilo Chicago ijo [rej] maron̄ karrūtoļo̧k baam̧le eo [aer] ie.”17

Ta eo eaar waļo̧ktok tokālik ej juon waanjon̄ak kōn ekōjkan an im̧we eo an Irooj kar tōl jokālet ko im kōpooj Russell M. Nelson. Ilo Salt Lake City, eaar kappukōt kapilōk jān Būreejtōn David O. McKay (1873–1970) n̄an tōl Nelson ro ilo jokālet in aer eaorōk. Rikanaan eo eaar jar, im uwaak eo eaar itok: “Jaab.”

Pija
David O. McKay; Russell M. Nelson looking at model of heart

Būreejtōn McKay eaar ba: “Em̧ōj am̧ kadede mour ilo jikin kweilo̧k eo em̧m̧an tata ilo aolepān lal in. Ewōr juon wāween am̧ mour me ejjab maron̄ jokkun wōt juon jabdewōt jikin ilo laļ in. Ijin leddik ro nejūm̧ renaaj leļo̧k n̄an er peļaak eo em̧m̧an tata me maron̄ leļo̧k n̄an er. Eļapļo̧k aer aorōk n̄an eok jān jabdewōt bun̄bun̄ ak jekļaj eo me emaron̄ itok n̄an eok ilo jabdewōt university. Jaab, Būratōr Nelson, ijo jikūm̧ ej ijin ilo Salt Lake City. Armej renaaj itok jān aolepān laļ in n̄an eok kōnke kwoj pād ijin. Ijjab ļōmņak kwoj aikuj etal n̄an Chicago.”18

Obrak kōn tōmak, Dr. Nelson eaar m̧akoko in bōk jerbal eo jān Chicago im kar pād wōt ilo Salt Lake City. Ijo, ilo iiō ko jekļaj, an kōm̧m̧an m̧wijm̧wij in menono im kaitokļo̧k mour ko an elōn̄ rinan̄inmej ro rej kam̧oolol, ekoba Būreejtōn Kimball, Elder Richard L. Evans (1906–71), Būreejtōn Boyd K. Packer (1924–2015), im ebar lōn̄ ritōl ro an Kabun̄ in im membōr ro im baam̧ļe ko aer.

N̄an June im n̄a, bwe ioon doon eo ilo Chicago eaar ijjino eo an juon jem̧jerā eo aitok im aorōk ippān Russell im Dantzel Nelson. Jiljino iiō ko tokālik kar kōtļo̧ke āinwōt juon stake būreejtōn im kar kūr āinwōt Būreejtōn eo Eutiej an Jabōt Jikuuļ. Ilo ejja iiō eo wōt, kar jitōn̄ eō bwe in būreejtōn n̄an Brigham Young University. Ium̧win elōn̄ iiō ko, kōm̧ kar jerbal ippān doon ilo Doulul eo an Jon̄oulruo Rijilōk ro, im kiiō kōm naaj jerbal ippān doon ilo Būreejtōnji eo Kein Kajuon ilo juon jem̧jerā me eaar ijjino ilo Chicago ikōtaan ruo rikatakin im lim̧aro pāleer 52 iiō ko remootļo̧k.

Ukōt Bōro ko

Ilo Eprōļ 7,1984 eo, Dr. Nelson ekar ekkapit āinwōt juon Rijilōk im kōjeno̧lo̧k āinwōt juon membōr in Doulul eo an Jon̄oulruo Rijilōk ro. “Ilo juon iien ekadu,” eaar ba, “m̧adjake eo an iiō ko en̄oul remootļo̧k ilo taktō im m̧wijm̧wij kar oktak n̄an wujlepeļo̧k aolepān mour eo aō ilo jerbal in jipan̄ n̄an aō Irooj im Rilo̧mo̧o̧r, Jisōs Kraist.”19

