Te aupurura’a fa’auruhia

E au mau taea’e here ē, tē māuruuru nei au i te ha’amaita’ira’a ’ia paraparau atu ia ’outou i roto i teie ’āmuira’a rahi e vai i roto i te pāpa’a parau. ’Ua pāturu tātou i te peresideni Russell M. Nelson ’ei 17ra’a o te Peresideni o te ’Ēkālesia a Iesu Mesia i te Feiā Mo’a i te Mau Mahana Hōpe’a Nei. Nō tō’u ha’amaita’ira’a ’ia ’ohipa i pīha’i iho iāna i te mau mahana ato’a, ’ua fāri’i au i te ha’apāpūra’a a te Vārua ē, nā te Atua i pi’i i te peresideni Nelson nō te fa’atere i te ’Ēkālesia mau a te Fatu.

’Ua ’ite ato’a vau ē, ’ua pi’i te Fatu ia Elder Gerrit W. Gong ’e ia Elder Ulisses Soares ’ia tāvini ’ei melo nō te pupu nō te Tino ’Ahuru Ma Piti ’āpōsetolo. ’Ua here au ’e tē pāturu nei au ia rātou. Nā roto i tā rāua tāvinira’a, e ha’amaita’i rāua i te mau orara’a ’ati a’e te ao nei ’e i roto i terā u’i ’e terā u’i.

E ’āmuira’a teie e vai i roto i te pāpa’a parau nō te tahi ato’a tumu. ’Ua fa’aara te peresideni Nelson i te hō’ē ta’ahira’a fa’auruhia i roto i te fa’anahonahora’a a te Fatu nō tāna ’Ēkālesia. Tei roto i te reira fa’anahonahora’a te hō’ē fa’anahora’a nā te mau pupu autahu’ara’a i roto i te mau pāroita ’e te mau titi, ’ia ti’a ho’i ia tātou ’ia rave fa’aoti maita’i a’e i tā tātou mau hōpoi’a autahu’ara’a. E tū’atira’a tō teie mau hōpoi’a pā’āto’a i ni’a i te parau nō tā tātou aupurura’a autahu’ara’a i te mau tamari’i a tō tātou Metua.

I te roara’a o te tau, ’ua ’itehia e rave rahi huru fa’anahora’a a te Fatu nō tōna feiā mo’a nō te hōro’a i te aupurura’a here. I te anotau nō Nāvū, ’ua hina’aro te peropheta Iosepha Semita i te hō’ē fa’anahora’a nō te aupuru i te rahira’a ta’ata veve fa’afāriuhia i mani’i mai i roto i te ’oire. E maha o tō’u nau metua pa’ari tei rotopū ia rātou—’o Eyring mā, ’o Bennion mā, ’o Romney mā, ’e ’o Smith mā. ’Ua fa’anaho te peropheta i te aupurura’a o taua feiā mo’a ra nā roto i te tā’oti’ara’a i te fenua. I Illinois, ’ua parauhia taua mau tā’oti’ara’a ra « te mau tuha’a ’oire ».

’A tere ai te feiā mo’a nā te mau fenua pāpū, ’ua fa’anahohia « te mau pupu » ’ei rāve’a aupurura’a nā rātou i te tahi ’e te tahi. Hō’ē o tō’u mau metua pa’ari i te pae o tō’u metua tāne tē ho’i mai ra nā tāna misiōni i te vāhi e parauhia nei i teienei ’o Oklahoma, fārerei atura ’oia i te hō’ē pupu i ni’a i te purūmu. ’Ua paruparu roa ’oia nō te mea ’ua ro’ohia ’oia ’e tōna hoa ’orometua i te ma’i ’e ’ua tārava noa rāua i ni’a i te tua i roto i te hō’ē pere’o’o na’ina’i.

’Ua tono atu te ra’atira o te pupu e piti nā tamāhine nō te tauturu i te ta’ata i roto i te reira pere’o’o ’ati. Hō’ē o rāua, hō’ē tuahine taure’are’a tei fa’afāriuhia mai i Herevetia, ’ua hi’opo’a ’oia i te hō’ē o nā misiōnare ’e ’ua tupu te aroha i roto iāna. ’Ua fa’aorahia ’oia nā taua pupu feiā mo’a ra. ’Ua maita’i ri’i mai ’oia nō te haere nō te toe’a o te purūmu ’e tae atu ai i te peho nō Roto Miti ’e tōna ta’ata fa’aora i pīha’i iho iāna. ’Ua tupu te here i roto ia rāua ’e ’ua fa’aipoipohia rāua. ’Ua riro mai ’oia ’ei metua tāne tupuna pa’ari nō’u, ’o Henry Eyring, ’e te vahine, ’o tō’u ïa metua vahine tupuna pa’ari ’o Maria Bommeli Eyring.

