Ol Haelaet blong Namba 188 Yia Jeneral Konfrens

Taem yumi bin stanap mo sastenem wan niu profet mo Presiden, i no gat man i no bin kaontem mo raetemdaon han we yumi bin leftemap; oli bin raetemdaon long heven, olsem wan kavenan blong yumi wetem God.

Truaot long konfrens, yumi bin luk pruf se hemia i Jos blong Sevya, we Hem nao i stap lidim tru long ol wokman blong Hem. Yumi witnesem posisen we wan profet we i stap laef i stap long hem wetem wanwan long yumi—hem i no stanap bitwin yumi mo Sevya, be hem i stanap long saed blong yumi mo i stap poenem rod we i go long Sevya. Yumi bin gat eksperiens ia blong gat janis blong kasem “wan witnes blong yumiwan se koling blong Presiden Nelson i kam long God,” mo blong mekem “sol blong yumi i hang strong long Lod Jisas Kraes taem yumi lisin long olgeta we Hem i sendem olgeta oli kam” (luk long Elda Neil L. Andersen long pej 26).

Yumi bin sastenem Presiden Nelson, be tu, yumi bin sastenem moa long 70 niu lida.

Nomata we ol profet oli bin lukaot long wok blong hemia, ol jenis ia we oli bin anaonsem long taem blong konfrens, oli “ol eksampol blong revelesen we i kam long God we i bin lidim Jos ia stat long stat finis,” Elda Jeffrey R. Holland i bin talem (luk long pej 101).

Blong poenem gud “mesej blong mifala i go long wol,” we “mifala i stap invaetem evriwan long ol pikinini blong God long tugeta saed blong vel blong kam long Sevya blong olgeta, kasem ol blesing blong tabu tempol, stap glad oltaem, mo kwalifae from laef we i no save finis,” Presiden Nelson i anaonsem seven niufala tempol.