Pija
Russell M. Nelson with other members of the Quorum of the Twelve Apostles

Ilo iien eo kar kūri n̄an rijilōk, Elder Nelson eaar kean̄, “Jerbal eo kiiō ij bōk koņaaō ie ej jerbal eo eaorōk tata ilo laļ in. Ekanooj in ļap, ej kakūrm̧ool, im ej idajon̄jon̄. Im ij aikuj kōm̧m̧ane ijo em̧m̧an tata ippa, kōnke ewōr aō eddo n̄an jerbal in.”20

Jān an kar erom juon Rijilōk, im āinwōt Būreejtōn an Doulul eo an Jon̄oulruo Rijilōk ro jān 2015 eo, Būreejtōn Nelson eaar wōnm̧aanļo̧k wōt in ito itak ilaļ in—kwaļo̧k naan ko an mour indeeo im ukōt bōro ko. Juon iaan ijjitōn̄ ko an m̧oktata eaar jino kwaļo̧k gospel eo n̄an laļ ko ilo Eastern Europe. “Ilo … ļalem iiō ko, eaar wōr 27 aō tūreep ko n̄an 31 laļ ko ilo Europe,” Būreejtōn Nelson eaar ba. “M̧okta jān an Būreejtōn [Ezra Taft] Benson kar mej, … N̄a [iaar] maron̄ in ripoot n̄an e bwe em̧ōj am̧ kar kam̧ōj ijjitōn̄ eo am: kiiō Kabun̄ in ad em̧ōj an jutak ilo aolep laļ ko ilo Eastern Europe.”21

Pija
Russell M. Nelson greeting Saints in Moscow, Russia

Būreejtōn Nelson eaar barāinwōt aje 27 laļ ko n̄an kwaļo̧k gospel eo, ekoba Bulgaria, Croatia, El Salvador, Ethiopia, French Polynesia, Kazakhstan, im Russia. Juon kōttan, ilo ium̧win emān raan ko, eaar aje jiljino laļ ko rejeno̧lo̧k jān doon.22 Ilo jerbal in rijilōk eo an em̧ōj an kiiō loļo̧k 133 laļ ko.23

Āinwōt juon membōr in Doulul eo an Jon̄oulruo eo, Elder Russell M. Nelson eaar jerbal elōn̄ iiō ko āinwōt chairman an kajjojo ko̧o̧njeļ ko jilu raorōk: Mijenede, Tampeļ im Menmenbwij an Baam̧le, im Priesthood Executive (kiiō Priesthood im Family Executive).

Kabun̄ in em̧ōj an kōm̧m̧ani elōn̄ oktak ko reļļap ilo iiō ko Elder Nelson eaar pād ilo Doulul eo an Jon̄oulruo, ijo eaar jerbal ium̧win ļalem Būreejtōn ro an Kabun̄ in. Jān kar 1984 eo, Kabun̄ in em̧ōj an ļapļo̧k alen ruo ilo dettan, jān enan̄in 6 milien membōr ro n̄an elōn̄ļo̧k jān 16 milien. Doulul eo an Jon̄oulruo Rijilōk ro im Būreejtōnji eo Kein Kajuon raar kwaļo̧k ruo ennaan ko kōmālimi: “Baam̧le Eo: Juon Naan in Kean̄ N̄an Laļ In” ilo 1995 eo im “Kraist Eo Emour” ilo 2000 eo. Oran tampeļ ko rej jerbal eaar ļapļo̧k jān 30 ilo 1984 eo n̄an 159 ilo 2017 eo. Ilo 2010 eo, ke Elder Nelson eaar kūr āinwōt chairman eo an Mijenede Executive Ko̧o̧njeļ eo, Kabun̄ in eaar wōr an 58,000 mijenede ro. Kiiō, ālkin lōn̄ļo̧k in oran mijenede eo eļap ke dettan iiō in jerbal kar kadikļo̧k, oran eo eaar pād ilo enan̄in 67,000.

