Peresitene Russell M. Nelson: Taialaina, Sauniaina, Tuuto
I le mavae ai o tausaga e tele o le faaleleia o fatu i le avea ai ma se fomai tipitipi lauiloa o fatu, ona sosoo ai lea ma le faaootiaina o loto i le avea ai ma se Aposetolo a le Alii o Iesu Keriso, ua faaloaloa mai ai e Peresitene Russell M. Nelson se lima mausali ma se alofa lemafaatoilaloina i lana auaunaga o se Peresitene o le Ekalesia.
Pe a maliu se Peresitene o le Ekalesia, e toatele tagata e taulai atu i le faagasologa lea e filifili ai sona sui. O le mea moni, o lena faagasologa, e taialaina e le Alii, na amataina i le tele o tausaga na muamua atu. Na i ai lava ia Russell M. Nelson se olaga o sauniuniga mo lenei valaauga paia. Ua avea pea a’u o se molimau i le tele o lena sauniuniga.
Ua manino lava sauniuniga a Peresitene Russell M. Nelson i le aofaiga atoa o ona aafiaga ma ausiaga o lona soifuaga atoa. Ua lauiloa o ia o se fomai tipitipi paionia o le fatu. O ia o se tusitala ma se failauga atamai, ua mafai ona talanoa i le tele o gagana. E silafia e ia tagata ma alofa i ai, ma e malamalama o ia i aafiaga o faaiuga i o latou olaga. E silafia ma fiafia o ia i tusitusiga paia ma le malumalu paia. O ia o se taitai faafoe atamai e faia ni faaiuga vave ma mausali.
Ua lauiloa patino Peresitene Nelson, ma i le tele o taimi na aoaoina ai e le toa 10 o Peresitene e 16 o le Ekalesia na muamua atu. O le taimi nei, i le avea ai ma Peresitene lona 17, ua ia amata lana auaunaga faaperesitene i le faamautinoa atu i le Au Paia o Aso e Gata Ai o le a faaauau pea ona taitaia e Iesu Keriso Lana Ekalesia.
“E i ai pea le Alii i taimi uma ma o le a aoao ma musuia i taimi uma Ana perofeta,” sa ia saunoa ai i le faasalalauga lea na faasilasila [ai le Au Peresitene Sili] i le aso 16 Ianuari, 2018. “O loo tu le Alii i le Foe. O i tatou o e ua faauuina ina ia molimau atu e uiga i Lona suafa paia i le lalolagi atoa o le a faaauau pea ona saili ia iloa Lona finagalo ma mulimuli i ai.”1
O le popolega o Peresitene Nelson mo le manuia e faavavau o fanau a le Atua e sau mai se auaunaga ootia o le olaga atoa. E pei lava ona ia pa’i moni i le tele o fatu a o avea ma se fomai tipitipi, e faapena foi lona pa’i atu faafaatusa i loto o le Au Paia i le lalolagi atoa i ana aoaoga mamana, auaunaga le manatu faapito, ma le alofa lemafaatoilaloina. E pei ona ia saunoa ai i le taimi o le faasalalauga faasolopito ia Ianuari, o lena alofa “ua faatupulaia i le tele o tausaga o le feiloai atu ia te outou, tapuai faatasi ma outou, ma le auauna atu ia te outou.”2
Sauniuniga Taua
E tele mea ua iloa e uiga i le matata maoae a Dr. Nelson o se sikola, saienitisi, ma se fomai tipitipi paionia o le fatu o le tagata soifua. O mea uma na, faapea ai foi ma lona soifuaga faaleaiga o faataitaiga, o se vaega autu lea o ana sauniuniga.
Na soifua mai Russell Marion Nelson i le aso 9 o Setema, 1924, ia Marion C. ma Edna Anderson Nelson. Sa le o ni tagata toaaga o le Ekalesia ia matua i le taimi atoa o le tamaitiiti o Russell, ae sa la’ua matua alolofa i le la fanau ma mai lea taimi i lea taimi sa la auina atu ai i latou i le Aoga Sa. O le taimi muamua lava, sa le naunau ai le taulealea o Russell i le lotu, sa fiafia lava e taalo lakapi ma ana uo. Ae ina ua atoa lona 16, sa amata ona tali atu lona loto i upumoni o le talalelei ma sa papatisoina ai o ia faatasi ma ona tei. I ni tausaga mulimuli ane, ona o le faataitaiga ma le faatauanauga a le la fanau, sa toe foi mai ai matua o Nelson ma malolosi i le lotu.
Sa tali atu foi le taulealea o Russell i le folafolaga o aoaoga. Sa oo ina ia iloa, e pei ona o le a ia aoao atu ai mulimuli ane, o le tulitulimatāgauina o le a’otauina o se tiutetauave faalelotu. Sa faauu o ia mai le a’oga maualuga i le 16 o tausaga, ma sa lesitala ai i le Iunivesite o Iuta ina ua taofia e fetaua’iga i le lalolagi atoa o le Taua Lona II a le Lalolagi o ia mai le auauna atu i se misiona faamamaluina.
