Nambafo Sandei Miting

?Wanem nao, givhan i minim long ol memba insaed long wod o long branj blong yu? Blong faenemaot hemia, yu save raetem, Givhan long bod, mo afta, invaetem ol memba blong raetem ol toktok ia raon long hem, we oli ting se i go wetem wok blong givhan. Ol memba oli save faenem ol toktok o ol sentens blong ademap long lis ia we oli stap long ol skripja ia: Matiu 25:34–40; Luk 10:25–37; 2 Nifae 25:26; Mosaea 18:8–9; 3 Nifae 18:25; mo Doctrine and Covenants 81:5. ?Wanem nao yumi lanem aot long ol ves abaot wok blong givhan? Yu save askem ol memba blong serem samfala eksampol blong sap givhan we oli bin luk i hapen. ?Olsem wanem nao, givhan blong yumi, i save help blong lukluk long ol nid long saed blong spirit mo long saed blong laef? ?Olsem wanem nao, hemia i stap helpem ol pipol blong kolosap moa long Kraes?

Blong lanem abaot wei blong givhan we bae i wokgud, ol memba oli save serem ol stori we oli kamaot long ol skripja, we insaed long ol stori ia, Sevya i stap givhan long ol narawan—samfala eksampol, bae yufala i save faenem long Jon 4–6 mo Mak 2:1–12. Ol memba oli save serem wanem i kam strong long maen blong olgeta abaot ol stori ia, mo wanem prinsipol nao, oli bin lanem abaot givhan. Eksampol: ?Olsem wanem Sevya i mekem se seves blong Hem long ol narawan, i spesel, i wei blong Hem? ?Olsem wanem nao Hem i bin lukluk long nid blong ol pipol long saed blong spirit, mo tu, ol nid long saed blong laef? Ol memba blong klas oli save serem sam taem we oli bin luk ol pipol oli yusum olgeta prinsipol ia long givhan wok blong olgeta.

Blong lukluk tru long paoa blong givhan we lav olsem hemia blong Kraes i pusum, yu save raetem olgeta sentens ia long bod, mo invaetem ol memba blong givim sam wei blong fulumap ol waet spes we i stap: Taem mi rili lavem ol pipol we mi stap givim seves long olgeta, mi stap . Taem mi stap givim seves from ol nara risen, mi stap . ?Wanem nao yumi save meksua se givhan wok blong yumi long ol narawan, lav olsem hemia blong Kraes nao i pusum i go? ?Olsem wanem yumi stap developem lav olsem hemia blong Kraes long olgeta we yumi stap givhan long olgeta? (luk long Moronae 7:45–48). Maet ol memba oli save serem ol eksampol blong givhan we lav olsem hemia blong Kraes nao i givim insperesen from.

Presiden Russel M. Nelson i talem: “Wan spesel man blong Jos we i tru mo i stap laef blong Lod, bambae oltaem i wan wok blong givhan we i oganaes mo i wokgud, blong lukluk long wanwan pikinini blong God mo famli blong olgeta” (“Givhan wetem Paoa mo Atoriti blong God,” Liahona Mei 2018, 69.). ?Wanem nao Presiden Nelson i stap tijim, we oli samfala wei we Jos i “oganaes, i lidim rod” blong stap helpem gud moa wanwan man mo woman.? ?From wanem ol wok ia, oli “wan spesel mak blong Jos we i tru mo i laef blong Lod”? (luk long Mosaea 18:21–22 mo Moronae 6:4–6 blong kasem sam tingting). ?Wanem blesing nao i kam insaed long laef blong yumi, o insaed long laef blong ol narawan from se ol pipol oli bin givhan tru long ol koling, o wok we oli bin givim long olgeta long Jos?

Eksperiens blong ol boe blong Mosaea i soemaot gud we, hao yumi luk long ol pipol, bae i talemaot hao bae yumi givhan long olgeta. Yu save raetem antap long bod: Wei we Ol Man blong Nifae oli lukluk Ol Man blong Leman mo Wei we ol boe blong Mosaea oli lukluk long Ol Man blong Leman. Afta, invaetem ol memba blong luklukgud insaed long Mosaea 28:1–3 mo Alma 26:23–26 blong faenem ol toktok o ol sentens blong raetem andanit long tufala toktok antap ia. Taem yu komperem hemia, ?wanem nao hemia i stap tijim yumi abaot wei we yumi stap luk ol pipol we bae i talemaot hao bae yumi givhan long olgeta? ?Hao nao bae yumi lanem blong luk moa ol pipol long wei we God i stap luk olgeta? (luk long D&C 18:10–16).