Men ko Bōnjān Make

Elōn̄ wōt iaan ta ko kar etali kōn Taktō, Elder, im kiiō Būreejtōn Nelson ej juon jekjek kar jeļā kajien kake jān aolep. Inaaj kiiō kōnono kōn jet iaan men ko bōnjān rem̧m̧an iaar lali ium̧win elōn̄ iiō ko.

M̧oktata, Russell M. Nelson ej juon armej eo ekanooj em̧m̧an im juon m̧ōtta im rijerbal em̧m̧an. An jouj iien otemjej im tenkwadik ilo aolep jem̧jerā ko an make. E ej āinwōt juon jemānāe ekabwilōn̄lōn̄, niknik im tiljek ilo kōm̧m̧ane eddo ko an ilo—baam̧ļe, Kabun̄ in, im jerbal eo an. Im ekam̧ōņōņō ilo an pād ipeļaakiid.

Pija
Russell M. Nelson on a swing

Ilo jekjek in an tōl, iien otemjej ej jouj im pidodo kepaake. En̄in ej men eo eļap aikuji im ej bōnjān ritōl ro rerūtto. Ippān, jejjab āliklik in kwaļo̧k juon unin kōnono ak en̄jake me enej kōbōņōņōik e. Kōmij jan̄in kar mijak in kōnono ippān kōn jabdewōt men. Būreejtōn Nelson epidodo bwebwenato ippān, lukkuun pidodo kepaake, im lukkuun pidodo kōnono n̄an e.

Ilo kōm̧m̧an jokālet eo an, Būreejtōn Nelson ej n̄ūrbōktak kōn ta eo enaaj waļo̧k. Ekapāāl ilo kōļmenļo̧kjeņ kōn ta ko remaron̄ waļo̧k n̄an juon jokālet ak kakien ak jerbal in juon katak ippān elōn̄ kūrub in membōr ro—rūtto ro, jodikdik ro, ro rejaniknik, ritōl ro an Kabun̄ in, im ro jet. Em̧ōj aō lo bōnjān jab in ippān ritōl ro jet, ak ettōņak eo an Būreejtōn Nelson kōn menin ejej uwaan. Bōlen ej jebar jān imminene ko an āinwōt juon taktō eo ejjab maron̄ leļo̧k kōm̧adm̧ōd n̄an juon m̧ōttan ilo juon ānbwin ilo an jab ļōmņak kōn ta ko renej waļo̧k n̄an m̧ōttan ko jet an ānbwin eo.

Būreejtōn Nelson ej juon eo eļap an em̧m̧an an kōmaron̄ ro jet kōn juon jerbal, em̧m̧an ilo menin jān enan̄in aolep ritōl ro ikar waate er ilo jikin jerbal im ilo karōk ko ilo Kabun̄ in. Menin barāinwōt bōlen m̧ōttan wōt jerbal eo an rim̧wijm̧wij eo, eo ej kōm̧m̧ane juon jerbal āinjuon ālkin (im m̧okta) jān an ro jet kōm̧m̧ani ko aer.

Bar juon m̧wil eaorōk bōnjān Būreejtōn Nelson ej an kijenmej. Ejjab jelm̧ae armej ilo iakwelel n̄e ej ņamejļan būrabōļōm̧ ko ak kadedeļo̧k jerbal ko. Ejjab kōjerbal juon kōl n̄an pukōt uwaak ko “jān kōm̧m̧an bwe en dedeļo̧k kiiō,” ilo an kōņaan kōtļo̧k jidik iien n̄an lale eļan̄n̄e men ko renej ņa mejļaer make. Bōnjān in em̧m̧an enaaj lukkuun aorōk ilo an tōl, baj āinwōt an kar tōl ilo iiō ko ruo im jimettan ke ekar jerbal āinwōt Būreejtōn eo an Doulul eo an Jon̄oulruo Rijilōk ro.