A o galue ai Russell mo lana faailoga o le tagata malaga, sa faatosinaina o ia e lana taleni faamusika ia auai i le au musika i le iunivesite. O le taitai o le soparano, o Dantzel White, na tosina i ai lana faalogo ma lana vaai. E lei leva ona uma ona maua lona faailoga o le tagata malaga ae faaipoipo loa i la’ua i le 1945. I le 22 o tausaga, sa faauu ai o ia ma le mamalu maualuga mai le Iunivesite o Iuta o se fomai. Sa ia faaauau i le Iunivesite o Minesota mo aoaoga faafomai faaopoopo. O iina sa avea ai o ia ma tagata autu o le vaega sa muai atiaeina le taotoga o le fatu. Mulimuli ane sa ia auauna atu i tagatanuu i Minesota i taotoga ma i le Maota Gasegase Lautele o Massachusetts i Boston, Massachusetts, ISA.
I le lotolotoi o lana a’oga ma le faatupulaia o le aiga, sa poloaiina ai Dr. Nelson ia auauna atu i le taimi o le Taua i Korea ona sa matua manaomia tele fomai e le militeli. Ona o ana aoaoga tau taotoga, sa auina atu ai o ia i Uosigitone, D.C., lea na ia faatuina ai se iunite mo sailiiliga tau i taotoga i le Walter Reed National Military Medical Center. I le 1953, na faatunuuina ai lana matafaioi faafomai, sa ia faaaluina se tausaga i le Harvard Service i le Maota Gasegase Lautele o Massachusetts i Boston. Ona ia faamaeaina ai lea o lana faailoga PhD i le Iunivesite o Minesota i le 1954.
E ui i le pisi o lana a’oga faafomai ma le matata, ae sa faamuamua i taimi uma e Dr. Nelson lona aiga i lona soifuaga. Sa tu Dantzel White Nelson i talaane ma lagolago lana tane i gaoioiga uma a lona aiga, Ekalesia, faalematata, ma faamiliteli. O le la sootaga tumau, felagolagomai tutusa ma le agaalofa o se uunaiga ma le faatosinaga mausali lea mo tamaiti taitasi e 10 o le la fanau—iva afafine ma le atalii e toatasi. O le la mafutaga “sa matagofie tele ma sa lotofoai tele i le tasi ma le isi,” e tusa ai ma le saunoaga a le afafine ia Sylvia Webster. Sa faamatala e le la uii, o Russell Nelson le Itiiti, “Sa iloagofie i taimi uma le alolofa tele o o’u matua i le tasi ma le isi.”3
Sa faafuasei ona maliu Dantzel Nelson ae toeitiiti atoa le la 60 tausaga o le la faaipoipoga. Ina ua mavae se taimi o le tuuatoatasi tele, sa faaipoipo atu ai Elder Nelson ia Wendy Watson, o se tamaitai sa lei faaipoipo muamua o lē, i lana faailoga faafomai, se polofesa i le Iunivesite o Polika Iaga, ma lona aapa atu ma le agaalofa i le aiga toatele o Nelson sa avea ai o ia ma se soa talafeagai mo Elder ma Peresitene Nelson.
“Ou te mautinoa e faigata le savali atu i totonu o se aiga e 200 ma ona tupu tagata ma lagona e pei oe o se uo mamae,” sa saunoa ai Sylvia. “Sa faia e Wendy se taumafaiga ma e ofoofogia lava o ia.”4 Sa faaopoopo mai Russell le Itiiti, “Ua avea lava Wendy ma se soa lelei tele ia te ia. … Ua mafai ona ou vaaia le auala o loo saunia ai o ia i le gasologa o tausaga mo lenei tofiga ma lenei valaauga, ma o se vaega autu o lena mea, o Wendy i lona soifuaga.”5
A o tusia lenei tala, o le aofai o le aiga o Nelson e 10 le fanau, 57 fanau a fanau, ma fanau a fanau a fanau e 116, faatasi ai ma le isi to’a 2 o loo faatali nei. O i latou uma e avanoa e faatasitasi i se fale i masina taitasi e faamanatu ni aso fanau ma aso faamanatu.
“O Malo Uma ua I Ai se Tulafono ua Tuu Atu i ai”
A o i ai Russell M. Nelson i se a’oga faafomai, sa aoaoina o ia e leai se fomai e tatau ona pa’i i se fatu o se tagata ola, ona o le taimi lava e pa’i ai i se fatu, o le a le toe tata ai. Peitai, i le na o ni nai tausaga mulimuli ane, sa lipotia ai e Dr. Nelson ma ana uso a sailiili le faamanuiaina o le faaaogaina o se masini fai o le fatu-mama i se ta’ifau. O le masini o le fatu-mama na te tauaveina le fealua’iga o le toto o le ma’i, ma faatagaina ai le taotoga e fai i le fatu e le o tata. O lenei foafoaga fou a Dr. Nelson ma ana paaga sa lei pine ae faalautele atu i tagata soifua ma ua taitai atu ai nei i le silia ma le 1.5 miliona taotoga o fatu e faia i tausaga taitasi i le lalolagi atoa.