Blong helpem ol memba blong andastanem moa hamas i impoten blong lukluk moa long ol nid blong ol narawan taem yumi stap givhan, yu save komperem wok blong givhan long fasin blong givim mo kasem ol presen. ?I bin gat wan taem we yu bin kasem wan presen we i gat mining long yu, we i kam long wan we i savegud wanem yu bin nidim o wantem? ?Olsem wanem givhan i semmak long fasin blong givim wan presen we i gat mining? Tingting blong toktok raon long ol stori we oli kamaot long las jeneral konfrens we i soem olsem wanem ol pipol oli bin givhan folem nid blong ol narawan (eksampol, luk long, Jean B. Bingham, “Givhan Olsem we Sevya I Stap Mekem,” Liahona, Mei 2018). Ol memba oli save serem tu ol stori ia we i soem prinsipol ia.

?Olsem wanem nao yumi save lanem wanem nao ol narawan oli nidim? Invaetem wanwan memba blong mekem wan lis blong sam pipol we oli gat wok blong givhan long olgeta. Long saed blong wanwan nem blong olgeta, oli save raetem wan ansa long kwestin ia: “Wanem nao man o woman ia i nidim blong hem i kam kolosap moa long Kraes?” Sapos i gat nid, leftemap tingting blong ol memba blong putum tu ol odinens we wanwan i nidim blong kasem. Invaetem ol memba blong gohed blong tingting abaot kwestin ia mo lukaotem insperesen blong helpem olgeta blong lukluk long ol nid blong ol narawan.

Elda Robert D. Hales i talem: “Plan blong gospel i minim blong givim mo blong kasem. … Olgeta we oli gat hadtaem, plante taem bae oli talem se: ‘Bae mi mekem miwan,’ … ‘mi save lukaot long miwan.’ Toktok i stap i talem se, i no gat wan we i rij tumas nao bae i talem se i no nidim help blong wan nara man, i no gat wan i pua tumas nao i no save givhan long sam wei long nara man. Open tingting ia blong askem help long ol narawan wetem tras, mo blong save givim wetem fasin we i kaen, i mas kam pat blong stret fasin blong yumi” (“We Can’t Do It Alone,” Ensign, Nov. 1975, 91, 93). ?From wanem nao, samtaem, yumi stap tingting tu taem bifo yumi akseptem help we i kam long ol narawan? ?Olsem wanem nao we, taem yumi glad blong akseptem help, i save blesem olgeta we oli stap givim seves long yumi? Givim smol taem long ol memba blong tingting hevi long sam wei we oli save gat hat we i open moa blong risivim givhan blong ol narawan. ?Wanem tingting nao 1 Korin 12:13–21 i stap talem long yumi abaot risen we yumi nidim wanwan long yumi?

Blong helpem ol memba blong tingting long sam wei we yumi save givgivhan long wanwan long yumi, yu save invaetem olgeta blong luklukbak long mesej blong Elda Jeffrey R. Holland, “Stap Wetem mo Mekem Olgeta Oli Kam Strong Moa” (Liahona, Mei 2018, 101–3; luk tu long “Ol Prinsipol blong Givhan” long ol nekis namba blong magasin ia, Liahona). Ol memba oli save seraot long ol smol grup, mo wanwan grup i save tingting long samfala situesen we wan i save nidim help. Oli save saksakem ol tingting abaot sam wei we ol pipol oli save givhan long nid long saed blong spirit, mo long saed blong laef blong wanwan man o woman insaed long ol situesen ia. Askem ol grup ia blong oli serem ol aedia blong olgeta, mo tingting hevi o askem olgetawan sapos ol aedia ia we oli toktokraon long olgeta i save blesem ol pipol we oli gat wok blong givhan long olgeta.