Ol Fas Toktok
I Kam long Elda Russell M. Nelson
Mifala i stap anaonsem wan bigfala jenis long Melkesedek Prishud kworom blong yumi blong save mekem wok blong Lod i wok gud moa.
Tangkyu Brata Holmes from impoten mesej blong yu.
Ol dia brata. Yumi misim Presiden Thomas S. Monson mo Elda Robert D. Hales. Yet, yumi evriwan i “gohed long wok blong Lod.”1
Mi mi talem tangkyu tumas blong wanwan man we i kasem tabu prishud. Yufala i hop blong Ridima blong yumi we i wantem se “evri man i save toktok long nem blong God Lod, we i Sevya blong wol.”2 Hem i wantem evriwan long ol boe blong Hem we oli odenem blong oli ripresentem Hem, blong oli toktok blong Hem, blong mekem samting blong Hem, mo blesem laef blong ol pikinini blong God raon long wol blong mekem se “fet i kam antap long ful wol ia.”3
Sam long yufala i givim seves long ples we Jos i stanap long hem blong plante jeneresen. Ol narawan, oli givim seves long ples we Jos i niu. Long sam, ol wod blong yufala i bigwan. Long sam narawan moa, ol branj blong yufala oli smol be ol ples oli longlongwe. Nomata long wanwan situesen blong yufala, wanwan long yufala i wan memba blong prishud kworom wetem tabu wok blong lanem samting mo tij, blong lavem mo givim seves long ol narawan.
Tunaet, mifala i stap anaonsem wan bigfala jenis long Melkesedek Prishud kworom blong yumi blong save mekem wok blong Lod i wok gud moa. Long wanwan wod, ol hae pris mo ol elda, naoia bambae oli kombaen long wan kworom blong ol elda. Jenis ia bambae i leftemap fasin mo paoa blong man we oli holem prishud blong givim seves long ol narawan. Ol fiuja elda bambae oli welkam i kam, mo kworom ia i felosipim olgeta. Long wanwan stek, stek presidensi bambae i gohed blong prisaed ova long stek kworom blong ol hae pris. Huia i stap insaed long kworom ia, bae i folem ol prishud koling blong naoia, olsem we bae mi eksplenem afta.
Elda D. Todd Christofferson mo Elda Ronald A. Rasband blong Kworom blong Olgeta Twelef Aposol bambae oli tijim yumi moa naoia, abaot olgeta bigfala impoten jenis ia.
Ol jenis ia, oli bin stadi long olgeta blong plante manis. Mifala i bin filim se i gat bigfala nid naoia blong kam antap long wei we yumi stap kea long ol memba blong yumi mo ripotem kontak blong yumi. Blong mekem gud hemia, yumi nidim blong mekem ol prishud kworom blong yumi oli kam strong moa, blong givim moa daereksen long wok blong givhan wetem lav mo sapot we Lod i wantem blong olgeta Sent blong Hem.
Ol jenis ia, oli kam tru long insperesen blong Lod. Taem yumi stap yusum i go, bambae yumi wok gud moa bitim bifo.
Yumi joen long wok blong God we I Gat Olgeta Paoa. !Jisas Hem I Kraes! !Yumi, yumi ol wokman blong Hem we tingting blong yumi i stap daon! God i blesem yufala ol brata, taem yumi stap lanem mo mekem diuti blong yumi, mi prea long nem blong Jisas Kraes, amen.