Em̧ōj nōbare kijenmej eo an Būreejtōn Nelson, ij aikuj barāinwōt nōbare juon bōnjān in em̧m̧an im eoktak. Ejjab āliklik in kōm̧m̧ani jokālet ko. N̄e iien eo ejejjet im unin kōnono eo ej pojak n̄an juon jokālet, ej kōm̧m̧ani jokālet ko ilo iien eo em̧ōkaj im jejjet. E ewōr juon an en̄jake em̧m̧an n̄e juon unin kōnono ej aikuji kijenmej im ļapļo̧k kōnono kake im n̄e jej aikuj kālet ilubwiljin men ko roktak im wōnm̧aanļo̧k wōt ilo jerbal eo an Irooj. Ritōl ro jet m̧ōttan rej iakwe men jab in.

Būreejōn Nelson ej barāinwōt juon eo ej kobaik. Ej bōktok meļeļe ko rej kalokjak anemkwōj n̄an ineem̧m̧an im armej ro roktak ilo bōro kuk. Ej ke juon bōnjān ekabwilōn̄lōn̄ an juon ritōl in membōr ro rej kallim̧ur n̄an ejja kain katak in ekwojarjar bōtaab ej itok jān m̧anit ko im imminene ko roktak.

Pija
Russell M. Nelson with young adults

Russell M. Nelson ewōr ippān menin letok ko an aenōm̧m̧an iaar waati ippān. Eaar kōjerbali ilo m̧akūtkūt ko ilo jerbal eo an, aaet ilo China. Jān iien eo ekar kūr n̄an Jon̄oulruo eo, em̧ōj an kōpeļļo̧k kōjām ko n̄an Kabun̄ in ilo Eastern Europe ilo juon kōro̧ro edipio an jekjek ko rekabwilōn̄lōn̄. Ilo kakobaba, eaar loļo̧k 133 laļ ko rooktak āinwōt rikarejeran Irooj. Ej juon m̧aanjabpopo ejej uwaan n̄an jerbal eo eļap me kiiō kar kūr e n̄ane!

Bar juon men eļap im ej būnjān Būreejtōn Nelson—ekailbōkbōk n̄an jet—ej kapeel eo an āinwōt juon rijeje. An leto letak meļeļe ilo jeje rej būnjān ko ralikkar, im an kajim̧we jeje ko an ro jet ej iien otemjej jipan̄. Ro uwaan Jon̄oulruo eo rej litok litak peba ko n̄an bōk ļōmņak ko n̄an kōkōm̧anm̧anļo̧k ilo naan ko an ekōņono ko raorōk. Ilo jekjek jab eo, iaar katak bwe ejjeļo̧k juon elmakot em̧m̧anļo̧k an kōkōmanmanļo̧k ekōnono ko aō jān Būreejtōn Nelson. Āinwōt juon eo eaar joļo̧k mour in jerbal eo an jerbal kōn naan ko, eaar ļo̧kjenaō n̄an kajim̧we ilo jejjet jān juon eo mour in jerbal eo an eaar jerbal ippān ānbwin ko. Iaar emerara n̄an katak bwe m̧ōņakjen in jeje ko an rej tōprak in kūtarre jerbal. Juon kōttan, ilo juon iien etale kar kajjitōk kake kōn juon iaan peba ko an, iaar lo bwe eaar peba eo kein kōralitōk. Eļan̄n̄e iaar jeļā kōn ļo̧o̧k in bok ko rekabwilōn̄lōn̄ an Dr. Nelson, iban kar bwilōn̄ bwe ejjeļo̧k bar rijeje em̧m̧anļo̧k ilo Doulul eo an Jon̄oulruo Rijilōk ro.