O le musumusuga lea na taitai atu ai i lenei ausiaga na oo atu ia Dr. Nelson a o ia mafaufau loloto i fuaiupu nei i le Mataupu Faavae ma Feagaiga:
“O malo uma ua i ai se tulafono ua tuu atu i ai. …
“Ma ua tuuina atu i malo taitasi se tulafono; ma ua i ai foi i tulafono taitasi ni tuaoi ma ni tuutuuga faapitoa” (MF&F 88:36, 38).6
Sa mafaufau Dr. Nelson afai e galue o ia, suesue, ma fai atu ni fesili sa’o, o le a latou iloa ma lana vaega pe o a tulafono o loo pulea ai le tata o le fatu. “Sa oo mai e ala i le malamalama i tusitusiga paia ma ‘faatatauina’ i latou i lenei vaega o loo naunau i ai,” sa ia saunoa ai, “o le matata maoae o le taotoga o le fatu e pei ona tatou iloaina i nei aso sa faafaigofieina mo a’u.”7
I lona soifuaga atoa, o lenei tomai e faaaoga mataupu faavae o le talalelei ua faamanuiaina ai Peresitene Nelson, o lona aiga, le Ekalesia, ma le lalolagi. Sa avea ma ki i lana sauniuniga mo lenei valaauga o se Aposetolo ma o le taimi nei o le Peresitene o le Ekalesia.
I lana matata faalegaluega, sa vave ona ausia ma lauiloa Dr. Nelson o se fomai tipitipi ma se tagata suesue faafomai. I le 1955 sa ia taliaina ai se tofiga e avea ma se polofesa suesue o taotoga i le Iunivesite o Iuta. O iina sa ia fausia ai se masini o le fatu-mama lea na ia faaaogaina e faatino ai le uluai taotoga o le fatu-mama i Iuta—o le taotoga muamua faapena o sisifo o le Vaitafe o Misisipi. Sa ia faiaoga ma tusia le tele o mataupu mo tusi lesona faafomai ma le silia ma le 70 pepa e iloiloina e uo i isi lomiga. A o lei valaauina o ia i le au aposetolo, sa ia faatinoina ni taotoga e latalata i le 7,000.8
E faaopoopo atu i ona tomai faafomai, o Dr. Nelson o se faiaoga musuia ma o se taitai mataalia, o uiga auau mama e mafua ai ona taua tele o ia i le matata faafomai ma mulimuli ane o le a tulagaese ai o ia i ona valaauga i le Ekalesia.
“O le tiute o se fomai, muamua lava, o le aoao atu,” sa saunoa ai Dr. Nelson. Sa ia faaopoopo mai, “E gaoioi moni se fomai i lona tulaga sili ona maualuga pe a aoao atu e ia lana ma’i pe o le a le mea o faaletonu ma po o le a foi se mea e mafai ona fai i ai.”9
Sa faaali e Dr. Nelson lona naunautaiga ma le fiafia e aoao atu ma aoaoga e ala i le femalagaai i atunuu ese e faaali atu i ai ma aoao atu faatulagaga faafomai. Ina ia fesoasoani ia te ia i le aoao atu, sa ia suesue ai ni gagana se tele, e aofia ai le FaaFarani, Potukale, Siamani, Rusia, ma le Sipaniolo ina ia mafai ai ona ia fesootai lelei atu ma aoao fomai ma tagata suesue i isi atunuu. Ina ua mavae ona auai i se fonotaga lea sa fautuaina ai e Peresitene Spencer W. Kimball (1895–1985) le faapotopotoga ia aoao le FaaSaina, sa amata ai loa e Dr. Nelson ma lona faletua o Dantzel ona suesueina le Meneterini. O lona tulaga lelei i lena gagana sa mafai ai ona ia galue vavalalata ma le faalapotopotoga faafomai i Saina, lea sa ia faia ai ni aoaoga ma faatino ia taotoga, ma faasaoina le ola o se tasi o toa o le malo o Saina.10
Saili Muamua le Malo o le Atua
E pei ona faagaeetia ausiaga faafomai a Peresitene Nelson, sa faapena foi ona ia faatumauina lana taulaiga i le Alii ma Lana galuega. O le toatele o tagata o le Ekalesia e le iloaina sa ia auauna atu o se faifeautalai i le Lotoa o le Malumalu mai le 1955 i le 1965, taialaina o tagata asiasi mai le 4:00 i le 5:00 i le afiafi i Aso Tofi taitasi. O se tasi lea o ona taimi sili ona pisi o se fomai tipitipi. Mulimuli ane sa ia tusia e faapea “i le 1964, sa faatoa matou amata i vailaau i le luitau o le suitulagaina o le faasolototo o le aota (aortic valve ). Sa maualuga le numera o tagata maliliu, ma o le taimi e tuuto atu i gasegase taitasi sa matua maualuga lava—sa toetoe lava o le taitoatasi mo le tele ma le tele o itula, o nisi taimi o aso.”11
Mo le toatele o tagata o le Ekalesia, o lena mea moni e ono le taliaina ai se valaauga e tele se taimi e alu ai. E leai la mo Dr. Nelson. I le 1964, i le mavae ai o le faatalanoaina o ia ma isi e ono avea ma peresitene o le siteki, i le taimi lena o Elder ia Spencer W. Kimball, sa faafeao atu e Elder LeGrand Richards (1886–1983) o le Korama a Aposetolo e Toasefululua, sa ia fai atu ai ia te ia: “Ma te lagonaina ua finagalo le Alii e te pulefaamalumalu i lenei siteki. I le taimi o a ma faatalanoaga e tele, soo se taimi lava e oso mai ai lou igoa, o le tali masani lava: ‘Oi, o le a le lelei tele o ia,’ po o le “E leai sona taimi,’ po o mea uma foi e lua. Ae ui i lea, ma te lagonaina ua finagalo le Alii ia te oe. O lenei la afai e te lagonaina e te pisi tele ma e le tatau ona taliaina le valaauga, ia o lou lava finagalo lena.’ …
