Mau parau ’ōmuara’a

Māuruuru e te taea’e Holmes, nō tā ’oe parau poro’i faufa’aroa

E te mau taea’e here, tē mihi roa nei tātou i te peresideni Thomas S. Monson ’e ia Elder Robert D. Hales. Terā rā, e « tāmau noa tātou i roto i te ’ohipa a te Fatu ».¹

E māuruuru rahi tō’u nō te tāne tāta’itahi e mau nei i te autahu’ara’a mo’a. ’O ’outou te tīa’ira’a a tō tātou Fa’aora ’o tē hina’aro nei « ’ia parau te mau ta’ata ato’a nā roto i te i’oa o te Atua te Fatu, ’oia ho’i te Fa’aora o te ao nei ».² Tē hina’aro nei ’oia i tāna mau tamaiti fa’atōro’a-pā’āto’a-hia ’ia riro ’ei mau ti’a nōna, ’ia parau nōna, ’ia ’ohipa nōna, ’e ’ia ha’amaita’i i te orara’a o te mau tamari’i a te Atua ’ati a’e te ao nei, ’ia ti’a ho’i i « te fa’aro’o ’ia rahi ato’a i te fenua [tā’āto’a] ».³

Tē tāvini nei te tahi pae ’o ’outou nā te mau vāhi ’ua ha’amauhia te ’Ēkālesia e rave rahi u’i i teienei. Te tahi pae rā, tē tāvini nei ïa i te mau vāhi e mea ’āpī roa te ’Ēkālesia. Nō te tahi pae o ’outou, e mea rarahi tā ’outou mau pāroita. Nō te tahi pae, e mea na’ina’i tā ’outou mau āma’a, ’e tei te mau vāhi ātea. Noa atu te huru o tō tātou orara’a, e melo ’outou tāta’itahi nō te hō’ē pupu autahu’ara’a ma te fa’auera’a hanahana ’ia ha’api’i mai ’e ’ia ha’api’i atu, ’ia here ’e ’ia tāvini ia vetahi ’ē.

I teie pō tē fa’aara atu nei mātou i te hō’ē fa’anaho-fa’ahou-ra’a o tā tātou mau pupu autahu’ara’a a Melehizedeka nō te fa’aoti maita’i atu ā i te ’ohipa a te Fatu. I roto i te pāroita tāta’itahi, e ’āmuihia te mau tahu’a rahi ’e te mau peresibutero i roto hō’ē pupu peresibutero. E ha’amaita’i rahi roa teie fa’atanora’a i te ti’ara’a ’e te ’aravihi o te mau tāne e mau nei i te autahu’ara’a ’ia tāvini ia vetahi ’ē. E fāri’i-poupou-hia ’e e fa’ahoahia te mau ta’ata e au ’ei peresibutero i roto i teie pupu. I roto i te titi tāta’itahi, e tāmau noa te peresidenira’a titi i te fa’atere i te pupu tahu’a rahi o te titi. Terā rā, e ha’amauhia te fa’anahora’a o te reira pupu i ni’a i te mau pi’ira’a autahu’ara’a i teie taime, ’o te ha’amāramaramahia atu araua’e.

I teienei, e ha’api’i mai Elder D. Todd Christofferson ’e ’o Elder Ronald A. Rasband nō te pupu nō te Tino ’Ahuru Ma Piti ’āpōsetolo, ia tātou nō ni’a i teie mau fa’atanora’a faufa’a roa.

E rave rahi ’āva’e te tuatāpapara’ahia teie mau tāuiuira’a. ’Ua fāri’i mātou i te hina’aro rū ’ia ha’amaita’i i te huru nō tā tātou aupurura’a i tō tātou mau melo ’e te hōro’ara’a i te parau fa’a’ite nō tā tātou mau fārereira’a ia rātou. Nō te rave maita’i a’e i te reira, tītauhia ia tātou ’ia ha’apūai i tā tātou mau pupu autahu’ara’a nō te fa’atere maita’i a’e i te aupurura’a here ’e te pāturu tā te Fatu i ’ōpua nei nō tōna feiā mo’a.

Nā te Fatu i fa’auru mai i teie mau fa’atanora’a. Mai te mea e fa’a’ohipa tātou i te reira, e maita’i atu ā tā tātou ’ohipa i tei muta’a ra.

Tei roto tātou i te ’ohipa a te Atua Mana hope. ’O Iesu te Mesia ! E tāvini ha’eha’a tātou nāna. ’Ia ha’amaita’i mai te Atua ia ’outou e te mau taea’e, ’a ha’api’i ai ’e ’a rave ai tātou i tā tātou ’ohipa, ’o tā’u ïa pure, nā roto i te i’oa o Iesu Mesia, ’āmene.