Pija
Russell M. Nelson on family ski outing

Elōn̄ rej itok limo kōn jon̄an iiō eo an būreejtōn eo ekāāl ad—93! Kōm ro kōmij jerbal epaake kōmij inepata wōt kōn kijejeto ko am make n̄an atartar wōt ippān. E ekanooj in emourur, ilo ānbwin im ilo kōļmenļo̧kjeņ. An ememej ekabwilōn̄lōn̄. Ekutkut an ski kōn jidik kakkije. Ej kōjerbal wōt kein ukukļo̧k jiņo̧ eo an, jim̧or ilo jidik deļo̧n̄ļo̧k an wa eo waan ak an ro rūturin.24 Em̧ōj aō lo kajoor eo an ejjeļo̧k jon̄an kajjojo Taije. N̄e ej dedeļo̧k am kweilo̧k ilo Salt Lake Tampeļ eo, jet rej bōk elevator eo laļļo̧k n̄an būļoor ko ilaļļo̧k im jet rej etetal laļļo̧k jet jikin iuwe ko jān ruum̧ eo am itulōn̄. Būreejtōn Nelson ej iien otemjej ekairir laļļo̧k ilo jikin iuwe ko. Iien otemjej ij kajieon̄ kōjaake wōt bōtaab jab maron̄ kōm̧m̧ane.

Kar kallim̧ur n̄an Rilo̧mo̧o̧r eo

Būreejtōn Nelson eaar ba, “Kajjojo raan in jebal an juon Rijilōk ej juon raan in katak im kōppopo n̄an eļapļo̧k eddo ilju im jekļaj.”25 N̄an e, iien m̧aanjabpopo eo n̄an tōl Kabun̄ in ej kiiō jem̧ļo̧k, im em̧ōj bōk jerbal eo ekwojarjar an Būreejtōn an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Ta maanjappopo eo an ekar tōlļo̧k kōj n̄an kōtmene ilo tōre in iien tōl eo an?

Aorōk tata eo ej an kallim̧ur n̄an Irooj Jisōs Kraist, eo ej bōran Kabun̄ in An. Āinwōt an Būreejtōn Nelson kar ba ilo ennaan eo an ilo Jānwōde eo, kar kōnono kake im̧aanļo̧k, “Jej … wōnm̧aanļo̧k wōt n̄an pukōt n̄an jeļā Ankilan im ļoore.”26 Ilo iien in, katak ko reim̧we an Būreejtōn Nelson rej kwaļo̧k unin kōnono ko n̄an kalikkari.

Ilo Oktoba 2017 kweilo̧k eo eļap, Būreejtōn Nelson eaar kakeememej ro uwaan Kabun̄ in kōn aorōk eo eļap an Bok in Mormon. Eaar kwaļo̧k tōprak ko jān ekkatak eo an kōn Bok in Mormon, ekoba laajrak ko kōn ta eo Bok in Mormon ej, ta ej kapene, ta eo ej jum̧ae, ta eo ej kakūrm̧ool, ta eo ej kalikkar, im ta ej kwaļo̧k. Eaar libjōrjōre ro uwaan n̄an ekkatak im kejōkļo̧kjeņ kōn bok eo raan otemjej.27

Pija
Russell M. Nelson and his counselors during press conference

Ilo Jānwōde 16, 2018 eo, ruo raan ko ālkin an Būreejtōn Nelson kar kōjeno̧lo̧k āinwōt Būreejtōn eo an Kabun̄ in, eaar kōjeļļā bwe Būreejtōnji eo Kein Kajuon ekāāl enaaj jino jerbal eo an “kōn kōttōpar eo ilo ļōmņak.” Bwe “kōttōpar” eo ej lo̧mo̧o̧r an kajjojo im liāp an baam̧ļe ko ilo im̧weo im̧ōn Irooj. “Kōn un in, jej kōnono n̄an kom̧ rainin jān tampeļ eo,” Būreejtōn Nelson eaar ba jān eon̄ļo̧k eo an Sall Lake Tampeļ eo.