“Sa faigofie lava ona ou tali atu o lena faaiuga sa ma faia i le aso 31 o Aokuso, 1945, ina ua ma faaipoipo ma Sister Nelson i le malumalu. Sa ma faia se tautinoga i lena taimi e ‘muai saili le malo o le Atua ma lana amiotonu,’ ma le lagona mautu o le a faaopoopoina mai isi mea uma ia te i maua, e pei ona folafola mai e le Alii. (Tagai i le Mata. 6:33.)”12
O le taliaina e Dr. Nelson o lena valaauga ua faaalia ai le mea na ta’ua e Elder Jeffrey R. Holland o le Korama a Aposetolo e Toasefululua talu ai nei “o le lotomaualalo ma le faigofie faatamaitiiti o le faatuatua o Russell Nelson. … O ia o lena lotomaualalo, o ia e pei o se tamaitiiti, i tulaga uma ma e toetoe lava i ai i isi uma mafutaga faaletagata soifua ua ou vaaia ia te ia.”13
Sa tuu atu e Elder Kimball ia Dr. Nelson se faamanuiaga, ma folafola atu i ai o le a pa’u i lalo le saoasaoa o le numera o tagata maliliu i taotoga o fatu (aortic valve) ma o faatulagaga o le a le toe avea ma se mea e alu tele ai lona taimi ma le malosi.
“O le tausaga na sosoo ai, o taimi na manaomia mo taotoga sa faaitiitia, ma sa ou maua le taimi talafeagai e auauna atu ai i lena valaauga ma isi valaauga,” sa saunoa ai Dr. Nelson. “O le mea moni, sa alu i lalo le numera o tagata maliliu i … se tulaga maualalo tele, taliana ma lavātiaina. O le mea e mata’ina tele ai, o le taotoga tonu lena sa ou faia mo Peresitene Kimball i le valu tausaga mulimuli ane.”14
O manaoga o lana matata ma valaauga o le Ekalesia sa matua faatapulaaina ai Dr. Nelson i ona taimi avanoa e faaalu i le aiga. Peitai, sa ia faia mea uma na ia mafai e avea ai lona faletua ma le la fanau e toa 10 ma faamuamua. Soo se taimi lava e i ai o ia i le fale, na te tuuto atu lona taimi atoa i lona aiga. I le tele o ana malaga i le lalolagi atoa, sa tele na ia ave ‘a le o lona faletua po o se tasi o le la fanau faatasi ma ia. E ui sa tausia ma le maoae e Dantzel le la fanau i taimi e toesea ai [Nelson], ae sa faafetai o ia mo lona tuuto ia i latou pe a faia sana malologa mai lana matata pisi ma valaauga. “A i ai o ia i le fale, e i ai o ia i le fale!” sa ia ta’u atu ai i se tasi taimi ia Peresitene Harold B. Lee (1899–1973), i lena taimi sa avea ai o ia ma Peresitene o le Korama a Aposetolo e Toasefululua.15 Sa tele ina ta’ua soo e Peresitene Lee lenei fuaiupu pe a fautuaina taitai perisitua pisi ia taulai i o latou aiga.
Mulimuli i le perofeta
Sa avea a’u ma se molimau ma se tagata faatauvaa e auai i se mea taua e tupu i le olaga faalematata o Dr. Russell M. Nelson ma lona faletua o Dantzel. Sa tupu lenei mea o se vaega o la’u uluai feiloaiga ma le au Nelson i le 1965, ua silia ma le 52 tausaga talu ai. I lana tusi o le talaaga o lona soifuaga, o loo faamatala ai e Dr. Nelson le auala na ofoina atu ai ia te ia se tofiga faapolofesa o taotoga ma le taitaifono o le Vaega o Taotoga o Fatu ma Mama i le Iunivesite o Sikako (Cardiovascular and Thoracic Surgery at the University of Chicago). O lenei ofa, sa ia tusia ai, “e maua ai punaoa mo a’u i le auala o mea tautupe, potu suesue, ma le lagolago a se aufaigaluega lea o le a faataunuu ai le miti o soo se tagata atamai lava. E fai ma se isi faatosinaga faaopoopo, sa aofia i le ofa tausaga e fa o le kolisi mo le ma fanau uma e toaiva i le iunivesite latou te filifilia, faatasi ai ma pili uma e totogi e le Iunivesite o Sikako.” Sa ta’u atu e le faaao ia Dr. Nelson, “O se tasi o mafuaaga matou te mananao ai ia te oe ona matou te iloa o oe o se Mamona lelei. Matou te mananao ia te oe i le matou au pulega. Matou te manaomia lau susuga iinei e aumai le faatosinaga i lenei Iunivesite lea e mafai ona aumai e se Mamona.”16
I se vaega o lenei avanoa faatosina mo lenei fomai ofoofogia, sa telefoni mai ai le faaao mo sa’u fesoasoani e faatauanau le au Nelson ia o atu i Sikako. O le taimi lena o avea a’u o se polofesa o le tulafono i le Iunivesite o Sikako ma sa ou iloa le faaao o vailaau faafomai ona sa ma auauna faatasi i luga i le senate o le au pulega o le iunivesite. Sa talosaga mai le faaao ia te a’u ia matou fai’aiga afiafi ma le au Nelson i lo matou fale. Sa ia augani mai ia te a’u ia ou ta’u atu ia i latou mea uma e uiga i le Ekalesia i Sikako ona sa ia iloa o se iloiloga sili ona taua tele lea mo i latou.
