Rurura’a nō te maha o te sābati

E aha te aura’a o te aupurura’a nō te mau melo o tā ’outou pāroita ’aore rā ’āma’a ? Nō te ’ite mai, e nehenehe ’outou e pāpa’i aupurura’a i ni’a i te tāpura ’ere’ere ’e i muri iho e ani i te mau melo ’ia pāpa’i ha’ati i te mau ta’o ’o tā rātou e tū’ati atu i te aupurura’a. E nehenehe te mau melo e ’ite mai i te mau ta’o ’aore rā te mau pereota e tu’u atu i ni’a i te tāpura nā roto mai i te mau pāpa’ira’a mo’a, mai teie : Mataio 25:34–40 ; Luka 10:25–37 ; 2 Nephi 25:26 ; Mosia 18:8–9 ; 3 Nephi 18:25 ; ’e Te Parau Ha’api’ira’a ’e te Mau Parau Fafau 81:5. E aha tā tātou i ’apo mai nā roto mai i teie mau ’īrava nō ni’a i te aupurura’a ? ’A ani i te mau melo ’ia fa’a’ite mai i te mau hi’ora’a nō te aupurura’a tā rātou i ’ite. Nāhea tā tātou aupurura’a e tauturu ai ’ia pahono i te mau hina’aro pae vārua ’e pae tino o te mau ta’ata ? Nāhea te reira e tauturu ai i te mau ta’ata ’ia ha’afātata mai i te Mesia ?

Nō te ha’api’i mai nō ni’a e nāhea i te aupuru-tano-ra’a, e nehenehe te mau melo e fa’a’ite mai i te mau ’ā’amu nō roto mai i te mau pāpa’ira’a mo’a, i reira tō te Fa’aora aupurura’a ia vetahi ’ē—e rave rahi mau hi’ora’a e ’itehia mai i roto i te Ioane 4–6 ’e Mareko 2:1–12. E nehenehe te mau melo e fa’a’ite mai i te mea tā rātou i fa’ahiahia nō ni’a i teie mau ’ā’amu ’e e aha te mau parau tumu tā rātou i ’apo mai nō ni’a i te aupurura’a. ’Ei hi’ora’a, nāhea te Fa’aora i te fa’aaura’a i tāna tāvinira’a ia vetahi ’ē ? Nāhea ’oia i te pāhonora’a i te mau hina’aro pae varua ’e pae tino ? E nehenehe te mau melo e fa’a’ite mai i te mau taime ’a ’ite ai rātou i te mau ta’ata i te fa’a’ohipara’a i teie mau parau tumu i roto i tā rātou aupurura’a.

Nō te hi’o haere i te mana o te aupurura’a e fa’aitoitohia e te here Huru Mesia, ’a pāpa’i i ni’a i te tāpura ’ere’ere te mau pereota i muri nei ’e ’a ani i te mau melo ’ia parau mai i te mau rāve’a nō te fa’a’ī i te vāhi vata : ’Ia here mau ana’e au i te mau ta’ata e tāvini au, e . ’Ia tāvini ana’e au nō te tahi atu mau tumu, e . E aha tā tātou e ti’a e rave nō te ha’apāpū ē e mea itoito mau tā tātou aupurura’a ia vetahi ’ē ma te here Huru Mesia ? Nāhea tātou i te fa’arahi atu ā i te here Huru Mesia nō te feiā o tei fa’ata’ahia e nā tātou e aupuru ? (hi’o Moroni 7:45–48). Penei a’e e nehenehe te mau melo e fa’a’ite mai i te mau hi’ora’a nō te aupurura’a tei fa’auruhia e te here Huru Mesia.

’Ua parau te peresideni Russell M. Nelson ē, « Hō’ē tāpa’o rahi nō te ’Ēkālesia mau ’e te ora a te Fatu maori rā, te hō’ē tauto’ora’a fa’anahonahohia ’e te arata’ihia nō te aupuru i te tamari’i tāta’itahi a te Atua ’e i tō rātou ’utuāfare » (« Aupuru ma te mana ’e te ha’amanara’a a te Atua », Liahona, Mē 2018, 69.). E aha tā te peresideni Nelson i ha’api’i ’o te tahi mau rāve’a ’o tei « fa’anahonahohia ’e arata’ihia » ’o tā te ’Ēkālesia e tauturu nei ia tātou ’ia ’atu’atu maita’i ā i te mau ta’ata ? Nō te aha teie mau tauto’ora’a i riro ai ’ei « hō’ē tāpa’o rahi nō te ’Ēkālesia mau ’e te ora a te Fatu » ? (hi’o Mosia 18:21–22 ’e Moroni 6:4–6 nō te tahi mau mana’o). Nō te mea ’ua tāvini te mau ta’ata i roto i tō rātou pi’ira’a ’aore tā rātou hōpoi’a nō te ’Ēkālesia, e aha te mau ha’amaita’ira’a tei tae mai i roto i tō tātou orara’a ’aore rā i te orara’a o vetahi ’ē ?

E hōho’a te mau ’itera’a rau o te mau tamaiti a Mosia, nō te huru ’o tā tātou hi’ora’a i te mau ta’ata e fa’atupu i te huru ’o tā tātou aupurura’a ia rātou. ’A pāpa’i i ni’a i te tāpura ’ere’ere Nāhea te mau ’āti Nephi i te hi’ora’a i te mau ’āti Lamana ’e Nāhea te mau tamaiti a Mosia i te hi’ora’a i te mau ’āti Lamana I muri iho ’a ani i te mau melo ’ia ’imi Mosia 28:1–3 ’e Alama 26:23–26 nō te ’ite mai i te mau ta’o ’e te mau pereota nō te pāpa’i i rāro a’e i teie mau fa’ahitira’a. E aha tā teie fa’aaura’a e ha’api’i nei ’ia tātou nō ni’a i te huru e nāhea tā tātou huru hi’ora’a i te ta’ata i te fa’atupu i te huru ’o tā tātou aupurura’a ia rātou ? Nāhea tātou ’ia ’apo mai ’ia hi’o i te mau ta’ata mai tā te Atua e hi’o ra ia rātou ? (hi‘o PH&PF 18:10–16).

