Elda Carl B. Cook

Elda Carl B. Cook i bilivim se spesel janis ia blong givim seves, i wan long ol hae blesing blong membasip insaed long Jos blong Jisas Kraes blong Ol Lata-dei Sent. Be, hem i luksave mo talem se blong akseptem mo wok strong long ol koling, i nidim fet.

Elda Cook, we oli sastenem hem olsem wan memba blong Presidensi blong Olgeta Seventi long 31 Maj 2018, i talem se ol memba blong Jos—we oli givim seves tugeta insaed long ol branj mo wod, ol kworom, mo ol okseleri—oli olsem wan gia wetem plante pat long wan trak, we i givim moa paoa.

Wan gia wetem plante pat, wetem fowil draev we i go wetem, “i letem yu blong putum long gia, gat moa paoa, mo muv,” hem i talem long Oktoba 2016 jeneral konfrens. “Semmak olsem we ol gia oli joen wan blong givim moa bigfala paoa insaed long trak, yumi tu, yumi gat moa paoa taem yumi joen tugeta. Taem yumi joen wan blong givim seves long wanwan long yumi, yumi mekem plante moa tugeta bitim we yumi save mekem yumiwan. Hem i gud tumas blong joen mo kam wan taem yumi givim seves mo help long wok blong Lod.”

Elda Cook, oli bin sastenem hem olsem wan Jeneral Atoriti Seventi long 2 Epril 2011. Bifo long niufala wok blong hem, Elda Cook i bin stap givim seves long Jos hedkwota, we hem i bin stap help blong lukaotem Not Amerika Wes Eria, wetem sam moa responsabiliti. Bifo long hemia, hem i bin stap olsem Presiden blong Afrika Saot Is Eria.

Elda Cook i bin leftemap tingting blong ol Ol Lata-dei Sent blong tingbaot se ol koling insaed long Jos oli kam long God tru long ol wokman blong Hem we Hem i bin jusum olgeta.

“Ol blesing oli kam taem yumi gogohed long ol koling mo responsabiliti blong yumi, mo taem yumi hang i stap wetem evri fet we yumi gat.”

Elda Cook i kasem digri blong hem long Weber Stet Kolej long Yuta, mo i gat wan masta blong bisnis administresen blong Yuta Stet Yunivesiti. Bifo we oli singaotem hem olsem wan Seventi, hem i bin wok long bisnis blong developem graon.

Ol koling blong Elda Cook, i blong stap olsem fultaem misinari long Hambeg, Jemani, mo olsem wan bisop, stek presiden, Eria Seventi, mo presiden blong Niu Silan Oklan Misin.

Hem i bin bon long Ogden, Yuta, YSA, long 15 Oktoba 1957. Hem i maredem Lynette Hansen long Disemba 1979. Tufala i papa mo mama blong faef pikinini.