E rave rahi matahiti i muri mai, ’a paraparau ai te ta’ata nō ni’a i te fifi rahi ’ia rātere nā roto i te ’ā’anora’a o te hō’ē fenua, ’ua parau ’oia : « E ’ere, e ’ere i te mea ’eta’eta. ’A haere noa ai māua, i te roara’a o te tere, ’ua paraparau noa māua nō ni’a i te temeio o tō māua to’opiti ’itera’a i te ’evanelia mau a Iesu Mesia. ’Ua riro te reira ’ei taime ’oa’oa roa a’e tā’u e nehenehe e ha’amana’o ».

Mai taua taime ra, ’ua fa’a’ohipa te Fatu i te mau rāve’a rau nō te tauturu i tōna feiā mo’a ’ia aupuru te tahi i te tahi. I teienei, ’ua ha’amaita’i ’oia ia tātou i te mau pupu autahu’ara’a pūai ’e te tāhō’ē i roto i te pāroita ’e te titi—te mau pupu autahu’ara’a e ha’a nei ’e te mau pupu tauturu ato’a o te pāroita.

E piti mea i tītauhia i te mau tuha’a ’oire, te mau pupu, ’e te mau pupu autahu’ara’a pūai, nō te manuia i roto i te hina’aro o te Fatu ’ia aupuru i tōna feiā mo’a i te tahi ’e te tahi mai te au i tāna aupurura’a ia rātou. E manuia rātou ’ia ’ite ana’e te feiā mo’a i te here o te Mesia nō te tahi ’e te tahi, hau atu i tō rātou iho maita’i. Tē parau ra te mau pāpa’ira’a mo’a i te reira ē : « Te aroha… te hina’aro mau ïa i te Mesia » (Moroni 7:47). ’E e manuia rātou ’ia arata’i ana’e te Vārua Maita’i i te ta’ata aupuru ’ia ’ite i te mea tā te Fatu i ’ite e mea maita’i a’e nō te ta’ata tāna e tāmata ra i te tauturu.

I terā ’e terā taime i roto i te mau hepetoma i ma’iri a’enei, ’ua ha’a te mau melo o te ’Ēkālesia i mua iā’u mai te huru ra ē, ’ua ’ite a’ena rātou i te mea tā te Fatu e rave, mai tei fa’aarahia i teie mahana. E hōro’a atu vau e piti hi’ora’a. ’A tahi, hō’ē a’ora’a ’ōhie i roto i te purera’a ’ōro’a nā te hō’ē ha’api’i 14 matahiti nō te autahu’ara’a a Aarona tei māramarama ē, e aha tā te mau taea’e nō te autahu’ara’a e nehenehe e rave i roto i tā rātou tāvinira’a i te Fatu. ’A piti, hō’ē taea’e nō te autahu’ara’a a Melehizedeka tei fa’auruhia, nā roto i te here o te Mesia, ’ia tāvini i te hō’ē ’utuāfare.

’A tahi, e hōro’a atu vau ia ’outou i te mau parau a te tamaiti i te paraparaura’a ’oia i roto i te purera’a ’ōro’a a te hō’ē pāroita. Tei reira vau. ’A tāmata i te ha’amana’o e aha tō ’outou huru i te 14ra’a o tō ’outou matahiti, ’e ’a fa’aro’o iāna ’ia parau i te mau mea hau atu i tā te hō’ē tamaiti ’āpī e nehenehe e ’ite.

« ’Ua ’oa’oa mau vau i te rirora’a ’ei melo nō te pupu ha’api’i i roto i tā tātou pāroita mai te taime ’a ti’a ai tō’u matahiti i te 14 i te matahiti i ma’iri a’enei. E tāpe’a noa ā te ha’api’i i te mau hōpoi’a ato’a a te hō’ē diakono ’e te tahi atu mau hōpoi’a ’āpī.

