Elder Carlos A. Godoy

I te hope’a o te mau matati 1980, nō ha’amāuruuru-noa-hia Elder Carlos A. Godoy ’ei ’episekōpo. ’Ua noa’a ato’a tāna parau tū’ite i te fare ha’api’ira’a tuatoru ’e tē ’ohipa ra ’oia nō te hō’ē taiete manuia mau, ’e ’ua mana’o ’oia ē, ’aita atu ai te orara’a—ē tae mai nei te tahi hoa tahito.

’Ua ha’apoupou terā hoa iāna, ’ua ui atu rā i te hō’ē uira’a tei fa’aferuri roa iāna : « Mai te mea e nā reira noa ’oe i te ora mai tā ’oe e ora nei, e fāri’i ānei ’oe i te mau ha’amaita’ira’a i fafauhia i roto i tō ’oe ha’amaita’ira’a patereareha ? »

I puta mai nei te mana’o i roto ia Elder Godoy ē, tītauhia iāna ’ia taui i te tahi mea mai te peu ’ua hina’aro ’ōna ’ia fāri’i i te mau ha’amaita’ira’a ato’a i parauhia. Noa atu te orara’a au, ’ua fa’aoti ’oia e tītau i te hō’ē parau tū’ite Master. ’Ua fa’aru’e ’oia i tāna ’ohipa, ’ua ho’o i te tā’āto’ara’a o tāna mau mea, ’e, ma tōna ’utuāfare, ’ua fa’aru’e ’oia i te orara’a au i Beresiria nō te haere i te ha’api’ira’a i te Fenua Marite.

’Ua parau Elder Godoy, tei pi’ihia i roto i te peresidenira’a o te Hitu ’Ahuru i te 31 nō Māti 2018, ’ua ha’api’i rahi mai ’oia i roto i teie ’ohipa ’ia ti’aturi i te ’ōpuara’a a te Fatu ’e ’ia ineine nō te fa’aru’e i te vāhi orara’a au.

« ’Ua ’ite au ē e fa’anahora’a tā te Fatu nō tātou i roto i teie orara’a », ’o tāna ïa i fa’a’ite pāpū atu i roto i te ’āmuira’a rahi nō ’Ātopa 2014. « ’Ua ’ite maita’i ’oia ia tātou. Ua ite Oia e aha te mea maitai a’e no tatou. E ’ere nō te mea tē tere maitai ra te mau ’ohipa, e’ita tā tātou e nehenehe i terā ’e terā taime e feruri ē, tē vai ra ānei te tahi atu mau ’ohipa maita’i a’e. »

’Ua pāturuhia Elder Godoy ’ei Hitu ’Ahuru Hui mana fa’atere rahi i te 5 nō ’Ēperēra 2008. Tē tāvini nei ’oia ’ei peresideni nō te ārea nō Amerika Apato’a, te pae Apato’a Tō’o’a o te rā ’e e pārahi atu ’oia i roto i te peresidenira’a o te Hitu ’Ahuru i te 1 nō ’Ātete 2018.

Hou tāna pi’ira’a ’ei Hitu ’Ahuru, ’ua ’ohipa Elder Godoy ’ei fa’atere nō te mau rave ’ohipa i roto e piti taiete rahi hou ’a ha’amau ai i tāna iho taiete ’ohipa tauturu a’o. ’Ua noa’a tāna parau tū’ite Licence nō te fa’arava’ira’a faufa’a ’e ’ihi poritita i te fare ha’api’ira’a São Paulo Pontifical Catholic University i te matahiti 1987 ’e ’ua noa’a tāna parau tū’ite Master nō te peu fa’anahonahora’a i Brigham Young University i te matahiti 1994.

’Ua tāvini Elder Godoy ’ei misiōnare rave tāmau i roto i te misiōni nō Brazil São Paulo South, ’ei ’episekōpo, ’ei melo ’āpo’ora’a teitei, ’ei ti’a Retioni nō te ’ohipa totauturu, ’ei Hitu ’Ahuru ārea ’e ’ei peresideni nō te misiōni nō Brazil Belém.

’Ua fānauhia ’oia i Porto Alegre (Beresiria), i te 4 nō Fepuare 1961. ’Ua fa’aipoipo ’oia ia Mônica Soares Brandao i te ’āva’e Māti 1984, ’e e maha tamari’i tā rāua.