O lea la sa matou feiloai ai, o a’u ma lo’u toalua muamua ua maliu, o June, ma Dantzel ma Russell Nelson ma matou fai’aiga i le afiafi ma se feiloaiga matagofie i lo ma fale i Sikako i le Aso Sa, 21 o Novema, 1965. Sa ma faia le mea sili na ma mafaia e faatauanau i la’ua e o mai i Sikako. Mulimuli ane sa ou iloa ai mai lana tusi o le talaaga o lona soifuaga sa la’ua “matua tosina lava i lenei ofa ma sa la pikiina foi se fale i se tasi o aai o Sikako lea sa ono mafai ona [la’ua] tausi a’e ai lo [la] aiga.”17
O le mea na sosoo ai na tupu o le tasi lea o faaaliga o le auala na taitaia ai e musumusuga a le Alii ia faaiuga ma sauniuniga a Russell M. Nelson. I le Aai o Sate Leki, sa ia saili atu ai i le fautuaga mai ia Peresitene Tavita O. MaKei (1873–1970) e taiala ai le au Nelson i le latou faaiuga taua. Sa tatalo le perofeta, ma sa oo mai le tali: “Leai.”
Sa saunoa Peresitene MaKei: “O lea ua e nofo i le aai aupito sili ona lelei i le lalolagi atoa. Ua i ai sou auala o le olaga e le mafaatusalia i soo se mea i le lalolagi. O iinei o le a maua ai e ou afafine le siosiomaga aupito silisili ona lelei e mafai ona latou mauaina. E sili atu ona taua i latou ia te oe nai lo se isi lava tulaga tautaua po o se lumanai e mafai ona oo atu ia te oe mai soo se iunivesite lava. Leai, Uso Nelson, o lou nofoaga o iinei lava i le Aai o Sate Leki. O le a o mai tagata mai le lalolagi atoa ia te oe ona o loo e i ai iinei. Ou te manatu e le tatau ona e alu i Sikako.”18
I le tumu ai i le faatuatua, sa teena ai e Dr. Nelson le ofa a Sikako ma nofo ai pea i le Aai o Sate Leki. O iina, i ni tausaga o lumanai, sa ia faatino ai ni taotoga o fatu ma faafualoa ai ola o le toatele o gasegase lotofaafetai, e aofia ai ma Peresitene Kimball, Elder Richard L. Evans (1906–71), Peresitene Boyd K. Packer (1924–2015), atoa ai ma le toatele o isi taitai o le Ekalesia ma tagata o le ekalesia ma o latou aiga.
Mo ma’ua ma June, o lena feiloaiga i Sikako o le amataga lea o se faigauo umi ma faapelepele ma Russell ma Dantzel Nelson. I le ono tausaga mulimuli ane sa faamalolo ai o ia o le peresitene o le siteki ae valaau o le Peresitene Aoao o le Aoga Sa. I lena lava tausaga e tasi, sa tofia ai a’u e avea ma peresitene o le Iunivesite o Polika Iaga. Mo le tele o tausaga, sa ma’ua auauna faatasi ai i le Korama a Aposetolo e Toasefululua, ma o lea la o le a ma auauna faatasi i le Au Peresitene Sili i se faigauo na amata mai i Sikako i le va o ni polofesa ma a la taitoalua i le 52 tausaga talu ai.