« E ha’api’i te tahi pae o mātou, e riro mai te tahi atu pae ’ei ha’api’i i te hō’ē mahana, ’e e ha’amaita’i te autahu’ara’a i te mau ta’ata ato’a i roto i te ’Ēkālesia, nō reira, e mea faufa’a nō tātou pā’āto’a ’ia rahi atu te ’ite i te mau ’ohipa a te hō’ē ha’api’i.

« ’A tahi roa, tē parau nei Te Parau Ha’api’ira’a ’e te mau Parau Fafau 20:53 ē : ‘’O te ’ohipa a te ha’api’i ’o tē tia’i ïa i te ’Ēkālesia i te mau taime ato’a, ’e ’ia vai noa i pīha’i iho ia rātou ’e ’ia fa’aitoito ia rātou ra.’

« I muri iho, tē parau nei Te Parau Ha’api’ira’a ’e te mau Parau Fafau 20:54-55 ē :

« ’E ’ia hi’o noa ’ia ’ore te ’ino ’ia ō mai i roto i te ’Ēkalesia, ’eiaha ato’a te ’ā’au ’eta’eta te tahi i te tahi, ’eiaha ato’a te ha’avare, te ’ōhumu, ’e aore rā te paraura’a i te parau ’ino ;

« ’E ’ia hi’o ato’a ’ia ha’aputuputu pinepine tō te ’Ēkalesia i te vahi hō’ē, ’e ’ia hi’o ato’a i te mau melo ato’a ’ia rave rātou i tā rātou mau ’ohipa’ ».

’Ua parau ā teie tamaiti :

« Tē parau mai nei te Fatu ia tātou e hōpoi’a nā tātou ’eiaha i te aupuru noa i te ’Ēkālesia, e aupuru ato’a rā i te ta’ata i roto i te ’Ēkālesia mai tā te Mesia e hina’aro, nō te mea nāna ho’i teie ’Ēkālesia. Mai te mea ē, tē tāmata nei tātou i te ha’apa’o i te mau fa’auera’a, ’ei marū te tahi i ni’a ite tahi, ’ei ha’avare ’ore, ’ei mau hoa maita’i, ’e ’ia ’oa’oa i te ’amui-tahi-ra’a, ’ei reira e ti’a ai ia tātou ’ia fāri’i i te Vārua i roto ia tātou ’e ’ia ’ite e aha tā te Metua i te Ao ra e hina’aro ’ia rave tātou. ’Ia ’ore rā, e ’ore ïa e ti’a ia tātou ’ia rave fa’aoti i tō tātou pi’ira’a ».

Nā ’ō fa’ahou atu ra ’oia :

« ’Ia fa’aoti ana’e te hō’ē ha’api’i e fa’a’ite i te hi’ora’a ti’a nā roto i te rirora’a ’ei taea’e hāhaere maita’i, te arohara’a i te mau melo i te fare purera’a, te fa’aineinera’a i te ’ōro’a mo’a, te tauturura’a i te fare, ’e te rirora’a ’ei fa’atupu hau, tē mā’iti ra ’oia ’ia fa’atura i tōna autahu’ara’a ’e’ ’ia rave fa’aoti i tōna pi’ira’a.

« Te rirora’a ’ei ha’api’i maita’i, e ’ere ïa te ha’apa’o-noa-ra’a i te fare purera’a ’e ’aore rā, i te mau fa’a’oa’oara’a a te ’Ēkālesia. ’Ua a’o mai te ’apōsetolo Paulo ē : ‘’Ei ha’apa’ora’a rā ’oe nā tei fa’aro’o ra, i te parau, i te haere’a, i te aroha, i te huru o te ’ā’au, i te fa’aro’o, i te vi’ivi’i ’ore’. (1 Timoteo 4:12). »

I muri iho nā ’ō a’era te tamaiti ē :

« Ta’a ’ē noa atu te vāhi tei reira tātou ’e ’aore rā, ta’a ’ē noa atu te ’ohipa tā tātou e rave, e nehenehe tātou e riro ’ei hi’ora’a maita’i nō te parau ti’a i te mau taime ato’a ’e i te mau vāhi ato’a.

« Tē hāhaere nei māua tō’u pāpā ia Brown mā.¹ I te mau taime ato’a e haere māua i reira, e mea au roa nā’u ’ia fārerei ia rātou ’e ’ia mātau maita’i ia rātou. Hō’ē mea au roa nā’u i’ō Brown mā maori rā, ’ia haere ana’e māua i reira, e hina’aro mau tō rātou ’ia fa’aro’o, ’e e ’ā’amu maita’i noa tā rātou nō te fa’a’ite mai.