“Kōn kōttōpar eo me kajjojo iaad ej kajieon̄e ej n̄an bōk menin letok kwojarjar eo kōn kajoor ilo m̧weo im̧ōn Irooj, liāp āinwōt baam̧le ko, tiljek n̄an bujen ko kōm̧m̧an ilo tampeļ eo me ej kakōrbōb kōj n̄an menin letok eo eļap tata an Anij—eo an mour indeeo. Kain̄i ko an tampeļ im bujen ko kom̧ij kōm̧m̧ani ijo rej kii n̄an kōkajoorļo̧k mour eo ami, m̧are eo im baam̧le eo ami, im maron̄ eo ami n̄an jum̧ae ko im jo̧o̧r jān jodik ko an rikapo eo. Ami kabun̄-jar ilo tampeļ eo im jerbal eo ami ijo n̄an rūtto ro ami naaj kōjeraam̧m̧an kom̧ kōn ļapļo̧k in revelesōn an juon make im aenōm̧m̧an eo im naaj kōkajoorļo̧k kallim̧ur eo ami n̄an pād wōt ioon iaļ in bujen eo.”28

Būreejtōn Nelson eaar barāinwōt kwaļo̧k juon kajjitōk n̄an Armej ro Rekwojarjar n̄an pād wōt ilo iaļ in bujen eo: “Ami kallim̧ur n̄an ļoor Rilo̧mo̧or eo jān kōm̧m̧ani bujen ko Ippān innām kōjparok bujen ko naaj kōpeļļo̧k kōjām eo n̄an aolep kōjeraam̧m̧an ko ilo jetōb im iien eo em̧m̧an repād n̄an em̧m̧aan ro, kōrā ro, im ajri ro aolep jikin.” N̄an ro me raar jejļo̧k jān iaļ jab in, eaar ba: “Ij kūr kom̧ kōn aolep kōjatdikdik ilo būruwō n̄an jouj im bar ro̧o̧ltok. Jekdo̧o̧n ta inepata ko ami, jekdo̧o̧n ta apan̄ ko ami, ewōr juon jikin n̄an kom̧ ilo menin, Kabun̄ eo an Irooj. Kom̧ im epepen ko rejjan̄in de ļotak naaj jeraam̧m̧an jān m̧akūtkūt ko ami kiiō n̄an bar ro̧o̧ltok n̄an iaļ in bujen eo.”29

En̄in ej bar juon kōkaļļe eaorōk: “Jeje ko rekwojarjar me raar erom bwebwenato ko remour n̄an n̄a ej pād ilo 88 jākjōn in Katak in Bujen ko, ijo Irooj ej ba, ‘Inaaj kōm̧ōkaj jerbal eo Aō ilo iien eo an,’” Būreejtōn Nelson eaar ba. “Im ikar mour … n̄an lo kōm̧ōkaj in.”30 Kiiō enaaj tōl menin.

Būreejtōn Russell M. Nelson eaar iien otemjej kam̧ool kōn kwojarjar eo an Jisōs Kraist im tarlep in m̧ool eo an karōk in lo̧mo̧o̧r eo Jemedwōj Ilan̄ im Nejin Jitōnbōro Emake Wōt kar letok n̄an karon̄ im tōl kōj. Ilo an Būreejtōn Nelson tōl Kabun̄ in n̄an ilju im jekļaj, Armej ro Rekwojarjar ilo Raan-ko Āliktata remaron̄ bōk aenōm̧m̧an eļap ilo jeļā bwe enaaj tōl er ekkar n̄an ankilaan lan̄. “Ij kwaļo̧k aō wujlepļo̧k n̄an Anij Jemed Indeeo im Nejin, Jisōs Kraist,” eaar ba. “Ijelā Kajjiero, ij iakwe Er, im kallim̧ur n̄an jerbal n̄an Er—im kom̧—kōn aolep kitwōn mour eo aō āliktata.”31

Ij iakwe rikarejeran in an Irooj, rijerbal eo im eo m̧ōtta eto am̧ro jerbal ippān doon, Būreejtōn Russell M. Nelson. Ippānļo̧k membōr ro m̧ōttan an Kabun̄ eo an Jisōs Kraist im Armej ro Rekwojarjar ilo Raan-ko Āliktata, ij kaorōk katak ko an im reim̧aanļo̧k n̄an im̧we in tōl eo an rikanaan eo ad. Ij kam̧ool bwe kar kūr e jān Anij n̄an tōl Kabun̄ in ilo tōre in ad.