Suia ia Loto
I le aso 7 Aperila, 1984, sa faauuina ai Dr. Nelson o se Aposetolo ma vaetofia o se uso o le Korama a Aposetolo e Toasefululua. “I se taimi puupuu lava,” sa ia saunoa ai, “o le taulaiga o le fasefulu tausaga talu ai i vailaau faafomai ma taotoga sa suia i le tuuto atu o lo’u olaga o totoe i auaunaga tumau i lo’u Alii ma le Faaola, o Iesu Keriso.”19
I lona valaauga i le au aposetolo, sa tautino mai ai Elder Nelson, “O le galuega ua ou punouai ai nei o le galuega aupito sili ona taua lea i le lalolagi. Ua i ai mea uma, e faamalieina, ma e luitauina. Ma e tatau ona ou faia le mea silisili, ona e i ai so’u tiute e tali atu ai a’u lava ia mo lenei tofiga faatausimea.”20
Talu ona avea ma Aposetolo, ma Peresitene o le Korama a Aposetolo e Toasefululua talu mai le 2015, ua faaauau ai pea e Peresitene Nelson ona femalagaai i le lalolagi—ma faasoa atu upu o le ola e faavavau ma suia ia loto. O se tasi o ana uluai tofiga o le tatalaina lea o faitotoa o malo o Europa i Sasae i le talalelei. “I totonu o le … lima tausaga, sa ou faia ai ni malaga se 27 i malo e 31 i Europa,” sa saunoa ai Peresitene Nelson. “A o lei maliu Peresitene [Ezra Taft] Benson, … [Sa] mafai ona ou lipoti atu ia te ia ua matou faamaeaina a matou tofiga: ua tatou faatuina nei le Ekalesia i atunuu uma o Europa i Sasae.”21
Ua faapaiaina foi e Peresitene Nelson atunuu e 27 mo le talaiina o le talalelei, e aofia ai Pulekeria, Kalaotia, El Salvador, Ethiopia, Polenisia Farani, Kazakhstan, ma Rusia. I se tasi taimi, i le va o aso e fa, sa ia faapaiaina ai ni malo eseese se ono.22 I lana auaunaga faaaposetolo ua ia asia nei ni atunuu se 133.23
I le avea ai ma se uso o le Korama a le Toasefululua, sa auauna atu ai Elder Russell M. Nelson i ni tausaga se tele o se taitaifono o aufono autu taitasi nei e tolu: Faifeautalai, Malumalu ma Talafaasolopito o Aiga, ma le Pulega o le Perisitua (lea ua avea nei ma Pulega o le Perisitua ma Aiga).
Ua faia e le Ekalesia le tele o suiga taua i le taimi o tausaga a Elder Nelson i le Korama a le Toasefululua, lea na ia auauna ai i lalo o Peresitene e toalima o le Ekalesia. Talu mai le 1984, ua silia ma le faaluaina le toatele o le Ekalesia, mai le pe tusa ma le 6 miliona tagata i le silia ma le 16 miliona. Na faalauiloa mai ai e le Korama a Aposetolo e Toasefululua ma le Au Peresitene Sili ni folasaga aloaia se lua: “O Le Aiga: O Se Folafolaga i le Lalolagi,” i le 1995 ma le “O Le Keriso Soifua” i le 2000. O le aofai o malumalu o loo faaaogaina ua faateleina mai le 30 i le 1984 i le 159 i le 2017. I le 2010, ina ua valaauina Elder Nelson o le taitaifono o le Aufono Faatonu a Faifeautalai, na maua ai e le Ekalesia ni faifeautalai e 58,000. O le taimi nei, i le mavae ai o le faatelega tele ina ua tuu i lalo le tausaga e auauna ai, ua faatumauina ai le aofai pe tusa ma le 67,000.
Uiga Auau Mama Patino
O le tele o mea ia faatoa toe iloiloina e uiga i le Fomai, Elder, ma o le taimi nei o Peresitene Nelson o se mataupu o faamaumauga faalauaitele. O le a ou faamatala atu nei nisi o ona uiga auau mama maoae na ou matauina i le aluga o tausaga.
Muamua, o Russell M. Nelson o se tagata matua lelei lava ma o se uo ma se paaga lelei. E le mafaatoilaloina lona agalelei ma le agaalofa i ana sootaga patino uma. O ia o se faataitaiga ofoofogia, e filiga ma mataala e auai atu i ona tiutetauave—aiga, Ekalesia, ma le galuega faalematata. Ma e mālie tele le faatasi ma ia.
I lana sitaili faaletaitaiga, e tausaafia o ia i taimi uma ma faigofie ona talanoa i ai. O se uiga auau mama lena e sili ona manaomia i taitai matutua. Ia te ia, matou te le popole lava e talanoaina se mataupu pe lagona o le faia o lena mea e faaātu ai o ia. Matou te lei fefefe lava e talanoa ia te ia e uiga i soo se mataupu patino lava. E lotomatala tele Peresitene Nelson, tausaafia tele, ma e faigofie tele ona talanoa i ai.
I ana faaiuga fai, e popole ai lava Peresitene Nelson e uiga i le aafiaga atoa. E lelei o ia i le mafaufauina o aafiaga e ono tutupu mai se faaiuga po o se aiaiga faavae po o le faaaogaaga o aoaoga faavae i ni vaega eseese o tagata o le ekalesia—le aumatutua, le autalavou, le au le toaaga, taitai o le Ekalesia, ma isi. Ua ou vaaia lena uiga auau mama i isi taitai, ae o le vaaiga mamao a Peresitene Nelson i lenei mataupu e tulagaese lava. Masalo e pogai mai i ona aafiaga o se fomai o le e le mafai ona tusi maia se vailaau mo le tasi vaega o le tino e aunoa ma le mafaufau i ona aafiaga i isi vaega.
O Peresitene Nelson o se tagata e matua lelei tele i le faamatuu atu o tiute, e sili atu ona lelei i lenei mea nai lo le toatele o taitai ua ou matauina i faatulagaga faalegaluega ma le Ekalesia. O lena mea foi e masalo e fesootai i le galuega a le fomai tipitipi, lea e faatinoina se galuega tupito i le maea ai (ma a o lei) faia ai e isi a latou galuega.