« ’Ia matau maita’i ana’e tātou i te ta’ata i roto i te pāroita maoti te hāhaerera’a, e fa’a’ōhie te reira i te ravera’a i te ’ohipa i muri iho a te hō’ē ha’api’i, ’oia ho’i, te arohara’a ïa i te mau melo i te fare purera’a. Te tauturura’a i te ta’ata ’ia ’ite ē, tē fāri’ihia ra ’e tē ’āmuihia ra rātou i te fare purera’a, e tauturu te reira i te mau melo ato’a o te pāroita ’ia ’ite i te aroha, ’e e fa’aineine ho’i ia rātou nō te rave i te ’ōro’a mo’a.

« ’Ia oti te arohara’a i te mau melo ’o tē haere mai i te purera’a, e tauturu te mau ha’api’i i te mau sābati ato’a i te fa’aineinera’a i te ’ōro’a mo’a. E mea ’oa’oa roa nā’u ’ia ’ōpere ’e ’ia fa’aineine i te ’ōro’a mo’a i roto i teie pāroita nō te mea, e mea fa’atura roa te mau ta’ata ato’a. E fari’i tāmau noa vau i te Vārua ’ia fa’aineine ’e ’ia ’ōpere ana’e au i te ’ōro’a mo’a. E ha’amaita’ira’a rahi mau nō’u ’ia ti’a iā’u ’ia rave i te reira i te mau sābati ato’a.

« Te tahi mau tāvinira’a mai te ’ōperera’a i te ’ōro’a mo’a, ’o te hō’ē ïa ’ohipa e ’itehia e te mata ta’ata, ’e e ha’amāuruuru rātou ia mātou nō te ravera’a i te reira, te tahi atu rā mau tāvinira’a, mai te fa’aineinera’a i te ’ōro’a mo’a, e ravehia te reira ma te ’ite-’ore-hia e te ta’ata. E ’ere i te mea faufa’a mai te mea ē, e ’ite mai te ta’ata ia mātou ’ia tāvini ; te mea faufa’a maori rā, ’ua ’ite te Fatu ’ua tāvini mātou iāna.

« ’Ei ha’api’i, e tāmata noa mātou i te ha’apūai i te ’Ēkālesia, tō mātou mau hoa, ’e tō mātou ’utuāfare nā roto i te fa’aotira’a i tā mātou mau hōpoi’a autahu’ara’a. E ’ere i te mea ’ōhie i te mau taime ato’a, terā rā, e’ita te Fatu e tu’u mai i te mau fa’auera’a ia tātou ’maori rā e fa’aineine ’oia i te hō’ē rāve’a nō [tātou e ti’a ai ia tātou] i te rave i te mea tāna i fa’aue mai’ (1 Nephi 3:7) ».

’A ’ōpani ai taua tamaiti ra, ’ua tāmau noa vau i te māere i tōna pa’ari. ’Ua nā ’ō ’oia i te ha’apoto : « ’Ua ’ite au ē, e maita’i atu ā tātou mai te mea ē, e fa’aoti tātou ’ia pe’e ia [Iesu Mesia] ».

Te tahi atu ’ā’amu nō te tāvinira’a autahu’ara’a, ’ua fa’ati’ahia ïa hō’ē ’āva’e i ma’iri a’enei i roto i te hō’ē purera’a ’ōro’a nā te hō’ē pāroita. Fa’ahou ā, tei reira vau. I terā taime, ’a paraparau ai ’oia, ’aita teie taea’e ’aravihi tei mau i te autahu’ara’a i ’ite ē, tē fa’ata’a pāpū ra ’oia i te mea tā te Fatu e hina’aro nei ’ia tupu i roto i te mau pupu autahu’ara’a ha’apūaihia. Teie te tuha’a faufa’a o tāna ’ā’amu :

’Ua fa’ata’ahia nāna ’e tōna hoa hāhaere ’ia tāvini e hitu ’utuāfare. Fātata rātou pā’āto’a ’aita i hina’aro ’ia hāhaerehia rātou. ’Ia haere atu te mau taea’e hāhaere i tō rātou nohora’a, ’aita rātou e pāhono mai i te ’ōpani. ’Ia niuniu atu nā taea’e hāhaere, ’aita e ta’ata e pāhono mai. ’Ia vaiiho rāua i te hō’ē poro’i, ’aita te niuniu e pāhonohia mai. I te pae hope’a ’ua fa’a’ohipa teie taea’e hāhaere pa’ari i te rata. ’Ua ha’amata ato’a ’oia i te fa’a’ohipa i te vehi rata re’are’a ma te ti’aturi ē, e fāri’i ’oia i te hō’ē pāhonora’a.