Nō te tauturu i te mau melo ’ia ta’a maita’i i te faufa’a nō te fa’atumura’a i ni’a i te mau hina’aro o vetahi ’ē ’a aupuru ai tātou, e nehenehe ’outou e fa’aau i te aupurura’a mai te hōro’ara’a ’e te fāri’ira’a i te mau ō. ’Ua fāri’i a’ena tātou i te hō’ē ō faufa’a roa nā roto mai i te hō’ē ta’ata ’o tei ’ite pāpū i te mea o tā tātou e hina’aro ’aore rā tā tātou i hia’ai nā ? Nāhea te aupurura’a e riro ai mai te hō’ē ō tei hōro’ahia ma te feruri-maita’i-hia ? ’A feruri i te tāu’aparau i te mau ’ā’amu nō roto mai i te ’āmuira’a rahi i tupu iho nei ’o tei fa’ata’a mai e nāhea te mau ta’ata i te aupurura’a mai te au i te mau hina’aro o vetahi ’ē (hi’o, ’ei hi’ora’a, Jean B. Bingham, « Aupuru mai tā te Fatu e rave nei », Liahona, Mē 2018). E nehenehe ato’a te mau melo e fa’a’ite mai i te tahi atu mau ’ā’amu ’o tei fa’ata’a mai i teie parau tumu.

Nāhea tātou i te ha’api’i mai e aha te mau hina’aro o vetahi ’ē ? ’A ani i te melo tāta’itahi ’ia hāmani i te hō’ē tāpura nō te fei’a tei fa’ata’ahia nā rātou e aupuru. I pīha’i iho i te i’oa tāta’itahi, e pāpa’i rātou i te hō’ē pāhonora’a i te uira’a « E aha tā teie ta’ata e hina’aro nō te ha’afātata atu i te Mesia » ? Mai te mea e nehenehe, ’a fa’aitoito i te mau melo ’ia fa’aō atu i te mau ’ōro’a ’o tā te ta’ata tāta’itahi e ti’a ’ia fāri’i. ’A ani i te mau melo ’ia tāmau ā i te feruri i ni’a i teie uira’a ’e ’ia ’imi i te fa’aurura’a nō te tauturu ’ia rātou ’ia ’ite mai i te hina’aro o vetahi ’ē.

’Ua parau o Elder Robert D. Hales ē : « E tītau te fa’anahora’a o te ’evanelia te hōro’ara’a ’e te fāri’ira’a… E parau pinepine te mau ta’ata i roto i te fifi ē : ‘E rave au te reira ’o vau ana’e’ […] ‘E nehenehe au e ’atu’atu iā’u iho’. ’Ua parauhia ē ’aita te hō’ē ta’ata i ’ona roa i ’ore ai ’oia i hina’aro i te tauturu a vetahi ’ē, ’aita ato’a te hō’ē ta’ata i veve roa i ’ore ’oia i riro ’ei mea faufa’a nō tōna ta’ata tupu. Te tītaura’a e ani i te tauturu a vetahi ’ē ma te ti’aturi, ’e te hōro’ara’a te reira ma te mata a’ia’i, e ti’a ’ia riro ’ei tuha’a nō tō tātou huru mau » (« We Can’t Do It Alone », Ensign, Nōvema 1975, 91, 93). Nō te aha i te tahi taime e fē’a’a tātou i te fāri’i i te tauturu a vetahi ’ē ? Nāhea tō tātou hina’aro e fāri’i i te tauturu e ha’amaita’i i te feiā e tāvini ra ia tātou ? Hōro’a i te mau melo te tahi ma’a taime iti nō te feruri i te mau rāve’a tā rātou e nehenehe e fāri’i hau atu noa i te aupurura’a a vetahi ’ē. E aha tā te 1 Korinetia 12:13–21 e parau nei nō ni’a i te parau ē, nō te aha tātou e hina’aro ai i te tahi ’e te tahi ?

Nō te tauturu i te mau melo ’ia feruri i te mau rāve’a e rave rahi ’o tā tātou e nehenehe e aupurpu te tahi ’e te tahi , ’a ani iā rātou e hi’o fa’ahou i te parau poro’i a Elder Jeffrey R. Holland « ’Ia vai noa i pīha’i iho ia rātou ’e ’ia fa’aitoito ia rātou » (Liahona, Mē 2018, 101–3; hi’o ato’a « Ministering Principles » i roto i te mau ve’a Liahona i muri nei). ’A vāhi i te mau melo i roto i te mau pupu na’ina’i, ’e e feruri te pupu tāta’itahi e rave rahi huru fa’a’itera’a e hina’aro te hō’ē ta’ata i te tauturu. I muri iho e tu’u pauroa mai rātou i te mau mana’o nō ni’a i te mau huru ta’a ’ē o tā te mau ta’ata e nehenehe e aupuru i te mau hina’aro pae vārua ’e pae tino o te ta’ata i roto i te mau fa’a’itera’a. ’A ani i te mau pupu ’ia hōro’a mai i tō rātou mana’o ’e ’a feruri e nehenehe ānei hō’ē o te mau mana’o i tāu’aparauhia e ha’amaita’i i te mau ta’ata ’o tā rātou i tītauhia e aupuru.