O le isi uiga auau mama iloga o Peresitene Nelson o lona onosai. Na te aloese mai fefinauaiga pe a foiaina ni faafitauli pe faia foi ni mea. Na te aloese ma le atamai mai le metotia o le “ia tatou faia loa i le taimi nei a” ae fiafia e faatagaina sina taimi itiiti e vaai ai pe aoga ni mea na o i latou lava. O lena uiga auau mama o le a taua tele i lana taitaiga, e pei lava ona sa i ai i le lua tausaga ma le afa o ia auauna ai o se Peresitene o le Korama a le Toasefululua.
I le viia ai o le onosai o Peresitene Nelson, e tatau foi ona ou viia se uiga auau mama e ese ai. E le faatuai o ia e fai ni faaiuga. A oo i le taimi sa’o ma ua saunia le faafitauli mo se faaiuga, na te faia ni faaiuga vave ma mausali. E i ai sona lagona lelei i le taimi e manaomia ai e se mataupu le onosai ma nisi talanoaga faaopoopo ma le taimi e tatau ai ona matou filifili i isi filifiliga e ese ai ma faaauau ai le galuega a le Alii. E fiafia ana paaga i le taitaiga i lena mea.
O Peresitene Nelson o se tamalii na te tuufaatasia loto o tagata. Na te aumai ni manatu feteenai i le autasi ma tagata eseese i le lotogatasi. E maeu le uiga auau mama ofoofogia mo se taitai o tagata ua tuuto atu i le aoaoga faavae paia lava e tasi ae o mai mai aganuu ma tumasani eseese.
E i ai ia Russell M. Nelson ni meaalofa masani o feutagaiga ua ou matauina e au lava ia. Na ia faaaogaina i ana gaoioiga faalematata, e oo lava i Saina. Talu mai lona valaauga i le Toasefululua, ua ia tatalaina faitotoa mo le Ekalesia i Europa i Sasae i se tuufaasologa atoa o tulaga faavavega. I se faaopoopoga, ua ia asia malo eseese e 133 i le avea ai ma se auauna a le Alii. E maeu sauniuniga ofoofogia mo le tofiga maoae lea ua valaau ai nei o ia!
O le isi o uiga auau mama maoae o Peresitene Nelson—e faateia ai nisi—o lona tomai o se tusitala. O ana fesootaiga tusitusia o ni faataitaiga ia o le manino, ma o lona faasa’osa’oina o tusitusiga a isi e aoga i taimi uma. E faafesuiai e uso o le Toasefululua auivi o lauga ia maua mai ai ni fautuaga mo mea e faaleleia i anotusi o ni lauga taua. I lena faagasologa, ua ou iloa ai e leai se tasi e lelei atu ana fautuaga i mea e faaleleia i a’u lauga nai lo Peresitene Nelson. I le avea ai ma se tasi ua faaaluina lona olaga faalematata e galue i upu, sa ou maofa lava i le faasa’oina ai ma le atamai tele e lē o lona olaga faalematata sa galue i tino. Sa ou maua le toomaga i le iloaina o lana tusitala mata’ina o le taunuuga lea o le galue malosi. I se tasi taimi, i se suesuega na talosagaina mai se tasi o ana pepa tusitusia, sa ou vaai ai o lana auivi lona valu lea. A na faapea ou te iloaina e uiga i faamaumauga maoae o lomiga faalematata a Dr. Nelson, semanu ou te le te’i i le leai o se tusitala sili ona lelei i le Korama a le Toasefululua nai lo ia.
E toatele ua faagaeetia i le matua o le tatou peresitene fou—93! O i matou e galulue vavalalata ma ia e na o le pau le mea e popole ai o a matou taumafaiga ia o faatasi ma ia. Sa faagaeetia lona malosi faaletino ma faalemafaufau. E faagaeetia foi lona manatuaina o mea. E faasee soo o ia i le aisa faatasi ma malologa laiti. O loo ia faaaogaina pea lana masini feula aisa, i lana auala taavale ma auala taavale a ona tuaoi.24 Ua ou matauina lona malosi le faatuaoia i Aso Tofi taitasi. A maea a matou fonotaga i le Malumalu i Sate Leki, e faaaoga e isi le lifi e o ai i lalo i le fogafale maualalo ma o nisi e savavali i lalo i nisi o faasitepu mai le matou potualuga. O taimi uma lava e faananati atu ai Peresitene Nelson i lalo i faasitepu. Ou te taumafai lava i taimi uma e o faatasi ma ia ae le mafai ona faia.
Tuuto Atu i le Faaola.
Na saunoa Peresitene Nelson, “O aso taitasi o auaunaga a se Aposetolo o se aso o le aoaoina ma le sauniaina mo isi tiutetauave e tele i le lumanai.”25 Mo ia, o le taimi o sauniuniga e taitai le Ekalesia ua maea nei, ma ua ia mauaina le tiute paia o le Peresitene o Le Ekalesia a Iesu Keriso o le Au Paia o Aso e Gata Ai. O le a le mea ua taitai atu e ana sauniuniga tatou te faamoemoeina mai i lenei vaitau o le taitaiga?