Hō’ē o nā ’utuāfare e hitu, e tuahine paruparu ïa i te pae o te ’Ēkālesia, nō Europa mai ’oia. E piti tāna nā tamari’i ’āpī.

I muri a’e e rave rahi taime i te tāmatara’a i te fārerei iāna, ’ua fāri’i ’oia i te hō’ē poro’i niuniu. ’Ua fa’a’ite tā’ue mai te vahine iāna ē, ’aita tōna e taime nō te fārerei i te mau taea’e hāhaere. E piti tāna ’ohipa ’e tei roto ato’a ’oia i te nu’u fa’ehau. Tāna ’ohipa mātāmua e muto’i ïa, e tāna tōro’a e tītau ra, ’o te rirora’a ïa ’ei muto’i huna i reira e ho’i atu ai i tōna fenua ’ā’ia nō te rave tāmau i tāna ’ohipa.

’Aita roa atu i ti’a i te taea’e hāhaere ’utuāfare ’ia fārerei iāna i roto i tōna fare. ’A taime ra, ’ua hāpono ’oia i te tahi poro’i niuniu. Pauroa te ’āva’e e hāpono ’oia i te hō’ē rata pāpa’i rima, ma te ’apiti ato’a i te tahi mau tāreta pu’e tau fa’afa’aeara’a nō te tamari’i tāta’itahi.

’Aita hō’ē a’e pāhonora’a. ’Ua ’ite rā ’oia ē, ’o vai tōna nā taea’e hāhaere, nāhea ’ia fārerei ia rāua, ’e e tāmau māite rāua i tā rāua tāvinira’a autahu’ara’a.

Ē i te hō’ē mahana ’ua fāri’i ’oia i te hō’ē poro’i niuniu nō roto mai i teie vahine. E hina’aro rū tōna i te tauturu. ’Aita ’oia i ’ite ’o vai te ’episekōpo, ’ua ’ite rā ’oia i tōna nā taea’e hāhaere.

I roto i te tahi tau mahana i muri nei, e tītauhia iāna ’ia fa’aru’e i te fenua Marite nō te hō’ē ha’api’ipi’ira’a nu’u fa’ehau hō’ē ’āva’e te maoro. E’ita tāna e nehenehe e ’āfa’i i tāna mau tamari’i nā muri iho iāna. ’O tōna metua vahine, ’o tei fa’ata’ahia e ha’apa’o i tāna mau tamari’i, nō reva noa atura ïa i Europa nō te ha’apa’o i tāna tāne, tei roto i te hō’ē ma’i rū.

E nava’i te moni a teie tuahine ’ōtahi paruparu i te pae o te ’Ēkālesia nō te ho’o i te hō’ē tīteti nā tāna tamari’i ’āpī a’e nō te haere i Europa, ’eiaha rā nō te tamaiti 12 matahiti, ’o Eric.² ’Ua ani teie tuahine i tōna taea’e hāhaere e nehenehe ānei tāna e ’imi i te hō’ē ’utuāfare maita’i feiā mo’a nō te ha’apa’o ia Eric i’ō rātou nō nā mahana e 30 i muri nei !

’Ua pāhono atu te taea’e hāhaere ē, e ’imi māite ’oia. ’Ua fārerei atura ’oia i tōna mau ti’a fa’atere autahu’ara’a. ’Ua fāri’i te ’episekōpo, ’oia ho’i te tahu’a rahi peresideni, ’ia fārerei ’oia i te mau melo o te ’āpo’ora’a pāroita, ’e tae noa atu i te peresideni o te Sōtaiete Tauturu.