Kakeememej ko

  1. Russell M. Nelson, “As We Go Forward Together,” Liahona, Epr. 2018, 6.

  2. Russell M. Nelson, “As We Go Forward Together,” 7.

  3. Sylvia Webster and Russell Nelson Jr., in Sarah Jane Weaver, “Get to Know President Russell M. Nelson, a Renaissance Man,” Church News, Jān. 16, 2018, lds.org/church/news.

  4. Sylvia Webster, ilo Sarah Jane Weaver, “Get to Know President Russell M. Nelson.”

  5. Russell Nelson Jr., in Tad Walch, “Who Is President Russell M. Nelson? A Man of Heart, Compassion and Faith,” Deseret News, Jān. 16, 2018, deseretnews.com.

  6. Lale Russell M. Nelson, “Begin with the End in Mind” (Brigham Young University fireside, Jept. 30, 1984), 2, speeches.byu.edu.

  7. Russell M. Nelson, “Begin with the End in Mind,” 3.

  8. Lale Tad Walch, “Who Is President Russell M. Nelson?”

  9. Ilo Spencer J. Condie, Russell M. Nelson: Father, Surgeon, Apostle (2003), 140.

  10. Lale Russell M. Nelson, “Stand as True Millennials,” Liahona, Okt. 2016, 52–53.

  11. Ilo “Elder Russell M. Nelson of the Quorum of the Twelve Apostles,” Ensign, Māe 1984, 87.

  12. Russell Marion Nelson, From Heart to Heart: An Autobiography (1979), 114.

  13. Jeffrey R. Holland, in Tad Walch, “Who Is President Russell M. Nelson?”

  14. Ilo “Elder Russell M. Nelson of the Quorum of the Twelve Apostles,” 88.

  15. Dantzel White Nelson, in Lane Johnson, “Russell M. Nelson: A Study in Obedience,” Ensign, O̧kw. 1982, 23.

  16. Russell Marion Nelson, From Heart to Heart, 149.

  17. Russell Marion Nelson, From Heart to Heart, 149.

  18. David O. McKay, in Russell Marion Nelson, From Heart to Heart, 150.

  19. Ilo Spencer J. Condie, Russell M. Nelson: Father, Surgeon, Apostle, 186.

  20. Ilo Marvin K. Gardner, “Elder Russell M. Nelson: Applying Divine Laws,” Ensign, Juun 1984, 13.

  21. Facebook page eo an Russell M. Nelson, video kar likūt ilo Jept. 11, 2014, facebook.com/lds.russell.m.nelson/videos.

  22. Lale Facebook page eo an Russell M. Nelson, video kar likūti ilo Jept. 11, 2014.

  23. Lale Tad Walch, “Who Is President Russell M. Nelson?”

  24. Lale Tad Walch, “Who Is President Russell M. Nelson?”

  25. Russell M. Nelson, “As We Go Forward Together,” 6.

  26. Russell M. Nelson, “As We Go Forward Together,” 6.

  27. Lale Russell M. Nelson, “Bok in Mormon eo: Eļan̄n̄e en kar Ejjeļo̧k Elmen Nej Kar Mour eo Am̧?Kweilo̧k eo Eļap, Nob. 2009, 84–87.

  28. Russell M. Nelson, “As We Go Forward Together,” 7.

  29. Russell M. Nelson, “As We Go Forward Together,” 7.

  30. Facebook page eo an Russell M. Nelson, video kar likūt ilo Jept. 11, 2014.

  31. Russell M. Nelson, “As We Go Forward Together,” 7.