Ua silisili i mea uma o lona tuuto atu i le Alii o Iesu Keriso, o le ao o Lana Ekalesia. E pei ona saunoa Peresitene Nelson i lana savali o Ianuari, lea sa ta’ua muamua, “O le a tatou … faaauau pea ona saili atu ia iloa Lona finagalo ma mulimuli i ai.”26 Ae i le taimi nei, ua faailoa e aoaoga musuia a Peresitene Nelson ni mataupu talafeagai mo le faamamafaina.
I le taimi o le konafesi aoao ia Oketopa 2017, sa faamanatu mai ai e Peresitene Nelson i tagata o le Ekalesia e uiga i le taua tele o le Tusi a Mamona. Na ia faasoa maia ni taunuuga o ana suesuega faaletagata lava ia o le Tusi a Mamona, e aofia ai ni lisi o mea e uiga i le Tusi a Mamona, o mea na te faamautuina, o mea na te faamaoniaina le sese, o mea na te faataunuuina, o mea na te faamaninoina, ma mea na te faaalia mai. Na ia augani mai i tagata o le ekalesia ia suesue ma mafaufau loloto i le tusi i aso taitasi.27
I le aso 16 o Ianuari, 2018, i le lua aso talu ona mavae le vaetofiaina o Peresitene Nelson e avea ma Peresitene o le Ekalesia, sa ia faasilasila mai ai o le a amata e le Au Peresitene Sili fou lana auaunaga “faatasi ma le taunuuga i le mafaufau.” O lena “taunuuga” o le faaolataga lea o tagata taitoatasi ma le faamauina o aiga i le maota o le Alii. “Mo lenei mafuaaga, ua matou talanoa atu ai ia te outou i le asō mai se malumalu,” sa saunoa ai Peresitene Nelson mai le faaopoopoga o le Malumalu o Sate Leki.
“I le taunuuga lea tatou te tauivi uma i ai ina ia faaeeina i le mana i totonu o se maota o le Alii, faamauina o ni aiga, faamaoni i feagaiga e osia i totonu o se malumalu lea e agavaa ai i tatou mo le meaalofa silisili a le Atua—le ola e faavavau. O sauniga o le malumalu ma feagaiga tou te faia iina o le ki lea i le faamalosia o lou olaga, lau faaipoipoga ma le aiga, ma lou tomai e tetee atu ai i osofaiga a le fili. O lou tapuai ai i totonu o le malumalu ma lau auaunaga iina mo ou tuaa o le a faamanuiaina ai oe i le faateleina o faaaliga faaletagata lava ia ma le filemu, ma o le a faamalosia ai lou tuuto e tumau i luga o le ala o feagaiga.”28
Na tuuina mai e Peresitene Nelson se valaau i le Au Paia ia tutumau i luga o le ala o feagaiga: “O lo outou tuuto e mulimuli i le Faaola e ala i le osia o feagaiga ma Ia ona tausia lea o na feagaiga, o le a matala ai le faitotoa i faamanuiaga uma faaleagaga ma avanoa e maua e alii, tamaitai, ma fanau i soo se mea.” Ia i latou ua se ese mai lena ala, sa ia saunoa ai: “Ou te valaaulia oe ma le faamoemoe atoa i lo’u loto ina ia faamolemole toe foi mai. Po o a lava ou atugaluga, po o a lava ou luitau, o loo i ai se faamoemoega mo oe i lenei, le Ekalesia a le Alii. O le a faamanuiaina oe ma augatupulaga e lei faananau mai e ala i au galuega i le taimi nei ina ia toe foi mai i le ala o feagaiga.”29
O le isi lenei faaiteite taua: “O le mau ua avea ma se talatuu ola mo a’u o loo i ai i le vaega 88 o le Mataupu Faavae ma Feagaiga, lea o loo fetalai ai le Alii. ‘O le a Ou faanatinatiina la’u galuega i lona taimi,’” sa saunoa ai Peresitene Nelson. “Ma ua ou ola … e vaai i lenei faanatinatiina.”30 O le a ia taialaina nei.
E molimau lava Peresitene Nelson i taimi uma e uiga i le paia o Iesu Keriso ma le moni o le ata o le faaolataga ua tuuina mai e lo tatou Tama Faalelagi ma Lona Alo Pele e faailoa mai ia i tatou ma taiala ai i tatou. A o taitai atu e Peresitene Nelson le Ekalesia i le lumanai, e mafai ona maua e le Au Paia o Aso e Gata Ai se mafanafana tele i le iloaina o le a ia taialaina i latou e tusa ma le finagalo o le lagi. “Ou te tautino atu lo’u tuuto i le Atua lo tatou Tama Faavavau ma i Lona Alo, o Iesu Keriso,” sa ia saunoa ai. “Ou te iloaina i La’ua, alofa ia i La’ua, ma tautino atu e auauna atu ia i La’ua—faapea ma outou—faatasi ai ma le mānava uma o loo totoe o lo’u ola.”31
Ou te alofa i lenei auauna a le Alii, la’u paaga ma uo o le olaga atoa, Peresitene Russell M. Nelson. Faatasi ai ma o’u uso ma tuafafine o Le Ekalesia a Iesu Keriso o le Au Paia o Aso e Gata Ai, ou te faatauaina ana aoaoga ma tulimatai atu i lana taitaiga musuia i le avea ai ma o tatou perofeta. Ou te molimau atu ua valaauina o ia e le Atua e taitai le Ekalesia i o tatou aso.