’Ua ’ite-’oi’oi-hia i te peresideni Sōtaiete Tauturu e maha ’utuāfare maita’i feiā mo’a, e tamari’i tā rātou i te fāito matahiti o Eric, ’o tē nehenehe e rave iāna i roto i tō rātou fare nō te hō’ē hepetoma te maoro, hō’ē ’utuāfare i te taime hō’ē. I te ’āva’e i muri iho, ’ua fa’a’amu teie mau ’utuāfare ia Eric, ’ua fa’anaho i te hō’ē piha nōna i roto i tō rātou nohora’a tei apiapi a’ena, ’e ’aore rā, i roto i tō rātou fare tei apiapi a’ena, ’ua ’āfa’i ato’a iāna i roto i tā rātou mau fa’a’oa’oara’a ’utuāfare nō te pu’e tau māhanahana i fa’anaho-a’ena-hia na, ’ua ’āfa’i iāna i te purera’a, ’ua ’āmui atu iāna i roto i tō rātou mau purera’a pō ’utuāfare, ’e tē vai atu ra.

’Ua fa’aō mai te mau ’utuāfare e tamāroa tā rātou mai ia Eric, i roto i te mau rurura’a pupu diakono ’e te mau fa’a’oa’oara’a. I roto i te roara’a o nā mahana e 30, ’ua tae ’o Eric i te purera’a i te mau sābati ato’a nō te taime mātāmua o tōna orara’a.

’Ia ho’i mai tōna metua vahine nā tāna ha’api’ipi’ira’a, ’ua tāmau noa Eric i te haere i te purera’a, nā muri iho i te hō’ē o teie nā ’utuāfare melo e maha ’e ’aore rā, te tahi atu tei fa’ahoa ato’a iāna, tae roa atu i te mau tuahine hāhaere o tōna metua vahine. I muri a’e, ’ua fa’atōro’ahia ’oia ’ei diakono ’e ’ua ha’amata i te ’ōpere tāmau i te ’ōro’a mo’a.

I teienei e hi’o tātou i te ananahi o Eric. E’ita tātou e māere mai te mea ē, e riro mai ’oia ’ei ti’a fa’atere i roto i te ’Ēkālesia i te fenua ’ā’ia o tōna metua vahine ’ia ho’i ana’e tōna ’utuāfare i reira—nō te mea ’ua ha’a ’āmui te feiā mo’a ma te tāhō’ē nō te tāvini i raro a’e i te fa’aterera’a a te ’episekōpo, nō te tāvini ma te aroha i tō rātou ’ā’au ’e nā roto i te mana o te Vārua Maita’i.

’Ua ’ite tātou ē, e mea faufa’a te aroha nō tātou ’ia fa’aorahia tātou i roto i te bāsileia o te Atua. ’Ua pāpa’i Moroni ē, « ’Aore o ’outou e aroha, e ’ore roa ’outou e ora i roto i te bāsileia o te Atua ra » (Moroni 10:21 ; hi’o ato’a Etera 12:34).

’Ua ’ite ato’a tātou ē, te aroha, e hōro’a ïa ’o te hōro’ahia mai ia tātou i muri a’e i tō tātou ravera’a i te mau mea ato’a e ti’a ia tātou ’ia rave. Tītauhia ia tātou ’ia « pure atu i te Metua ma te pūai hope o te ’ā’au ia ’ī [tatou] i teie aroha, ’o tāna i hō mai i te ta’ata ato’a e pe’e mai i tāna Tamaiti, ia Iesu Mesia » (Moroni 7:48).

Mai te mea ra iā’u ē, e fāri’i maita’i a’e tātou i te Vārua Maita’i mai te mea ē, e rōtahi tātou i ni’a i te tāvinira’a ia vetahi ’ē. Nō reira tātou i fāri’i ai i te hōpoi’a autahu’ara’a ’ia tāvini nō te Fa’aora. ’A rave ai tātou i te ’ohipa tāvinira’a ia vetahi ’ē, e iti tātou i te feruri ia tātou iho, e ’ōhie atu te Vārua Maita’i i te haere mai ia tātou ra ’e’ ia tauturu ia tātou i roto i tā tātou tītaura’a roa ’ia fāri’i i te hōro’a o te aroha.

Te fa’a’ite atu nei au i tō’u ’itera’a ē, ’ua ha’amata a’ena te Fatu i te hō’ē ta’ahira’a rahi i mua i roto i tāna fa’anahora’a nō tātou ’ia rahi atu te fa’aurura’a ’e te aroha i roto i tā tātou ’ohipa aupurura’a autahu’ara’a. Tē māuruuru nei au nō tōna here, tāna e hōro’a nei ia tātou ma te ’ā’au tae mau. Tē fa’a’ite pāpū nei au i te reira i te i’oa mo’a o Iesu Mesia, ’āmene.